ប្រធានាធិបតីចិន លោក ស៊ី ជីនពីង បានមកដល់រាជធានីភ្នំពេញនៅថ្ងៃព្រហស្បតិ៍ ទី១៧ ខែមេសានេះ ដោយចាប់ផ្តើមដំណើរទស្សនកិច្ចផ្លូវរដ្ឋរយៈពេលពីរថ្ងៃមកកម្ពុជា តបតាមការអញ្ជើញរបស់ព្រះមហាក្សត្រកម្ពុជា ព្រះករុណាព្រះបាទសម្ដេចព្រះបរមនាថ នរោត្ដម សីហមុនី។ រូបថត ទ.ទ.ក
ភ្នំពេញ៖ ប្រធានាធិបតីចិន លោក ស៊ី ជីនពីង បានមកដល់រាជធានីភ្នំពេញនៅថ្ងៃព្រហស្បតិ៍ ទី១៧ ខែមេសា ដោយចាប់ផ្តើមដំណើរទស្សនកិច្ចផ្លូវរដ្ឋរយៈពេលពីរថ្ងៃមកកម្ពុជា ដែលជាផ្នែកមួយនៃដំណើរចុងក្រោយទស្សនកិច្ចនៅអាស៊ីអាគ្នេយ៍របស់លោក ដែលរួមមានប្រទេសវៀតណាម និងម៉ាឡេស៊ី។
ដំណើរទស្សនកិច្ចនេះត្រូវបានធ្វើឡើងចំពេលដែលមានសង្គ្រាមពន្ធគយកាន់តែខ្លាំងឡើង និងវោហាសាស្ត្រដ៏មុតស្រួចពីប្រធានាធិបតីសហរដ្ឋអាមេរិក Donald Trump ដែលបានចោទប្រកាន់តំបន់នេះថាបានព្យាយាមប្រកួតប្រជែងជាមួយសហរដ្ឋអាមេរិក។
ក្នុងដំណើរទស្សនកិច្ចនេះ លោកប្រធានាធិបតី ស៊ី ជីនពីង នឹងចូលគាល់ព្រះករុណាព្រះបាទសម្ដេចព្រះបរមនាថ នរោត្ដម សីហមុនី និងសម្ដេចម៉ែ ព្រះវររាជមាតាជាតិខ្មែរ នៅព្រះបរមរាជវាំង នេះបើយោងតាមក្រសួងការបរទេស និងសហប្រតិបត្តិការអន្តរជាតិកម្ពុជា។
សេចក្តីថ្លែងការណ៍របស់ក្រសួងបានឱ្យដឹងថា៖ «លោក ស៊ី នឹងជួបជាមួយប្រធានព្រឹទ្ធសភា លោក ហ៊ុន សែន និងលោកនាយករដ្ឋមន្ត្រី ហ៊ុន ម៉ាណែត ដើម្បីពិភាក្សាលើការពង្រឹងទំនាក់ទំនងទ្វេភាគី និងផ្លាស់ប្តូរទស្សនៈលើបញ្ហាតំបន់ និងអន្តរជាតិដែលជាផលប្រយោជន៍រួម»។
សេចក្ដីថ្លែងការណ៍បន្ដថា៖ «នេះជាដំណើរទស្សនកិច្ចដ៏សំខាន់មួយដែលនឹងពង្រឹងទំនាក់ទំនងជាប្រពៃណីនៃទំនាក់ទំនងមិត្តភាពដែលបានកសាងឡើងដោយមេដឹកនាំបន្តបន្ទាប់នៃប្រទេសទាំងពីរ។ វានឹងបន្ថែមសារៈសំខាន់ដល់ទំនាក់ទំនងមិត្តភាព និងភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ»។
ឯកអគ្គរដ្ឋទូតចិនប្រចាំកម្ពុជា លោក Wang Wenbin បានប្រាប់ស៊ីនហួរ កាលពីម្សិលមិញថា ពាណិជ្ជកម្មទ្វេភាគីឈានដល់ ១៧,៨៣ ពាន់លានដុល្លារក្នុងឆ្នាំ ២០២៤ ដោយការនាំចេញកសិផលបានជំរុញប្រាក់ចំណូលរបស់កម្ពុជា។
ប្រទេសចិននៅតែជាវិនិយោគិនលំដាប់កំពូលរបស់កម្ពុជា ជាពិសេសផ្នែកហេដ្ឋារចនាសម្ព័ន្ធ និងថាមពល ដោយរោងចក្រថាមពលដែលផលិតដោយចិនឥឡូវនេះផ្គត់ផ្គង់ជាង ៦០ភាគរយ នៃថាមពលអគ្គិសនីរបស់កម្ពុជា។
