នៅថ្ងៃទី ២៨ ខែតុលា ឆ្នាំ ២០២២ វេទិកាទីផ្សារមូលធនអាស៊ាន (ACMF) ក្រោមភាពជាប្រធាននៃនិយ័តករមូលបត្រកម្ពុជា បានសម្ពោធដាក់ឱ្យប្រើប្រាស់នូវស្តង់ដាសញ្ញាបណ្ណផ្សារភ្ជាប់និរន្តរភាពអាស៊ាន (ASEAN SLB Standards) ដើម្បីជួយសម្រួលដល់ការប្រមូលសាច់ប្រាក់របស់ក្រុមហ៊ុនដែលរួមចំណែកដល់ការអភិវឌ្ឍប្រកបដោយនិរន្តរភាព ខណៈពេលដែល ACMF បន្តសង្កត់ធ្ងន់លើការអភិវឌ្ឍហិរញ្ញវត្ថុនិរន្តរភាពនៅក្នុងតំបន់។
ស្តង់ដាសញ្ញាបណ្ណផ្សារភ្ជាប់និរន្តរភាព អាស៊ានគឺជាការអនុម័តចុងក្រោយបំផុតនៃស្តង់ដាសញ្ញាបណ្ណក្នុងក្របខណ្ឌអាស៊ាន ដែលរួមមានស្តង់ដាសញ្ញាបណ្ណបៃតងអាស៊ាន ស្តង់ដា សញ្ញាបណ្ណសង្គមអាស៊ាន និងស្តង់ដាសញ្ញាបណ្ណនិរន្តរភាពអាស៊ានដែលត្រូវបានអនុម័តដាក់ឱ្យប្រើប្រាស់ក្នុងឆ្នាំ ២០១៧ និង ២០១៨។
គិតត្រឹមថ្ងៃទី ២១ ខែតុលា ឆ្នាំ ២០២២ សញ្ញាបណ្ណ និង Sukuk មានទឹកប្រាក់ទំហំ ២៩,៨២ ប៊ីលានដុល្លារអាមេរិក ត្រូវបានបោះផ្សាយក្រោមស្តង់ដា និងស្លាកសញ្ញាសញ្ញាបណ្ណបៃតងអាស៊ាន សញ្ញាបណ្ណសង្គមអាស៊ាន និងសញ្ញាបណ្ណនិរន្តរភាពអាស៊ាន ដែលនេះសរឱ្យឃើញថាសញ្ញាបណ្ណប្រភេទនេះ បាននិងកំពុងទទួលបានការចាប់អារម្មណ៍គួរឱ្យ កត់សម្គាល់ក្នុងប៉ុន្មានឆ្នាំចុងក្រោយនេះ។
តើអ្វីទៅជាស្តង់ដាសញ្ញាបណ្ណផ្សារភ្ជាប់និរន្តរភាពអាស៊ាន?
ស្តង់ដាសញ្ញាបណ្ណផ្សារភ្ជាប់និរន្តរភាពអាស៊ាន គឺជាប្រភេទឧបករណ៍ ហិរញ្ញវត្ថុមួយដែលមានលក្ខណៈ ហិរញ្ញវត្ថុនិង/ឬរចនាសម្ព័ន្ធអាចប្រែប្រួលអាស្រ័យលើថា តើក្រុមហ៊ុនបោះផ្សាយសម្រេចបាននូវគោលបំណងនិរន្តរភាព ដែលបានកំណត់ទុកជាមុន ដែរឬទេ? ឧទាហរណ៍អត្រាគូប៉ុងអាចកើនឡើងបន្ទាប់ពីរយៈពេលកំណត់ជាក់លាក់ណាមួយ ប្រសិនបើគោលដៅនិរន្តរភាពដែលកំណត់ដោយក្រុមហ៊ុនបោះផ្សាយមិនអាចសម្រេចបាន។ គោលដៅនេះត្រូវបានវាស់វែងតាមរយៈសូចនាករគន្លឹះ (KPIs) និងត្រូវបានវាយតម្លៃដោយធៀបនឹងគោលដៅនៃការអនុវត្តប្រកបដោយនិរន្តរភាព (SPTs)។
ផ្ទុយពីសញ្ញាបណ្ណបៃតង សញ្ញាបណ្ណសង្គម និងសញ្ញាបណ្ណនិរន្តរភាព ចំពោះសាច់ប្រាក់ដែលប្រមូលបានពីការបោះផ្សាយ ត្រូវតែប្រើប្រាស់សម្រាប់គម្រោងបៃតង សង្គម និងនិរន្តរភាព ការបោះផ្សាយសញ្ញាបណ្ណផ្សារភ្ជាប់និរន្តរភាពអាចប្រើប្រាស់ក្នុងគោលបំណងទូទៅបាន។ សញ្ញាបណ្ណផ្សារភ្ជាប់និរន្តរភាព អាចជួយដល់ក្រុមហ៊ុនដែលកំពុងស្វែងរកការផ្លាស់-ប្តូរឆ្ពោះទៅរកនិរន្តរភាព។
ស្តង់ដាសញ្ញាបណ្ណផ្សារភ្ជាប់និរន្តរភាពអាស៊ានត្រូវបានអភិវឌ្ឍដោយផ្អែកលើគោលការណ៍សញ្ញាបណ្ណផ្សារភ្ជាប់និរន្តរភាព (SLBP) របស់សមាគមទីផ្សារមូលធនអន្តរជាតិ (ICMA) ដោយសារតែគោលការណ៍នេះត្រូវបានទទួលស្គាល់ជាអន្តរជាតិ និងប្រើប្រាស់យ៉ាងទូលំទូលាយ។ SLBP ដែលត្រូវបានដាក់ឱ្យប្រើប្រាស់ជាលើកដំបូងនៅក្នុងខែមិថុនា ឆ្នាំ ២០២០ គឺជាសំណុំនៃគោលការណ៍ណែនាំដោយស្ម័គ្រចិត្ត ដែលអភិវឌ្ឍន៍ដោយអ្នកចូលរួមក្នុងទីផ្សារសំខាន់ៗក្រោមការសម្របសម្រួលរបស់ ICMA ជាលេខាធិការដ្ឋាន។
