អាកាសយានដ្ឋានអន្តរជាតិតេជោ ដែលនឹងបើកដំណើរការនៅខែកក្កដា ខាងមុខ។ ភ្នំពេញប៉ុស្តិ៍
កម្ពុជាមានផែនការសម្រេចឲ្យបាននូវការដឹកជញ្ជូនអ្នកដំណើរតាមផ្លូវអាកាសចំនួន ២៥លាននាក់ និងការដឹកជញ្ជូនទំនិញតាមផ្លូវអាកាសចំនួន២០៥ពាន់តោន ក្នុងឆ្នាំ២០៣៥ ក្រោមក្របខ័ណ្ឌយុទ្ធសាស្ត្រថ្មី នៃគោលនយោបាយជាតិស្ដីពីការដឹកជញ្ជូនតាមផ្លូវអាកាស ឆ្នាំ២០២៥-២០៣៥។
គោលនយោបាយជាតិស្ដីពីការដឹកជញ្ជូនតាមផ្លូវអាកាស ឆ្នាំ២០២៥-២០៣៥ ត្រូវបានអង្គគណៈរដ្ឋមន្ត្រីពិនិត្យពិភាក្សានៅថ្ងៃក្នុងកិច្ចប្រជុំនៅថ្ងៃទី៤ ខែមេសានេះ។
យោងតាមសេចក្ដីថ្លែងហេតុរបស់លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នៅក្នុងកិច្ចប្រជុំនេះ ដើម្បីសម្រេចគោលដៅនេះ គោលនយោបាយជាតិផ្ដោតលើយុទ្ធសាស្ត្រស្នូលជាច្រើនចំណុច ដូចជា ការជំរុញសេរីភាវូបនីយកម្មសិទ្ធិហោះហើរ គោលដៅហោះហើរ និងចំណុះដឹកជញ្ជូន និង សេរីភាវូបនីយកម្មនៃសញ្ជាតិលើម្ចាស់ភាគហ៊ុន និងការគ្រប់គ្រងក្រុមហ៊ុនអាកាសចរណ៍ ដោយអ្នកវិនិយោគទុនបរទេសអាចមានសិទ្ធិវិនិយោគដាក់ដើមទុន១០០% និងគ្រប់គ្រងក្រុមហ៊ុនអាកាសចរណ៍ផ្ទាល់។
លើសពីនេះ យុទ្ធសាស្ត្រនេះផ្ដោតលើសេរីភាវូបនីយកម្មសេវាកម្មគាំទ្រការដឹកជញ្ជូនតាមផ្លូវអាកាស ជាពិសេស លើសេវានៅអាកាសយានដ្ឋានអន្តរជាតិ សេវាកម្មជួសជុលនិងថែទាំ អាកាសយាន និងសេវាកម្មដឹកជញ្ជូនទំនិញតាមផ្លូវអាកាស។
យុទ្ធសាស្ត្រនេះក៏ផ្តោទៅលើការប្រកួតប្រជែងស្មើភាព,ការសម្របសម្រួល និងការប្រើប្រាស់បច្ចេកវិទ្យា, សមាហរណកម្មគោលនយោបាយជាតិនេះ ជាមួយនឹងគោលនយោបាយទេសចរណ៍ ពាណិជ្ជកម្ម និងវប្បធម៌, និងការពង្រឹងគុណភាពសេវាកម្មនិងកិច្ចគាំពារអ្នកដំណើរតាមផ្លូវអាកាស។
លោក ម៉ៅ ហាវណ្ណាល់ បានថ្លែងថា គោលនយោបាយនេះនឹងបន្តអនុវត្តនូវគោលនយោបាយ «បើកចំហជើងមេឃ» ដែលអតីតនាយករដ្ឋមន្ត្រី (លោក ហ៊ុន សែន) បានដាក់ចេញកាលពីឆ្នាំ១៩៩៩។ គោលនយោបាយនេះនឹងបន្តជួយគាំទ្រកាន់តែរឹងមាំបន្ថែមទៀតដល់លទ្ធផលជាវិជ្ជមាន នៃការដឹកជញ្ជូនតាមផ្លូវអាកាសនៅកម្ពុជា ក្នុងឆ្នាំ២០២៤កន្លងទៅ។
លោកថ្លែងថា៖ «រដ្ឋលេខាធិការដ្ឋានអាកាសចរណ៍ស៊ីវិល សូមគោរពស្នើសុំការពិនិត្យនិងឯកភាពពីគណៈរដ្ឋមន្ត្រី ក្នុងសម័យប្រជុំពេញអង្គនាថ្ងៃនេះ ដើម្បីដាក់ឱ្យអនុវត្តជាផ្លូវការនូវ «គោលនយោបាយជាតិស្តីពីការដឹកជញ្ជូនតាមផ្លូវអាកាសឆ្នាំ២០២៥- ២០៣៥» ដោយសង្ឃឹមយ៉ាងមុតមាំថា វិស័យដឹកជញ្ជូនតាមផ្លូវអាកាសនៅកម្ពុជា នឹងមានការ រីកចម្រើនយ៉ាងខ្លាំង ជំរុញការតភ្ជាប់ទីផ្សារអាកាសចរណ៍ក្នុងស្រុកនិងអន្តរជាតិ និងធានា បាននូវចីរភាពនៃការអភិវឌ្ឍសង្គមនិងសេដ្ឋកិច្ចកម្ពុជា»។
គិតត្រឹមឆ្នាំ២០២៤ កម្ពុជាសម្រេចបានការតភ្ជាប់ជើងហោះហើរអន្តរជាតិទៅកាន់១២ប្រទេស និងតំបន់រដ្ឋបាលពិសេស ហុងកុង និងកោះតៃវ៉ាន់ និងភ្ជាប់ជើងហោះហើរទៅកាន់រាជធានី ឬ ទីក្រុងចំនួន ៣៤ ក្នុងតំបន់និងសកលលោក តាមរយៈក្រុមហ៊ុនអាកាសចរណ៍ជាតិ និងអន្តរ ជាតិសរុបចំនួន ៣១ក្រុមហ៊ុន។
កាលពីឆ្នាំមុន អ្នកដំណើរតាមផ្លូវអាកាសមានចំនួន ៦,២៤ លាននាក់ ក្នុងកំណើន ២២% និងទំនិញតាមផ្លូវអាកាសចំនួន ៧៧,៨ ពាន់ តោន កំណើន៤០% ធៀបនឹងឆ្នាំ២០២៣។ នេះបើតាមលោក ម៉ៅ ហាវណ្ណាល់ ដដែល៕
