កម្មករកំពុងចង់ដែកក្នុងការដ្ឋានសំណង់ស្ពានអាកាសច្រមុះជ្រូកក្បាលថ្នល់ កាលពីខែមិថុនា ឆ្នាំ ២០២៣។ រូបថត ហេង ជីវ័ន
ភ្នំពេញៈ គម្រោងវិនិយោគវិស័យសំណង់ចំនួនជាង ២,៣ ពាន់ ត្រូវបានរដ្ឋាភិបាលអនុម័តឱ្យសាងសង់ ក្នុងរយៈពេល ៨ ខែដើមឆ្នាំ ២០២៣ ធ្លាក់ចុះជិត ២០ ភាគរយបើធៀបនឹងរយៈពេលដូចគ្នាឆ្នាំ ២០២២ ខណៈក្នុងខែសីហា ឆ្នាំ ២០២៣ ចំនួនគម្រោងដែលទទួលបានការអនុម័តបានហក់ឡើងដល់ជិត ៨០ ភាគរយបើធៀបខែកក្កដា។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។
ឯកសារនិន្នាការសេដ្ឋកិច្ចសង្គម ខែសីហា ឆ្នាំ ២០២៣ របស់ក្រសួងសេដ្ឋកិច្ច និងហិរញ្ញវត្ថុ ឱ្យដឹងថា ពីខែមករា ដល់ខែសីហា ឆ្នាំ ២០២៣ រដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ បានអនុម័តឱ្យគម្រោងសាងសង់សរុប ២ ៣៦៧ មានផ្ទៃក្រឡា ១១,៦ លានម៉ែត្រការ៉េ និងមានទុនវិនិយោគ ៤ ៧៥៧ លានដុល្លារធៀបរយៈពេល ៨ ខែឆ្នាំ ២០២២ ចំនួនគម្រោងបានធ្លាក់ចុះចំនួន ៤៤៤ ប៉ុន្តែផ្ទៃក្រឡាសាងសង់ និងទំហំទឹកប្រាក់សាងសង់ បានកើនឡើង ១៨៤ ភាគរយ និង ១៨៦ ភាគរយរៀងគ្នា។
បន្ថែមលើនេះឯកសារឱ្យដឹងទៀតថា សម្រាប់ខែសីហា ឆ្នាំ ២០២៣ គម្រោងដែលទទួលបានការអនុញ្ញាតឱ្យសាងសង់មានចំនួន ៣៣១ មានផ្ទៃក្រឡាសរុប ៣,៦ លានម៉ែត្រការ៉េ និងទំហំទឹកប្រាក់ ១ ៥៥៧ លានដុល្លារបើធៀបនឹងខែកក្កដា ឆ្នាំ ២០២៣ គឺចំនួនគម្រោងបានកើនឡើង ១១៤គម្រោង (ស្មើ ៤៣ ភាគរយ), ផ្ទៃក្រឡា កើន ឡើង ២០១ ភាគរយ និងទំហំទុនវិនិយោគ កើនឡើង ២៥៤ ភាគរយ។ ទោះបីយ៉ាងណា បើធៀបនឹងខែសីហា ឆ្នាំ ២០២២ គឺចំនួនគម្រោងសាងសង់ បានថយចុះ ៦៩ គម្រោង (ស្មើ ១៧ភាគរយ) ប៉ុន្តែចំពោះផ្ទៃក្រឡា និងទំហំទឹកប្រាក់ គឺកើនឡើង ៤៣៨ ភាគរយ និង ៥៣៨ ភាគរយរៀងគ្នា។
ចំពោះគម្រោងទាំង ៣៣១ ដែលអនុម័តក្នុងខែសីហា ឆ្នាំ ២០២៣ គឺគម្រោងលំនៅឋាន មានចំនួន ២៤៧ (២២៥ គឺជាបុរី), សំណង់ឧស្សាហកម្ម ៣២, សំណង់ពាណិជ្ជកម្ម ៣៣, សំណង់ទេសចរណ៍ ៨, វិនិយោគចំនួន ៣, និងសំណង់សាធារណៈ ៨ គម្រោង។
ឯកសារបញ្ជាក់ថា៖ «ក្នុងបរិបទនៃគន្លងប្រក្រតីភាពថ្មីនេះ និន្នាការវិស័យសំណង់កម្ពុជាកំពុងមានសកម្មភាពងើបឡើងវិញ បើទោះចំនួននៃគម្រោងធ្លាក់ចុះ ប៉ុន្តែទំហំផ្ទៃក្រឡា និងទឹកប្រាក់សាងសង់បានបង្ហាញសញ្ញាណវិជ្ជមានច្រើន ដែលនេះមានន័យថា គម្រោងដែលបានសាងសង់នាមួយរយៈចុងក្រោយនេះភាគច្រើនជាគម្រោងអភិវឌ្ឍន៍ខ្នាតធំ»។
