លោក ហ៊ុន ម៉ាណែត ប្រកាសដាក់ឱ្យអនុវត្ត «កម្មវិធីពិសេសជំរុញការវិនិយោគក្នុងខេត្តទាំង៤ នៅភាគឦសាន» នៅថ្ងៃទី៩ ខែមេសា។ FN
លោកនាយករដ្ឋមន្ត្រី ហ៊ុន ម៉ាណែត ប្រាប់អាជ្ញាធរនៅខេត្តទាំង ៤នៅតំបន់ភូមិភាគឦសាន ដែលមានខេត្តរតនគិរី មណ្ឌលគិរី ក្រចេះ និងស្ទឹងត្រែង ឲ្យពង្រឹងសន្តិសុខ និងទប់ស្កាត់ការប្រព្រឹត្តបទល្មើសនានាដែលបង្កអសន្តិសុខ ជាពិសេសបទល្មើសឆបោកតាមបច្ចេកវិទ្យា។
លោកថ្លែងក្នុងពិធីប្រកាសដាក់ឱ្យអនុវត្ត «កម្មវិធីពិសេសជំរុញការវិនិយោគក្នុងខេត្តទាំង៤ នៅភាគឦសាន» នៅថ្ងៃទី៩ ខែមេសានេះថា៖ «កិច្ចការងារនេះត្រូវប្រយ័ត្ន ខេត្តយើងទាំង ៤ ទោះបីជាតាំងពី១៩៩៩មក យើងអភិវឌ្ឍកវែកកឆ្នាំ បានប៉ុននេះ អត់មានពឹងទៅលើបទល្មើសបច្ចេកវិទ្យាទេ។ អីចឹង យើងរស់តទៅទៀតដោយមិនចាំបាច់ពឹងទៅលើអាហ្នឹងទេ»។
លោកបន្តថា ការវិនិយោគនៅតំបន់នេះត្រូវតែជាការវិនិយោគពិត លើវិស័យពិត មិនមានពាក់ព័ន្ធនឹងសកម្មភាពខុសច្បាប់ និងមិនពាក់ព័ន្ធទៅដល់បញ្ហាសន្តិសុខ។ លោកប្រៀបធៀបបទល្មើសតាមបច្ចេកវិទ្យាទៅនឹងការដាំដំឡូងមី ដែលងាយរាលដាល ធ្វើឲ្យខូចកេរ្តិ៍ឈ្មោះខេត្តនៅភូមិភាគឦសាន។
លោកថ្លែងថា៖ «រឿងសន្តិសុខដូចជាបទល្មើសបច្ចេកវិទ្យានេះ វាដូចដំឡូងមី បានន័យថាវារាល វាឆាប់បានផលជាងស្វាយចន្ទី ប៉ុន្តែដាំទៅវាហិលដី វាខូចដីហ្នឹងតែម្ដង។ បើសិនជាពឹងផ្អែកទៅលើវត្តមាននៃការឆបោកតាមបច្ចេកវិទ្យា ហើយថានេះជាការចិញ្ចឹមទីផ្សារ កុំឲ្យសោះ។ ខេត្តនីមួយៗធ្លាប់រស់បានហើយ តាមរយៈទេសចរណ៍ធម្មជាតិ និងស្អីផ្សេងៗ យើងបន្តធ្វើបែបនេះ ដូចជាកសិកម្ម ស្អីៗផ្សេងៗ។ [ករណីឆបោកតាមអនឡាញ] អាចមានវត្តមាន។ ដូច្នេះសូមឲ្យខេត្តទាំង ៤នេះយកចិត្តទុកដាក់លើកិច្ចការងារនេះ»។
កម្មវិធីពិសេសជំរុញការវិនិយោគក្នុងខេត្តទាំងបួន នៅភូមិភាគឦសាន ត្រូវបានប្រកាសចេញក្នុងគោលដៅជំរុញការពង្រីកមូលដ្ឋានសេដ្ឋកិច្ចក្នុងបណ្តាខេត្តភាគឦសាន តាមរយៈការជំរុញ វិនិយោគឯកជន ក៏ដូចជាជំរុញការតភ្ជាប់នៃចរន្តសេដ្ឋកិច្ចជាតិឱ្យកាន់តែរឹងមាំ និងប្រកបដោយបរិយាប័ន្ន។
