ភ្នំពេញៈ គណៈកម្មការប្រកួតបាល់ទាត់ជាតិកម្ពុជា (CNCC) នៃសហព័ន្ធកីឡាបាល់ទាត់កម្ពុជា មិនបានទុកពេលឱ្យក្រុមទាំង ១៣ នៅលីគកំពូលកម្ពុជា ឱ្យឈប់សម្រាកនោះឡើយ គឺអង្គភាពមួយនេះ បានសម្រេចបន្តការប្រកួតជើងទី២ នៅថ្ងៃសៅរ៍ និងថ្ងៃអាទិត្យទៀត បើទោះបីជា ការប្រកួតជើងទី១ ទើបបានបញ្ចប់ កាលពីថ្ងៃពុធ បន្ទាប់ពីមានការផ្អាក និងពន្យារពេលប្រកួតជាច្រើនលើក ដោយសារការរីករាលដាលនៃជំងឺកូវីដ ១៩។
វាហាក់ដូចជាមានភាពទាន់ហន់ផងដែរ សម្រាប់ក្រុមបឹងកេត ដែលត្រូវវិលមកជួបគូសត្រូវចាស់ វិសាខា ក្នុងការប្រកួតរវាងក្រុមមានសិទ្ធិប្រជែងយកពាន ឈរនៅកំពូលតារាងទាំង ៨ (Top8) នារសៀលម៉ោង ៣:៣០ ថ្ងៃសៅរ៍ ព្រោះការចាញ់ក្រុមកំពុងឈរនៅកំពូលតារាង វិសាខា ៥-១ សម្រាប់ការប្រកួតជើងទី១ កាលពីថ្ងៃទី ១១ ខែកញ្ញា ថ្មីៗនេះ វាមិនទាន់បានធ្វើឱ្យ បឹងកេត ស្រួលចិត្តនៅឡើយទេ។
ជាមួយគ្នានេះ បឹងកេត ត្រូវបានគេមើលឃើញថា កំពុងជួបបញ្ហាខ្លាំង ទៅលើតំបន់ការពារ ខណៈខ្សែការពារកណ្តាល ដ៏រឹងមាំរបស់ខ្លួន Anderson Zogbe មានរបួសធ្ងន់ធ្ងរ ក្នុងពេលហ្វឹកហាត់ កាលពីពេលថ្មីនេះ ហើយរូបគេ នឹងត្រូវអវត្តមានពីការប្រកួត រហូតដល់ចប់រដូវកាលតែម្តង។
ជុំវិញបញ្ហានេះ ក្លិបបឹងកេត បានប្រកាស កាលពីថ្ងៃទី ១៣ ខែកញ្ញា ថា៖ «កីឡាករខ្សែ-ការពារកណ្ដាល Anderson Zogbe របស់យើង បានរងរបួសធ្ងន់ធ្ងរ អំឡុងពេលហ្វឹកហាត់ ដោយដាច់សរសៃជង្គង់ ACL (Anterior Cruciate Ligament) និងបែកទ្រនាប់ឆ្អឹង (Meniscus) ជង្គង់ខាងស្តាំ។ ដូចនេះរូបគេ នឹងត្រូវអវត្តមាន ពីទីលានរយ:ពេលយូរ ដោយត្រូវធ្វើការវះកាត់ និង សម្រាករយៈពេលចម្លោះពី ៦ ដល់ ៨ ខែ។ នេះបើតាមការបញ្ជាក់ឱ្យដឹងពីក្រុមគ្រូពេទ្យរបស់យើង នៅថ្ងៃ (ចន្ទ) នេះ»។
