កង់ឡាន ៤ កុងតឺន័រ ដែលត្រូវបានបញ្ជូនចេញពីកម្ពុជាកាលពីខែកុម្ភៈ។ GDCE
កង់ឡានចាស់ៗជាង ៧៨តោន ដែលជាមុខសញ្ញានៃការនាំចូលយកមកបោះបង់ចោលនៅកម្ពុជាតាមកំពង់ផែអន្តរជាតិក្រុងព្រះសីហនុ ត្រូវបានបញ្ជូនត្រឡប់ទៅវិញ ខណៈដែលអ្នកនាំចូលត្រូវបានផាកពិន័យទៅតាមច្បាប់។ នេះបើតាមអគ្គនាយកដ្ឋានគយនិងរដ្ឋាករកម្ពុជា។
អគ្គនាយកដ្ឋានគយនិងរដ្ឋាករកម្ពុជាបានឲ្យដឹងនៅថ្ងៃនេះថា អគ្គនាយកដ្ឋានបានចាត់ការតាមនីតិវិធី តម្រូវឲ្យម្ចាស់នាំចូលកង់ឡានចាស់ៗចំនួន ៤ កុងតឺន័រដែលមានទម្ងន់សរុបជាង ៧៨តោន (៧៨.៦៤០គីឡូក្រាម) នាំត្រឡប់ចេញពីកម្ពុជាវិញ ក្រោយពេលអាជ្ញាធរត្រួតពិនិត្យឃើញថា វាករណីបទល្មើសច្បាប់ស្តីពីគយ ហើយការនាំចូលនេះក្នុងគោលបំណងយកមកបោះចោលនៅកម្ពុជា។
បើតាមអគ្គនាយកដ្ឋាន កង់ឡានទាំងនេះត្រូវបានម្ចាស់នាំចូលបញ្ជូនចេញកាលពីថ្ងៃទី២៦ខែកុម្ភៈ ឆ្នាំ២០២៥កន្លងទៅ បន្ទាប់ពីបាននាំចូលមកកម្ពុជាតាំងពីខែកញ្ញា ឆ្នាំ២០២៤ ហើយត្រូវបានមន្ត្រីអគ្គនាយកដ្ឋានឃាត់ទុក ដើម្បីត្រួតពិនិត្យ។
វិធានការនេះធ្វើឡើងតាមអនុសញ្ញាអន្តរជាតិបាសែលស្តីពីការត្រួតពិនិត្យការដឹកជញ្ជូនអន្តរជាតិ និងការបោះបង់ចោលសំណល់គ្រោះថ្នាក់ ឆ្នាំ១៩៨៩។
អគ្គនាយកដ្ឋានថ្លែងថា៖ «អគ្គនាយកដ្ឋានគយនិងរដ្ឋាករកម្ពុជាតែងតែយកចិត្តទុកដាក់លើបញ្ហាសន្តិសុខ និងសុវត្ថិភាព ចំពោះទំនិញនាំចេញ នាំចូល និងឆ្លងកាត់។ ជាក់ស្ដែង ក្នុងឆ្នាំ២០២៤ នេះ អគ្គនាយកដ្ឋាន បង្ក្រាបបានការនាំចូលដោយខុសច្បាប់នូវទំនិញហាមឃាត់មួយចំនួនរួមមាន សាច់បង្កកនិងផលិតផលពីសាច់សត្វខូចគុណភាព ៣៧ ករណី ស្មើនឹង ៩៤ ០១៨ គីឡូក្រាម និងគ្រឿងញៀនទម្ងន់សុទ្ធ ៦៦ ៣០០,៩៤ ក្រាម»។
បន្ថែមពីលើនេះ ទំនិញល្មើសច្បាប់ និងទំនិញខូចគុណភាពចំនួន ១០៧ មុខ ដែលមានទម្ងន់សរុបប្រមាណ ៥០៧ តោន ត្រូវបានអគ្គនាយកដ្ឋានកម្ទេចចោលនៅថ្ងៃទី២៨ ខែកុម្ភៈកន្លងទៅ៕
