ភ្នំពេញៈ ចង្ក្រានសន្សំសំចៃថាមពល ដែល​ជួយកាត់បន្ថយការប្រើប្រាស់អុស រហូតដល់ទៅជាង៦៥ភាគរយ និង​ធុង​ចម្រោះ​ទឹកស្អាតជាង៧ម៉ឺន នឹងត្រូវចែកជូន​ពលរដ្ឋ​ក្នុង​សហគ​មន៍​តំ​បន់​ការ​ពារ​ធម្ម​ជាតិ នៅឆ្នាំ២០២៦ខាងមុខ។

ការចែកជូនដោយឥតគិតថ្លៃនេះ គឺស្ថិតក្នុងគម្រោងវិនិយោគទឹកប្រាក់សរុប៤០លាន ដែលមានចង្ក្រាន និងធុង​ចម្រោះ​ជាង១លាន​ ដើម្បីចូលរួមសកម្មភាពកាត់បន្ថយការបំភាយឧស្ម័នផ្ទះកញ្ចក់ ដែលជា​ផ្នែកមួយ​ជួយដល់​គោល​ដៅ​កាត់​បន្ថ​យកា​របំភាយកាបូនរបស់កម្ពុជា។

គម្រោងចែកជូននេះ ត្រូវបានប្រកាសឱ្យដឹង នាពេ​ល​ថ្មីៗនេះ តាមរយៈការចុះកិច្ចព្រមព្រៀងគម្រោង «បែង​ចែក​ចង្ក្រាន​សន្សំ​សំចៃ​ថា​ម​ពល និងធុងចម្រោះទឹកស្អាតដោយឥតគិតថ្លៃជូនប្រជាពលរដ្ឋ» រវាងតំណាងក្រុមហ៊ុនស៊ីបកូ(SIPCO) និង​លោកស្រីមាន សំ​អាន ប្រ​ធានគណៈកម្មការទី៨ ព្រឹទ្ធសភា និងជាអនុប្រធានសមាគមនារីកម្ពុជា ដើម្បី​សន្តិភាព​និង​អភិវឌ្ឍន៍​​​។

អ្នកនាំពាក្យ ក្រសួងបរិស្ថាន លោកខ្វៃ អាទិត្យាបានបញ្ជាក់ថា៖«ក្រសួងបរិស្ថាន ទទួលបាន ចង្ក្រាន​សន្សំសំ​ចៃ​ថាម​ពល​ចំនួន៣៦ ៥៧៤ចង្ក្រាន និងធុងចម្រោះទឹកស្អាត៣៦ ៥៧៥ធុងទឹក ដើម្បី​បែងចែក​ជូនគ្រួសារ​សហគមន៍នៅ​តំ​បន់​កាពារធម្មជាតិ នៅឆ្នាំ២០២៦»។

ក្រសួងបានឱ្យដឹងថា ចង្ក្រានសន្សំសំចៃថាមពលនេះ មានប្រសិទ្ធិភាពស្រូបកំដៅបានជាង៣៨ភាគរយ ដែលបាន​ជួយ​កាត់​បន្ថយការ​ប្រើ​អុស​បានជាង៦៥ភាគរយ បើប្រៀបធៀបទៅនឹងចង្ក្រានដាំអុសបែបប្រពៃណី។ គម្រោង​នេះ​ត្រូវ​បាន​គេ​រំពឹងថា នឹងផ្តល់ឥណទានកាបូន ដែលមាន​គុណភាពខ្ពស់​ដល់​ឧស្សា​ហកម្មអា​កាស​ចរណ៍​អន្តរ​ជាតិ។

គម្រោងនេះមានទឹកប្រាក់វិនិយោគសរុបចំនួន៤0លានដុល្លារអាមេរិក ដែលចែកចេញជា២ដំណាក់កាល។ ដំ​ណាក់​កាល​ទី១ គឺចាប់ពីឆ្នាំ២០២២ ដល់ ២០២៥ និងដំណាក់កាលទី២ គឺចាប់ពីឆ្នាំ២០២៥​ដល់ឆ្នាំ២០២៧។

