.jpg)
កម្មករកំពុងរៀបចំដែកក្នុងការដ្ឋានសំណង់ ១ កន្លែង នៅខណ្ឌមានជ័យ កាលពីខែមករា ឆ្នាំ ២០២៣។ រូបថត ហេង ជីវ័ន
ភ្នំពេញៈ ទឹកប្រាក់ប្រមាណជាង ៩៣ លានដុល្លារ ត្រូវបានបញ្ចេញទៅលើការនាំចូលដែក និងដែកថែប ក្នុងត្រីមាសទី ១ ឆ្នាំ ២០២៣ កើនជិត ១១ ភាគរយបើធៀបរយៈពេលដូចគ្នាឆ្នាំ ២០២២ ខណៈក្នុងខែមីនា ទឹកប្រាក់នាំចូលដែក និងដែកថែប កើនឡើងជាង៣ ០ ភាគរយ។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
តារាងស្ថិតិទំនិញពាណិជ្ជកម្មនាំចូលនៃអគ្គនាយកដ្ឋានគយ និងរដ្ឋាករកម្ពុជា ឱ្យដឹងថា ក្នុងត្រីមាសទី ១ ឆ្នាំ ២០២៣ កម្ពុជាបាននាំចូលដែក និងដែកថែប ក្នុងទឹកប្រាក់សរុប ៩៣,២៩២ លានដុល្លារកើនឡើង ១០,៩ ភាគរយធៀបត្រីមាសទី១ ឆ្នាំ ២០២២ ដែលមាន ៨៤,០៨៥ លានដុល្លារ។ ប្រាក់នាំចូលដែក និងដែកថែប ក្នុងត្រីមាសទី ១ ឆ្នាំ ២០២៣ ធៀបនឹងត្រីមាសទី ៤ ឆ្នាំ ២០២២ គឺកើនឡើង ៥,៩៦ ភាគរយ ឬស្មើនឹង ៥,២៥១ លានដុល្លារ។
ដោយឡែកនៅក្នុងខែមីនា ឆ្នាំ ២០២៣ ការនាំចូលដែក និងដែកថែប មានទឹកប្រាក់ ៣៤,២១៣ លានដុល្លារកើនឡើង ៣០,១ ភាគរយធៀបនឹងខែមីនា ឆ្នាំ ២០២២ ដែលមាន ២៦,២៩៨ លានដុល្លារ។
ប្រធានគ្រប់គ្រងទូទៅនៃសមាគមអ្នកសាងសង់កម្ពុជា លោក ជីវ ស៊ីវផេង បានប្រាប់ភ្នំពេញប៉ុស្តិ៍នៅថ្ងៃទី ២៥ ខែមេសា ថា ទោះបីមិនមានសម្ទុះខ្លាំងដូចនៅមុនពេលមានវិបត្តិជំងឺកូវីដ ១៩ ប៉ុន្តែវិស័យសំណង់កម្ពុជាបានផ្តើមកម្រើកឡើងវិញជាបណ្តើរៗហើយតាំងពីចុងឆ្នាំ ២០២២ មក ដោយគេសង្កេតឃើញតាមការដ្ឋានធំៗដែលជាប់គាំងកន្លងមកបានចាប់ផ្តើមមានសកម្មភាពសាងសង់ឡើងវិញខ្លះៗហើយ។ ការងើបឡើងវិញនៃវិស័យសំណង់ធ្វើឱ្យតម្រូវការដែក និងសម្ភារសំណង់ផ្សេងៗទៀតកើនឡើងដូចៗគ្នា។ លោកបន្តថា តាមរយៈស្ថានភាពពេលនេះ គឺលោករំពឹងថា ការនាំចូលដែក និងដែកថែបក្នុងវិស័យសំណង់នឹងកើនឡើងថែមទៀត។ លោកបន្ថែមថា៖«បន្ទាប់ពីស្ងប់ស្ងាត់ជាង ២ ឆ្នាំដោយសារវិបត្តិកូវីដ តម្រូវការដែក និងសម្ភារសំណង់គ្រប់ប្រភេទកំពុងកើនឡើងវិញជាលំដាប់»។
បើតាមលោក ស៊ីវផេង មូលហេតុដែលធ្វើឱ្យសកម្មភាពសាងសង់ចាប់ផ្តើមមានសញ្ញាល្អឡើងវិញ គឺដោយសារគ្រប់ប្រទេសលើពិភពលោកប្រកាសបើកឡើងវិញដែលធ្វើឱ្យមានលំហូរការធ្វើដំណើរឆ្លងប្រទេស, ការជំរុញ និងលើកទឹកចិត្តរបស់រាជរដ្ឋាភិបាលចំពោះគម្រោងដែលជាប់គាំងកន្លងមក និងកត្តាកំណើនសេដ្ឋកិច្ចពិភពលោក រួមទាំងកម្ពុជា។
