ភ្ញៀវទេសចរកម្សាន្តតាមទូកនៅតាមដងទន្លេក្នុងទីក្រុងភ្នំពេញ។ រូបថតហ្វេសប៊ុក
អ្នកជំនាញក្នុងវិស័យទេសចរណ៍ចាត់ទុក ទន្លេមេគង្គ និង ទន្លេសាប ថាជាគ្រាប់ពេជ្រមិនទាន់ច្នៃរបស់កម្ពុជា និងគាំទ្រគំនិតផ្ដួចផ្ដើមក្នុងការកសាងកំពង់ផែនៅតាមដងទន្លេទាំងនេះសម្រាប់បម្រើដល់វិស័យទេសចរណ៍ និងការដឹកជញ្ជូន។
អន្តរក្រសួងនៅថ្ងៃទី៨ ខែមេសានេះ បានបើកកិច្ចប្រជុំពិភាក្សាលើការសាងសង់កំពង់ផែមួយចំនួននៅតាមដងទន្លេមេគង្គ និងទន្លេសាប ដើម្បីជំរុញសកម្មភាពសេដ្ឋកិច្ច និងជំរុញវិស័យទេសចរណ៍ ដែលរួមចំណែកបង្កើនកម្រិតជីវភាពរស់នៅរបស់ប្រជាពលរដ្ឋនៅតាមដងទន្លេទាំងពីរ និងរួមចំណែកក្នុងការអភិវឌ្ឍសេដ្ឋកិច្ចជាតិ។
កិច្ចប្រជុំនេះដឹកនាំដោយលោក សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដោយមានការចូលរួមពីក្រសួងធនធានទឹកនិងឧតុនិយម ក្រសួងទេសចរណ៍ ក៏ដូចជាស្ថាប័ន្ធពាក់ព័ន្ធនិងវិស័យឯកជន។
យោងតាមក្រសួងធនធានទឹក អន្តរក្រសួងនឹងរៀបចំយុទ្ធសាស្ត្រយូរអង្វែង ដើម្បីកៀរគរវិនិយោគ និងបង្កើនចំណូលពីតំបន់ដងទន្លេមេគង្គ និងបឹងទន្លេសាប តាមរយៈសាងសង់ផែមួយចំនួនតាមដងទន្លេទាំងពីរនេះ។
យ៉ាងណាក៏ដោយ មិនទាន់មានព័ត៌មានលម្អិតអំពីការសម្រេចទៅលើចំនួន និងទីតាំងដែលនឹងត្រូវសាងសង់នៅឡើយទេ។ ប៉ុន្តែ អ្នកជំនាញក្នុងវិស័យទេសចរណ៍បានគាំទ្រគំនិតផ្ដួចផ្ដើមនេះ និងចាត់ទុកទន្លេទាំងពីរថាជាគ្រាប់ពេជ្រមិនទាន់ច្នៃរបស់កម្ពុជា។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិចប្រចាំប្រទេសកម្ពុជា ដែលបានចូលរួមក្នុងកិច្ចប្រជុំនេះ បានប្រាប់ភ្នំពេញប៉ុស្តិ៍ថា៖ «គម្រោងនេះល្អខ្លាំងណាស់ ខ្ញុំពេញចិត្តមែនទែន។ វាជាផែនការមួយផ្ដល់ក្ដីសង្ឃឹមដល់អ្នករស់នៅតាមដងទន្លេមេគង្គនិងទន្លេសាប។ គម្រោងនេះមានសក្ដានុពល និងមានអត្ថន័យធំធេងមែនទែន។ លោកឧបនាយករដ្ឋមន្ត្រី សាយ សំអាល់ លើកឡើងថា នឹងប្រែក្លាយកម្ពុជាឲ្យទៅជាដែនដីសុវណ្ណភូមិពិតប្រាកដ។ យើងដឹងហើយថា ទន្លេសាប និងទន្លេមេគង្គនេះគឺជាសម្បត្តិដ៏មហាសាល ដែលយើងចាត់ទុកថា ជាគ្រាប់ពេជ្រមិនទាន់កែច្នៃ ដែលមានអ្វីៗទាំងអស់»។
លោកយល់ថា គម្រោងនេះនឹងបង្កើតឲ្យមានកសិទេសចរណ៍ និងទេសចរណ៍ធម្មជាតិ, ទេសចរណ៍ក្នុងភាពជាខ្មែរដែលមានប្រពៃណី វប្បធម៌ សាសនា សិល្បៈ សិប្បកម្ម របស់ពលរដ្ឋក្នុងមូលដ្ឋាន, និងទេសចរណ៍វប្បធម៌ និងប្រវត្តិសាស្ត្រ។
លោក ស៊ីណាន បន្តថា ផែនការនេះលើសពីទេសចរណ៍ទៅទៀត ដោយសារតែសព្វថ្ងៃនេះ កម្ពុជាបានបោះបង់ទន្លេចោល ហើយប្រើតែមធ្យោបាយផ្លូវគោក។ ដូច្នេះ ការអភិវឌ្ឍគម្រោងនេះនឹងជំរុញវិស័យទេសចរណ៍ និងបង្កើនការដឹកជញ្ជូនតាមផ្លូវទឹកសម្រាប់វិស័យផ្សេងៗ ជាពិសេសផលិតផលកសិកម្ម និងជួយកាត់បន្ថយគ្រោះថ្នាក់ចរាចរណ៍ដែលកើតឡើងនៅលើផ្លូវគោក។
លោកថ្លែងថា៖ «ដូច្នេះ វាលើសពីទេសចរណ៍ ព្រោះវាបង្កើនទិន្នផលក្នុងស្រុក បង្កើនការដឹកជញ្ជូន និងធ្វើឲ្យតម្លៃដឹកជញ្ជូនធ្លាក់ចុះ ដែលធ្វើឲ្យមានការប្រកួតប្រជែងគ្នាលើផលិតផលកសិកម្ម»៕
.jpg)
