![](https://pppkhmer.sgp1.digitaloceanspaces.com/image/main/20248/20_8_2024_cambodia_and_indonesia_are_co_chairing_the_5th_meeting.jpg)
កម្ពុជា និងឥណ្ឌូណេស៊ីធ្វើជាសហប្រធានកិច្ចប្រជុំលើកទី៥នៃគណៈកម្មការចម្រុះកម្ពុជា-ឥណ្ឌូណេស៊ីសម្រាប់កិច្ចសហប្រតិបត្តិការទ្វេភាគី (JCBC) រវាងប្រទេសទាំងពីរ ពីថ្ងៃទី២០-២១ សីហា នៅភ្នំពេញ។ ហ្វេសប៊ុកលោក ឈឿង ចំរើន
ភ្នំពេញៈ កម្ពុជា និងឥណ្ឌូណេស៊ីពិភាក្សាអំពីគោលដៅក្នុងការធ្វើឱ្យកាន់តែទូលំទូលាយបន្ថែមទៀតនូវទំនាក់ទំនងរវាងប្រទេសទាំងពីរ នៅក្នុងកិច្ចប្រជុំលើកទី៥នៃគណៈកម្មការចម្រុះកម្ពុជា-ឥណ្ឌូណេស៊ីសម្រាប់កិច្ចសហប្រតិបត្តិការទ្វេភាគី (JCBC) ដែលប្រព្រឹត្តទៅនៅរាជធានីភ្នំពេញ ចាប់ពីថ្ងៃទី២០ ដល់ថ្ងៃទី២១ ខែសីហា។
លោក សុខ ចិន្តាសោភា ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា និងលោកស្រី Retno Marsudi រដ្ឋមន្ត្រីក្រសួងការបរទេសឥណ្ឌូណេស៊ីធ្វើជាសហប្រធាននៃកិច្ចប្រជុំនេះ។
សេចក្ដីប្រកាសព័ត៌មានក្រសួងការបរទេសកម្ពុជាបញ្ជាក់នាថ្ងៃទី១៩ សីហា ថា កិច្ចប្រជុំនេះនឹងពិនិត្យឡើងវិញនូវវឌ្ឍនភាពសំខាន់ៗដែលសម្រេចបានបន្ទាប់ពីកិច្ចប្រជុំ JCBC លើកទី៤ ដែលធ្វើឡើងកាលពីឆ្នាំ២០១៨ នៅរដ្ឋធានីហ្សាកាតា (Jakarta) និងកំណត់ទិសដៅអនាគតដើម្បីជំរុញបន្ថែមទៀតនូវទំនាក់ទំនងដ៏យូរអង្វែងរវាងប្រទេសទាំងពីរ ព្រមទាំងពង្រីកកិច្ចសហប្រតិបត្តិការ ដែលផ្ដល់ផលប្រយោជន៍ទៅវិញទៅមក។
សេចក្ដីប្រកាសព័ត៌មានបន្តថា៖ «រដ្ឋមន្ត្រីទាំងពីរ នឹងពិភាក្សាស៊ីជម្រៅអំពីគោលដៅក្នុងការធ្វើឱ្យកាន់តែទូលំទូលាយ បន្ថែមទៀតនូវទំនាក់ទំនងដែលកំពុងរីកចម្រើនលើគ្រប់វិស័យ ដូចជា ពាណិជ្ជកម្ម និងវិនិយោគ កសិកម្ម អប់រំ សុខាភិបាល ការងារ បរិស្ថាន ដឹកជញ្ជូន ទេសចរណ៍ វប្បធម៌ និងសហប្រតិបត្តិការ នយោបាយ-សន្តិសុខ»។
រដ្ឋមន្ត្រីទាំងពីរក៏នឹងពិភាក្សាអំពីការវិវឌ្ឍក្នុងតំបន់ និងបញ្ហាអន្តរជាតិដែលជាកង្វល់ និងជាផលប្រយោជន៍រួមផងដែរក្នុងកិច្ចប្រជុំនេះ។
កិច្ចប្រជុំ JCBC លើកទី៥នេះ ធ្វើឡើងស្របពេលនឹងខួបលើកទី៦៥នៃការបង្កើតទំនាក់ទំនងការទូតកម្ពុជា-ឥណ្ឌូណេស៊ី។
