គម្រោងពន្លឿនទីផ្សារគ្រប់គ្រងកាកសំណល់រឹង (WaMA) ពង្រីកសេវាកម្មប្រមូលសំរាមពីប្រមាណជាង ២ពាន់គ្រួសារជារៀងរាល់សប្តាហ៍ ដែលកើនឡើងប្រមាណជាង ៤០០ភាគរយ។ រូបថត សហការី
ភ្នំពេញ៖ សេវាប្រមូលសំរាមតាមលំនៅដ្ឋាន ទើបដាក់ឱ្យដំណើរការទៅកាន់ភូមិជនបទជាច្រើននៅក្នុងស្រុកបរិបូណ៌ ខេត្តកំពង់ឆ្នាំង ដើម្បីការពារបរិស្ថានបឹងទន្លេសាប។
ត្រឹមរយៈពេលប្រាំមួយខែដំបូងប៉ុណ្ណោះ ក្រោមការគាំទ្ររបស់អង្គការអោយឱអ៊ី (iDE) តាបរយៈគម្រោងពន្លឿនទីផ្សារគ្រប់គ្រងកាកសំណល់រឹង (WaMA) លោក ឡាំ សំណាង ដែលជាអ្នកផ្តល់សេវាប្រមូលសំរាមនៅក្នុងស្រុក កំពុងពង្រីកសេវាកម្មប្រមូលសំរាមពីប្រមាណជាង ២ពាន់គ្រួសារជារៀងរាល់សប្តាហ៍។ នេះមានន័យថា អតិថិជន បានកើនឡើងប្រមាណជាង ៤០០ភាគរយ។
យោងតាម iDE Cambodia បានឱ្យដឹងថា៖ «គម្រោងនេះ បង្កើតឡើងក្នុងគោលបំណង ការពារកាកសំណល់រាប់តោន ពីការហូរចូលទៅក្នុងបឹងទន្លេសាបដែលជា ប្រព័ន្ធអេកូឡូស៊ីដ៏សំខាន់របស់កម្ពុជា»។
តំបន់បឹងទន្លេសាប ដែលត្រូវបានទទួលស្គាល់ជាឋបនីយជីវមណ្ឌលដោយ អង្គការយូណេស្កូ ជាមួយនឹងសក្តានុពលទេសចរណ៍ដ៏ធំធេង ក៏ជាកន្លែងផ្គត់ផ្គង់ជីវភាពប្រជាជនកម្ពុជាប្រមាណជាង បីលានគ្រួសារ និងជាប្រភពប្រូតេអ៊ីនប្រហណ៦០ភាគរយ សម្រាប់ប្រជាជននៅទូទាំងប្រទេស។
ទោះជាយ៉ាងណាក៏ដោយ បណ្តាផ្លូវទឹកនៃបឹងទន្លេសាប ឬដៃទន្លេត្រូវបានគំរាមកំហែងដោយកាកសំណល់ពីសហគមន៍ជុំវិញដែលត្រូវបានចាក់ និងហូរចូលទៅក្នុងបឹងទន្លេសាប បង្កើនការបំពុលទឹក និងធ្វើឱ្យគ្រោះថ្នាក់ដល់ធនធានក្នុងស្រុកដ៏វិសេសវិសាលនេះ។
iDE Cambodia បានបន្ដថា៖ «ប្រជាជនកម្ពុជាប្រមាណ ៧៥ភាគរយ រស់នៅតំបន់ជនបទ។ តំបន់ជនបទភាគច្រើន មិនមានសេវាប្រមូលសំរាមតាម លំនៅដ្ឋាននៅឡើយទេ។ កាកសំណល់ត្រឹមតែ ៤ភាគរយប៉ុណ្ណោះដែលត្រូវបានកែច្នៃឡើងវិញនៅទូទាំងប្រទេសហេតុ នេះហើយ គ្រួសារ អាជីវកម្ម ក៏ដូចជាសហគមន៍ជនបទកែងតែងាកទៅរកមធ្យោបាយចោលសំរាមដែលមិនមាន សុវត្ថិភាព និងគ្មាននិរន្តរភាពដូចជា ការដុត កប់ ឬចាក់ចោលនៅទីវាល»។
លោក ថៃល័រ កូហ្សូល នាយកកម្មវិធីទឹក និងអនាម័យ នៅ iDE កម្ពុជា បានលើកឡើងថា៖ «ការគ្រប់គ្រងកាក សំណល់រឹង (SWM) និងការពង្រីកសេវាកម្មប្រមូលសំរាមនេះ នៅតាមតំបន់ជនបទជាការងារដ៏សំខាន់បំផុតដើម្បី បំពេញទៅនឹងតម្រូវការដែលកំពុងកើនឡើង និងដ៏បន្ទាន់មួយ ដើម្បីប្រមូលសំរាម និងធានាថាទន្លេសាបស្អាត ការពារ សុខភាពមនុស្ស និងការពារសំរាមមិនឱ្យនៅរាយប៉ាយក្នុងបិរស្ថាន»។
គម្រោងសេវាប្រមូលសំរាមនេះ បង្កើតឡើងក្នុងគោលបំណង ការពារកាកសំណល់រាប់តោន ពីការហូរចូលទៅក្នុងបឹងទន្លេសាបដែលជា ប្រព័ន្ធអេកូឡូស៊ីដ៏សំខាន់របស់កម្ពុជា។ រូបថត សហការី
