សំណង់អគារបុរីមួយនៅក្នុងរាជធានីភ្នំពេញ។ ហេង ជីវ័ន
ភ្នំពេញៈ អគ្គនាយដ្ឋានពន្ធដារ (GDT) បន្តក្រើនរំឭកទៅដល់ម្ចាស់អចលនទ្រព្យទាំងអស់ ដែលមានអចលនទ្រព្យស្ថិតនៅរាជធានីភ្នំពេញនិងតាមបណ្តាខេត្តទាំងអស់ពីការបង់ពន្ធលើអចលនទ្រព្យ និងការបង់ពន្ធលើដីធ្លីមិនបានប្រើប្រាស់សម្រាប់ឆ្នាំ ២០២៣ នឹងត្រូវបិទបញ្ចប់នៅថ្ងៃទី ៣០ ខែកញ្ញាឆ្នាំ ២០២៣ ខាងមុខនេះ។
យោងតាមសេចក្តីជូនដំណឹងរបស់ GDT រហូតមកទល់ពេលនេះមានម្ចាស់អចលនទ្រព្យមួយចំនួនមិនទាន់បានបំពេញកាតព្វកិច្ចប្រកាសបង់ពន្ធប្រភេទទាំងនេះនៅឡើយ។ ដូច្នេះដើម្បីជំរុញការប្រមូលពន្ធលើអចលនទ្រព្យនិងពន្ធលើដីធ្លីមិនមានប្រើប្រាស់សម្រាប់ឆ្នាំ ២០២៣ បានអស់លទ្ធភាពប្រកបដោយប្រសិទ្ធភាពខ្ពស់និងចៀសវាងនូវការកកស្ទះ ការប្រជ្រៀតគ្នាមកប្រកាសបង់ប្រាក់ពន្ធនៅថ្ងៃជិតផុតកំណត់ ដែលអាចនាំឱ្យមានបាតុភាពអសកម្មដោយប្រការណាមួយ។
GDT បានគូសបញ្ជាក់ថា៖ «អគ្គនាយកដ្ឋានពន្ធដារសូមក្រើនរំឭកដល់ម្ចាស់អចលនទ្រព្យទាំងអស់ ដែលមិនទាន់បានបំពេញកាតព្វកិច្ចបង់ប្រាក់ពន្ធ រួសរាន់មកប្រកាសបង់ប្រាក់ពន្ធឱ្យបានទាន់ពេលវេលាត្រឹមថ្ងៃទី ៣០ ខែកញ្ញា ឆ្នាំ ២០២៣ នៅអគ្គនាយកដ្ឋានពន្ធដារ ឬសាខាពន្ធដារខេត្តខណ្ឌដែលអចលនទ្រព្យស្ថិតនៅ ឬនៅគ្រប់សាខាធនាគារជាដៃគូ ឬតាមរយៈកម្មវិធី GDT Taxpayer App»។
«ចំពោះការខកខានមិនបានដាក់លិខិតប្រកាសបង់ប្រាក់ពន្ធទាន់ ពេលវេលាកំណត់ខាងលើ ម្ចាស់អចលនទ្រព្យនឹងត្រូវរងនូវទណ្ឌកម្មរដ្ឋបាល តាមច្បាប់ស្តីពីសារពើពន្ធជាធរមាន។ អគ្គនាយកដ្ឋានពន្ធដារសង្ឃឹមយ៉ាងមុតមាំថា បន្ទាប់ពីទទួលបានសេចក្តីជូនដំណឹងនេះ ម្ចាស់អចលនទ្រព្យទាំងអស់ពិតជានឹងយកចិត្តទុកដាក់ និងមកបំពេញកាតព្វកិច្ចសារពើពន្ធឱ្យបានទាន់ ពេលវេលាកំណត់»។ នេះបើយោង តាម GDT។
លោក គឹម ហ៊ាង ប្រធាន KW Cambodia បានឱ្យដឹងដែរថា ម្ចាស់អចលនទ្រព្យទាំងអស់គួរបំពេញកាតព្វកិច្ចពន្ធឱ្យបានត្រឹមត្រូវ និងទាន់ពេលវេលា ព្រោះការបង់ពន្ធ គឺជាកាតព្វកិច្ចរបស់ពលរដ្ឋទាំងអស់គ្នា។
លោកក៏បានស្នើឱ្យមានការផ្សព្វផ្សាយឱ្យទូលំទូលាយបន្ថែមទៀត អំពីកាតព្វកិច្ចបង់ពន្ធ ដើម្បីឱ្យប្រជាជនបានយល់ និងទទួលបានព័ត៌មានគ្រប់គ្រាន់ និងទាន់ពេលវេលា។
យោងតាមរបាយការណ៍ពីអគ្គនាយកដ្ឋានពន្ធដារ បានឱ្យដឹងថាគិតត្រឹមថ្ងៃទី ១៨ ខែកញ្ញា ឆ្នាំ ២០២៣ លទ្ធផលនៃការគ្រប់គ្រងប្រមូលចំណូលពន្ធលើអចលនទ្រព្យសម្រេចបាន ៧១,៩៥ ភាគរយនៃផែនការដែលកាលបរិច្ឆេទផុតកំណត់នៃពន្ធនេះគឺថ្ងៃទី ៣០ ខែកញ្ញា ឆ្នា ២០២៣ នេះ។
ក្រសួងរៀបចំដែនដី នគរូបនីយកម្ម និងសំណង់ បានអនុម័តគម្រោងវិនិយោគសំណង់សរុបចំនួន ៤ ២៧៥ ក្នុងឆ្នាំ ២០២២ ធ្លាក់ចុះ ២៨ គម្រោង ឬ ០,៦៥ ភាគរយធៀបនឹងឆ្នាំ ២០២១ ជាមួយនឹងដើមទុនចុះបញ្ជីសរុបចំនួន ២ ៩៦៨ ពាន់លានដុល្លារ ធ្លាក់ចុះ ៤៦,៨ ភាគរយ។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។
ទិន្នន័យរបស់ក្រសួងបានបង្ហាញ ថា វិស័យលំនៅឋានតំណាងឱ្យ ៣ ៧៦៨ នៃគម្រោង កើនឡើងពីចំនួន ៣៧២០ ធៀបនឹងរយៈពេលដូចគ្នាឆ្នាំ២០២១ ឬ ៨៨,១៤ ភាគរយនៃចំនួនសរុបដែលកើនឡើងពី ៨៦,៤៥ ភាគរយកាលពីឆ្នាំ ២០២១។
ក្រសួងបានបែងចែកតាមប្រភេទដែលបានអនុម័តកាលពីឆ្នាំ ២០២២ គឺលំនៅឋាន (៣ ៧៦៨) ពាណិជ្ជកម្ម (២២៨) ឧស្សាហកម្ម (១៨៤) សាធារណៈ (៥៨) ទេសចរណ៍ (៣៦) និងផ្សេងទៀត (១)។ តួលេខឆ្នាំ ២០២១ គឺលំនៅឋាន (៣ ៧២០) ពាណិជ្ជកម្ម (៣០១) ឧស្សាហកម្ម (១៨៤) សាធារណៈ (៤៧) ទេសចរណ៍ (៤៩) និងផ្សេងទៀត (២)៕