សេចក្តីប្រកាសព័ត៌មានបានឱ្យដឹងថា ក្នុងអំឡុងពេលស្នាក់នៅកម្ពុជា លោកស្រី Retno Marsudi គ្រោងនឹងជួបជាមួយលោកនាយករដ្ឋមន្ត្រី ហ៊ុន ម៉ាណែត។
លោក ឯក ប៊ុនលី អ្នកស្រាវជ្រាវនៃមជ្ឈមណ្ឌលខ្មែរសិក្សាកិច្ចការតំបន់ (CCRS) ថ្លែងថា កិច្ចប្រជុំ JCBC លើកទី៥នេះ បង្ហាញយ៉ាងច្បាស់ពីការផ្តោតសំខាន់របស់ប្រទេសទាំងពីរក្នុងការពង្រឹងទំនាក់ទំនងទ្វេភាគី។ របៀបវារៈដើម្បីពិនិត្យមើលវឌ្ឍនភាពនៃទំនាក់ទំនងរវាងកម្ពុជា-ឥណ្ឌូនេស៊ីគឺជាឱកាសមួយសម្រាប់ប្រទេសទាំងពីរដើម្បីពិនិត្យមើលឡើងវិញនូវគោលនយោបាយពាណិជ្ជកម្មទ្វេភាគី ជំរុញទំនាក់ទំនងរវាងប្រជាជន និងប្រជាជន និងអាចជាឱកាសសម្រាប់ពិនិត្យមើលលើផ្នែកថ្មីមួយនៃកិច្ចសហប្រតិបត្តិការសន្តិសុខរបស់ប្រទេសទាំងពីរផងដែរ។
លោកយល់ឃើញថា៖ «ទំនាក់ទំនងសន្តិសុខរវាងឥណ្ឌូណេស៊ី និងកម្ពុជា គួរតែត្រូវបានពង្រឹងបន្ថែមទៀត ព្រមគ្នាជាមួយទំនាក់ទំនងសេដ្ឋកិច្ច និងនយោបាយដែលមានស្រាប់របស់ប្រទេសទាំងពីរ។ នេះក៏ព្រោះតែឥណ្ឌូណេស៊ី គឺជាមហាអំណាចកណ្ដាលមួយដែលកំពុងកើនឡើងនូវឥទ្ធិពល ដែលអាចដើរតួនាទីយ៉ាងសំខាន់ក្នុងសន្តិសុខក្នុងតំបន់អាស៊ីអាគ្នេយ៍នាពេលអនាគត ខណៈពេលដែលកម្ពុជាកំពុងតែព្យាយាមពង្រឹងបទពិសោធន៍យោធារបស់ខ្លួនដោយមិនមានការជ្រៀតជ្រែកពីប្រទេសមហាអំណាចសកលផងដែរ»។
លោក ប៊ុនលី ពន្យល់ថា កិច្ចសហប្រតិបត្តិការផ្នែកសន្តិសុខរវាងប្រទេសទាំងពីរនឹងទំនងជាមិនសូវទាក់ទាញការចម្រូងចម្រាស និងគុណវិបត្តិពីមហាអំណាចដូចជាចិន និងសហរដ្ឋអាមេរិកនោះទេ ខណៈពេលដែលវានឹងជំរុញឱ្យប្រទេសទាំងពីរមានសក្ដានុពល និងបទពិសោធន៍សន្តិសុខទ្វេភាគីនាពេលអនាគត។
លោកប្រាប់ភ្នំពេញ ប៉ុស្តិ៍ នាថ្ងៃទី ២០ សីហា ថា៖ «ទំនាក់ទំនងទ្វេភាគីរវាងឥណ្ឌូណេស៊ី និងកម្ពុជាដំណើរការដោយមានផលប្រយោជន៍ទៅវិញទៅមក។ កម្ពុជានឹងអាចពង្រឹងភាពជាដៃគូដ៏ល្អជាមួយប្រទេសឥណ្ឌូណេស៊ី ដែលជាមេដឹកនាំជាក់ស្ដែងរបស់សហគមន៍អាស៊ាន ខណៈដែលឥណ្ឌូណេស៊ីនឹងអាចពង្រីកសក្ដានុពលរបស់ខ្លួននៅក្នុងព្រះរាជាណាចក្រកម្ពុជាជាមួយនឹងប្រទេសអាស៊ីអាគ្នេយ៍ដីគោកផ្សេងទៀត»៕