ក្រុមកម្មកររៀបចំចងដែក ដើម្បីចាក់បេតុងនៅអគារមួយ។ ហេង ជីវ័ន
ភ្នំពេញៈ វិនិយោគិនក្នុងស្រុកពហុវិស័យ លោក លាង ម៉េង ដែលជាអគ្គនាយកក្រុមហ៊ុន Chip Mong Group បានលើកឡើងថា ការសាងសង់គម្រោងវិនិយោគនៅក្នុងវិស័យសំណង់កំពុងលើសពីតម្រូវការ ដោយសារការថមថយប្រាក់ចំណូលរបស់ប្រជាជនដែលបង្កឡើងពីការធ្លាក់ចុះសេដ្ឋកិច្ចក្នុងតំបន់ និងសកល ពិសេសបញ្ហាភូមិសាស្ត្រនយោបាយ និងការអូសបន្លាយពេលនៃសង្គ្រាមរុស្ស៊ី-អ៊ុយក្រែន។
ការអះអាងរបស់លោក លាង ម៉េង ធ្វើឡើងក្នុងកម្មវិធីមួយកាលពីសប្តាហ៍មុន ដែលជាការឆ្លុះបញ្ចាំងអំពីការព្រមាននៃការធ្លាក់ចុះពីស្ថាប័នហិរញ្ញវត្ថុអន្តរជាតិនានាដូចជាធនាគារពិភពលោក មូលនិធិរូបិយវត្ថុអន្តរជាតិ និងធនាគារអភិវឌ្ឍន៍អាស៊ីនាពេលកន្លងមក។
បើតាមការលើកឡើងរបស់លោក លាង ម៉េង គឺភាគច្រើនអ្នកវិនិយោគនៅក្នុងស្រុកផ្តោតលើការវិនិយោគវិស័យសំណង់ច្រើនដែលធ្វើឱ្យបរិមាណលើសតម្រូវការដោយសារតែមានផលចំណេញងាយស្រួល ខណៈសេដ្ឋកិច្ចសកលមានភាពមិនប្រាកដប្រជា។
លោកក៏មើលឃើញផងដែរថា ប្រជាពលរដ្ឋមួយចំនួនបាននាំគ្នាទិញច្រើនដោយសម្លឹងឃើញថា វាជាឱកាសទទួលបានប្រាក់ចំណេញខ្ពស់ដោយពុំមែនទិញរស់នៅឡើយ ដូច្នេះនៅពេលពួកគាត់មានបញ្ហាលំហូរសាច់ប្រាក់បង្វិលធ្វើឱ្យមានបញ្ហាក្នុងវិស័យនេះ។
លោកបញ្ជាក់ថា៖«សម្រាប់ខ្ញុំអ្នកវិនិយោគធំនៅក្នុងវិស័យអចលនទ្រព្យមួយដែរ គម្រោងដែលខ្ញុំកំពុងធ្វើទាំងអស់មានប្រហែល ៦ សួរថាខ្ញុំនៅលក់បានឬទេ? គឺនៅលក់បានគ្រាន់តែចំនួនថយជាងមុន។ ថយជាងមុន ប៉ុន្តែអ្នកដែលទិញគម្រោងរបស់ខ្ញុំ គឺអ្នកទិញសម្រាប់រស់នៅ មិនមែនទិញដើម្បីប្រាក់ចំណេញទេ។ ចំពោះមុខថា តើវិនិយោគនៅក្នុងវិស័យអចលនទ្រព្យ យើងមើលឃើញបែបណា?
