ឈាវមុន្និន ដែលមានតួនាទីក្នុងជួរយោធិន និង មានងារជាឧកញ៉ា។ FB
ឈ្មោះ ឈាវ មុន្និន មានឋានន្តរស័ក្តិថ្នាក់ឧត្តមសេនីយ៍ត្រី (ផ្កាយ១) និងមានងារជាឧកញ៉ា បានបង្ហោះវីដេអូថតក្នុងការិយាល័យក្នុងអកប្បកិរិយាមិនសមរម្យ មានទាំងរាំបទរ៉ែប ដែលប៉ះពាល់ដល់កិត្តិយសក្រសួងការពារជាតិ និងកងទ័ព។
ក្រសួងការពារជាតិនឹងរៀបចំបង្កើតក្រុមប្រឹក្សាវិន័យដើម្បីពិនិត្យនិងវាយតម្លៃរាល់ទង្វើទាំងឡាយរបស់មន្ត្រីរូបនេះ ដែលមានតួនាទីជានាយករងនៃនាយកដ្ឋានបច្ចេកទេស កងទ័ពជើងអាកាស អគ្គនាយកដ្ឋានសម្ភារៈបច្ចេកទេស នៃក្រសួងការពារជាតិ។ នេះបើតាមសេចក្ដីប្រកាសព័ត៌មាននៅថ្ងៃទី១ ខែមេសា។
ក្រសួងបញ្ជាក់ថា៖ «បុគ្គលរូបនេះបង្ហាញនូវរូបភាពនិងអាកប្បកិរិយាមិនសមរម្យក្នុងនាមជាយោធិន ដោយបានធ្វើឱ្យប៉ះពាល់យ៉ាងធ្ងន់ធ្ងរដល់កិត្តិយស សេចក្តីថ្លៃថ្នូរ និងឧត្តមភាពរបស់ក្រសួងការពារជាតិ និងកងយោធពលខេមរភូមិន្ទទាំងមូល»។
ក្រុមប្រឹក្សាវិន័យរបស់ក្រសួងនឹងពិនិត្យនិងវាយតម្លៃដើម្បីឈានទៅដល់ការដាក់ទណ្ឌកម្មឱ្យស្របទៅនឹងច្បាប់ស្តីពីលក្ខន្តិកៈទូទៅចំពោះយោធិន នៃកងយោធពលខេមរភូមិន្ទ។ នេះបើតាមក្រសួងដដែល។
ក្រៅពីមានតួនាទីជាមន្ត្រីថ្នាក់ឧត្តមសេនីយ៍នៅក្រសួងការពារជាតិ ឈាវ មុន្និន ក៏មានងារជាឧកញ៉ាផងដែរ បើយោងតាមព្រះរាជក្រឹត្យផ្ដល់គោរមងារចុះថ្ងៃទី១៩ ខែធ្នូ ឆ្នាំ២០២២។
យោងតាមព្រះរាជក្រឹត្យស្ដីពីគោរមងារឧកញ៉ា ដែលបានចេញផ្សាយកាលពីថ្ងៃទី២៣ ខែតុលា ឆ្នាំ២០២៤ មន្ត្រីរាជការស៊ីវិល មន្ត្រីនគរបាលជាតិ និងយោធិន ដែលកំពុងបំពេញការងារតាមក្រសួង ស្ថាប័ននានារបស់រដ្ឋ ដែលទទួលបានគោរមងារឧកញ៉ាពីមុន ត្រូវស្នើសុំលាឈប់ប្រើប្រាស់គោរមងារឧកញ៉ា ឬលាឈប់ពីក្របខណ្ឌទាំងនោះភ្លាមៗបន្ទាប់ថ្ងៃចេញអនុក្រឹត្យនេះ។
ក្រោយព្រះរាជក្រឹត្យនេះចូលជាធរមាន លោក ព្រាប សុវត្ថិ ដែលជាតារាចម្រៀងល្បី និងមានតួនាទីនៅក្នុងក្របខណ្ឌយោធា បានសុំលាលែងពីតួនាទីពីយោធិន និងរក្សាទុកគោរមងារឧកញ៉ា។
ប៉ុន្តែ សម្រាប់លោក ឈាវ មុន្និន រហូតមកទល់ពេលនេះ មិនទាន់បានអនុវត្តតាមអនុក្រឹត្យនេះនៅឡើយ ដោយលោកមិនទាន់បានដាក់ពាក្យស្នើសុំលាលែងគោរមងារនេះទេ។ នេះបើតាមមន្ត្រីជាន់ខ្ពស់នៃសមាគមន៍ឧកញ៉ាកម្ពុជា ដែលបានប្រាប់ភ្នំពេញប៉ុស្តិ៍នៅថ្ងៃនេះ។
នៅលើបណ្ដាញសង្គមក៏មានការហៅឈ្មោះលោកជា «ឧកញ៉ា ឈាវ មុន្និន» ផងដែរ។
យ៉ាងណាក៏ដោយ យោងតាមព្រះរាជក្រឹត្យស្ដីពីគោរមងារឧកញ៉ា គណៈកម្មការអន្តរក្រសួងមួយត្រូវបានបង្កើតឡើងដើម្បីវាយតម្លៃក្នុងការផ្ដល់គោរមងារ និង បញ្ចប់គោរមងារនេះ។ ភ្នំពេញប៉ុស្តិ៍មិនទាន់អាចសុំការបញ្ជាក់អំពីចំណាត់ការលើករណីនេះពីគណៈកម្មការអន្តរក្រសួងនេះបានទេ៕
