ភ្នំពេញៈ សំណង់លំនៅឋានលក្ខណៈបុរី និងមជ្ឈមណ្ឌលពាណិជ្ជកម្ម ត្រូវគេរំពឹងថា នឹងលេចឡើងជាបន្តបន្ទាប់នៅតាមបណ្តោយផ្លូវជាតិលេខ ៥ នៅពេលការដ្ឋានស្ថាបនាផ្លូវនេះបញ្ចប់ ហើយតម្លៃអចលនទ្រព្យនឹងកើនយ៉ាងតិច ១០ ភាគរយធៀបនឹងពេលបច្ចុប្បន្ន។ នេះបើយោងតាមក្រុមអ្នកជំនាញក្នុងវិស័យអចលនទ្រព្យ។
គម្រោងធ្វើឱ្យប្រសើរឡើងនៃកំណាត់ផ្លូវជាតិលេខ ៥ (ភ្នំពេញ-បន្ទាយមានជ័យ) មានប្រវែងសរុប ៣៦៦ គីឡូម៉ែត្រ ដែលជាការពង្រីកកំណាត់ផ្លូវមានស្រាប់ចាប់ពី ២ គន្លងទៅ ៤ គន្លង ជាប្រភេទផ្លូវបេតុងកៅស៊ូ AC និងមានសួនច្បារចំកណ្តាល ក្រោមកម្ចីឥណទានរដ្ឋាភិបាលជប៉ុនប្រមាណ ៥០០ លានដុល្លារ។ តាមផែនការគម្រោងនេះនឹងត្រូវបញ្ចប់ក្នុងឆ្នាំ ២០២៤។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានប្រាប់ ភ្នំពេញ ប៉ុស្តិ៍ នាថ្ងៃទី ១ ខែកញ្ញាថា នៅពេលបញ្ចប់ការដ្ឋាន អចលនទ្រព្យនៅបណ្តោយផ្លូវជាតិនេះ អាចនឹងកើនឡើងចន្លោះពី ១០-១៥ ភាគរយបើធៀបពេលបច្ចុប្បន្ន។ ការកើនឡើងក្នុងអត្រាទាបបែបនេះ គឺដោយសារវាជាផ្លូវចាស់ដែលមានការធ្វើចរាចរណ៍ឆ្លងកាត់ច្រើន ហើយគេគ្រាន់តែកែលម្អឡើងវិញប៉ុណ្ណោះ។
លោកថ្លែងថា៖ «តម្លៃអចលនទ្រព្យនៅតាមបណ្តោយផ្លូវដែលកំពុងមានចរាចរណ៍ គឺមិនសូវប្រែប្រួលខ្លាំងដូចការស្ថាបនាផ្លូវថ្មីនោះទេ។ ប៉ុន្តែសម្រាប់គម្រោងសាងសង់ និងគម្រោងវិនិយោគថ្មីៗ អាចនឹងកើតមានច្រើននៅពេលការសាងសង់ផ្លូវរួចរាល់ទាំងស្រុង»។
លោកបន្ថែមទៀតថា ទោះយ៉ាងណា តម្លៃអចលនទ្រព្យទីនោះក៏អាចមានសម្ទុះកាន់តែខ្លាំងផងដែរ បើសិនរដ្ឋាភិបាលមានផែនការ ឬប្លង់មេក្នុងការប្រែក្លាយតំបន់តាមបណ្តោយផ្លូវនេះទៅជាតំបន់ពាណិជ្ជកម្ម និងតំបន់រោងចក្រ ជាដើម។
ប្រធានសមាគមអចលនទ្រព្យសកល លោក សំ សុខនឿន និយាយថា ផ្លូវជាតិលេខ ៥ គឺជាផ្លូវសំខាន់សម្រាប់សេដ្ឋកិច្ចកម្ពុជា ដោយតភ្ជាប់ពីរាជធានី-ភ្នំពេញទៅប្រទេសថៃ។ យ៉ាងណាក៏ដោយ ក្នុងរយៈពេល ៣ ឆ្នាំចុងក្រោយ តម្លៃដីនៅតាមផ្លូវមួយនេះមិនបានប្រែប្រួលអ្វីគួរឱ្យកត់សម្គាល់ទេ។ លោកបន្ថែមថា បច្ចុប្បន្នបើគេប្រៀបធៀបទីផ្សារ និងតម្លៃអចលនទ្រព្យនៅតាមផ្លូវជាតិលេខ ៥ ជាមួយនឹងបណ្តាផ្លូវជាតិផ្សេងទៀតចេញពីរាជធានីភ្នំពេញ គឺនៅតាមផ្លូវជាតិលេខ ៥ មិនទាន់ឃើញមានគម្រោងអភិវឌ្ឍន៍ធំៗ ឬលំនៅឋានលក្ខណៈជាបុរីច្រើនទេ ប៉ុន្តែវានឹងរីកចម្រើនក្នុងពេលឆាប់ៗ។
លោកនិយាយថា៖ «ខ្ញុំគិតថានៅពេលផ្លូវនេះកែលម្អរួច តម្លៃអចលនទ្រព្យនឹងកើនក្នុងរង្វង់ ៣០ ភាគរយ ដោយយោងលើកត្តាមួយចំនួន ដូចជា ភាពងាយស្រួលក្នុងការធ្វើដំណើរ ការកើនឡើងនៃគម្រោងអភិវឌ្ឍន៍ និងគម្រោងវិនិយោគចម្រុះដូចជា រោងចក្រ និងឃ្លាំងស្តុកទំនិញ។ ទីនោះនឹងក្លាយជាតំបន់ថ្មីមួយទៀតដែលមានសំណង់ធំៗច្រើន មិនចាញ់ផ្លូវជាតិលេខ ១ និងលេខ ៦ នាពេលបច្ចុប្បន្នឡើយ»។
ថ្លែងក្នុងពិធី MPWT Live Show កាលពីថ្ងៃ ៣០ ខែសីហា លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានឱ្យដឹងថា បច្ចុប្បន្នការស្ថាបនាផ្លូវពីក្រុងបាត់ដំបង-ក្រុងសិរីសោភ័ណ បានបញ្ចប់ ១០០ ភាគរយហើយ ចំណែកកំណាត់ផ្លូវពីព្រែកក្តាម-ពោធិ៍សាត់ និងពោធិ៍សាត់-បាត់ដំបង កំពុងសាងសង់ដោយគ្រោងរួចរាល់ឆ្នាំ ២០២២-២០២៣។
ដោយឡែកសម្រាប់កំណាត់ផ្លូវជាតិលេខ ៥ ចេញពីក្រុងសិរីសោភ័ណ ទៅក្រុងប៉ោយប៉ែតនឹងរួចរាល់ក្នុងឆ្នាំ ២០២៤ ខណៈបច្ចុប្បន្នក្រសួងសាធារណការកំពុងជ្រើសរើសក្រុមហ៊ុនសាងសង់។ នេះបើតាមលោក ចាន់ថុល៕ LA
វីដេអូ៖