ខណៈពេលដែល SLBP កំណត់នូវគោលការណ៍ទូលំទូលាយចំពោះសញ្ញាបណ្ណផ្សារភ្ជាប់និរន្តរភាព ស្តង់ដាសញ្ញាបណ្ណផ្សារភ្ជាប់និរន្តរភាពអាស៊ានមានគោលបំណងផ្តល់នូវការណែនាំជាក់លាក់បន្ថែមទៀតអំពីរបៀបដែល SLBP ត្រូវអនុវត្តនៅទូទាំងអាស៊ាន។ ក្នុងន័យនេះ ក្រុមហ៊ុនបោះផ្សាយសញ្ញាបណ្ណ ដែលមានបំណងបោះផ្សាយ និងដាក់ស្លាកសញ្ញាបណ្ណផ្សារភ្ជាប់និរន្តរភាពអាស៊ាន ត្រូវតែអនុលោមតាមស្តង់ដាសញ្ញាបណ្ណផ្សារភ្ជាប់និរន្តរភាពអាស៊ាន។
ដូច្នេះ ស្តង់ដាសញ្ញាបណ្ណផ្សារភ្ជាប់និរន្តរភាពអាស៊ាននឹងផ្តល់ទំនុកចិត្តដល់វិនិយោគិន ដោយហេតុថាសញ្ញាបណ្ណផ្សារភ្ជាប់និរន្តរភាព ដែលត្រូវបានដាក់ស្លាកជាសញ្ញាបណ្ណផ្សារភ្ជាប់និរន្តរភាពអាស៊ាន បានបំពេញតាមស្តង់ដារួមមួយ ខណៈដែលស្តង់ដានេះនឹងផ្តល់ដល់ក្រុមហ៊ុនបោះផ្សាយ នូវការអនុវត្តល្អបំផុតក្នុងទីផ្សារសម្រាប់ សញ្ញាបណ្ណផ្សារភ្ជាប់និរន្តរភាព។
ស្តង់ដាសញ្ញាបណ្ណផ្សារភ្ជាប់និរន្តរភាពអាស៊ាន រួមបញ្ចូលនូវធាតុផ្សំស្នូលទាំងប្រាំនៃ SLBP មានដូចជា ការជ្រើសរើស KPIs ការកំណត់ SPTsលក្ខណៈសម្បត្តិរបស់សញ្ញាបណ្ណ ការរាយការណ៍ និងការផ្ទៀងផ្ទាត់ ជាមួយនឹងលក្ខណៈពិសេសបន្ថែមសំខាន់ៗ។
នៅទូទាំងពិភពលោក ទីផ្សារសញ្ញាបណ្ណផ្សារភ្ជាប់និរន្តរភាពបានរីកចម្រើនយ៉ាងឆាប់រហ័សចាប់តាំងពីការដាក់ឱ្យ អនុវត្តនូវ SLBP។ ក្នុងរបាយការណ៍ឆមាសទី១ ឆ្នាំ ២០២២ របស់គំនិតផ្តួចផ្តើមសញ្ញាបណ្ណអាកាសធាតុ (Climate Bonds Initiative) បានកត់ត្រាទំហំទឹកប្រាក់នៃការបោះផ្សាយសញ្ញាបណ្ណផ្សារភ្ជាប់និរន្តរភាពចំនួន ១៧៦,៦ ប៊ីលានដុល្លាអាមេរិក។ សម្រាប់ក្រុមហ៊ុនបោះផ្សាយដែលមិនមានគម្រោងដែលអាចកំណត់បានពីនិរន្តរភាព សញ្ញាបណ្ណផ្សារភ្ជាប់និរន្តរ-ភាពគឺជាច្រកក្នុងការប្រមូលហិរញ្ញប្បទានសម្រាប់គោលបំណងទូទៅ ខណៈដែលគម្រោងនេះក៏រួមចំណែកឆ្ពោះទៅរកគោលដៅនិរន្តរភាព។
ស្តង់ដាសញ្ញាបណ្ណផ្សារភ្ជាប់និរន្តរភាពអាស៊ានមានគោលបំណងពង្រឹង តម្លាភាព ស្ថិរភាព និងភាពរួមមួយនៃសញ្ញាបណ្ណផ្សារភ្ជាប់និរន្តរភាពដែលនឹងរួមចំណែកដល់ការអភិវឌ្ឍចំណាត់ថ្នាក់ទ្រព្យសកម្មថ្មី កាត់បន្ថយការ ចំណាយលើការវាយតម្លៃ និងជួយវិនិយោគិនធ្វើការសម្រេចចិត្តវិនិយោគប្រកបដោយការយល់ដឹងខ្ពស់។
ស្តង់ដាសញ្ញាបណ្ណផ្សារភ្ជាប់និរន្តរភាពអាស៊ាន អាចទាញយកបានតាមរយៈ៖ https://www.theacmf.org/initiatives/sustainable-finance/asean-sustainability-linked-bond-standards៕
