លោកឧកញ៉ា លាង ពៅ និងថ្នាក់ដឹកនាំក្រុមហ៊ុន ខ្មែរ ប៊ែវើរីជីស នៅក្នុងពិធីសម្ពោធកាលពីថ្ងៃពុធកន្លងទៅ។ ហុង មិនា
ក្រុមហ៊ុន ខ្មែរ ប៊ែវើរីជីស កាលពីថ្ងៃពុធកន្លងទៅ បានរៀបចំសន្និសីទសារព័ត៌មាននៅឯសណ្ឋាគារ ហៃយ៉ាត់ រីជិនស៊ី ភ្នំពេញ ដើម្បីប្រកាសអំពីការដាក់លក់ផលិតផលថ្មី ដែលជាស្រាបៀរ ដ្រាហ្វ ច្រកចូលដបដំបូងបង្អស់នៅកម្ពុជា ឈ្មោះថា «ស្រាបៀរ កម្ពុជា ព្រីមៀម ដ្រាហ្វ CAMBODIA PREMIUM DRAFT BEER»។
ការប្រើប្រាស់បច្ចេកវិទ្យាទំនើប និងផ្កាហប់ពិសេសមកពីអឺរ៉ុបបានធ្វើឱ្យស្រាបៀរ កម្ពុជា ព្រីមៀម ដ្រាហ្វច្រកក្នុងដបដ៏ពិសេសនេះមានរសជាតិដ៏ឈ្ងុយឆ្ងាញ់ និងស្រស់ស្រាយ សម្រាប់អ្នកទទួលទាននៅគ្រប់ទីកន្លែងជាមួយនឹងគុណភាពដែលល្អបំផុត។
កម្មវិធីនោះត្រូវបានអញ្ជើញចូលរួមពីសំណាក់លោកឧកញ៉ា លាង ពៅ (ភីធើរ) អគ្គនាយកក្រុមហ៊ុន ខ្មែរ ប៊ែវើរីជីស ព្រមទាំងថ្នាក់ដឹកនាំក្រុមហ៊ុន ខ្មែរ ប៊ែវើរីជីស អ្នកសារព័ត៌មាន និងភ្ញៀវកិត្តិយសជាច្រើនរូបទៀត។
លោកឧកញ៉ា លាង ពៅ (ភីធើរ) អគ្គនាយកក្រុមហ៊ុន ខ្មែរ ប៊ែវើរីជីស បានមានប្រសាសន៍ថា៖ «ថ្នាក់ដឹកនាំ ខ្មែរ ប៊ែវើរីជីស តែងនាំនូវអ្វីប្លែក និងថ្មីលើសពីការរំពឹងទុករបស់អតិថិជន ដោយសម្រេចផលិតស្រាបៀរ កម្ពុជា ព្រីមៀម ដ្រាហ្វ។ អតិថិជនអាចពិសាស្រាបៀរ ដ្រាហ្វ នៅផ្ទះ និងគ្រប់ទីកន្លែងយ៉ាងងាយខុសពីសម័យមុនដែលតម្រូវឱ្យអតិថិជនទៅបារ៍ ផាប់ ឬភោជនីយដ្ឋានផ្ទាល់ទើបអាចទទួលទានស្រាបៀរ ដ្រាហ្វ បាន»។
ស្រាបៀរ កម្ពុជា ព្រីមៀម ដ្រាហ្វ ត្រូវបានផលិតឡើងដោយប្រើប្រាស់បច្ចេកវិទ្យា Flash Pasteurization និងផ្កាហប់ពិសេស (Special Hops) មានរសជាតិស្រស់បំផុត ឬ Super Fresh និងមានអាយុកាលរហូតដល់ទៅ ១៨០ ថ្ងៃ ច្រកចូលក្នុងដបពណ៌បៃតង ដែលមានឡាប៊ែលពិសេសអាចបញ្ចេញពន្លឺនៅពេលប៉ះជាមួយភ្លើង UV ក្នុងកន្លែងងងឹត ឬ Glow in the dark។
ដបដែលរចនាដ៏ប្រណីតនេះ ក៏មានសញ្ញាផ្កាយនៅកដប ដែលនឹងប្រែពណ៌ពីប្រាក់ទៅជាខៀវនៅពេលស្រាបៀរត្រជាក់ដល់កម្រិត ក៏ដូចជាមានកម្របងាយស្រួលបើក និងមានសំឡេងពីរោះ។ លក្ខណពិសេសទាំងនេះ គឺមានស្រាបៀរកម្ពុជាតែប៉ុណ្ណោះ។
លោកឧកញ៉ា លាង ពៅ បានអះអាងថា៖ «ខ្ញុំបាទហ៊ាននិយាយថា ខ្មែរ ប៊ែវើរីជីស គឺជាក្រុមហ៊ុនទី ១ នៅប្រទេសកម្ពុជា ហើយក៏ប្រហែលជានៅអាស៊ីអាគ្នេយ៍ផងដែរ ដែលផលិតស្រាបៀរ ព្រីមៀម ដ្រាហ្វ ច្រកក្នុងដប។ វាគឺមិនមែនជាស្រាបៀរ ដ្រាហ្វ ធម្មតានោះទេ វាគឺជាព្រីមៀម ដ្រាហ្វ បៀរ ច្រកចូលក្នុងដបពណ៌បៃតងយ៉ាងល្អប្រណីត» ។
