លោក ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត ថ្ងៃទី១១ ខែកុម្ភៈ។ SHS
ខណៈដែលក្រសួងយុត្តិធម៌កំពុងពិនិត្យទៅលើការធ្វើសេចក្ដីព្រាងច្បាប់ស្ដីពីការប្រឆាំងអំពើភេរវកម្ម លោក ហ៊ុន សែន បានបង្ហើបពីផែនការវាយប្រហារទៅលើគេហដ្ឋានរបស់លោក នៅទីក្រុងតាខ្មែរ ខេត្តកណ្ដាល។
លោក ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សតបានថ្លែងក្នុងពិធីសម្ពោធអគារសិក្សា និងសមិទ្ធផលនានាបរិវេណវត្តព្រះឥន្ទសាមគ្គីធម៌ ភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល ខេត្តកណ្តាល ថា កាលពីប៉ុន្មានសប្ដាហ៍កន្លងទៅ មានផែនការវាយប្រហារលើគេហដ្ឋានរបស់លោក ដោយប្រើដ្រូន។
លោកបញ្ជាក់ដែរថា ផែនការវាយប្រហារនេះបានឈានដល់ការចាប់ខ្លួនមនុស្សម្នាក់ពីខេត្តតាកែវ ដែលជាប់ពាក់ព័ន្ធ។ លោកបន្តថា ប្រសិនបើមានការបាត់ខ្លួនមនុស្សពីមូលដ្ឋាន វាច្បាស់ជាមានពាក់ព័ន្ធនឹងផែនការធ្វើភេរវកម្មនេះហើយ។
កាលពីពេលថ្មីៗនេះ លោកបានលើកឡើងពីការបង្កើតច្បាប់ស្ដីការប្រឆាំងអំពើភេរវកម្ម ដែលផ្ដោមគោលដៅលើក្រុមប្រឆាំងនៅក្រៅប្រទេស ដោយចាត់ក្រុមអ្នក«ប្រឆាំងជ្រុលនិយម» ជាភេរវករ។
លោក សេង ឌីណា អ្នកនាំពាក្យក្រសួងយុត្តិធម៌ បានប្រាប់ភ្នំពេញប៉ុស្តិ៍ថា៖ «ចំពោះការរៀបចំធ្វើច្បាប់ស្តីពីការដាក់ជាក្រុមភេរវករ នូវក្រុមជ្រុលនិយមដែលធ្វើសកម្មភាពផ្តួលរំលំរាជរដ្ឋាភិបាលស្របច្បាប់ យើងក៏កំពុងតែសិក្សាលម្អិតលើទិដ្ឋភាពច្បាប់ផងដែរ»។
គណបក្សនយោបាយមួយចំនួនបានចេញញត្តិគាំទ្រដល់ការបង្កើតច្បាប់នេះ និងបានលើកទឹកចិត្តឲ្យច្បាប់នេះចេញឲ្យបានឆាប់។
លោក យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានថ្លែងថា បើពិតជាមានផែនការវាយប្រហារលើថ្នាក់ដឹកនាំប្រទេសបែបនេះមែន វាជាការប៉ះពាល់ដល់សន្តិសុខជាតិយ៉ាងខ្លាំង ហើយកិច្ចការពារត្រូវតែពង្រឹងកាន់តែខ្លាំងផងដែរ។
លោកថ្លែងថា ការធ្វើផែនការវាយប្រហារអាចកើតឡើងបាន ពីព្រោះសូម្បីតែនៅប្រទេសរុស្ស៊ី ក៏ធ្លាប់មានដ្រូនហោះទៅដល់ដែរ ហើយនៅសហរដ្ឋអាមេរិក ក៏ធ្លាប់មានការវាយប្រហារលើអាគារពាណិជ្ជកម្មពិភពលោក និងមន្ទីរបញ្ចកោណ កាលពីឆ្នាំ២០០១ សម្លាប់មនុស្សជិត ៣០០០ពាន់នាក់។សម្រាប់លោក ហ៊ុន សែន លោកធ្លាប់រងការវាយប្រហារម្ដងហើយ កាលពីឆ្នាំ១៩៩៨ នៅខេត្តសៀមរាប ប៉ុន្តែមិនចំគោលដៅ។
លោកថ្លែងថា៖ «សន្តិសុខរបស់កម្ពុជាត្រូវតែរៀបចំក្បួនយុទ្ធសាស្ត្របន្ថែមទៀត ដើម្បីការពារថ្នាក់ដឹកនាំដែលមានគុណតម្លៃធំធេងសម្រាប់កម្ពុជា។ ការការពារសម្ដេចតេជោ គឺជាការធានានូវសន្តិភាព និងស្ថិរភាពនយោបាយរយៈពេលវែងតទៅទៀតនៅកម្ពុជា»៕
