![](https://pppkhmer.sgp1.digitaloceanspaces.com/image/main/20242/23_2_2024_kizuna_festival_2024.jpg)
មហោស្រពគីហ្សូណាជប៉ុន-កម្ពុជា លើកទី១៣ ដែលជាកម្មវិធីវប្បធម៌ដ៏ធំមួយនឹងប្រព្រឹត្តទៅចាប់ពីថ្ងៃទី ២២ ដល់ថ្ងៃទី ២៥ ខែកុម្ភៈ ឆ្នាំ ២០២៤ នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ដែលនឹងមានកម្មវិធីពិសេសៗជាច្រើន។
ព្រឹត្តិការណ៍នេះមានកម្មវិធី និងសកម្មភាពជាច្រើនដូចជា ការសរសេរអក្សរផ្ទង់ជប៉ុន, កីឡាយុទ្ធសិល្ប៍ជប៉ុននិងកម្ពុជា, ភាសា, អក្សរសិល្ប៍, អាហារ, តន្ត្រី, សិល្បៈ, ហត្ថកម្ម, និងសូម្បីតែ Cosplay ហើយមហោស្រពគីហ្សូណាឆ្នាំនេះ មានអ្វីៗពិសេសជាច្រើនទៀតសម្រាប់អ្នកចូលរួម។
ពិធីបើកមហោស្រពគីហ្សូណាជប៉ុនកម្ពុជាដ៏ធំបំផុតមួយនេះដែលរៀបចំដោយស្ថានទូតជប៉ុន រួមសហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) និងការិយាល័យទំនាក់ទំនងភ្នំពេញនៃមូលនិធិជប៉ុន នឹងប្រព្រឹត្តទៅនៅថ្ងៃព្រហស្បតិ៍ ទី ២២ ខែកុម្ភៈ ចាប់ពីម៉ោង ១៨:០០ ដល់ម៉ោង ១៩:៣០។
ប្រធានបទនៃមហោស្រពឆ្នាំនេះគឺ «ទំព័រថ្មីនៃអនុស្សាវរីយ៍» ដែលគូសបញ្ជាក់ពីសកម្មភាពជាច្រើនដែលនឹងប្រារព្ធរួមគ្នាពេលនេះ ក៏ដូចជារក្សាទំនាក់ទំនងបន្តនាពេលអនាគត។
![](https://pppkhmer.sgp1.cdn.digitaloceanspaces.com/image/main/20242/23_2_2024_dsc00856.jpg)
ពាក្យភាសាជប៉ុន «គីហ្សូណា» មានន័យថា «ចងចិត្ត» ត្រូវបានជ្រើសរើសពាក្យនេះជាឈ្មោះសម្រាប់មហោស្រពតាំងពីឆ្នាំ ២០១២ ដោយសង្ឃឹម ថា នឹងក្លាយជានិមិត្តរូបនៃចំណងទំនាក់ទំនងរវាងប្រទេសកម្ពុជា និងជប៉ុនឱ្យកាន់តែរឹងមាំ។
កញ្ញា Miyu Shimomura នឹងមានការសម្តែងក្នុងពិធីបើកមហោស្រពគីហ្សូណាជប៉ុន-កម្ពុជា នាថ្ងៃទី ២២ ខែកុម្ភៈ និងកម្មវិធីសម្តែងពិសេស «របាំបុរាណកម្ពុជា-ជប៉ុន» នាថ្ងៃទី ២៣ ខែកុម្ភៈផងដែរ។
កញ្ញា Miyu Shimomura គឺជានាដការបាំបុរាណជប៉ុន «Nihonbuyo» និងជាវិចិត្រករខាងគំនូរខ្មុកម្រ័ក្សណ៍ Urushi។ គាត់ចូលរួមសម្តែងក្នុងកម្មវិធីអបអរសាទរខួប-មិត្តភាព ៧០ ឆ្នាំ រវាងជប៉ុន-កម្ពុជា នៅទីក្រុងតូក្យូ កាលពីឆ្នាំមុន។
វិចិត្រសាល មកុដ និងអលង្ការ ភួង មាល័យ បាយសីខ្មែរ (Mealai Khmer Arts Studio) ជាក្រុមការងារដែល មានជំនាញលើការរចនាមកុដ និងគ្រឿងអលង្ការបុរាណខ្មែរ ដែលធ្លាប់ចូលរួមរចនាគ្រឿងអលង្ការសម្រាប់កម្មវិធីថ្នាក់ជាតិធំៗជាច្រើន។ ក្នុងមហោស្រពគីហ្សូណាជប៉ុន-កម្ពុជា ពួកគាត់នឹងរៀបចំការតាំងពិព័រណ៍គ្រឿងមកុដ ពស្ត្រា អលង្ការនៃអង្គមហាវីរក្សត្រ និងមហាវីរក្សត្រីនៃសម័យអង្គរដ៏រុងរឿងរបស់ខ្មែររយៈពេល ៣ ថ្ងៃពេញ។