ប្រធានគ្រប់គ្រងទូទៅសមាគមអ្នកសាងសង់កម្ពុជា លោក ជីវ ស៊ីវផេង បានប្រាប់ ភ្នំពេញ ប៉ុស្តិ៍ថា បន្ទាប់ពីធ្លាក់ចុះយ៉ាងគំហុកនាអំឡុងពេលនៃការផ្ទុះជំងឺកូវីដ ១៩ ពេលនេះវិស័យសំណង់កម្ពុជាចាប់ផ្តើមបង្ហាញសញ្ញាវិជ្ជមានវិញជាបណ្តើរៗហើយ ដោយមានទាំងការដ្ឋានសាងសង់សំណង់ថ្មីៗ និងការបន្តដំណើរការសាងសង់គម្រោងជាប់គាំងមួយចំនួន។ លោកបន្តថា អ្វីដែលគួរចាប់អារម្មណ៍មួយទៀតនោះគឺការបញ្ចេញទុនរបស់វិនិយោគិនក្នុងស្រុកមានកាន់តែច្រើន ខុសប្លែកពីមុនដែលភាគច្រើនជាវិនិយោគិនបរទេស។
លោកបានបញ្ជាក់ថា៖ «ភាពអំណោយផលនៃទីតាំងភូមិសាស្ត្រ និងច្បាប់វិនិយោគដែលមានលក្ខណៈអំណោយផល គឺជាកម្លាំងចលករដ៏សំខាន់ដែលកំពុងជួយទាក់ទាញវិនិយោគិនក្នុងស្រុក និងបរទេសឱ្យចូលមកបណ្តាក់ទុនកាន់តែច្រើននៅកម្ពុជា។ វិស័យសំណង់ គឺជាផ្នែកដ៏សំខាន់ក្នុងការជំរុញកំណើនសេដ្ឋកិច្ចជាតិ»។
រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក សាយ សំអាល់ កាលពីថ្ងៃទី ១៦ ខែតុលា ឆ្នាំ ២០២៣ នៅទីស្តីការក្រសួងរៀបចំដែនដី បានរៀបចំកិច្ចប្រជុំមួយដើម្បីត្រៀមសម្រាប់វេទិការាជរដ្ឋាភិបាលផ្នែកឯកជន លើកទី១៩ ដែលមានការចូលរួមពីថ្នាក់ដឹកនាំ និងមន្ត្រីពាក់ព័ន្ធនៃក្រសួងរៀបចំដែនដី, តំណាងសមាគមអ្នកអភិវឌ្ឍន៍លំនៅឋាន, តំណាងសមាគមអ្នកសាងសង់កម្ពុជា, តំណាងសមាគមមីក្រូហិរញ្ញវត្ថុកម្ពុជា, និងអ្នកពាក់ព័ន្ធជាច្រើនទៀត។
គោលបំណងនៃកិច្ចប្រជុំនេះ គឺដើម្បីពិនិត្យ ពិគ្រោះ ពិភាក្សា និងដោះស្រាយទៅលើបញ្ហាប្រឈមពាក់ព័ន្ធទៅនឹងវិស័យសំណង់ និងអចលនទ្រព្យនៅក្នុងប្រទេសកម្ពុជា ដែលលើកឡើងដោយផ្នែកឯកជន ដើម្បីត្រៀមក្នុងការរៀបចំសម្រាប់វេទិការាជរដ្ឋាភិបាលផ្នែកឯកជន លើកទី១៩ ដែលគ្រោងប្រារព្ធនៅក្នុងខែវិច្ឆិកា ខាងមុខ។
ឯកសារនិន្នាការសេដ្ឋកិច្ចសង្គម ឆ្នាំ ២០២២ ឱ្យដឹងថា ក្នុងឆ្នាំ ២០២២ គម្រោងដែលទទួលការអនុញ្ញាតឱ្យសាងសង់ពីក្រសួងរៀបចំដែនដី នគរូបនីយកម្ម និងសំណង់ មានសរុប ៤ ២៧៥ គម្រោង ធ្លាក់ចុះ ២៨ គម្រោងបើធៀបឆ្នាំ ២០២១ និងមានទុនវិនិយោគ ២ ៩៦៨ លានដុល្លារ ធ្លាក់ចុះ ៤៦,៨ភាគរយ។ ក្នុងចំណោមគម្រោងទាំងអស់នោះ គឺគម្រោងលំនៅឋានចំនួន ៣ ៧៦៨ គម្រោង ស្មើ ៨៨,១ ភាគរយនៃសំណើសុំសាងសង់សរុប កើនឡើង ៤៨ គម្រោង បើធៀបនឹងរយៈពេលដូចគ្នាឆ្នាំ ២០២១ ក្រៅពីនោះរួមមាន អគារពាណិជ្ជកម្ម ឧស្សាហកម្ម ទេសចរណ៍ និងគម្រោងផ្សេងៗទៀត៕
