.jpg)
អ្នកចាំទីក្រុមណាហ្គាវើលដ៍ បានលោតទៅចាប់បាល់ ចេញពីការលោតតែតរបស់ក្រុមភ្នំពេញក្រោន កាលពីថ្ងៃអាទិត្យ។ រូបថត ណាហ្គាវើលដ៍
ភ្នំពេញ៖ សហព័ន្ធកីឡា បាល់ទាត់កម្ពុជា (FFC) តាមរយៈគណៈកម្មការប្រកួតបាល់ទាត់កម្ពុជា (CNCC) បានឈានដល់ការសម្រេចពន្យារពេល ការប្រកួតលីគកំពូលកម្ពុជា ឆ្នាំ២០២១ និងពានរង្វាន់សម្តេច ហ៊ុន សែន (ថ្នាក់ខេត្ត) ឆ្នាំ ២០២១ ដើម្បីចូលរួមបង្ការ និងទប់ស្កាត់ការឆ្លងរីករាលដាលក្នុងសហគមន៍ នៃមេរោគកូវីដ ១៩ បំប្លែងថ្មី ប្រភេទដែលតា (Delta)។
ការពន្យារពេលព្រឹត្តិការណ៍បាល់ទាត់ទាំង ២ ក្របខ័ណ្ឌនេះ គឺគណៈកម្មការប្រកួតបាល់ទាត់កម្ពុជា បានជូនដំណឹងជាផ្លូវការ កាលពីល្ងាចថ្ងៃចន្ទ ដើម្បីឱ្យប្រធានមន្ទីរអប់រំ យុវជន និងកីឡារាជធានី-ខេត្ត ព្រមទាំងអគ្គលេខាធិការក្លិបបាល់ទាត់ ដែលបានចូលរួមក្នុងព្រឹត្តិការណ៍ទាំង ២ នេះ បានដឹង និងត្រៀមលក្ខណៈសម្បត្តិចូលរួមទាំងអស់គ្នា ជាមួយរាជរដ្ឋាភិបាលកម្ពុជា។
តាមសេចក្តីប្រកាសនោះ CNCC បានបញ្ជាក់ថា៖ «យោងតាមសេចក្តីសម្រេចរបស់រាជរដ្ឋាភិបាល និងសេចក្តីសម្រេចរបស់របស់រដ្ឋបាលរាជធានីភ្នំពេញ និងដើម្បីចូលរួមបង្ការ និងទប់ស្កាត់ការឆ្លងរីករាលដាលក្នុងសហគមន៍ នៃមេរោគកូវីដ ១៩ ប្រភេទដែលតា (Delta) CNCC សម្រេចពន្យារពេលការប្រកួតពានរង្វាន់សម្តេច ហ៊ុន សែន ឆ្នាំ ២០២១ (ថ្នាក់ខេត្ត) និងការប្រកួតលីគកំពូលកម្ពុជា ចាប់ពីពេលជូនដំណឹងនេះ រហូតដល់ថ្ងៃទី ១២ ខែ សីហា ឆ្នាំ ២០២១ ជាបណ្តោះអាសន្ន។ ចំពោះកាលបរិច្ឆេទថ្មី នៃការប្រកួតពានរង្វាន់ទាំង ២ នេះ CNCC នឹងជូនដំណឹងនៅពេលក្រោយ»។
គួរបញ្ជាក់ថា ការប្រកួតលីគកំពូលកម្ពុជា ឆ្នាំ ២០២១ ទើបតែ បានចាប់ដំណើរការប្រកួតវិញ និងបានបញ្ចប់ការប្រកួតប្រចាំសប្តាហ៍ទី ១១ កាលពីថ្ងៃសៅរ៍ និងថ្ងៃអាទិត្យ កន្លងមកនេះ ហើយតាមរយៈការបកួតនេះ ក្រុមវិសាខា បានយកឈ្នះក្រុមខេត្តព្រៃវែង ៣-២ ដើម្បីសម្រេចបំណងក្នុងការដណ្តើមយកទីតាំងលេខ ១ ពីក្រុមអង្គរថាយហ្គឺរ ដោយពួកគេមាន ២២ ពិន្ទុ។
ខ្សែប្រយុទ្ធ ម៉ាត់ នូរុណ របស់ក្រុមបឹងកេត បានតែតបាល់គេចចេញពីការតាមបិទរបស់ក្រុមស្វាយរៀង។ រូបថត បឹងកេត
ចំណែកក្រុមបឹងកេត បានយកឈ្នះក្រុមព្រះខ័នរាជស្វាយរៀង ២-១ ដើម្បីឡើងមកឈរនៅលេខរៀងទី ២ មាន ២១ ពិន្ទុ លើក្រុមអង្គរថាយហ្គឺរ ដែលមាន ២០ ពិន្ទុ ដដែល ចំណែកក្រុមស្វាយរៀង បានធ្លាក់មកឈរនៅលេខ ៤ មាន ១៩ ពិន្ទុដដែល ជាមួយការប្រកួតចំនួន ១០ លើកដូចគ្នា ហើយក្រុមណាហ្គាវើលដ៍ និងភ្នំពេញក្រោន ដែលបានស្មើគ្នា ១-១ នោះ បានឈរនៅលេខ ៥ និងលេខ ៦ ដោយណាហ្គា មាន ១៩ ពិន្ទុ ជាមួយការប្រកួត ១០ លើក និងភ្នំពេញក្រោន មាន ១៨ ពិន្ទុ ដោយប្រកួតបានត្រឹម ៨ ដងទេ។
ផ្ទុយពីនេះ ការប្រកួតថ្នាក់ខេត្ត ពានរង្វាន់សម្តេចហ៊ុនសែន ដែលបានផ្អាកការប្រកួតតាំងពីដើមខែមេសាមកនោះ គឺ CNCC ទើបតែប្រកាសពីការបើកឱ្យដំណើរការវិញ ដែលគ្រោងធ្វើ នៅថ្ងៃអង្គារនេះ ប៉ុន្តែមិនទាន់ទាំងបានប្រកួតផង ស្រាប់តែពេលនេះ CNCC បានប្រកាសពន្យារពេលទៀតទៅហើយ។
យ៉ាងណាមិញ សម្រាប់ការត្រៀមបើកការប្រកួតឡើងវិញ នេះ គឺមានក្រុមចំនួន ១០ ប៉ុណ្ណោះ បានចូលរួមប្រកួតបន្ត ក្នុងនោះមានក្រុមសៀមរាបអេហ្វស៊ី កោះកុងអេហ្វស៊ី ភ្នំពេញហ្គាឡាក់ស៊ី ខេត្តកំពង់ឆ្នាំង ខេត្តបាត់ដំបង ខេត្តបន្ទាយមានជ័យ ខេត្តឧត្តរមានជ័យ ខេត្តកណ្ដាល ខេត្តកំពត និងក្រុមខេត្តត្បូងឃ្មុំ ចំណែកក្រុមចំនួន ១១ ទៀត មិនចូលរួមការប្រកួតទៀតឡើយ ដែលធ្វើឱ្យការប្រកួតថ្នាក់ខេត្តពានរង្វាន់សម្តេច ហ៊ុន សែន នេះ មានការកែប្រែលក្ខខណ្ឌ និងរូបមន្តនៃការប្រកួតបានដែរ៕
