ក្រុងមីឡាន: កីឡាករ Rodrygo បានផ្ដល់មេរៀន ដល់ក្រុមម្ចាស់ផ្ទះ Inter Milan ដែលបានខ្ជះខ្ជាយឱកាសរបស់ខ្លួន ដោយការស៊ុតនូវគ្រាប់បាល់ជ័យជម្នះ នៅចុងម៉ោង សម្រាប់ក្រុមអធិរាជស Real Madrid ដើម្បីឱ្យ ក្រុមយក្សអេស្ប៉ាញ មាននូវការចាប់ផ្ដើមដ៏ឥតខ្ចោះ ក្នុងយុទ្ធនាការនៅក្របខ័ណ្ឌ Champions League។
ក្រុមជើងឯកលីគកំពូលអ៊ីតាលី Inter កំពុងព្យាយាមប្រកួតប្រជែងឱ្យបានឆ្លងផុត វគ្គចែកពូលនេះជាលើកដំបូង គិតតាំងពីរដូវកាល ២០១១-២០១២ តែពួកគេត្រូវដាក់ទោស សម្រាប់ការបណ្ដោយឱ្យឱកាសល្អជាច្រើនកន្លងទៅឥតការ មុនពេលខ្សែប្រយុទ្ធសញ្ជាតិប្រេស៊ីលស៊ុតបញ្ចូលទីឱ្យក្រុមភ្ញៀវ Real មានជ័យជម្នះនៅនាទីចុងក្រោយ នៃការប្រកួតដ៏ស្វិតស្វាញ ប្រចាំពូល D នាកីឡដ្ឋាន San Siro នេះ។
វា គឺជាលទ្ធផលដ៏អាក្រក់ សម្រាប់ក្រុម Inter ក្នុងការលេងទល់នឹងក្រុម Real របស់លោក Carlo Ancelotti ដែលឡើងមកដល់ចំណុចនោះ បានបង្ហាញឱ្យឃើញនូវថាមពលតិចតួចប៉ុណ្ណោះ ក្នុងតំបន់ប្រយុទ្ធ បើប្រៀបនឹងការលេង នៅក្របខ័ណ្ឌ La Liga ដែលពួកគេស៊ុតបញ្ចូលទីដល់ទៅ ១៣ គ្រាប់ពីការប្រកួតចំនួន ៤ លើកដំបូង នារដូវកាលថ្មីនេះ។
«យើងស័ក្ដិសមទទួលបានលផលល្អពីហ្គេមមួយនេះ តែប្រសិនបើអ្នកមិនអាចស៊ុតបញ្ចូលទីបាន អ្នកនឹងមិនអាចឈ្នះការប្រកួតបានទេ។ យើងសមនឹងបានលទ្ធផលល្អជាងនេះ យើងលេងល្អណាស់ ពិតមែនទល់នឹងក្រុមដ៏ខ្លាំងបែបនេះ ហើយយើងមានឱកាសជាច្រើន ក្នុងការឈ្នះហ្គេមនេះ។ វាជារឿងគួរឱ្យអាម៉ាស់ ខណៈដែលអ្នកមិនគួរចាញ់សោះ»។ កីឡាករ Edin Dzeko បាននិយាយប្រាប់វេបសាយ Amazon។
តែយ៉ាងណា ក្រុម Real Madrid មិនអាចឈរនៅលេខ ១ ក្នុងពូលឡើយ ដោយសារតំណែងមួយនេះ បានក្លាយជារបស់ក្រុម Sheriff Tiraspol ដែលធ្វើឱ្យគ្រប់គ្នាភ្អាក់ផ្អើលយ៉ាងខ្លាំង ជាមួយនឹងការយកជ័យជម្នះ ២-០ លើក្រុម Shakhtar Donetsk របស់អ៊ុយក្រែន ហើយលទ្ធផលនេះធ្វើឱ្យក្រុមរបស់ប្រទេសសា.ម៉ុល-ដាវីមួយនេះ ចាប់ផ្ដើមប្រឡូកនៅ Champions League ជាមួយនឹងក្ដីសង្ឃឹមយ៉ាងខ្ពស់៕ AFP/VN