ជាមួយគ្នានេះ អតីតខ្សែការពារដ៏ល្អម្នាក់ទៀតរបស់បឹងកេត គឺ ទេស សម្បត្តិ ដែលទើបបានចាកចេញពីក្រុមនេះ ក៏នឹងក្លាយជាសមាជិកថ្មី ដែលត្រូវលេងឱ្យ វិសាខា ដើម្បីទប់ទល់ជាមួយអតីតមិត្តរួម នៅបឹងកេត នាជំនួបនេះ ផងដែរ ហើយការបង្ហាញខ្លួនរបស់កីឡាករបរទេស ២ នាក់ របស់ វិសាខា កំពុងក្លាយជារឿងដែលគ្រប់គ្នាចង់ឃើញថា តើខ្សែប្រយុទ្ធចំណូលថ្មីរបស់ប្រេស៊ីល Cristian Alex និងកីឡាករកូរ៉េខាងត្បូង Lee Jae Gun មានគុណភាពលេងល្អបែបណា! រីឯខ្សែប្រយទ្ធឆ្នើម Abee Ndjoo ដែលទើបចាកចេញពីក្រុមអាស៊ីអឺរ៉ុប ក៏ជាក្តីសង្ឃឹមសម្រាប់បឹងកេត ក្នុងជំនួបនេះផងដែរ។
ចំណែកក្រុមម្ចាស់ផ្ទះ ព្រះខ័នរាជស្វាយរៀង និងភ្នំពេញក្រោន នឹងវិលមកជួបគ្នា នៅល្ងាចម៉ោង ៦ ថ្ងៃសៅរ៍ ដើម្បីជម្រះភាពមន្ទិល នៃការស្មើគ្នា ៣-៣ កាលពីជើងទី១។ ក្រុមកំពុងឈរនៅលេខ ២ ភ្នំពេញក្រោន ដែលមាន ២៨ ពិន្ទុ ស្មើក្រុមវិសាខា មិនមានការផ្លាស់ប្តូរសមាសភាពកីឡាករបរទេសនោះទេ ព្រោះកីឡាករបរទេសទាំង ៥ នាក់របស់ក្រុមនេះ ត្រូវបានគេមើលឃើញថា មានគុណភាពលេងល្អរួចទៅហើយ។
ចំណែកក្រុមព្រះខ័នរាជស្វាយរៀងបាននាំយកខ្សែប្រយុទ្ធកាមេរូន Emmanuel Junior Mbarga Mkene មកជំនួសកីឡាករប្រេស៊ីល Thiago ដែលបានចាកចេញ ហើយកីឡាករចំណូលថ្មីម្នាក់នេះ ជាប្អូនបង្កើតរបស់ខ្សែប្រយុទ្ធឆ្នើម Private តែម្តង ហើយការបង្ហាញខ្លួនរួមគ្នារបស់បងប្អូនបង្កើតទាំង ២ នេះ អាចនឹងមានអ្វីប្លែក សម្រាប់ក្រុមស្វាយរៀង ក៏ថាបាន ដើម្បីទទួល ភ្នំពេញក្រោន លើកនេះ។
ចំណែកក្រុមណាហ្គាវើលដ៍ ត្រូវស្វាគមន៍ក្រុមអង្គរថាយហ្គឺរ ដែលពួកគេ ធ្លាប់បានយកឈ្នះ ២-១ កាលពីជើងទី១ នារសៀលម៉ោង ៣:៣០ ថ្ងៃសៅរ៍នេះដែរ ចំណែកក្រុមកងយោធពលខេមរភូមិន្ទ (ទ័ព) ត្រូវជួបក្រុមគិរិវង់សុខសែនជ័យ នៅរសៀលម៉ោង ៣:៣០ ថ្ងៃអាទិត្យ ហើយវាក៏ជាពេល ដែលខ្សែប្រយុទ្ធកូរ៉េខាងត្បូង CHAN Young Ha និងខ្សែប្រយុទ្ធធ្លាប់លេងច្រើនក្លិបនៅកម្ពុជា Timothy ចាប់ផ្តើមបង្ហាញខ្លួនឱ្យក្រុមទ័ព ផងដែរ ខណៈការជួបគ្នា កាលពីជើងទី១ ទ័ព បានយកឈ្នះក្រុមគិរីវង់ ១-០៕