ទិដ្ឋភាពក្នុងបុរី ១ កន្លែង ក្នុងរាជធានីភ្នំពេញ។ ហេង ជីវ័ន
ភ្នំពេញៈ ស្របពេលដែលធនាគារកណ្តាលសហរដ្ឋអាមេរិកបានទម្លាក់អត្រាការប្រាក់ អ្នកជំនាញអចលនទ្រព្យ និងអាជ្ញាធរមានសុទិដ្ឋិនិយមថា ការណ៍នេះនឹងជះឥទ្ធិពលជាវិជ្ជមានសម្រាប់ទីផ្សារអចលនទ្រព្យ និងសំណង់កម្ពុជាក្នុងឆ្នាំ ២០២៤ នេះដោយវានឹងជំរុញឱ្យសកម្មភាពទិញ-លក់ និងជួលអចលនទ្រព្យ និងសំណង់កម្ពុជាក្នុងឆ្នាំ ២០២៤ នេះដែលនឹងជំរុញឱ្យសកម្មភាពការទិញ-លក់-ជួលអចលនទ្រព្យ និងសំណង់មានភាពល្អប្រសើរជាងឆ្នាំ ២០២៣ កន្លងមក។
សារព័ត៌មាន CNBC បានរាយការណ៍កាលពីពាក់កណ្តាលខែធ្នូ ឆ្នាំ ២០២៣ ថា ធនាគារកណ្តាលអាមេរិកបានប្រកាសថា នឹងបញ្ចប់វដ្តនៃការដំឡើងអត្រាការប្រាក់ និងកំណត់ដំណាក់កាលសម្រាប់ការកាត់បន្ថយអត្រាការប្រាក់នៅឆ្នាំខាងមុខ។
ធនាគារកណ្តាលអាមេរិកបានដំឡើងអត្រាការប្រាក់ចំនួន ១១ ដងចាប់តាំងពីខែមីនា ឆ្នាំ ២០២២ ដែលវាជាល្បឿនដ៏លឿនបំផុតនៃការរឹតបន្តឹងចាប់តាំងពីដើមទសវត្សរ៍ ១៩៨០។ ការកើនឡើងនៃអត្រាការប្រាក់បានធ្វើឱ្យការចំណាយលើការខ្ចីប្រាក់របស់អ្នកប្រើប្រាស់កើនឡើងខ្ពស់ ខណៈអតិផរណានៅតែកើនឡើង ដោយធ្វើឱ្យគ្រួសារជាច្រើនស្ថិតនៅក្រោមសម្ពាធ។
អត្រាការប្រាក់ទាប និងការបន្ថយលក្ខខណ្ឌឥណទាននឹងជួយឱ្យទីផ្សារអចលនទ្រព្យ ឆាប់ងើបឡើងវិញ
អនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) និងជាម្ចាស់ក្រុមហ៊ុនអចលនទ្រព្យ Amatak Property Service Co., Ltd លោកស្រី តាំង ហួរ បានប្រាប់ ភ្នំពេញ ប៉ុស្តិ៍ កាលពីថ្ងៃទី ៤ ខែមករាថា កាលពីចុងឆ្នាំ ២០២៣ មានដំណឹងថា ធនាគារធំៗនៅអាមេរិកនឹងទម្លាក់អត្រាការប្រាក់ឥណទាន (ប្រាក់កម្ចី)។ ការទម្លាក់អត្រាការប្រាក់ពីសំណាក់ធនាគារធំៗនៅអាមេរិកដែលគេដឹងជាទូទៅថាជាប្រភពហិរញ្ញវត្ថុធំជាងគេលើពិភពលោកនោះ គឺប្រាកដជានឹងជះឥទ្ធិពលជាវិជ្ជមានដល់កំណើនសេដ្ឋកិច្ច និងទីផ្សារអចលនទ្រព្យលើពិភពលោក រួមទាំងប្រទេសកម្ពុជា។