ទន្ទឹមនឹងនេះ លោកបណ្ឌិត Zvonimir Nemet នាយករោងចក្រនៃក្រុមហ៊ុន ខ្មែរ ប៊ែវើរីជីស ដែលជាអ្នកជំនាញ និងមានបទពិសោធផលិតស្រាបៀរយូរឆ្នាំមកពីប្រទេសអាល្លឺម៉ង់បានឱ្យដឹងដែរថា៖ «ការផលិតស្រាបៀរ ដ្រាហ្វ ច្រកចូលក្នុងដប មិនមែនជារឿងងាយស្រួលនោះទេ ពោលគឺមានការលំបាកច្រើន និងត្រូវការធនធានច្រើនដូចជាការវិនិយោគខ្ពល់លើបច្ចេកវិទ្យា Flash Pasteurization និងការបំពាក់បន្ទប់ពិសេស (hygiene room) ដើម្បីធានាគុណភាព និងរសជាតិស្រស់របស់ស្រាបៀរ»។
លោកបណ្ឌិត Zvonimir Nemet បន្តថា ដើម្បីអាចច្រកស្រាបៀរដ្រាហ្វចូលទៅក្នុងដបពណ៌បៃតងបានគឺទាមទារការសិក្សា និងស្រាវជ្រាវយ៉ាងហ្មត់ចត់បំផុត ពីព្រោះថា ដបពណ៌បៃតងគឺងាយស្រូបពន្លឺព្រះអាទិត្យ ដែលអាចធ្វើឱ្យប្រែប្រួលដល់រសជាតិនៃស្រាបៀរ។
ស្រាបៀរ កម្ពុជា ព្រីមៀម ដ្រាហ្វ មានរសជាតិស្រស់ឆ្ងាញ់ខុសពីស្រាបៀរធម្មតា។ ហុង មិនា
ហេតុដូច្នេះ ទើបក្រុមហ៊ុនត្រូវនិយោគលើបច្ចេកវិទ្យា Flash Pasteurization និងជ្រើសរើសផ្កាហប់ពិសេស (Special Hops) ដែលមានតម្លៃខ្ពស់នាំចូលពីអឺរ៉ុបក្នុងការផលិតស្រាបៀរ កម្ពុជា ព្រីមៀម ដ្រាហ្វ ដែលមានរសជាតិស្រស់បំផុត និងក្លិនឈ្ងុយឈ្ងប់។
ដើម្បីធ្វើឱ្យផលិតផលថ្មីនេះទទួលបានជោគជ័យ អ្នកស្រី គង់ កុសល នាយិកាផ្នែកទីផ្សារក្រុមហ៊ុនខ្មែរ ប៊ែ វើរីជីស បានបន្ថែមឱ្យដឹងពីផែនការផ្សព្វផ្សាយយ៉ាងដូច្នេះថា៖ «ស្រាបៀរ កម្ពុជា ព្រីមៀម ដ្រាហ្វ ជាផលិតផលថ្មីបំផុតសម្រាប់ទីផ្សារកម្ពុជា ដូច្នេះអតិថិជន នឹងស្គាល់ពីលក្ខណពិសេស និងអត្ថប្រយោជន៍របស់ស្រាបៀរថ្មីនេះកាន់តែច្បាស់តាមរយៈទូរទស្សន៍ វិទ្យុ និងប្រព័ន្ធឌីជីថលនានា។ ក្រៅពីនេះ ក្រុមហ៊ុនក៏នឹងបង្កើតកម្មវិធីកម្សាន្តប្លែកៗ ជូនអតិថិជន និងផ្តល់ជូនប្រូម៉ូសិនជាច្រើនផងដែរ»។
ទន្ទឹមនឹងនេះដែរ លោកបណ្ឌិត អ៊ឹម សុធារិទ្ធ នាយកផ្នែកលក់នៃក្រុមហ៊ុនខ្មែរ ប៊ែវើរីជីស ក៏បានសម្តែងភាពជឿជាក់ខ្លាំងទៅលើផលិតផលថ្មីនេះដែរដោយលោកបានមានប្រសាសន៍ថា៖ «ក្នុងរយៈពេលប៉ុន្មានថ្ងៃនៃការចែកចាយស្រាបៀរ កម្ពុជា ព្រីមៀម ដ្រាហ្វ ទៅលើទីផ្សារ ស្រាបៀរ ព្រីមៀម ដ្រាហ្វ ទទួលបានការបញ្ជាទិញជាច្រើន ព្រមទាំងការកោតសរសើរពីអតិថិជនអំពីរសជាតិដ៏ស្រស់ឆ្ងាញ់ប្លែកពីស្រាបៀរធម្មតា។ ដូច្នេះ ផលិតផលថ្មីរបស់យើងនឹងផ្តល់ទំនុកចិត្តមួយបន្ថែមទៀតដល់អតិថិជនដៃគូពាណិជ្ជកម្ម ព្រមទាំងចូលរួមបង្កើតការងារ និងជំរុញកំណើនសេដ្ឋកិច្ចផងដែរ»។
គួរបញ្ជាក់ថា ក្រុមហ៊ុន ខ្មែរ ប៊ែវើរីជីស ជាក្រុមហ៊ុនឈានមុខគេក្នុងស្រុកលើផលិតកម្មស្រាបៀរ និងភេសជ្ជៈដែលតែងតែបង្កើតជម្រើសច្រើន និងនាំយកផលិតផលថ្មីប្លែកជូនដល់អតិថិជនជានិច្ច ហើយគិតមកដល់ពេលនេះ ក្រុមហ៊ុនមានផលិតផលល្បីៗជាច្រើនដូចជា ស្រាបៀរ កម្ពុជា ភេសជ្ជៈប៉ូវកម្លាំង វើក ទឹកក្រូចអាយស៍ និងទឹកបរិសុទ្ធ កម្ពុជា ដែលសុទ្ធតែជាផលិតផលល្បី និងទទួលបានការគាំទ្រយ៉ាងខ្លាំងនៅលើទីផ្សារ៕
