លោកនាយករដ្ឋមន្ត្រី ហ៊ុន ម៉ាណែត ថ្លែងថា ការដំឡើងពន្ធរបស់សហរដ្ឋអាមេរិកលើទំនិញនាំចូល បង្ហាញថា សហរដ្ឋអាមេរិកបាននិងកំពុងខាតបង់ច្រើនលើការនាំចូលទំនិញពីបណ្តាប្រទេសលើពិភពលោក ដែលឆ្លុះបញ្ចាំងតាមរយៈឱនភាពជញ្ជីងពាណិជ្ជកម្ម។
លោកបន្តថា ដូច្នេះហើយបានជារដ្ឋបាលប្រធានាធិបតី ដូណាល់ ត្រាំ បានប្រកាសដាក់ចេញនូវអត្រាពន្ធនាំចូលឆ្លើយតប លើបណ្តាប្រទេសដែលសហរដ្ឋអាមេរិកមានឱនភាពជញ្ជីងពាណិជ្ជកម្ម។ នេះបើយោងតាមសេចក្ដីប្រកាសព័ត៌មានស្ដីពីលទ្ធផលនៃកិច្ចប្រជុំគណៈរដ្ឋមន្ត្រីនៅថ្ងៃទី៤ ខែមេសានេះ។
កាលពីថ្ងៃទី២ ខែមេសា ប្រធានាធិបតីសហរដ្ឋអាមេរិក ដូណាល់ ត្រាំ បានសម្រេចដំឡើងពន្ធសម្រាប់ទំនិញនាំចូលពីកម្ពុជា ៤៩% ដោយសារតែឱនភាពជញ្ជីងពាណិជ្ជកម្មរវាងសហរដ្ឋអាមេរិកមានគម្លាតធំ ពោលគឺកម្ពុជានាំចេញទៅអាមេរិកក្នុងទំហំទឹកប្រាក់ធំជាងអាមេរិកនាំចេញមកកម្ពុជាក្នុងកម្រិតមួយដ៏ធំ។
សេចក្ដីប្រកាសព័ត៌មានបានបញ្ជាក់ថា៖ « រាជរដ្ឋាភិបាលកម្ពុជានឹងចរចាជាមួយសហរដ្ឋអាមេរិកដើម្បីរកដំណោះស្រាយសមស្របណាមួយ។ សម្តេចធិបតី បន្តថា បញ្ហានេះអាចបង្កផលប៉ះពាល់មួយចំនួនដោយចៀសមិនរួចមកលើកម្ពុជា ប៉ុន្តែវាមិនអាក្រក់ដូចអ្វីដែលអ្នកលេងបណ្តាញសង្គមមួយចំនួនខំប្រឹងស្រែកបំភ័យនោះឡើយ។ ក្នុងន័យនេះ សម្តេចបានអំពាវនាវសូមឱ្យប្រជាពលរដ្ឋ ស្ងប់ចិត្ត ហើយជឿជាក់លើរាជរដ្ឋាភិបាល ក្នុងការដោះស្រាយបញ្ហានេះ»។
នៅជិតខាងកម្ពុជា ប្រទេសឡាវ និងវៀតណាម ត្រូវទទួលរងនូវអត្រាពន្ធនាំចូលក្នុងកម្រិត ៤៨%, និង៤៦% រៀងគ្នា ដោយសារសហរដ្ឋអាមេរិកមានឱនភាពជញ្ជីងពាណិជ្ជកម្មក្នុងកម្រិត ៩៥% ជាមួយឡាវ និង ៩០% ជាមួយវៀតណាម។
សេចក្ដីប្រកាសព័ត៌មានបន្តថា៖ «ដូច្នេះ ការដាក់អត្រាពន្ធនាំចូលឆ្លើយតបនេះ មិនមែនជាការឆ្លើយតបទៅនឹងអត្រាពន្ធនាំចូលដែល ប្រទេសទាំងនោះបានដាក់លើទំនិញនាំចូលពីសហរដ្ឋអាមេរិកនោះទេ ហើយការដាក់អត្រាពន្ធនាំចូលឆ្លើយតបនេះ ទៀតសោត មានតែ ៥០% នៃអត្រាដែលសហរដ្ឋអាមេរិកមានឱនភាពជញ្ជីងពាណិជ្ជកម្មជាមួយប្រទេសទាំងនោះតែប៉ុណ្ណោះ៕
.jpg)
