យន្តហោះរបស់ក្រុមហ៊ុន Air Cambodia ក្នុងបរិវេណអាកាសយានដ្ឋានអន្តរជាតិភ្នំពេញ។ ភ្នំពេញប៉ុស្តិ៍
ក្រុមហ៊ុនអាកាសចរណ៍ជាតិកម្ពុជា(Air Cambodia) គ្រោងនឹងធ្វើប្រតិបត្តិការហោះហើររវាងអាកាសយានដ្ឋានអន្តរជាតិភ្នំពេញ ជាមួយអាកាសយានដ្ឋានអន្តរជាតិកាន់សៃ(Kansai) នៃទីក្រុងអូសាកា ប្រទេសជប៉ុន នាអំឡុងត្រីមាសទី៤ ឆ្នាំ២០២៥ បន្ទាប់ពីអាជ្ញាធរពាក់ព័ន្ធផ្នែកអាកាសចរណ៍នៃប្រទេសទាំងពីរបានឯកភាពតាមការស្នើសុំរបស់ក្រុមហ៊ុនរួចមក។
រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល លោក ស៊ីន ចាន់សិរីវុត្ថា បានប្រាប់ភ្នំពេញប៉ុស្តិ៍នៅថ្ងៃទី២៩ ខែមេសា ថា បន្ទាប់ពីទទួលបានការឯកភាពពីស្ថាប័នមានសមត្ថកិច្ចផ្លូវអាកាសនៃប្រទេសទាំង ២ កាលពីថ្ងៃទី៤ ខែមេសាកន្លងមក ក្រុមហ៊ុនអាកាសចរណ៍ជាតិកម្ពុជា Air Cambodia គ្រោងចាប់ផ្តើមបើកប្រតិបត្តិការហោះហើររបស់ខ្លួនចេញពីអាកាសយានដ្ឋានអន្តរជាតិភ្នំពេញតេជោ ទៅកាន់អាកាសយានដ្ឋានអន្តរជាតិកាន់សៃ(Kansai) នៃទីក្រុងអូសាកា ប្រទេសជប៉ុន ដោយឆ្លងកាត់ទីក្រុងហ្វូចូវ(Fuzhou) នៃប្រទេសចិន (ភ្នំពេញ/PNH – ហ្វូចូវ/FOC – កាន់សៃ/KIX)។ តាមគម្រោង គឺប្រតិបត្តិការនេះនឹងធ្វើឡើងចំនួន ៤ជើងក្នុង ១សប្តាហ៍ គឺថ្ងៃចន្ទ ពុធ សុក្រ និងអាទិត្យ ដោយប្រើប្រាស់យន្តហោះប្រភេទ Airbus A321។
លោកបានថ្លែងថា៖«ប្រសិនបើគ្មានអ្វីប្រែប្រួល ក្រុមហ៊ុនអាកាសចរណ៍ជាតិកម្ពុជាអាចនឹងចាប់ផ្តើមដំណើរការប្រតិបត្តិការដឹកជញ្ជូនអ្នកដំណើររបស់ខ្លួននៅអំឡុងខែតុលា ឆ្នាំ២០២៥ ខាងមុខ»។
ក្រសួងទេសចរណ៍បានឱ្យដឹងថា ក្នុងឆ្នាំ២០២៤ កម្ពុជាទទួលបានភ្ញៀវបរទេសសរុប ៦,៧លាននាក់ កើនឡើង ២២,៩ ភាគរយបើធៀបឆ្នាំ២០២៣ ក្នុងនោះជនជាតិជប៉ុន មានចំនួន ១១២ ៧១៨នាក់ កើនឡើង ៣០,៤ភាគរយ។
បើតាមលោក ស៊ីន ចាន់សិរីវុត្ថា នៅខែឧសភាខាងមុខ ក្រុមហ៊ុនអាកាសចរណ៍ជាតិកម្ពុជា(Air Cambodia) នឹងទទួលបានយន្តហោះថ្មី ប្រភេទ ATR 72-600 MSN 1716 ដែលបានបញ្ជាទិញពីក្រុមហ៊ុនបារាំង សម្រាប់មកបន្ថែមក្នុងប្រតិបត្តិការអាជីវកម្មរបស់ក្រុមហ៊ុន។
លោកបានប្រាប់ទៀតថា រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល និងជាប្រធានក្រុមប្រឹក្សាភិបាលក្រុមហ៊ុនអាកាសចរណ៍ជាតិកម្ពុជា(Air Cambodia) លោក ម៉ៅ ហាវណ្ណាល់ ក៏នឹងត្រូវធ្វើដំណើរទៅប្រទេសបារាំង នៅខែឧសភា ខាងមុខផងដែរ ដើម្បីចូលរួមកិច្ចប្រជុំពិភាក្សាការងារជាមួយថ្នាក់ដឹកនាំក្រុមហ៊ុន ATR លើការងារពង្រឹងសុវត្ថិភាពនៃការប្រើប្រាស់អាកាសយានប្រភេទ ATR និងចូលរួមកម្មវិធីប្រគល់ និងទទួលយកអាកាសយានប្រភេទ ATR 72-600 MSN 1716 នៅទីក្រុងទូលូ(Toulouse) ប្រទេសបារាំង។
