ទិដ្ឋភាពអគារខ្ពស់នៅរាជធានីភ្នំពេញ។ វិស័យអចលនទ្រព្យនៅកម្ពុជាបន្តស្ងប់ស្ងាត់។ ភ្នំពេញប៉ុស្តិ៍
បើទោះបីមួយរយៈចុងក្រោយនេះរាជរដ្ឋាភិបាលបានខិតខំពង្រីកការអភិវឌ្ឍហេដ្ឋារចនាសម្ព័ន្ធផ្លូវថ្នល់ ព្រលានយន្តហោះ និងអាកាសយានដ្ឋាន ជាបន្តបន្ទាប់ក៏ដោយ ក៏ទីផ្សារអចលនទ្រព្យកម្ពុជា នៅក្នុងរយៈពេល ៩ខែដើមឆ្នាំ ២០២៤ នេះហាក់មិនបង្ហាញពីសញ្ញាវិជ្ជមានគួរឱ្យកត់សម្គាល់ឡើយ។ នេះបើតាមអ្នកជំនាញក្នុងវិស័យអចលនទ្រព្យកម្ពុជា។
ប្រធានសមាគមអចលនទ្រព្យសកល និងជាប្រធានសម្ព័ន្ធក្រុមហ៊ុន SAM SN Group លោក សំ សុខនឿន បានប្រាប់ភ្នំពេញប៉ុស្តិ៍នៅថ្ងៃទី ៩ ខែតុលា ថា ទោះបីស្ថានភាពនៃការឆ្លងរាលដាលជំងឺកូវីដ១៩ បានបិទបញ្ចប់ ប៉ុន្តែបញ្ហាជម្លោះភូមិសាស្រ្តនយោបាយ និងជម្លោះប្រដាប់អាវុធរវាងប្រទេសមួយចំនួន គឺបានបន្តជះឥទ្ធិពលអវិជ្ជមានដដែលទៅលើកំណើនសេដ្ឋកិច្ចសកល។
លោកបន្តថា ដោយសារទីផ្សារអចលនទ្រព្យកម្ពុជាតែងពឹងផ្អែកលើវិនិយោគអន្តរជាតិ ដូច្នេះបើសេដ្ឋកិច្ចសកលមិនសូវល្អ ផលអវិជ្ជមានប្រាកដជាជះឥទ្ធិពលដល់វិស័យអចលនទ្រព្យកម្ពុជា។
លោកថ្លែងថា៖«សម្រាប់សកម្មភាពទិញ-លក់-ជួល និងតម្លៃអចលនទ្រព្យនៅកម្ពុជានារយៈពេល ៩ ខែដើមឆ្នាំ ២០២៤ នេះ គឺមិនទាន់មានអ្វីប្រែប្រួលឡើយបើធៀបនឹងចុងឆ្នាំ២០២៣»។
ទោះយ៉ាងណា ក្នុងនាមជាអ្នកជំនាញក្នុងវិស័យអចលនទ្រព្យជាង ១ទសវត្ស លោក សុខនឿន បានប្រាប់ថា អំឡុងពេលនេះគឺជាឱកាសសម្រាប់អ្នកដែលមានប្រាក់នៅសល់ និងមានទស្សនវិស័យច្រើនឆ្នាំទៅមុខ ក្នុងការស្វែងរកអចលនទ្រព្យដែលស្ថិតក្នុងទីតាំងល្អ និងមានតម្លៃសមរម្យ។ នៅពេលសេដ្ឋកិច្ចសកល និងកម្ពុជាល្អប្រសើរឡើងវិញ ហើយការរៀបចំហេដ្ឋារចនាសម្ព័ន្ធនៅកម្ពុជារួចរាល់ គឺនឹងមានក្រមហ៊ុន/វិនិយោគិនជាតិ និងអន្តរជាតិជាច្រើនចូលមកបណ្តាក់ទុននៅកម្ពុជា។ កិច្ចការទាំងអស់នេះសុទ្ធតែត្រូវការអចលនទ្រព្យសម្រាប់ធ្វើជាទីតាំង។
លោកលើកឡើងថា៖ «បច្ចុប្បន្ននេះខ្ញុំឃើញមានទីតាំងសក្តានុពលមួយចំនួនសម្រាប់វិនិយោគលើអចលនទ្រព្យ (តំបន់ភ្នំពេញ) ដែលមានដូចជា តំបន់ព្រលានយន្តហោះថ្មី តំបន់ក្បែរគម្រោងព្រែកជីកតេជោ ... និងតំបន់អរិយក្សត្រ។ ទាំងអស់នេះសុទ្ធតែជាទីតាំងវិនិយោគដែលមានលក្ខណៈយូរអង្វែង។ អចលនទ្រព្យនៅតំបន់ទាំងអស់នេះនឹងមានការវិវឌ្ឍកាន់តែខ្លាំងនៅពេលសេដ្ឋកិច្ចសកលល្អប្រសើរ»។
ចំណែកប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក សន សៀប ថ្មីៗនេះបាននិយាយថា ស្ថានភាពទីផ្សារអចលនទ្រព្យកម្ពុជា ដែលមិនសូវល្អនាពេលនេះ គឺដោយសារមានកត្តារួមផ្សំជាច្រើនដូចជា ការវិនិយោគរបស់រដ្ឋមិនសូវមានសកម្មភាពដែលបណ្តាលមកពីផលប៉ះពាល់ពីវិបត្តិសេដ្ឋកិច្ចសកល ឥទ្ធិពលវិបត្តិសង្គ្រាមនៅប្រទេសមួយចំនួន និងភាពតានតឹងផ្នែកនយោបាយនៅតំបន់ផ្សេងៗទៀត។
លោកបន្តថា បញ្ហានេះមានផលលំបាកខ្លាំងរហូតដល់អចលនទ្រព្យនៅតំបន់ខ្លះធ្លាក់ដល់ក្រោមតម្លៃទីផ្សារ ៥០ ភាគរយ និងមិនមានអ្នកទិញទៀតផង។
លោកនិយាយថា៖«នៅពេលមានវិបត្តិសេដ្ឋកិច្ចរកលុយមិនបាន តម្រូវការអ្វីគ្រប់យ៉ាងនឹងថយចុះ។ វាថយដូចខ្ញុំនិយាយអ៊ីចឹង គឺវាថយតម្រូវការ ខណៈការផ្គត់ផ្គង់ឡើងខ្ពស់រួចទៅហើយ»។
អ្នកជំនាញអចលនទ្រព្យរូបនេះឱ្យដឹងថា តាមបទពិសោធបញ្ហាទីផ្សារអចលនទ្រព្យត្រូវការពេលសមស្របដើម្បីងើបឡើងវិញបន្ទាប់ពីប៉ះទង្គិចមក ដូចជា នៅកម្ពុជាបញ្ហាអចលនទ្រព្យនៅឆ្នាំ ២០០៨ អូសបន្លាយដល់ឆ្នាំ ២០១២ ទើបប្រសើរឡើងវិញ។
តាមការយល់ឃើញរបស់លោក សន សៀប គឺស្ថានភាពទីផ្សារអចលនទ្រព្យនៅកម្ពុជា នឹងអាចប្រសើរឡើងវិញនៅឆ្នាំ២០២៨៕
