ភ្នំពេញៈ ក្រសួងសាធារណការ និងដឹកជញ្ជូនបានព្រមានថា នាវាណា ដែលមិនបានចុះបញ្ជីត្រឹមត្រូវស្របតាមច្បាប់ និង លិខិតបទដ្ឋានគតិយុត្តជាធរមាន នឹងត្រូវបានហាមឃាត់ មិនឱ្យធ្វើនាវាចរណ៍ និងប្រតិបត្តិការដឹកជញ្ជូនតាមផ្លូវទឹកនោះឡើយ។

ការព្រមាននេះធ្វើឡើង ក្នុងសេចក្តីជូនដំណឹង ស្តីពី ការបំពេញកាតព្វកិច្ចក្នុងការចុះបញ្ជីនាវា របស់ អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ នៃក្រសួងសាធារណការ ដែលត្រូវបានធ្វើការផ្សព្វផ្សាយនាថ្ងៃចន្ទ ទី៤ ខែមីនា។

អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ បានលើកឡើងថា ក្នុង ពេលកន្លងមកក្រុមហ៊ុនដឹកជញ្ជូនតាមផ្លូវទឹក និងម្ចាស់នាវាមួយចំនួន ដែលកំពុងធ្វើប្រតិបត្តិការនាវាចរណ៍ តាមផ្លូវទឹកក្នុងព្រះរាជាណាចក្រកម្ពុជា ពុំទាន់បំពេញកាតព្វកិច្ចក្នុងការចុះបញ្ជីនាវាអនុលោមតាមច្បាប់ និង លិខិតបទដ្ឋានគតិយុត្តពាក់ព័ន្ធជាធរមាននៅឡើយ។

អនុលោមតាមច្បាប់ ស្តីពីការដឹកជញ្ជូនតាមផ្លូវទឹក ដែលបានប្រកាសដាក់ឱ្យប្រើកាលពីថ្ងៃទី២៣ ខែមីនា ឆ្នាំ២០២៤ តម្រូវឱ្យនាវាឆ្នេរសមុទ្រ និងនាវាផ្លូវទឹកក្នុងប្រទេស ដែលធ្វើនាវាចរណ៍នៅទូទាំងប្រទេស ត្រូវធ្វើការចុះបញ្ជីនាវាជាចាំបាច់។

អគ្គនាយកដ្ឋានបានអំពាវនាវដល់ ម្ចាស់ក្រុមហ៊ុន ឬម្ចាស់នាវាទាំងអស់ ដែលពុំទាន់បានចុះបញ្ជីនាវា ត្រូវដាក់ពាក្យស្នើសុំចុះបញ្ជីនាវា នៅ អគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ឬអង្គភាពច្រកចេញចូលតែមួយតាមបណ្តារាជធានី-ខេត្ត។

ការចុះបញ្ជីនេះ គឺដើម្បីធានាបាននូវការគ្រប់គ្រងមធ្យោបាយដឹកជញ្ជូនតាមផ្លូវទឹក ការធ្វើនាវាចរណ៍ឱ្យបានត្រឹមត្រូវអនុលោមតាមបទប្បញ្ញត្តិច្បាប់ និងលិខិតបទដ្ឋានជាធរមាន ការចូលរួមការ ការពារសុវត្ថិភាព និងបរិស្ថាននាវា ការរក្សាបាននូវសណ្តាប់ធ្នាប់ក្នុងការធ្វើប្រតិបត្តិការដឹកជញ្ជូនតាមផ្លូវទឹក និងការធានាឱ្យបានតម្លាភាពនៃការធ្វើអាជីវកម្មដឹកជញ្ជូនតាមផ្លូវទឹក។

សេចក្តីជូនដំណឹងបញ្ជាក់ថា៖«ក្នុងករណីដែលម្ចាស់ក្រុមហ៊ុន ឬម្ចាស់នាវាមិនបានអនុវត្តក្នុងការចុះបញ្ជីនាវាស្របតាមច្បាប់ និង លិខិតបទដ្ឋានគតិយុត្តជាធរមាន នាវានឹងត្រូវបានហាមឃាត់មិនឱ្យធ្វើនាវាចរណ៍ និងប្រតិបត្តិការដឹកជញ្ជូនតាម ផ្លូវទឹកឡើយ»។

អនុរដ្ឋលេខាធិការ និងជាអ្នកនាំពាក្យក្រសួងសាធារណការ លោកផន រីមបានឱ្យដឹងថា ស្ថិតិនាវាផ្លូវទឹក និងនាវាឆ្នេរសមុទ្រ ដែលបានចុះបញ្ជីគិតត្រឹមឆ្នាំ២០២៤ មានសរុបចំនួន ១ ៣៧៣។

ក្នុងនោះរួមមាន នាវាផ្លូវទឹកចំនួន៩៣៦គ្រឿង និងនាវាឆ្នេរសមុទ្រ៤៣៧គ្រឿងផងដែរ។ នាវាដែលបានចុះបញ្ជីទាំងនោះ ភាគច្រើនជានាវាដឹកទំនិញ នាវាដឹកអ្នកដំណើរ និងនាវានេសាទ។

ក្រសួងធ្លាប់បានឱ្យដឹង នាពេលកន្លងមកថា នៅក្នុង​ខេត្ត​​ឆ្នេរសមុទ្រ​ទាំង៤ រួមមានខេត្តកំពត កែប ព្រះសីហនុ និងកោះកុង ​មាននាវាជាង៨ពាន់​គ្រឿង គិតត្រឹមចុងឆ្នាំ២០២៣។ ក្នុងនោះ​​នាវា​ដឹកទំនិញមានច្រើនជាងគេ គឺជាង៣០០គ្រឿង។

ក្រសួងបានលើកឡើងថា ការចុះបញ្ជី ក៏ដើម្បី​ធានា​ប្រសិទ្ធភាព​ក្នុងការ​តាមដាន ត្រួតពិនិត្យ និង​គ្រប់គ្រង​នាវា ក៏ដូចជា​នាវិកផងដែរ ជាពិសេស​តាមដាន​ត្រួតពិនិត្យ​ទំនិញ​លើ​នាវា​។

ច្បាប់ដដែលនេះ ក៏បានចែងផងដែរថា នាវាឆ្នេរសមុទ្រ និងនាវាផ្លូវទឹកក្នុងប្រទេស ដែលធ្វើនាវាចរណ៍នៅតាមផ្លូវទឹក ក៏តម្រូវឱ្យមានការត្រួតពិនិត្យលក្ខណៈបច្ចេកទេសនាវាផងដែរ។

ការត្រួតពិនិត្យនោះ គឺត្រូវធ្វើឡើងដោយមន្ត្រី ត្រួតពិនិត្យលក្ខណៈបច្ចេកទេសនាវា ដែលមានសមត្ថភាពវិជ្ជាជីវៈត្រួតពិនិត្យលក្ខណៈបច្ចេកទេសនាវា៕