គម្រោងនេះ ត្រូវ​បាន​អនុវត្តនៅគ្រប់តំបន់ជនបទ នៃប្រទេសកម្ពុជា ដោយមានការរំពឹងទុកថា នឹងចែកចាយចង្ក្រានសន្សំសំចៃថាមពល ចំនួន៦០០ ០០០​​ និងម៉ាស៊ីនបន្សុទ្ធទឹក ចំនួន៦២០ ០០០។ ការធ្វើវិភាគទាន ដោយឥតគិតថ្លៃនេះ កំពុងតែជួយលើក​កម្ពស់សុខ​ភាពពលរដ្ឋ៥លាននាក់។

ក្នុងដំណាក់កាលទី១ គម្រោងកំពុងតែចែកចង្រ្កានប្រភេទនេះចំនួន៣សែន និងធុងចម្រោះទឹក១សែន នៅក្នុងខេត្ត​ចំនួ​ន​៨។ ក្នុងនោះរួមមាន ខេត្តកំពត កែប ស្វាយរៀង ព្រៃវែង ត្បូងឃ្មុំ កំពង់ស្ពឺ កំពង់ធំ និងកំពង់ចាម។ 

គម្រោងនេះ កំពុងតែរួមចំណែកសន្សំសំចៃបរិមាណអុសក្នុងការចម្អិនអាហារ និងកាត់បន្ថយការបំភាយឧស្ម័ន។ ម៉ា​ស៊ីន​ចម្រោះទឹកកាន់តែមានប្រសិទ្ធភាព ជាមួយនឹងការប្រើប្រាស់ទឹកស្អាតដែលមានអនាម័យ ដើម្បីកំណត់ការដុត ដើម្បីកាត់បន្ថយបរិមាណអុសដ៏ច្រើនសម្រាប់ទឹកពុះក្នុងគ្រួសារ។

គម្រោង ដែលត្រូវបានចុះបញ្ជីនៅទីភ្នាក់ងារ Verra ដោយមាន VCS 2925និង VCS 3052 ID​ ត្រូវ​បាន​អនុម័ត​ដោយ​មាត្រា៦ នៃកិច្ចព្រមព្រៀងទីក្រុងប៉ារីស ក្រោមការណែនាំអំពីការអនុវត្តប្រការ៦ នៃកិច្ចព្រមព្រៀមទីក្រុងប៉ារីស ដែល​ចេញ​ដោយកម្ពុជា កាលពីខែមិថុនា ឆ្នាំ២០២៤ និងត្រូវបានអនុញ្ញាត​ក្នុងការផ្ទេរឥណទានអន្តរជាតិ(ITMOS)។

ក្រុមបច្ចេកទេសរបស់Verra តំណាងក្រុមហ៊ុនស៊ីបកូ និងក្រុមការងារសមាគមនារីថ្នាក់កណ្តាលបានធ្វើការរួមគ្នា ​ក្នុង​ការ​ចុះពិនិត្យមើលការប្រើប្រាស់ចង្ក្រានសន្សំសំចៃ ថាមពលនិងធុងចម្រោះទឹកស្អាត ដើម្បីទទួលបាននូវពត៌មានត្រឡ ប់ពីការប្រើប្រាស់ និងតាមដានលើគុណភាពផលិត ក្នុងខេត្តដែលបានអនុវត្តគម្រោង។

ការអវុត្តការចែកចង្ក្រានសន្សំសំចៃថាមពល និងធុងចម្រោះទឹកស្អាតដោយឥតគិតថ្លៃ ជូនប្រជាពលរដ្ឋ នៅតាម​សហ​គម​ន៍នេះ ត្រូវបានអាជ្ញាធរមូលដ្ឋាន និងប្រជាពលរដ្ឋមានការសប្បាយរីករយ និងយក​ទៅ​ប្រើប្រាស់​ដើម្បី​លើក​កម្ពស់​សុខភាពជីវភាព កាត់បន្ថយការចំណាយ សន្សំសំចៃថវិកា ថាមពល កាត់បន្ថយការកាប់ព្រៃ និងការបំពុលបរិស្ថាន។

