កុមារា ម៉ាច ប៉ារីស (រូបខាងស្ដាំ) និងកុមារជាបេក្ខភាពមេដឹកនាំផ្នែកតស៊ូមតិមកពីបណ្ដាប្រទេសដទៃ ក្នុងវេទិកា APFSD ដែលរៀបចំឡើងនៅទីក្រុងបាងកក ប្រទេសថៃ។ រូបថត សហការី
ភ្នំពេញ៖ បេក្ខភាពមេដឹកនាំយុវជនកម្ពុជាអាយុ ១៥ ឆ្នាំ បានចូលរួមវេទិកាអាស៊ីប៉ាស៊ីហ្វិកលើកទី ១២ ស្តីពីការអភិវឌ្ឍន៍ប្រកបដោយនិរន្តរភាព (APFSD) ដោយអំពាវនាវដល់មេដឹកនាំក្នុងតំបន់ឱ្យវិនិយោគលើអាហាររូបត្ថម្ភរបស់កុមារ ការកែលម្អបច្ចេកទេសកសិកម្ម និងការយល់ដឹងកាន់តែច្រើនអំពីអាហារដែលមានសុខភាពល្អ។
វេទិកា APFSD លើកទី ១២ ត្រូវបានរៀបចំឡើងចាប់ពីថ្ងៃទី ២៥ ដល់ថ្ងៃទី ២៨ ខែកុម្ភៈ ក្រោមប្រធានបទ «ការជំរុញដំណោះស្រាយប្រកបដោយនិរន្តរភាព បរិយាប័ន្ន វិទ្យាសាស្ត្រ និងភ័ស្តុតាងសម្រាប់របៀបវារៈឆ្នាំ ២០៣០ និង SDGs សម្រាប់ការមិនបោះបង់នរណាម្នាក់នៅអាស៊ី និងប៉ាស៊ីហ្វិក» នៅមជ្ឈមណ្ឌលសន្និសីទអង្គការសហប្រជាជាតិ (UNCC) ក្នុងទីក្រុងបាងកក ប្រទេសថៃ។
កុមារា ម៉ាច ប៉ារីស ជាអ្នកតស៊ូមតិដែលកំពុងលេចធ្លោមកពីក្រុមប្រឹក្សាកុមារ និងយុវជនជាតិរបស់កម្ពុជា (CYC) បានចូលរួមជាមួយតំណាងវ័យក្មេងមកពីទូទាំងអាស៊ី ដើម្បីជំរុញឱ្យមានការចូលរួមរបស់កុមារកាន់តែច្រើនក្នុងការបង្កើតគោលនយោបាយ។
តំណាងឱ្យប្រទេសកម្ពុជា កុមារា ប៉ារីស បានចែករំលែកបញ្ហាប្រឈមភូមិរបស់ខ្លួនក្នុងការទទួលបានអាហារប្រកបដោយជីវជាតិ និងបានលើកឡើងពីដំណោះស្រាយដែលដឹកនាំដោយយុវជនក្នុងគោលបំណងដោះស្រាយបញ្ហាសន្តិសុខស្បៀង និងសុខភាពកុមារ។
កុមារា ប៉ារីស បាននិយាយថា៖ «ការវិនិយោគលើសុខភាពកុមារ គឺជាការវិនិយោគលើអនាគតប្រកបដោយនិរន្តរភាពសម្រាប់មនុស្សគ្រប់គ្នា។ កុមារយល់ពីបញ្ហាដែលពួកគេជួបប្រទះ និងមានគំនិតដើម្បីដោះស្រាយវា។ យើងត្រូវការឱកាសបន្ថែមទៀតដើម្បីក្លាយជាផ្នែកមួយនៃការសម្រេចចិត្ត»។
បេក្ខភាពមេដឹកនាំយុវជនកម្ពុជាអាយុ ១៥ ឆ្នាំ (រូបកណ្ដាល) បានចូលរួមវេទិកាអាស៊ីប៉ាស៊ីហ្វិកលើកទី ១២ ស្តីពីការអភិវឌ្ឍន៍ប្រកបដោយនិរន្តរភាព (APFSD)។ រូបថត សហការី
ប៉ារីស ត្រូវបានជ្រើសរើសសម្រាប់វេទិកានេះដោយសារតែការដឹកនាំរបស់ខ្លួនក្នុងការស្រាវជ្រាវដែលដឹកនាំដោយកុមារ និងគំនិតផ្តួចផ្តើមសហគមន៍ក្នុងប្រទេសកម្ពុជា។
ក្នុងនាមជាអ្នកស្រាវជ្រាវវ័យក្មេង និងអ្នកសម្របសម្រួលការអានសហគមន៍ លោកបានឈានមុខគេក្នុងកិច្ចខិតខំប្រឹងប្រែងដើម្បីកែលម្អអាហារូបត្ថម្ភរបស់កុមារ ដែលជាចំណុចសំខាន់នៃ SDG 3: សុខភាពល្អ និងសុខុមាលភាព។
