ភ្នំពេញៈ ក្រសួង​សេដ្ឋ​កិច្ច និង​ហិរញ្ញវត្ថុ​ បាន​សម្រេច​លើកលែង​ពន្ធ​លើ​អចលន​ទ្រព្យ រហូតដល់​ដំណាច់ឆ្នាំ​ ២០២៣ ​នេះ ចំពោះ​អចលនទ្រព្យ​ដែល​ស្ថិតនៅក្នុង​ក្រុង​ទើប​បង្កើត​ថ្មី​ចំនួន ៤ នៅ​ខេត្ដ​កំពង់ស្ពឺ ​ខេត្ដ​កណ្ដាល និង​ខេត្ដ​កំពត។

យោង​សេចក្ដី​ប្រកាស​រប​ស់​ក្រសួង​សេដ្ឋកិច្ច ​និង​ហិរញ្ញវត្ថុ ​ចុះ​ថ្ងៃទី៥ ​ខែមិថុនា ឆ្នាំ២០២៣ បញ្ជាក់​ថា ត្រូវបាន​លើកលែង​ពន្ធ​លើ​អចលនទ្រព្យ រហូតដល់​ដំណាច់ឆ្នាំ២០២៣ ចំពោះ​អចលនទ្រព្យ ដែល​ស្ថិតនៅក្នុង​ក្រុង​ឧដុង្គ​ម៉ែ​ជ័យ នៃ​ខេត្ដ​កំពង់​ស្ពឺ ក្រុង​អរិយ​ក្សត្រ និង​ក្រុង​សំពៅ​ពូន នៃ​ខេត្ដ​កណ្ដាល និង​ក្រុង​បូកគោ នៃ​ខេត្ដ​កំពត​ផង​ដែរ។

ក្រសួង​សេដ្ឋកិច្ច​បានបញ្ជាក់​ថា៖ «ម្ចាស់​អចលន​ទ្រព្យ​ទាំង​អស់ ដែល​ស្ថិតក្នុង​ក្រុង​ដូច​មានកំណត់​ក្នុង​​សេចក្តី​ប្រកាស​ខាងលើ ត្រូវមាន​កាតព្វកិច្ច​ចុះបញ្ជី​អចលន​ទ្រព្យ នៅ​សាខា​ពន្ធដារ​ខេត្ត ដែល​អចលន​ទ្រព្យ​ស្ថិតនៅ ឬ​នៅ​នាយកដ្ឋាន​ពន្ធ​ចលនទ្រព្យ និង​អចលន​ទ្រព្យ នៃ​អគ្គនាយក​ដ្ឋាន​ពន្ធដារ ប៉ុន្តែ​ពុំមាន​កាតព្វ​កិច្ច​ដាក់​លិខិត​ប្រកាស និង​បង់ពន្ធ​លើ​អចលន​ទ្រព្យ ​រហូត​ដល់​ដំណាច់​ឆ្នាំ​២០២៣»។

ក្នុងករណី​អចលនទ្រព្យ​ខាងលើ ​ដែល​បាន​បង់ពន្ធ​លើ​អចលនទ្រព្យ​រួចហើយ ​ចំនួន​ប្រាក់​ពន្ធ​ដែល​បាន​បង់​រួច​នោះ ត្រូវបាន​អនុញ្ញាត​ឱ្យធ្វើ​ជា​ឥណទាន​យោង សម្រាប់​យកទៅ​កាត់កង​ពន្ធ​លើ​អចលនទ្រព្យ​សម្រាប់​ឆ្នាំ​បន្តបន្ទាប់។

ក្រសួង​​គូស​បញ្ជាក់ថា៖«ម្ចាស់​អចលន​ទ្រព្យ ត្រូវ​ស្នើសុំ​ឥណទាន​ពន្ធ​លើ​អចលនទ្រព្យ ដែល​បាន​បង់​រួច នៅ​សាខា​ពន្ធដារ​ខេត្ត​ដែល​អចលន​ទ្រព្យ​ស្ថិតនៅ ឬ​នៅ​អគ្គនាយក​ដ្ឋាន​ពន្ធដារ សម្រាប់​យកទៅ​កាត់កង​ពន្ធ លើ​អចលន​ទ្រព្យ​សម្រាប់​ឆ្នាំ​ជាប់ពន្ធ​បន្ត​បន្ទាប់»។

សេចក្ដីប្រកាស​ដដែល​បាន​បន្ថែមថា គ្រប់​អង្គភាព​ពាក់ព័ន្ធ​ដែល​ទទួលបន្ទុក ហើយ​ស្ថិតក្រោម​ឱវាទ​របស់​ក្រសួង​សេដ្ឋកិច្ច និង​ហិរញ្ញ​វត្ថុ ត្រូវ​ទទួល​បន្ទុក​អនុវត្ត​ប្រកាស​នេះ​តាម​ភារកិច្ច​រៀងខ្លួន ចាប់ពី​ការចុះហត្ថលេខា​នេះ​តទៅ។