រដ្ឋាភិបាលតាមរយៈក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី ១២ ខែមេសា បានចេញសេចក្តីជូនដំណឹងមួយដោយបានដាក់ចេញនូវវិធានការមួយចំនួនដើម្បីគាំទ្រដល់ការអភិវឌ្ឍវិស័យសំណង់ និងអចលនទ្រព្យផ្នែកបុរី។
លោក ហ៊ុយ វណ្ណា អគ្គលេខាធិការនៃសមាគមអ្នកអភិវឌ្ឍន៍លំនៅឋានកម្ពុជា បាននិយាយថា ភាគច្រើននៃវិស័យសំណង់ដែលមានសកម្មភាពនៅពេលនេះ គឺជាសំណង់លំនៅឋាន ខណៈសំណង់ធំៗដែលមានម្ចាស់ជាជនបរទេសគឺមិនសូវមានសកម្មភាពទេ។
វិស័យនេះត្រូវការយូរបន្ថែមទៀតទើបមានសម្ទុះខ្លាំងដូចអំឡុងមុនឆ្នាំ ២០១៨។ គម្រោងអភិវឌ្ឍន៍ហេដ្ឋារចនាសម្ព័ន្ធដែលលេចឡើងជាបន្តបន្ទាប់នាពេលនេះក៏បានជំរុញឱ្យមានតម្រូវការនាំចូលដែក និងដែកថែបកាន់តែច្រើនផងដែរ។ លោកលើកឡើងថា៖ «សម្រាប់ពេលនេះគេឃើញថា សកម្មភាពសាងសង់គឺគ្រាន់បើជាងមុន ដោយគម្រោងដែលជាប់គាំងកន្លងមកមួយចំនួនត្រូវបានគេចាប់ផ្តើមដំណើរការសាងសង់ឡើងវិញ ប៉ុន្តែមិនហក់ឡើងគំហុកនោះទេ»។
ទិន្នន័យបានឱ្យដឹងថា ក្នុងឆ្នាំ ២០២២ ការនាំចូលដែក និងដែកថែប មានទឹកប្រាក់សរុប ៣៥៩,៨១៩ លានដុល្លារ កើន ២៣,១ ភាគរយពី ២៩២,៣៣៩ លានដុល្លារក្នុងឆ្នាំ ២០២១។ ទឹកប្រាក់នាំចូលដែក និងដែកថែប គឺស្មើប្រមាណ ១,២ ភាគរយធៀបនឹងចំនួនប្រាក់នៃការនាំចូលទំនិញក្នុងឆ្នាំ ២០២២ ដែលមានចំនួន ២៩ ៩៤១,៦០ លានដុល្លារ។
ឯកសារនិន្នាការសេដ្ឋកិច្ចសង្គម ឆ្នាំ ២០២២ របស់ក្រសួងសេដ្ឋកិច្ច និងហិរញ្ញវត្ថុ ឱ្យដឹងថា ក្នុងឆ្នាំ ២០២២ គម្រោងដែលទទួលការអនុញ្ញាតឱ្យសាងសង់ពីក្រសួងរៀបចំដែនដីនគរូបនីយកម្ម និងសំណង់ មានចំនួន ៤ ២៧៥ គម្រោង ធ្លាក់ចុះ ២៨ គម្រោងបើធៀបទៅនឹងឆ្នាំ ២០២១ និងមានទុនវិនិយោគសរុប ២ ៩៦៨ លានដុល្លារ ធ្លាក់ចុះ ៤៦,៨ ភាគរយ។ ក្នុងចំណោមគម្រោងទាំងអស់នោះ គឺគម្រោងលំនៅឋានចំនួន ៣ ៧៦៨ គម្រោង ស្មើនឹង ៨៨,១ ភាគរយនៃសំណើសុំសាងសង់សរុប កើនឡើង ៤៨ គម្រោង បើធៀបនឹងរយៈពេលដូចគ្នាកាលពីឆ្នាំ ២០២១ ក្រៅពីនោះរួមមាន អគារពាណិជ្ជកម្ម ឧស្សាហកម្ម ទេសចរណ៍ និងគម្រោងផ្សេងៗទៀត៕