![](https://pppkhmer.sgp1.cdn.digitaloceanspaces.com/image/main/20242/23_2_2024_kizuna_festival_2024_1.jpg)
លោក លី វណ្ណថាន ជាអ្នកចម្រៀងខ្មែរដែលមានទេពកោសល្យចម្រុះ ដូចជាអ្នកនិពន្ធចម្រៀង ផលិតករ និងជាតន្ត្រីករផងដែរ។ នៅឆ្នាំ ២០០៩ លោក វណ្ណថាន បានទៅបន្តការសិក្សាលើផ្នែកផលិតកម្មទ្រឹស្តីតន្ត្រី ការងារតន្ត្រីករ និងសកម្មភាពជាច្រើនទៀតនៅប្រទេសបារាំង។ ចំណុចលេចធ្លោ និងល្បីល្បាញរបស់គាត់គឺជាតន្ត្រីករ ១ រូប ដែលមានទេពកោសល្យអាចលេងឧបករណ៍តន្ត្រី ២៨ ឧបករណ៍។ លោក វណ្ណថាន នឹងមានការសម្តែងពិសេសនៅក្នុងកម្មវិធីការប្រគុំតន្ត្រីកម្ពុជា-ជប៉ុន នៅថ្ងៃទី ២៥ ខែកុម្ភៈ។
លើសពីនេះ មានកម្មវិធីសម្តែងពិសេស «របាំបុរាណកម្ពុជា-ជប៉ុន» នៅថ្ងៃសុក្រ ទី ២៣ ខែកុម្ភៈ ហើយក៏មានសិក្ខាសាលាស្តីពីការចារ និងផ្តិតសំណៅ អក្សរខ្មែរបុរាណ។ ក្នុងនោះក៏មានការបង្ហាញជាមួយសម្លៀកបំពាក់បែបប្រពៃណីជប៉ុនដ៏ស្រស់ស្អាត, ការសរសេរអក្សរផ្ចង់ជប៉ុន ជាមួយលោក គ្រូអ៊ីតុ។
នៅថ្ងៃសៅរ៍ ក៏មានការប្រគុំតន្ត្រីក្លាស៊ិកដោយ Worldship Orchestra រួមជាមួយសមាគមវង់តន្ត្រីយុវជនអង្គរ។ ក្នុងនោះក៏មានសិក្ខាសាលាស្តីពី «សារៈសំខាន់នៃការអាន ដើម្បីសំយោគអត្ថបទស្រាវជ្រាវក្នុងវិស័យអក្សរសិល្ប៍» ដោយបណ្ឌិត សោន វណ្ណៈ។
ថ្ងៃអាទិត្យ ទី ២៥ ខែកុម្ភៈ មានកម្មវិធីជាច្រើនដូចជាកម្មវិធីយល់ដឹងពីសិល្បៈ នៃការប្រើជក់ តាមបែបអក្សរផ្ចង់ជប៉ុន ហើយក្នុនោះក៏មានសិក្ខាសាលាខ្លីស្តីពី រូបារម្មណ៍ក្នុងអក្សរសិល្ប៍ ដោយកវីនិពន្ធ ស៊ូ ខេមរិន្ទ។
![](https://pppkhmer.sgp1.cdn.digitaloceanspaces.com/image/main/20242/23_2_2024_kizuna_festival_2024_2.jpg)
លើសពីនេះក៏មានកីឡាយុទ្ធសិល្ប៍ជប៉ុន និងកម្ពុជា, ការរៀនភាសារជប៉ុន និងបទបង្ហាញស្តីអំពីការសិក្សានៅប្រទេសជប៉ុនឆ្នាំ ២០២៤ ជាដើម។
មហោស្រពគីហ្សូណា ជប៉ុន-កម្ពុជា ត្រូវបានរៀបចំឡើងជារៀងរាល់ឆ្នាំចាប់តាំងពីឆ្នាំ ២០១២ ក្នុងគោលបំណងបង្ហាញពីវប្បធម៌ជប៉ុន និងកម្ពុជា ក៏ដូចជាការជំរុញការផ្លាស់ប្តូរនានារវាង ប្រជាជននៃប្រទេសទាំង ២។ តាមរយៈព្រឹត្តិការណ៍នេះ អ្នកចូលរួមនឹងមានអារម្មណ៍កាន់តែស្និទ្ធស្នាលជាមួយប្រទេសជប៉ុន និងបានយល់ដឹងកាន់តែស៊ីជម្រៅទៅលើវប្បធម៌ខ្មែរ និងជប៉ុនតាមរយៈការចូលរួមកម្មវិធីនានាក្នុងមហោស្រពនេះ៕
![](https://pppkhmer.sgp1.cdn.digitaloceanspaces.com/image/main/20242/23_2_2024_kun_khmer.jpg)