ទិដ្ឋភាពនៃសំណង់អគារនៅខេត្តព្រះសីហនុ។ រូបថត Yousos Apdoulrashim
ភ្នំពេញៈ លោក ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា គ្រោងនឹងប្រកាសកម្មវិធីជំរុញការវិនយោគ ដើម្បីដោះស្រាយបញ្ហាសំណង់អគារជាប់គាំងប្រមាណជា ១ ១៥០ កន្លែងនៅខេត្តព្រះសីហនុ ដែលជាប់គាំងក្រោយពីការរីករាលដាលនៃជំងឺកូវីដ១៩តាំងពីអំឡុងឆ្នាំ២០២០។ នេះបើយោងតាមការថ្លែងរបស់លោកនាយករដ្ឋមន្ត្រីនៅក្នុងពីធីសម្ពោធស្ពានបេតុង និងសំណេះសំណាលជាមួយកម្មករនិយោជិតសរុបជាង១ម៉ឺននាក់ នៅក្នុងខេត្តកោះកុង កាលពីថ្ងៃទី៨ ខែមករា ឆ្នាំ២០២៤។
លោក ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានប្រកាសថា នៅថ្ងៃទី២៥ ខែមករា ខាងមុខនេះ លោកនឹងអញ្ជើញប្រកាសកម្មវិធីជំរុញការវិនិយោគ នៅខេត្តព្រះសីហនុ ដើម្បីដោះស្រាយបញ្ហាជាប់គាំងមួយចំនួន។
លោក ហ៊ុន ម៉ាណែត បានថ្លែងថា៖«ថ្ងៃទី២៥ ខែមករានេះ ខ្ញុំត្រូវទៅប្រកាសកម្មវិធីថ្មី១ទៀត ដែលជាកម្មវិធីពិសេស សម្រាប់ជំរុញការវិនិយោគនៅខេត្ដព្រះសីហនុ ដើម្បីដោះស្រាយបញ្ហាជាប់គាំង រឿងសំណង់មួយចំនួន»។
យោងតាមរដ្ឋបាលខេត្តព្រះសីហនុ បានឱ្យដឹងថា មានសំណង់អគារដែលជាប់គាំង សាងសង់មិនទាន់បានរួចរាល់នៅក្រុងព្រះសីហនុ មានរហូតដល់ ១ ១៥០កន្លែង ហើយត្រូវបានកំពុងសហការជាមួយក្រសួងសេដ្ឋកិច្ចនិងហិរញ្ញវត្ថុ, អ្នកជំនាញផ្នែកអចលនទ្រព្យ, វិស័យធនាគារ, វិស័យឯកជន រួមទាំងភាគីពាក់ព័ន្ធផ្សេងៗទៀត ដើម្បីដោះស្រាយបញ្ហាជាប់គាំងនៃសំណង់អគារនៅក្រុងព្រះសីហនុដែលមានរហូតដល់ ជាង១ ០០០កន្លែង ឱ្យបានឆាប់រហ័ស។ ទោះជាយ៉ាងណាក៏ដោយសំណង់អគារទាំងនោះជាប់គាំងអស់រយៈពេលជិត៤ឆ្នាំមកហើយៗក៏បានចាប់ផ្ដើមដំណើរការសាងសង់ឡើងវិញជាបន្តបន្ទាប់ ហើយរហូតមកដល់ពេលបច្ចុប្បន្ននេះមានអគារ១០០កន្លែងហើយបាននិងកំពុងចាប់ផ្ដើមសាងសង់ និងជួសជុលឡើងវិញ។
លោក ច្រឹក សុខនីម ប្រធានសមាគមអ្នកវាយតម្លៃ និងទីភ្នាក់ងារអចលនវត្ថុ ថ្លែងថា ការប្រកាសរបស់លោកនាយករដ្ឋមន្ត្រីនេះ គឺជាយន្តការដ៏ល្អ ក្នុងការដោះស្រាយបញ្ហាអគារជាប់គាំងក្នុងខេត្តព្រះសីហនុ ក៏ដូចជាវិស័យអចលនទ្រព្យក្នុងខេត្តនេះផ្ទាល់ ដែលបានរងវិបត្តិដោយសារតែបញ្ហាជំងឺកូវីដ១៩ និងបញ្ហាសង្គ្រាមនានាផងដែរ។