លើ​សពីនេះ វា​ក៏រួមចំណែក​ជាមួយរា​ជដ្ឋា​ភិបាល​ក៏​ដូចជា​ពិភ​ពលោ​កទាំ​ង​មូល​ក្នុ​ងការ​ខិត​ខំប្រឹ​ងប្រែ​ងក្នុ​ងកា​រការ​ពារ​កា​រ​ប្រែប្រួលគេអាកាស និងកាត់បន្តបោកពក្រីក្ររបស់ប្រជាពលរដ្ឋ។

ចាប់ពីថ្ងៃទី២៨ ដល់៣១ ខែមីនាកន្លងមក លោកស្រីម៉ុម ថានី រដ្ឋលេខាធិការ, លោកស្រីងិន លីណា រដ្ឋលេខាធិការ និង​លោកស្រី ឯម ចាន់លីតា អនុប្រធាននាយកដ្ឋាននៃក្រសួងបរិស្ថាន បានចូលរួមកិច្ចប្រជុំស្ដីពី«ការឆ្លើយ​តប​នឹង​កា​រ​ប្រែ​ប្រួលអាកាសធាតុ៖ មេរៀន និងសកម្មភាពបន្ទាន់សម្រាប់អនាគត» និងចុះកិច្ចព្រមព្រៀងគម្រោង«បែង​ចែកចង្ក្រាន​សន្សំសំចៃថាមពល និងធុងចម្រោះទឹកស្អាតដោយឥតគិតថ្លៃជូនប្រជាពលរដ្ឋ»។

ពិធីនេះ ត្រូវបាន​ដឹក​នាំ​ដោ​យលោ​ក​ស្រី​មាន សំអាន ប្រធានគណៈកម្មការទី៨ ព្រឹទ្ធសភា និងជាអនុប្រធានសមាគមនារីកម្ពុជា ដើម្បី​សន្តិ​ភាព​និ​ងអ​ភិ​វ​ឌ្ឍ​ន៍។

កម្មពិធីនេះមានការចូលរួមពីសមាជិកព្រឹទ្ធសភា រដ្ឋសភា ក្រុមប្រឹក្សាខេត្ត តំ​ណាងសមាគមនារីថ្នាក់កណ្ដាល ខេត្ត​ស្ទឹងត្រែង មណ្ឌលគិរី កំពង់ចាម កំពង់ធំ សៀមរាប និងក្រុមហ៊ុនអ៊ីនត្រាកូ(INTRACO) សរុបចំនួន២៤នាក់ នៅ​ទី​ក្រុង​ដាណាង សាធារណរដ្ឋសង្គមនិយមវៀតណាម។

កិច្ចប្រជុំនេះ រៀបចំឡើងក្នុងគោលបំណង ពិនិត្យ និងវាយតម្លៃអំពីការអនុវត្ត គម្រោង «បែងចែក​ចង្ក្រាន​សន្សំ​សំចៃ​ថាម​ពល និងធុងចម្រោះទឹកស្អាតដោយឥតគិតថ្លៃជូនប្រជាពលរដ្ឋ» នៅដំណាក់កាលទី១។ ក្រៅពីនោះ ក៏ដើម្បី បន្ត​ពិភាក្សាលើការអនុវត្តគម្រោង ដំណាក់កាលទី២ និងចុងក្រោយ គឺការចុះហត្ថលេខាលើកិច្ចព្រមព្រៀងអនុវត្តគម្រោង នៅដំណាល់កាលទី២។

ក្នុងដំណាក់កាលទី២ គម្រោងនឹងបន្តបែងចែកចង្ក្រានសន្សំសំចៃថាមពល និងធុង​ចម្រោះទឹកស្អាត​ដល់ប្រជា​សហគម​ន៍ ដើម្បីចូលរួមចំណែកលើកកម្ពស់ជីវភាពរស់នៅ សុខភាពរបស់ប្រជាពលរដ្ឋនៅសហគមន៍ ព្រមទាំងគាំ​ទ្រនិង​ការ​ពារ​បរិស្ថាន តាមរយៈ សមាគមនារីកម្ពុជាដើម្បីសន្តិភាព និងអភិវឌ្ឍន៍ កាកបាតក្រហមកម្ពុជា និងក្រសួងបរិស្ថាន៕