គម្រោងខ្សែក្រវាត់ និងផ្លូវសំខាន់ៗ ដូចជាផ្លូវល្បឿនលឿនភ្នំពេញ-ព្រះសីហនុ និងអាកាសយានដ្ឋានអន្តរជាតិសៀមរាបអង្គរ កំពុងជំរុញកំណើនសេដ្ឋកិច្ច។
យោងតាមរបាយការណ៍ទស្សនវិស័យអភិវឌ្ឍន៍អាស៊ី (ADO) របស់ធនាគារអភិវឌ្ឍន៍អាស៊ី (ADB) ខែមេសា ឆ្នាំ ២០២៥ បានបង្ហាញថា ក្នុងឆ្នាំ ២០២៤ ពាណិជ្ជកម្មរវាងចិន និងកម្ពុជាបានឈានដល់កម្រិតខ្ពស់បំផុតចំនួន ១៥,១៩ ពាន់លានដុល្លារ ពោលគឺកើនឡើង ២៣,៨ភាគរយ ធៀបនឹងឆ្នាំមុន។
របាយការណ៍បានបន្តថា៖ «កម្ពុជាបាននាំចូលទំនិញពីប្រទេសចិនក្នុងតម្លៃ ១៣,៤៤ ពាន់លានដុល្លារ ខណៈការនាំចេញរបស់ខ្លួនទៅប្រទេសចិនមានចំនួន ១,៧៥ ពាន់លានដុល្លារ ដែលបណ្តាលឱ្យមានឱនភាពពាណិជ្ជកម្ម ១១,៦៩ ពាន់លានដុល្លារ»។
ដើម្បីប្រឈមមុខនឹងពន្ធអាមេរិកដែលដាក់ដោយលោក Donald Trump ម៉ាឡេស៊ីអាចជាប់ ២៤ ភាគរយ វៀតណាម និងកម្ពុជាកំពុងប្រឈមមុខនឹងការយកពន្ធអតិបរមាពីសហរដ្ឋអាមេរិក ៤៦ ភាគរយ និង ៤៩ ភាគរយ មុនពេលលោក Trump ប្រកាសផ្អាករយៈពេល ៩០ ថ្ងៃ។
សហរដ្ឋអាមេរិកបានដាក់ពន្ធដ៏ខ្ពស់រួចជាស្រេច ដែលឈានដល់កម្រិតខ្ពស់ដល់ទៅ ១០០ភាគរយ លើផលិតផលចិនមួយចំនួន សូម្បីតែមុនពេលលោក Trump ចាប់ផ្តើមដាក់ពន្ធបន្ថែមនៅឆ្នាំនេះ។ ជាមួយនឹងពន្ធថ្មីសរុប ១៤៥ភាគរយ បន្ថែមពីលើទំនិញដែលមានស្រាប់ ទំនិញចិនមួយចំនួនឥឡូវនេះត្រូវទទួលរងពន្ធខ្ពស់រហូតដល់ ២៤៥ភាគរយ។
ប្រធានាធិបតីអាមេរិកលោក Donald Trump បានតាមដានដំណើរទស្សនកិច្ចនៅតំបន់អាស៊ីអាគ្នេយ៍របស់លោក ស៊ី យ៉ាងយកចិត្ដទុកដាក់ និងបានធ្វើបទសម្ភាសន៍ជាមួយទូរទស្សន៍ CNN ដោយនិយាយថា ដំណើរនេះគឺជាឱកាសមួយដើម្បី «ប្រជែង» ជាមួយសហរដ្ឋអាមេរិក។
លោក Donald Trump បាននិយាយនៅក្នុង CNN កាលពីថ្ងៃទី ១៤ ខែមេសាថា៖ «ខ្ញុំមិនបន្ទោសប្រទេសចិនទេ ខ្ញុំមិនបន្ទោសវៀតណាមទេ។ ខ្ញុំមិនប្រកាន់ទេ។ ខ្ញុំឃើញថា ពួកគេជួបប្រជុំគ្នានៅថ្ងៃនេះ។ តើអស្ចារ្យទេ? នោះជាជំនួបដ៏គួរល្អ។ ជំនួបនេះដូចជាកំពុងព្យាយាមរកវិធីទប់ទល់ជាមួយសហរដ្ឋអាមេរិក»។
ដំណើរទស្សនកិច្ចនេះជាដំណើរទស្សនកិច្ចលើកទីពីររបស់លោក ស៊ី មកកម្ពុជាក្នុងពេលកាន់អំណាចបន្ទាប់ពីដំណើរទស្សនកិច្ចលើកដំបូងរបស់លោកក្នុងឆ្នាំ ២០១៦៕
លោក ស៊ី ជីនពីង ធ្វើទស្សនកិច្ចមកកម្ពុជា ជាផ្នែកមួយនៃដំណើរទស្សនកិច្ចនៅអាស៊ីអាគ្នេយ៍ចុងក្រោយរបស់លោក ដែលរួមមានប្រទេសវៀតណាម និងម៉ាឡេស៊ី។ រូបថត ទ.ទ.ក
.jpg)