លោកស្រីបន្តថា កន្លងមកដោយសារកំណើនសេដ្ឋកិច្ចពិភពលោកមិនមានភាពច្បាស់លាស់វាបានបង្ខំឱ្យគ្រឹះស្ថានហិរញ្ញវត្ថុនៅទូទាំងពិភពលោកសម្រេចដំឡើងអត្រាការប្រាក់ជាបន្តបន្ទាប់ ព្រមទាំងដាក់ចេញវិធានការរឹតបន្តឹងយ៉ាងខ្លាំងចំពោះការផ្តល់ឥណភាព ពិសេសក្នុងវិស័យអចលនទ្រព្យ និងសំណង់។
លោកស្រីលើកឡើងទៀតថា ជាក់ស្តែងក្នុងរយៈពេលប៉ុន្មានឆ្នាំចុងក្រោយនេះ ពិសេសក្នុងឆ្នាំ ២០២៣ គឺគ្រឹះស្ថានហិរញ្ញវត្ថុនៅកម្ពុជាបានធ្វើការរឹតបន្តឹងខ្លាំងលើការផ្តល់ឥណទានសម្រាប់វិស័យអចលនទ្រព្យ និងសំណង់ ដែលធ្វើឱ្យវិស័យនេះជួបនឹងបញ្ហាប្រឈមជាច្រើន សូម្បីតែការទិញ-លក់ និងជួលលក្ខណៈតូចៗក៏មិនសូវមានសកម្មភាពដែរ។
លោកស្រីបានថ្លែងថា៖ «ក្នុងនាមអ្នកនៅក្នុងវិស័យអចលនទ្រព្យ យើងពិតជារីករាយ និងចង់ឃើញការងើបឡើងវិញនៃទីផ្សារអចលនទ្រព្យ និងសំណង់ បើទោះក្នុងកម្រិតណាក៏ដោយ បន្ទាប់ពីស្ងប់ស្ងាត់ខ្លាំងក្នុងរយៈ-ពេលជិត ៤ ឆ្នាំមកនេះ ពោលគឺចាប់តាំងពីការលេចឡើងនៃវត្តមានជំងឺកូវីដ ១៩ នាដើមឆ្នាំ ២០២០»។
លោកស្រីបន្តថា៖ «អាមេរិក គឺជាមូលដ្ឋាននៃស្ថាប័នហិរញ្ញវត្ថុ និងធនាគារធំៗលំដាប់អន្តរជាតិ ដូច្នេះការទម្លាក់អត្រាការប្រាក់នៅអាមេរិក គឺនឹងបើកលទ្ធភាពឱ្យអ្នកវិនិយោគអាចយកឥណទានទាំងអស់នោះមកវិនិយោគផ្ទាល់នៅកម្ពុជាកាន់តែច្រើន»។
លោកស្រីបន្តថា ទន្ទឹមនឹងការទម្លាក់អត្រាការប្រាក់នៅអាមេរិក លោកស្រីក៏ចង់ឃើញគ្រឹះស្ថានហិរញ្ញវត្ថុនៅកម្ពុជាចាប់ផ្តើមទម្លាក់អត្រាការប្រាក់ និងការបញ្ចេញឥណទានឱ្យបានច្រើនឡើងវិញ ព្រមទាំងបន្ធូរបន្ថយលក្ខខណ្ឌផ្សេងៗ ដើម្បីផ្តល់លទ្ធភាព និងឱកាសឱ្យអ្នកវិនិយោគអាចចាប់ផ្តើមវិនិយោគលើវិស័យអចលនទ្រព្យ និងសំណង់ថ្មីៗ។
ទោះយ៉ាងណា លោកស្រីបញ្ជាក់ថា៖ «ទីផ្សារអចលនទ្រព្យនៅកម្ពុជាក្នុងអំឡុងពេលខ្លីនឹងមិនអាចស្ទុះឡើងខ្លាំងដូចមុនអំឡុងឆ្នាំ ២០២០ ឡើយ ដោយវិស័យនេះត្រូវការពេលបន្ថែមទៀត»។