ចំពោះខ្ញុំ ខ្ញុំឃើញថា សម្រាប់ឆ្នាំក្រោយយើងនៅរាងពិបាកបន្តិច ដោយសារពេលនេះយើងបានការបញ្ជាទិញពីមុនមក ដល់ទៅមុខទៅអាចធ្លាក់បន្តិច ប៉ុន្តែខ្ញុំសង្ឃឹមថា យើងមានរាជរដ្ឋាភិបាលថ្មី ដែលគាត់បានយល់បញ្ហាច្បាស់ គាត់នឹងមានវិធីសាស្ត្រដើម្បីជួយជំរុញឱ្យវិស័យនេះប្រសើរឡើងវិញ។ ខ្ញុំមើលឃើញថា ក្នុងឆ្នាំ ២០២៤ ដើមឆ្នាំមិនទាន់សូវល្អ ប៉ុន្តែសម្រាប់ខែ ១០ អីប្រហែលជាល្អ»។
លោក ហ៊ុយ វណ្ណា អគ្គលេខាធិការសមាគមអភិវឌ្ឍន៍លំនៅឋានកម្ពុជា បានប្រាប់ភ្នំពេញប៉ុស្តិ៍កាលពីពេលថ្មីៗនេះថា ឧស្សាហកម្មសំណង់មានការរីកចម្រើនគួរឱ្យកត់សម្គាល់ចន្លោះឆ្នាំ ២០០៨-២០១៩ ដែលបង្ហាញឱ្យឃើញពីការលេចឡើងចំនួនអគារតូច និងធំជាច្រើន ជាពិសេសក្នុងរាជធានីភ្នំពេញ និងខេត្តព្រះសីហនុ។
លោកបន្តថា ទោះយ៉ាងណា បន្ទាប់ពីរដ្ឋាភិបាលធ្វើវិសោធនកម្មច្បាប់មួយចំនួនទាក់ទងនឹងការលេងល្បែងតាមប្រព័ន្ធអ៊ីនធឺណិត និងការមកដល់ជំងឺកូវីដ ១៩ វិស័យសំណង់នៅកម្ពុជាបានធ្លាក់ចុះយ៉ាងខ្លាំង ពិសេសផ្នែកនៃអគារធំៗដែលគ្រប់គ្រងដោយវិនិយោគិនបរទេស។ លោកបន្តថា គម្រោងដែលកំពុងដំណើរការស្ទើរតែទាំងអស់ គឺជាអាផាតមិន ឬបុរី។
លោកលើកឡើងថា៖ «ការបន្តកើតមានវិបត្តិសេដ្ឋកិច្ចជាប់ៗគ្នាដែលបានចាប់ផ្តើមនៅចុងឆ្នាំ ២០១៩ បានធ្វើឱ្យវិស័យសំណង់កម្ពុជាស្ថិតក្នុងស្ថានភាពមួយដែលមិនធ្លាប់ជួបជាមួយនឹងការអភិវឌ្ឍភាគច្រើនឥឡូវនេះ គឺជាអគារកម្ពស់ទាប ដែលគ្រប់គ្រងដោយវិនិយោគិនក្នុងស្រុក»។
ទេសាភិបាលធនាគារជាតិនៃកម្ពុជា (NBC) លោកស្រី ជា សិរី បានថ្លែងនៅក្នុងសិក្ខាសាលាមួយកាលពីថ្ងៃទី ៦ ខែកក្កដា ថា ត្រូវពិនិត្យដោយប្រុងប្រយ័ត្នលើវិស័យអចលនទ្រព្យ ដោយលោកស្រីកំណត់ថា ជាប្រភពនៃហានិភ័យដល់ស្ថិរភាពហិរញ្ញវត្ថុ ហើយបានគូសបញ្ជាក់ពីការធ្លាក់ចុះនៃតម្រូវការអចលនទ្រព្យ បន្ទាប់ពីការកើនឡើងរយៈពេល ១ ទសវត្សរ៍។
លោកស្រីបញ្ជាក់ថា៖ «ការរក្សាស្ថិរភាពហិរញ្ញវត្ថុ គឺជាកិច្ចការអន្តរវិស័យ ដែលតម្រូវឱ្យមានកិច្ចសហប្រតិបត្តិការ និងការសម្របសម្រួលពីអាជ្ញាធរ និងភាគីពាក់ព័ន្ធដោយសារប្រព័ន្ធហិរញ្ញវត្ថុមានទំនាក់ទំនងយ៉ាងជិតស្និទ្ធជាមួយសេដ្ឋកិច្ចរូបវន្ត»។
បើយោងតាមក្រសួងដែនដី គឺពីខែមករា ដល់ឧសភា ឆ្នាំ ២០២៣ ក្រសួងបានចេញលិខិតអនុញ្ញាតឱ្យគម្រោងសាងសង់ចំនួន ១ ៤៦៣ លើក្រឡាផ្ទៃ«ជាង ៥ លាន» ម៉ែត្រការ៉េ ជាមួយនឹងដើមទុនចុះបញ្ជីសរុប ២,២៧ ពាន់លានដុល្លារ។
ក្រសួងបានបង្ហាញថា មានតែ ៤១ គម្រោង (២,៨០ភាគរយ) ប៉ុណ្ណោះ ដែលគ្រប់គ្រងដោយជនបរទេស ជាពិសេសវិនិយោគិនចិន ជប៉ុន និងកូរ៉េខាងត្បូង ដោយមានទឹកប្រាក់នៃការវិនិយោគជិត ៦០០ លានដុល្លារ (ប្រហែល ១/៤) នៃដើមទុនដែលបានចុះបញ្ជីសរុប៕