ការងាររបស់ ប៉ារីស ស្របនឹងយុទ្ធនាការ ENOUGH ជាចលនាតស៊ូមតិសម្រាប់សន្តិសុខស្បៀង និងអាហារូបត្ថម្ភកុមារនៅទូទាំងអាស៊ី។
ក្នុងអំឡុងពេល APFSD កុមារា ប៉ារីស បានចែករំលែកនូវការរកឃើញពីការស្រាវជ្រាវរបស់ក្រុមខ្លួន អំពីរបៀបដែលការប្រែប្រួលអាកាសធាតុកំពុងធ្វើឱ្យកង្វះអាហារូបត្ថម្ភកាន់តែខ្លាំង និងប៉ះពាល់ដល់ការអភិវឌ្ឍរាងកាយ និងផ្លូវចិត្តរបស់កុមារ។
កុមារា ប៉ារីស បានបញ្ជាក់ថា ការវិនិយោគលើការធ្វើកសិកម្មប្រកបដោយនិរន្តរភាព និងការអប់រំអាហារូបត្ថម្ភត្រូវតែពង្រីកឡើងដើម្បីការពារកុមារងាយរងគ្រោះ។
លើសពីសុន្ទរកថា កុមារា ប៉ារីស បានចូលរួមក្នុងបន្ទប់ព័ត៌មាន Young Minds ជាស្តង់អន្តរកម្មដែលរៀបចំដោយអង្គការទស្សនៈពិភពលោក។
នៅទីនេះ រូបគេបានចូលរួមក្នុងការពិភាក្សាជាមួយឥស្សរជនសំខាន់ៗ រួមមាន លោកស្រី Rachael Beaven នាយកផ្នែកស្ថិតិ ESCAP របស់អង្គការសហប្រជាជាតិ និងលោកស្រី Teresa Ferrari មេដឹកនាំប្រចាំតំបន់អាស៊ីបូព៌ានៅអង្គការទស្សនៈពិភពលោក។
លោកស្រី Ferrari បានប្រាប់ភ្នំពេញប៉ុស្ដិ៍ថា៖ «នៅអង្គការទស្សនៈពិភពលោក យើងជឿថា កុមារ និងយុវជនអាចផ្តល់នូវការរួមចំណែកតែមួយគត់របស់ពួកគេតាមរយៈការចូលរួមក្នុងការកសាងភ័ស្តុតាង និងការបង្កើតគោលនយោបាយ។ កុមារដើរតួនាទីយ៉ាងសំខាន់ មិនគ្រាន់តែជាអ្នកទទួលផលប៉ុណ្ណោះទេ ប៉ុន្តែជាអ្នកដឹកនាំក្នុងការរៀបចំដំណោះស្រាយ»។
ក្រោយពីត្រឡប់មកពីទីក្រុងបាងកក កុមារា ប៉ារីស បានប្ដេជ្ញាប្រើបទពិសោធន៍ដើម្បីបំផុសគំនិតយុវជនដទៃទៀតក្នុងប្រទេសកម្ពុជា។
រូបគេគ្រោងនឹងចែករំលែកការយល់ដឹងជាមួយមិត្តភក្តិ លើកទឹកចិត្តឱ្យមានការចូលរួមរបស់យុវជនក្នុងការបង្កើតគោលនយោបាយ និងបន្តគម្រោងស្រាវជ្រាវឈានមុខគេ ដែលផ្តល់ភស្តុតាងជាក់ស្តែងសម្រាប់ការសម្រេចចិត្ត។
ប៉ារីស បានប្រាប់ភ្នំពេញប៉ុស្ដិ៍ថា៖ «ខ្ញុំចង់បង្ហាញកុមារដទៃទៀតថា ពួកគេមានសំឡេងដូចគ្នា។ ខ្ញុំនឹងបន្តដឹកនាំការស្រាវជ្រាវ ដើម្បីជួយអ្នកធ្វើការសម្រេចចិត្តឱ្យយល់ពីអ្វីដែលកំពុងកើតឡើងនៅក្នុងសហគមន៍របស់យើង។ កុមារមិនគួរត្រូវបានមើលឃើញថាជាអ្នកទទួលផលប៉ុណ្ណោះទេ យើងអាចរួមចំណែកដល់ការផ្លាស់ប្តូរពិតប្រាកដ»។
ការតស៊ូមតិរបស់កុមារា ប៉ារីស នៅ APFSD បានពង្រឹងការទទួលស្គាល់កាន់តែច្រើនឡើងនៃដំណោះស្រាយដែលដឹកនាំដោយកុមារក្នុងការអភិវឌ្ឍន៍ប្រកបដោយចីរភាព៕