លោកថ្លែងថា កម្មវិធីពិសេសរបស់រាជរដ្ឋាភិបាលនេះ កើតចេញពីមហិច្ឆតា ចង់ជំរុញបង្កើននូវសកម្មភាពសេដ្ឋកិច្ច ដល់បណ្ដាខេត្តដែលស្ថិតនៅឆ្ងាយពីមជ្ឈមណ្ឌលកំណើន ក៏ដូចជា ដើម្បីធ្វើពិពិធកម្មសេដ្ឋកិច្ច។
លោកនាយករដ្ឋមន្ត្រី ប្រាប់ឲ្យអាជ្ញាធរឲ្យការពារការវិនិយោគស្របច្បាប់ និងត្រឹមត្រូវ ដោយមិនរើសអើងថាជាអ្នកវិនិយោគមកពីណាទេ ឲ្យតែពួកគេគោរពតាមច្បាប់វិនិយោគរបស់កម្ពុជា និងផ្ដល់ផលចំណេញវិជ្ជមានដល់ប្រជាពលរដ្ឋកម្ពុជា បង្កើនសក្ដានុពលខេត្ត បង្កើតរូបភាពវិជ្ជមាន ដើម្បីបង្កើតចំណូល ស្ថិរភាពនិងសន្តិសុខរយៈពេលវែង ដែលធ្វើឲ្យប្រជាពលរដ្ឋក្នុងខេត្តទាំង ៤រីកលូតលាស់។
កាលពីកន្លងទៅ បទល្មើសតាមបច្ចេកវិទ្យា ឬ ការឆបោកតាមអនឡាញត្រូវបានសមត្ថកិច្ចបង្ក្រាបបាននៅខេត្តព្រះសីហនុ កំពត កណ្ដាល ស្វាយរៀង និងក្រុងប៉ោយប៉ែតខេត្តបន្ទាយមានជ័យ និងភ្នំពេញ។
ប៉ុន្តែ កាលពីខែមីនា ទីតាំងប្រព្រឹត្តបទល្មើសឆបោកតាមអនឡាញរបស់ជនបរទេស បានទៅដល់ខេត្តមណ្ឌលគិរី ដោយសមត្ថកិច្ចបានឃាត់ខ្លួនជនបរទេស២៥៨នាក់ មានជនជាតិចិន ម៉ាឡេស៊ី មីយ៉ាន់ម៉ា និងវៀតណាម។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ថ្លែងក្នុងពិធីប្រកាសកម្មវិធីពិសេស។ FN
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុបានថ្លែងថា កម្មវិធីពិសេសសម្រាប់ខេត្តភាគឦសានត្រូវបានដាក់ចេញដើម្បីកែប្រែមុខមាត់ខេត្តទាំងបួន ឱ្យទៅជាខេត្តដែលមានមូលដ្ឋានសេដ្ឋកិច្ចពឹងផ្អែកលើកសិកម្ម, កសិ-ឧស្សាហកម្ម និងទេសចរណ៍, និងដើម្បីដោះស្រាយបញ្ហាប្រឈមជាក់ស្តែងដែលនាំមកនូវលទ្ធផលឆាប់រហ័ស តាមរយៈការវិនិយោគឯកជន។
លោកបន្តថា កម្មវិធីនេះក៏នឹងជំរុញសហថាមពលដែលកើតចេញពីការប្រមូលផ្តុំ ដើម្បីឈានទៅ អភិវឌ្ឍសេដ្ឋកិច្ចមាត្រដ្ឋាន (economic of scale) ជាជាងការវិនិយោគដែលមានលក្ខណៈរាយប៉ាយ និងមិនអាចផ្សារភ្ជាប់គ្នាបាន។
លោកបន្តថា ការវិនិយោគឯកជននៅខេត្តទាំង៤ នឹងទទួលបានការគាំទ្រផ្នែកពន្ធដារ និងពន្ធគយ, ការទទួលបានហិរញ្ញប្បទានក្រោមអត្រាការប្រាក់សមរម្យ និង ជួយកាត់បន្ថយថ្លែងដើមផលិតកម្ម ការសម្រួលនីតិវិធី និងការគាំទ្រសកម្មភាពវិនិយោគឯកជន៕
.jpg)