ជុំវិញ​រឿងនេះ លោក យង់ គិ​ម​អេង ប្រធាន​មជ្ឈមណ្ឌល​ប្រជាពលរដ្ឋ ដើម្បី​អភិវឌ្ឍន៍ និង​សន្តិភាព យល់​ឃើញ​ថា ការលើក​លែង​ពន្ធ​នេះ មាន​ហេតុផល​ចំនួន​៣ ដោយហេតុ​ផល​ទី១ អាច​ថា​ ក្រសួង​រៀបចំ​ការយកពន្ធ​នៅ​ក្រុង​បង្កើត​ថ្មី​ទាំង​នោះ មិន​ទាន់​រួចរាល់ ដែល​មាន​ន័យថា ​ការរៀបចំ​ប្រព័ន្ធ និង​ការរៀបចំ​មន្ត្រី​យកពន្ធ​ជាដើម។

ហេតុផល​ទី២ ដោយ​សារ​តែ​រដ្ឋ​ចង់​បង្ក​លក្ខណៈ​ងាយ​ស្រួល​បន្ថែម​ទៀត ជាពិសេស​គឺ​រដ្ឋ​ចង់​ទាក់ទាញ​អ្នកវិនិ​យោគ អ្នក​ដែល​ធ្វើការ​លើ​អចលន​ទ្រព្យ​ឱ្យមាន​ការចាប់​អារម្មណ៍ និង​ចង់​ធ្វើការ​វិនិយោគ​លើ​ទីតាំង​ទាំងនោះ​ឱ្យបាន​ច្រើន ពីព្រោះ​ទីតាំង​ទាំងនោះ ​មិន​យកពន្ធ​ទេ។

ហេតុផល​ទី៣នោះ ​លោក​យល់ថា រដ្ឋ​ចង់ឱ្យ​ទីផ្សារ​អចលន​ទ្រព្យ​នៅ​ទីតាំង​ថ្មី​ទាំង​នោះ អាចមាន​សម្ទុះ​កើន​ឡើង និង​ទទួលបាន​ការចាប់​អារម្មណ៍​ពី​សាធារណ​ជន​ផ្សេងៗ មក​ទិញ-លក់ និង​រស់នៅ​ផង​ដែរ។

លោក យង់ គិ​ម​អេង មាន​ប្រសាសន៍​ថា៖ «ដូច្នេះ​កត្តា​អចលន​ទ្រព្យ វា​គឺជា​រឿង​សំខាន់​មួយ នៅ​ក្នុង​ការអនុវត្ត​នៅ​ទីក្រុង​ថ្មីៗ​ដែល​ទើបតែ​បង្កើត​ហ្នឹង អ៊ីចឹង!ការលើក​លែង​ពន្ធ​នេះ វា​ជួយ​ទាក់ទាញ​ទាំង​អ្នកវិនិ​យោគ និង​ទាំង​សាធា​រណ​ជន មក​ចាប់​អារម្មណ៍​ទិញ​អចលន​ទ្រព្យ និង​ការធ្វើ​អាជីវ​កម្ម»។

បើតាម​លោក គិ​ម​អេង ការលើកលែង​ពន្ធ​នេះ វា​មិន​មាន​ផលប៉ះពាល់​អ្វី​ឡើយ​ដល់​ចំណូល​ពន្ធ​រដ្ឋ ពីព្រោះ​ប្រសិន​ជា​​អចលន​ទ្រព្យ​នៅ​ក្រុង​បង្កើត​ថ្មី​ទាំង​នោះ មាន​អ្នកវិនិយោគ និង​សាធារ​ណជន​មានការ​ចាប់អារម្មណ៍​កាន់តែ​ច្រើន​​មក​ទិញ ឬ​ក៏​លក់ នោះ​ប្រាកដជា​រដ្ឋ​នឹង​ទទួលបាន​ចំណូល​ការបង់ពន្ធ​ពី​អ្នក​ទាំងនោះ​កាន់តែ​ច្រើន​ផងដែរ។

សម្រាប់​លោក គី សេរី​វឌ្ឍន៍ អ្នក​ជំនាញ​ផ្នែក​សេដ្ឋ​កិច្ច នៃ​រាជ្យ​បណ្ឌិតសភា​កម្ពុជា ​យល់ថា ការលើក​លែ​ងពន្ធ​នេះ វា​ជាការ​ជំរុញ​វិស័យ​អច​លន​ទ្រព្យ​ឡើង​វិញ។

លោក គី សេរី​វឌ្ឍន៍ បញ្ជាក់ថា៖ «ការ​មិន​យកពន្ធ​នេះ វា​មិន​ប៉ះពាល់​ដល់​ចំណូលរ​ដ្ឋ​ទេ ព្រោះ​ឥឡូវ​គ្មាន​ប្រតិ​ប​ត្តិ​ការទិញ-លក់​អចលន​ទ្រព្យ ​ដូច្នេះ​ប្រសិនជា​រដ្ឋ​មិន​យកពន្ធ​ ក៏​គ្មាន​ចំណូល ហើយ​ប្រសិនជា​រដ្ឋ​យកពន្ធ ក៏​គ្មាន​ចំណូល​ដូចគ្នា​ដែរ៕