ទីតាំងប្រព្រឹត្តបទល្មើសឆបោកតាមអនឡាញប្រព្រឹត្តដោយជនបរទេស បានទៅដល់ខេត្តមណ្ឌលគិរី។ នៅថ្ងៃទី៦ ខែមីនា កម្លាំងនគរបាលនៃអគ្គស្នងការដ្ឋាននគរបាលជាតិ បានបើកប្រតិបត្តិការបង្ក្រាបនៅអគារមេគង្គ៧៤ ក្រុងសែនមនោរម្យ ខេត្តមណ្ឌលគិរី ឃាត់ខ្លួនជនបរទេស២៥៨នាក់។
ការបង្ក្រាបនេះកើតមានឡើងបន្ទាប់ពីមានការរាយការណ៍ចូលទំព័រហ្វេសប៊ុករបស់ក្រសួងមហាផ្ទៃ។ ក្នុងប្រតិបត្តិការនេះ សមត្ថកិច្ចរកឃើញជនជាតិចិនចំនួន ២៤៧នាក់ មីយ៉ាន់ម៉ា ៩នាក់ ម៉ាឡេស៊ីម្នាក់ និងវៀតណាមម្នាក់។ នេះបើតាមការចុះផ្សាយរបស់ហ្វ្រេសញូវដែលទទួលបានរបាយការណ៍ពីសមត្ថកិច្ច។
យ៉ាងណាក៏ដោយ ក្នុងចំណោមពួកគេ សមត្ថកិច្ចកំណត់ជនសង្ស័យចំនួន ១៤នាក់ ក្នុងនោះចិន ៧ នាក់ និងមីយ៉ាន់ម៉ា ៧នាក់ ដែលជាអ្នកពាក់ព័ន្ធនឹងការប្រព្រឹត្តសកម្មភាពប្រើអំពើហិង្សា និងបង្ខំឲ្យធ្វើការ និងបានបញ្ជូនទៅស្នងការដ្ឋានខេត្តមណ្ឌលគិរី ដើម្បីសាកសួរបន្ត។
ចំណែកជនបរទេសចំនួន ២៤៣នាក់ទៀត ត្រូវបញ្ជូនទៅអគ្គនាយកដ្ឋានអន្តោប្រវេសន៍ ដើម្បីបន្តនីតិវិធី ដែលជាទូទៅពួកគេនឹងត្រូវបណ្ដេញពីកម្ពុជា។
បទល្មើសអនឡាញ កំពុងរីករាលដាលនៅលើពិភពលោក។ នៅអាស៊ី ទីក្រុងឆបោកតាមអនឡាញដ៏ធំមួយត្រូវបានគេរកឃើញថាមានទីតាំងនៅប្រទេសភូមា ជាប់ព្រំដែនថៃ។ ប្រទេសថៃ កាលពីពេលថ្មីៗនេះបានចាប់ផ្ដើមចាត់វិធានការបង្ក្រាបទ្រង់ទ្រាយធំ។
នៅកម្ពុជា ការទប់ស្កាត់បទល្មើសប្រភេទនេះក៏កំពុងធ្វើឡើង ដោយកាលពេលថ្មីៗនេះ លោកនាយករដ្ឋមន្ត្រី ហ៊ុន ម៉ាណែត បានបង្កើតគណៈកម្មការចំពោះកិច្ចដើម្បីបង្ក្រាបសកម្មភាពនេះ ដោយរូបលោកជាប្រធានគណៈកម្មការនេះផ្ទាល់តែម្ដង។
អង្គការសហប្រជាជាតិបានរកឃើញកាលពីឆ្នាំកន្លងទៅថា អ្នកដែលចូលរួមប្រព្រឹត្តអំពើឆបោកតាមអ៊ីនធឺណិត ភាគច្រើនធ្លាក់ខ្លួនក្នុងសកម្មភាពនេះតាមរយៈការចាញ់បោកក្រុមឧក្រិដ្ឋជនដែលសន្យាផ្ដល់ការងារមានប្រាក់ខែខ្ពស់ ប៉ុន្តែទីបំផុតពួកគេក្លាយជាជនរងគ្រោះដែលត្រូវបង្ខំឲ្យធ្វើជាអ្នកលួងលោម ឬ សកម្មភាពឆបោកផ្សេងៗនៅតាមអនឡាញ។
អ្នកជំនាញនៅកម្ពុជា ធ្លាប់បានលើកឡើងកាលពីកន្លងទៅថា អំពើឆបោកតាមអនឡាញប្រព្រឹត្តដោយជនបរទេសនៅកម្ពុជា មិនបង្កហានិភ័យផ្ទាល់ដល់ភ្ញៀវទេសចរនោះទេ ប៉ុន្តែ វាប៉ះពាល់វិស័យទេសចរណ៍ និងមុខមាត់ប្រទេសជាតិ៕