លោកបានប្រាប់ថា៖«វាជាយន្តការដែលល្អមួយ ដែលធ្វើឱ្យភាពជាប់គាំងលើវិស័យសំណង់នៅខេត្តព្រះសីហនុ ត្រូវបានលុបបំបាត់ជាបណ្តើរៗ ឬអាចឈានដល់ការលុបបំបាត់ទាំងស្រុងនៅក្នុងរយៈពេល១ឆ្នាំឬ២ឆ្នាំទៀតផងដែរ»។
លោក សុខនីម ថ្លែងថា ភាពជាប់គាំងនៃវិស័យសំណង់ក្នុងខេត្តព្រះសីហនុនេះ មិនបានបង្កជាការរាំងស្ទះដល់ដំណើរកិច្ចអភិវឌ្ឍន៍របស់ខេត្តនោះទេ តែបញ្ហាកូវីដ១៩ ទៅវិញទេ ដែលបានធ្វើឱ្យខេត្តនេះ មានការអាក់ខានខ្លះ និងបានចាប់ផ្តើមប្រសើរឡើងវិញបន្តិចម្តងៗហើយក្នុងរយៈពេលចុងក្រោយនេះ។
លោកបានបញ្ជាក់ទៀតថា៖«ខ្ញុំគិតថា ចាប់ពីនេះទៅលក្ខខណ្ឌនៃទីផ្សារអន្តរជាតិមានភាពមិនច្បាស់នៅឡើយ ប៉ុន្តែរយៈពេល២ទៅ៣ឆ្នាំទៀត វានឹងល្អប្រសើរឡើងវិញហើយ។ទស្សនៈផ្ទាល់ខ្លួនរបស់ខ្ញុំចាប់ពីឆ្នាំ២០២៤ ឬ២០២៥ទៅ ការរីកចម្រើននៃសេដ្ឋកិច្ច វានឹងចាប់ផ្តើមរីកលូតលាស់បន្តិចម្តងៗ»។
រាជរដ្ឋាភិបាលបានប្រកាសពីការអនុគ្រោះ និងលើកទឹកចិត្តផ្នែកពន្ធដារ លើវិស័យអចលនទ្រព្យ ដូចជា ពន្ធប្រថាប់ត្រា,ពន្ធលើមូលធន,ពន្ធលើប្រាក់ចំណេញ ជាដើម ដើម្បីជួយដល់វិស័យនេះ។បែបនេះក្តី លោកប្រធានសមាគមអ្នកវាយតម្លៃ និងទីភ្នាក់ងារអចលនវត្ថុ នៅតែចង់ឱ្យរាជរដ្ឋាភិបាលកម្ពុជា ផ្តល់ការជ្រោមជ្រែងច្រើនជាងនេះទៀត ដូចជា ការផ្តល់នូវកញ្ចប់ថវិកាណាមួយ តាមរយៈការខ្ចីពីបរទេស ឬក៏យន្តការរូបមន្តទឹកប្រាក់ដែលមានស្រាប់ អាចចាក់ចូលនៅក្នុងវិស័យអចលនទ្រព្យឱ្យបានច្រើន នោះវិស័យអចលនទ្រព្យ នឹងមានភាពរឹងមាំ ដែលជាសសរស្តម្ភ សម្រាប់ទ្រទ្រង់នូវខឿនសេដ្ឋកិច្ចនាពេលអនាគត។
នៅចន្លោះឆ្នាំ២០១៦ ដល់ឆ្នាំ២០១៩ លំហូរវិនិយោគិនបរទេស បានសម្រុកមកវិនិយោគក្នុងខេត្តព្រះសីហនុយ៉ាងសន្ធឹកសន្ធាប់ ក្រោមវត្តមានសាងសង់អគារធំៗ ជាពិសេសលើផ្នែកសណ្ឋាគារ និងកាស៊ីណូជាដើម ដែលធ្វើឱ្យតម្លៃអចលនទ្រព្យនៅក្នុងខេត្តនេះ បានកើនឡើងយ៉ាងគំហុក។ ប៉ុន្តែចាប់តាំងពីចុងឆ្នាំ២០១៩ មក ដោយសារបញ្ហាបិទហ្គេមអនឡាញ ការរីករាលដាលជំងឺកូវីដ១៩ និងបញ្ហាសកល ដូចជាសង្គ្រាមរវាងរុស្ស៊ី និងអ៊ុយក្រែន សំណង់អគារមួយចំនួនត្រូវបានជាប់គាំងហើយផ្អាកសាងសង់រហូតដល់សព្វថ្ងៃនេះ។
លោក គួច ចំរើន អភិបាលខេត្តព្រះសីហនុ ធ្លាប់បានប្រាប់កាលពីពាក់កណ្តាលឆ្នាំ២០២៣ថា សំណង់អគារមួយចំនួន ត្រូវបានជាប់គាំងដោយសារការមានទំនាស់ រវាងអ្នកសាងសង់ ម្ចាស់អគារ និងម្ចាស់ដី បញ្ហាការផ្គត់ផ្គង់សម្ភារសំណង់ និងការមិនផ្ដល់ប្រាក់ឈ្នួលដីទៅម្ចាស់ដីជាដើម៕