ក្នុងឆ្នាំ២០២៤ កន្លងមកប្រតិបត្តិការរបស់ Air Cambodia បានបង្ហាញពីសញ្ញាវិជ្ជមានគួរឱ្យកត់សម្គាល់ ក្នុងនោះប្រាក់ចំណូលរបស់ក្រុមហ៊ុន បានកើនឡើងប្រមាណ ២៩ ភាគរយធៀបនឹងឆ្នាំ២០២៣។ សម្រាប់ចំនួនអ្នកដំណើររបស់ក្រុមហ៊ុន គឺកើនឡើង ១៩ភាគរយ និងការដឹកជញ្ជូនទំនិញ កើន ៤៩ភាគរយ។
សម្រាប់ឆ្នាំ២០២៥ នេះ ក្រុមហ៊ុនបានព្យាករណ៍ថា ប្រាក់ចំណូលនឹងអាចកើនឡើង ៤៣,៤ភាគរយ ក្នុងនោះអ្នកដំណើរអាចកើនឡើង ៤៩ភាគរយ និងចំនួនជើងហោះហើរ អាចកើន ២៩,៥ភាគរយ។
យោងតាមក្រុមហ៊ុន Air Cambodia បច្ចុប្បន្នក្រៅពីគោលដៅក្នុងស្រុក ក្រុមហ៊ុនកំពុងមានប្រតិបត្តិការហោះហើរទៅកាន់ប្រទេសចំនួន ៤ រួមមាន ប្រទេសចិន(គ័ងចូវ, ស៊ិនចូវ, ណាននីង, ហុងកុង) ប្រទេសវៀតណាម(ទីក្រុងហូជីមិញ, ដាណាង, ហាណូយ, ភូគុក) ថៃ(បាងកក) និងប្រទេសឥណ្ឌា(ញ៉ូដេលី)។
យោងតាមរដ្ឋលេខាធិការដ្ឋានអាកាសចរណ៍ស៊ីវិល នៅក្នុងត្រីមាសទី១ ឆ្នាំ ២០២៥ អាកាសយានដ្ឋានអន្តរជាតិទាំង ៣ របស់កម្ពុជា ទទួលបានជើងហោះហើរចំនួន ១៧ ៤៣៤ ជើង កើន ១៩ ភាគរយ ក្នុងនោះអ្នកដំណើរចំនួន ១ ៩៦០ ៦៣៥ នាក់ កើន ១៩ ភាគរយ និងទំនិញចេញ-ចូលជិត ២ ម៉ឺនតោន ១០ ភាគរយ ធៀបនឹងរយៈពេលដូចគ្នាលកាលពីឆ្នាំមុន។
អ្នកសេដ្ឋកិច្ចនៅរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី២៩ ខែមេសា ថា ការបើកដំណើរការជើងហោះហើរអន្តរជាតិ គឺមិនត្រឹមតែចូលរួមចំណែកជំរុញ និងលើកទឹកចិត្តឱ្យភ្ញៀវទេសចរអន្តរជាតិធ្វើដំណើរមកកម្សាន្តនៅកម្ពុជាកាន់តែច្រើនប៉ុណ្ណោះទេ ប៉ុន្តែវាក៏នឹងជួយជំរុញកំណើនពាណិជ្ជកម្មអន្តរជាតិរបស់កម្ពុជាផងដែរ។ ការបង្កើត ឬបន្ថែមចំនួនជើងហោះហើរនៅតាមគោលដៅនានា គឺសុទ្ធតែបញ្ជាក់ពីភាពរីកចម្រើន និងការប្រមើលមើលឃើញពីភាពវិជ្ជមាននាពេលអនាគតរបស់ក្រុមហ៊ុន។
លោកបានថ្លែងថា៖«ការបើកជើងហោះហើរថ្មី គឺបង្ហាញពីភាពរីកចម្រើននៃដំណើរការអាជីវកម្មរបស់ក្រុមហ៊ុន ក៏ដូចជាការចាប់យកឱកាស និងជួយផ្សព្វផ្សាយទៅភ្ញៀវទេសចរ និងអ្នកវិនិយោគបរទេសឱ្យចូលមកកម្ពុជាកាន់តែច្រើនបន្ថែមទៀត»។
ការផ្លាស់ប្តូរពាណិជ្ជកម្មរវាងប្រទេសកម្ពុជា-ជប៉ុន ក្នុងឆ្នាំ២០២៤ មានទឹកប្រាក់សរុប ២,១៦ ពាន់លានដុល្លារ កើនឡើង ២០,១ភាគរយបើធៀបឆ្នាំ២០២៣ ដោយក្នុងនោះកម្ពុជានាំទំនិញទៅជប៉ុន ១,៤១ ពាន់លានដុល្លារ កើនឡើង ១៩,៨ភាគរយ ចំណែកជប៉ុននាំចូល ៧៥២ លានដុល្លារ កើនឡើង ២០,៧ភាគរយ។ នេះបើតាមអគ្គនាយកដ្ឋានគយ និងរដ្ឋាករកម្ពុជា(GDCE)។
ចន្លោះពីពាក់កណ្តាលឆ្នាំ ២០១៦ រហូតដល់មុនមានការផ្ទុះឡើងជំងឺកូវីដ១៩ ការធ្វើដំណើរត្រង់រវាងប្រទេសកម្ពុជា និងជប៉ុន ត្រូវបានធ្វើឡើងតាមរយៈក្រុមហ៊ុនអាកាសចរណ៍ជប៉ុន All Nippon Airline (ANA)។ ទោះយ៉ាងណា ការហោះហើររបស់ ANA មកកម្ពុជា ត្រូវបានផ្អាកចាប់ពីអំឡុងពាក់កណ្តាលឆ្នាំ២០២០ រហូតដល់ពេលបច្ចុប្បន្ន៕
.jpg)
