ជប៉ុន ផ្តល់ជំនួយជាង ៨០ ម៉ឺនដុល្លារ សម្រាប់គម្រោងបោសសម្អាតមីន សង់អគារសិក្សា និងផ្នែកកសិកម្ម។ ស្ថានទូតជប៉ុនប្រចាំកម្ពុជា
រដ្ឋាភិបាលជប៉ុន បានផ្តល់ជំនួយជាថវិកាជិត ៨៣ ម៉ឺនដុល្លារអាមេរិក ដល់ស្ថាប័នទទួលជំនួយចំនួន ៣ ដើម្បីជួយលើសកម្មភាពបោសសម្អាតមីន សាងសង់អគារបឋមសិក្សា និងការកែលម្អប្រតិបត្តិការកសិកម្មក្នុងខេត្តចំនួន៥ រួមមាន ខេត្តពោធិ៍សាត់ កំពង់ធំ សៀមរាប បាត់ដំបង់ និងខេត្តរតនគិរី។
សេចក្តីប្រកាសរបស់ស្ថានទូតជប៉ុនប្រចាំកម្ពុជា បានឱ្យដឹងថា កាលពីថ្ងៃទី១៥ ខែកុម្ភៈ លោក អ៊ូអិណុ អាត់ស៊ូស៊ី ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំកម្ពុជា និងអ្នកតំណាងមកពីស្ថាប័នទទួលជំនួយនីមួយៗទាំង៣ បានចុះហត្ថលេខាលើកិច្ចសន្យាផ្តល់ជំនួយឥតសំណងនេះ។
ស្ថានទូតជប៉ុនបន្តថា៖«ជំនួយឥតសំណងសរុបចំនួន ៨២៨,៥៤៦ ដុល្លារអាមេរិក គឺក្រោមគ្រោងការណ៍ ជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ (ជំនួយឥតសំណងគូសាណូណិ)។
គម្រោងដែលបានចុះហត្ថលេខានោះរួមមាន សម្រាប់គម្រោងទី១ ដែលអនុវត្តដោយមជ្ឈមណ្ឌលសកម្មភាពកំចាត់មីនកម្ពុជា រដ្ឋាភិបាលជប៉ុនផ្តល់ថវិកាចំនួន ៥១៥ ០៦០ ដុល្លារ សម្រាប់ការពន្លឿន និងការបង្កើនប្រសិទ្ធភាពនៃសកម្មភាពបោសសម្អាតមីន ដោយដំឡើងកម្មវិធីសម្រាប់ប្រព័ន្ធសកម្មភាពមីន ផ្អែកលើបញ្ញាសិប្បនិម្មិត (AI) ក្នុងខេត្តពោធិ៍សាត់ ខេត្តកំពង់ធំ និងខេត្តសៀមរាប។
គម្រោងនេះ រំពឹងថានឹងផ្តល់អត្ថប្រយោជន៍ដល់ប្រជាពលរដ្ឋប្រមាណ ២ ម៉ឺននាក់ក្នុងខេត្តទាំង៣។
សម្រាប់គម្រោងទី២ ដែលអនុវត្តដោយមន្ទីរអប់រំ យុវជន និងកីឡាខេត្តបាត់ដំបង រដ្ឋាភិបាលជប៉ុនផ្តល់ថវិកាចំនួន ៨៨៩០០ ដុល្លារ សម្រាប់ការសាងសង់អគារសិក្សា ១ ខ្នង ៥ បន្ទប់ ដោយបំពាក់គ្រឿងសង្ហារិមដែលចាំបាច់ នៅសាលាបឋមសិក្សាពីងពង់ ក្នុងខេត្តបាត់ដំបង។ គម្រោងនេះរំពឹងថា នឹងផ្តល់អត្ថប្រយោជន៍ដល់សិស្សចំនួន ១៦៦ នាក់ តាមរយៈការកែលម្អឱ្យកាន់តែប្រសើរឡើងនូវគុណភាពអប់រំ។
សម្រាប់គម្រោងទី៣ ដែលអនុវត្តដោយមន្ទីរកសិកម្ម រុក្ខាប្រមាញ់ និងនេសាទខេត្តរតនគិរី រដ្ឋាភិបាលជប៉ុនផ្តល់ថវិកាចំនួន ២២៤៥៨៦ ដុល្លារ សម្រាប់ការសាងសង់ឃ្លាំង និងកន្លែងសម្ងួត ក៏ដូចជា ដំឡើងឧបករណ៍វាស់សំណើម និងម៉ាស៊ីនចាត់ថ្នាក់សម្រាប់សហគមន៍កសិកម្ម ចំនួន ៤ ក្នុងខេត្តរតនគិរី។
គម្រោងនេះ រំពឹងថានឹងផ្តល់អត្ថប្រយោជន៍ដល់កសិករប្រមាណ ២០០ នាក់ ដោយការពង្រឹងខ្សែសង្វាក់តម្លៃក្នុងការផលិតគ្រាប់ស្វាយចន្ទី ក៏ដូចជាការលើកកម្ពស់ប្រាក់ចំណូលរបស់កសិករ។
ឯកអគ្គរាជទូតជប៉ុន មានប្រសាសន៍នៅក្នុងសេចក្តីប្រកាសនេះដោយសង្កេតឃើញថា នាពេលថ្មីៗនេះ ប្រទេសកម្ពុជា បាននិងកំពុងអភិវឌ្ឍយ៉ាងឆាប់រហ័ស។ ទោះយ៉ាងណាលោកក៏ទទួលស្គាល់ថានៅតែមានបញ្ហាប្រឈមមួយចំនួនដែលត្រូវដោះស្រាយ ដើម្បីកែលម្អគុណភាពជីវិតរបស់ប្រជាជន។
លោកបញ្ជាក់ថា៖«ជប៉ុន នឹងបន្តចូលរួមចំណែកក្នុងការដោះស្រាយបញ្ហាប្រឈមទាំងនោះ តាមរយៈគ្រោងការណ៍ជំនួយអភិវឌ្ឍន៍ផ្លូវការផ្សេងៗ រួមទាំង ជំនួយគូសាណូណិ ផងដែរ»៕
