គ្រាប់មីននិងសំណល់ជាតិផ្ទុះសល់ពីសង្គ្រាម បន្តគំរាមកំហែងអាយុជីវិតប្រជាពលរដ្ឋខ្មែរ ដោយឧប្បត្តិហេតុចុងក្រោយកើតឡើងនៅព្រឹកថ្ងៃទី២៣នេះ នៅស្រុកត្រពាំងប្រាសាទខេត្តបន្ទាយមានជ័យ។
នៅព្រឹកថ្ងៃទី២៣ខែមេសានេះ មានករណីផ្ទុះគ្រាប់មីនតោន បណ្តាលឱ្យអ្នកបើកបរត្រាក់ទ័ររងរបួសជាទម្ងន់ ខណៈដែលត្រាក់ទ័របានខូចខាតទាំងស្រុង។ ជនរងគ្រោះមានឈ្មោះ ហែម កៅ ភេទប្រុស អាយុ ២៤ឆ្នាំ មានទីលំនៅភូមិស្វាយចេក ឃុំថ្លាត ស្រុកអន្លង់វែង ខេត្ដឧត្ដរមានជ័យ។
ជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យបង្អែកខេត្តឧត្តរមានជ័យ។ ហេតុការណ៍នេះកើតឡើងនៅពេលអ្នកបើកបរកំពុងភ្ជួរដីចម្ការនៅក្នុងភូមិអូរជីក ឃុំផ្អាវ ស្រុកត្រពាំងប្រាសាទ ខេត្តឧត្តរមានជ័យ។ នេះបើតាមអាជ្ញាធរមីន។
អាជ្ញាធរមីនអំពាវនាវនដល់បងប្អូនប្រជាពលរដ្ឋទាំងអស់ សូមកុំចូលទៅតំបន់ណាដែលមិនដឹងប្រវត្តិច្បាស់លាស់ និងត្រូវសាកសួរអាជ្ញាធរមូលដ្ឋានមុនចូលតំបន់នោះ និងសូមកុំប៉ះពាល់នៅពេលឃើញមីន និងគ្រាប់មិនទាន់ផ្ទុះ ហើយត្រូវរាយការណ៍ជាបន្ទាន់ដល់អាជ្ញាធរមានសមត្ថកិច្ច និងប្រតិបត្តិករបោសសម្អាតមីនដែលនៅជិតទីនោះដើម្បីយកគ្រាប់ទាំងនោះទៅកំទេចចោល។
លោក ឡាង កុសល្យ អ្នកនាំពាក្យអាជ្ញាធរមីនបានឲ្យដឹងថា ចាប់ពីខែមករា ដល់ខែមេសា ឆ្នាំ២០២៥ មានជនរងគ្រោះដោយសារយុទ្ធភណ្ឌគ្រឿងផ្ទុះចំនួន ១៧នាក់។ តួលេខនេះបានថយចុះ ២៦ ភាគរយ បើប្រៀបធៀបនឹងរយៈពេលដូចគ្នានៅឆ្នាំ២០២៤ ដែលមានជនរងគ្រោះចំនួន ២៣នាក់។
លោកថា ក្នុងចំណោមជនរងគ្រោះចំនួន ១៧នាក់ រួមមាន ជនរងគ្រោះដោយសារមីន ៧នាក់ និងជនរងគ្រោះដោយសារសំណល់ជាតិផ្ទុះពីសង្គ្រាមចំនួន១០នាក់។ ជនរងគ្រោះទាំង ១៧នាក់ មានស្លាប់ ៥នាក់ របួស ១១នាក់ និងពិការអវយវៈ ១នាក់។
លោកបន្តថា ជនរងគ្រោះជាបុរស ៩នាក់ ជាស្ត្រី ២នាក់ ជាក្មេងប្រុសអាយុក្រោម១៨ឆ្នាំ ៥នាក់ និងជាក្មេងស្រីអាយុក្រោម១៨ឆ្នាំ ១នាក់៕
.jpg)
