ក្រុងតូក្យូ៖ កីឡាការិនីចោលដុំដែករបស់សហរដ្ឋអាមេរិក Raven Saunders កំពុងប្រឈមនឹងវិធានការផ្នែកវិន័យ ក្រោយពីបានធ្វើការតវ៉ានៅលើវេទិកា ជាលើកដំបូង ក្នុងព្រឹត្តិការណ៍អូឡាំពិក នាទីក្រុងតូក្យូ ប្រទេសជប៉ុន។
អត្តពលិកកូនកាត់អាហ្វ្រិក-អាមេរិកវ័យ ២៥ ឆ្នាំ Saunders បានធ្វើកាយវិការខ្វែងដៃជាអក្សរ «X» អំឡុងកម្មវិធីប្រគល់មេដាយ កាលពីថ្ងៃអាទិត្យ នៅឯពហុកីឡដ្ឋានអូឡាំពិក បន្ទាប់ពីរូបនាងដណ្ដើមបានមេដាយប្រាក់នេះ នៅព្រឹកថ្ងៃនោះ។
បណ្ដាញសារព័ត៌មាន នៅអាមេរិកបានធ្វើសេចក្ដីរាយការណ៍ថា Saunders ដែលជាជនជាតិស្បែកខ្មៅ និងជាអ្នកគាំទ្រសិទ្ធិក្រុមអ្នកស្រឡាញ់ភេទដូចគ្នា (LGBT) បាននិយាយថា កាយវិការរបស់នាង ត្រូវបានធ្វើឡើងក្នុងន័យសាមគ្គីជាមួយនឹងក្រុមមនុស្ស ដែលត្រូវបានគេជិះជាន់។ Saunders និយាយថា នាងចង់បង្ហាញឱ្យមនុស្ស នៅជុំវិញពិភពលោកទាំងអស់ ដែលកំពុងប្រឹងប្រែងតស៊ូ និងមិនមានប្លាតហ្វ៉ម ដើម្បីនិយាយការពារខ្លូនឯងបាន។
ការតវ៉ារបស់ Saunders គឺជាតេស្តសាកល្បងលើកដំបូង ចំពោះច្បាប់របស់គណៈកម្មាធិការអូឡាំពិកអន្តរជាតិ (IOC) ដែលបានហាមឃាត់ជាដាច់ខាត មិនឱ្យមានការតវ៉ាគ្រប់យ៉ាង នៅលើវេទិកាប្រគល់មេដាយក្នុងព្រឹត្តិការណ៍អូឡាំពិកឡើយ។
IOC បានកែសម្រួលច្បាប់របស់ខ្លួន ពាក់ព័ន្ធនឹងការតវ៉ារបស់អត្តពលិកនៅមុនហ្គេមដំណើរការ ដោយចែងថា ការតវ៉ាដោយសន្តិវិធីមុនការប្រកួតប្រជែងនឹងត្រូវបានអនុញ្ញាតឱ្យធ្វើទៅបាន។
តែយ៉ាងណាក៏ដោយ ស្ថាប័នគ្រប់គ្រងកីឡាអូឡាំពិកបានបន្តរក្សាច្បាប់ដ៏តឹងរ៉ឹងប្រឆាំងនឹងការតវ៉ា នៅលើវេទិកាប្រគល់មេដាយដដែល ហើយពាក់ព័ន្ធនឹងកាយវិការរបស់កីឡាការិនី Saunders នៅមិនទាន់ច្បាស់ថា តើនាងនឹងត្រូវប្រឈមនឹងការពិន័យណាមួយនោះឡើយ។
គណៈកម្មាធិការអូឡាំពិក និងប៉ារ៉ាឡាំពិករបស់សហរដ្ឋអាមេរិកបានឱ្យដឹងនៅមុនហ្គេមចាប់ផ្ដើមថា នឹងមិនមានការដាក់ពិន័យចំពោះអត្តពលិកខ្លួន សម្រាប់ការតវ៉ានោះឡើយ៕AFP/VN