ទីផ្សារអចលនទ្រព្យ និងសំណង់នៅត្រូវការពេលបន្ថែមទៀត
ប្រធានសមាគមអចលនទ្រព្យសកលលោក សំ សុខនឿន បានលើកឡើងថា ឆ្នាំ ២០២៣ ជាអំឡុងពេលដែលទីផ្សារអចលនទ្រព្យកម្ពុជាមានភាពស្ងប់ស្ងាត់ខ្លាំង ប៉ុន្តែឆ្នាំ ២០២៤ នេះស្ថានភាពនៃវិស័យសំណង់ និងអចលនទ្រព្យនឹងល្អប្រសើរជាងមុនបន្តិច ខណៈរដ្ឋាភិបាល និងផ្នែកឯកជន បាននិងកំពុងខិតខំផ្សព្វផ្សាយ និងធ្វើទីផ្សារយ៉ាងខ្លាំងដើម្បីទាក់ទាញវិនិយោគិនជាតិ និងអន្តរជាតិឱ្យបញ្ចេញទុនមកវិនិយោគនៅកម្ពុជា។ នៅពេលមានការវិនិយោគ គឺប្រាកដជាត្រូវការទីតាំង និងសំណង់អគារផ្សេងៗ ដូច្នេះវានឹងជួយឱ្យទីផ្សារអចលនទ្រព្យ និងសំណង់ មានដំណើរការឡើងវិញ។
លោកអះអាងថា៖ «ទីផ្សារអចលនទ្រព្យឆ្នាំ ២០២៤ នឹងគ្រាន់បើជាងឆ្នាំ ២០២៣ បន្តិចតាមរយៈកំណើននៃការបណ្តាក់ទុនថ្មីៗ។ វិស័យអចលនទ្រព្យ និងសំណង់តែងត្រូវការពេលយូរជាងវិស័យផ្សេងទៀត»។
បើតាមលោក សុខនឿន ការទម្លាក់អត្រាការប្រាក់របស់ធនាគារធំៗនៅអាមេរិក គឺមានឥទ្ធិពលតិចតួចប៉ុណ្ណោះសម្រាប់ទីផ្សារអចលនទ្រព្យនៅកម្ពុជា ប៉ុន្តែអ្វីដែលសំខាន់នោះគឺសកម្មភាពនៅក្នុងប្រទេសផ្ទាល់តែម្តង។
អាជ្ញាធរបានត្រៀមខ្លួនរួចជាស្រេចសម្រាប់គាំទ្រដល់ការងើបឡើងវិញនៃវិស័យអចលនទ្រព្យ និងសំណង់
អភិបាលរងខេត្តព្រះសីហនុ លោក ឡុង ឌីម៉ង់ បាននិយាយថា រដ្ឋាភិបាលកម្ពុជា ក៏ដូចជាអាជ្ញាធរខេត្តព្រះសីហនុ បានត្រៀមខ្លួនរួចរាល់សម្រាប់ទទួលយកភ្ញៀវទេសចរ និងវិនិយោគិនជាតិ និងអន្តរជាតិ ដែលចង់មកវិនិយោគនៅកម្ពុជា។ ឆ្នាំ ២០២៤ នេះអាជ្ញាធរខេត្តបានត្រៀមកញ្ចប់លើកទឹកចិត្តជាច្រើនសម្រាប់វិនិយោគិនណាដែលចង់ពង្រីកអាជីវកម្ម ឬបើកអាជីវកម្មថ្មីៗ។
លោកប្រាប់ថា៖ «ក្នុងឆ្នាំ ២០២៤ យើងសង្ឃឹមថា នឹងទទួលបានទេសចរ និងអ្នកវិនិយោគកាន់តែច្រើន។ បញ្ហាជាប់គាំងជាច្រើន ពិសេសវិស័យសំណង់ និងអចលនទ្រព្យនឹងត្រូវដោះស្រាយ»៕