ការសិក្សាទីផ្សារមួយរបស់អង្គការ iDE កាលពីឆ្នាំ ២០២៣ បានបង្ហាញពីតួលេខដ៏សំខាន់អំពីគ្រួសារដែលចង់បាន សេវាប្រមូលសំរាម និងមានឆន្ទៈបង់ថ្លៃសេវាកម្មមួយនោះ។ ប្រហែល ៦៩ភាគរយ នៃគ្រួសារទាំងអស់ដែលបានចូលរួមក្នុង ការស្ទង់មតិ មានសាច់ប្រាក់នៅក្នុងដៃ និងមានឆន្ទៈបង់ថ្លៃសេវាចំនួន ១ម៉ឺនរៀលក្នុងមួយខែសម្រាប់សេវា ប្រមូលកាកសំណល់រឹងរបស់ពួកគេ។
ជាដំបូង iDE បានប្រមូលទិន្នន័យ ប្រតិបត្តិការសំខាន់ៗ ដើម្បីបង្កើតយុទ្ធសាស្ត្រពង្រីកសេវាកម្មមួយដែលអាចធានាបាននូវផលចំណេញទាំងផ្នែក ហិរញ្ញវត្ថុ និងធានាអំពីប្រសិទ្ធភាពនៃប្រតិបត្តិការប្រមូលសំរាមទាំងមូល។
ក្នុងនោះរួមមាន ការគូសផែនទីអតិថិជន ដើម្បីរៀបចំផែនការផ្លូវ ការប្រមូលព័ត៌មានអតិថិជនដើម្បីបង្កើតប្រព័ន្ធតាមដានការទូទាត់ និងទិន្នន័យសំខាន់ៗផ្សេងទៀត ដើម្បីបង្កើនប្រសិទ្ធភាពសេវាកម្ម និងនិរន្តរភាពយូអង្វែង។
បន្ទាប់មក iDE បានផ្តល់វគ្គបណ្តុះបណ្តាល ព្រមទាំងការបង្វឹកដល់លោក ឡាំ សំណាង និងក្រុមការងាររបស់គាត់ដើម្បីពង្រឹងសមត្ថភាពរបស់ពួកគេលើចំណុច សំខាន់ៗរួមមាន៖ ការរក្សាទុក និងធ្វើកំណត់ត្រាចំណាយចំណូល ការកំណត់កាលវិភាគប្រមូលសំរាមផ្លូវការ ការ បង្កើតបញ្ជីអតិថិជនឱ្យបានត្រឹមត្រូវ ការរៀបចំរចនាសម្ព័ន្ធផ្លូវដែលងាយស្រួលក្នុងការប្រមូលសំរាម និងប្រព័ន្ធ តាមដាន និងប្រមូលការទូទាត់ពីរអតិថិជន។
លោក កូហ្សូល បន្ដថា៖ «ដើម្បីពង្រីកសេវាប្រមូលសំរាមជាផ្លូវការមួយ ការលើកទឹកចិត្តគ្រួសារជនបទឱ្យ បង់ថ្លៃសេវាកម្មជាកត្តាសំខាន់។ ដូច្នេះ យើងបានបណ្តុះបណ្តាលក្រុមភ្នាក់ងារលក់ដើម្បីផ្សព្វផ្សាយលក់សេវានេះ ព្រមទាំងផ្តល់ចំនេះដឹង និងផ្លាស់ប្តូរឥរិយាបថគ្រួសារជនបទនីមួយៗចំពោះការគ្រប់គ្រងកាកសំណល់របស់ខ្លួន»។
លោកបានលើកឡើងថា៖ «ទន្ទឹមនឹងនេះដែរ អ្នកផ្តល់សេវាកម្មប្រមូលសំរាម ចាំបាច់ត្រូវតែបង្កើតទំនុកចិត្តពីសំណាក់ អតិថិជនតាមរយៈការ ផ្តល់សេវាដែលអាចជឿទុកចិត្តបាន មានរចនាសម្ព័ន្ធកំណត់តម្លៃត្រឹមត្រូវ និងទុកចិត្តបាន ព្រមទាំងការប្រមូលការ ទូទាត់ប្រកបដោយប្រសិទ្ធភាពផងដែរ»។
គម្រោង WaMA របស់ iDE ក្រោមការគាំទ្ររូបគ្នាដោយសហភាពអឺរ៉ុប សាសនាចក្រនៃព្រះយេស៊ូវគ្រីស្ទនៃ ពួកបរិសុទ្ធថ្ងៃចុងក្រោយ និងមូលនិធិច្នៃប្រឌិតរបស់ លោក Paul Polak នៃ iDE ផ្ទាល់ គឺមានគោលបំណង ពង្រីកសេវាប្រមូលសំរាមសម្រាប់គ្រួសារជនបទចំនួន ៣ពាន់គ្រួសារ នៅក្នុងស្រុកបរិបូណ៌ ខេត្តកំពង់ឆ្នាំងជាមួយ នឹងផែនការពង្រីកទៅកាន់ខេត្តផ្សេងទៀតនាពេលអនាគត។
iDE កំពុងកៀរគរធនធាន និងស្វែងរកការគាំទ្រ សម្រាប់ដំណោះស្រាយប្រកបដោយនិរន្តរភាពមួយ នោះគឺការគ្រប់គ្រងកាកសំណល់រឹង ដែលនឹងរួមចំណែកធ្វើឱ្យ ប្រសើរឡើងនូវសុខភាព ជីវភាពរស់នៅ និងសេចក្តីថ្លៃថ្នូរសម្រាប់គ្រួសារកម្ពុជា៕
