Kane របស់អង់គ្លេស អបអរជាមួយមិត្តរួមក្រុម ក្រោយស៊ុតបញ្ចូលទី អំឡុងការប្រកួតទល់នឹងសាំងម៉ារ៉ាំង កាលពីថ្ងៃចន្ទ។
ក្រុងសៀររ៉ាវ៉ែល: កីឡាករ Harry Kane បានពោលសរសើរនូវទម្រង់លេងរបស់ក្រុមតោកំណាចអង់គ្លេសថា ពិតជាអស្ចារ្យណាស់ បន្ទាប់ពីក្រុមជម្រើសជាតិរបស់ខ្លួន បានកក់កៅអីមួយ សម្រាប់ព្រឹត្តិការណ៍ World Cup នាឆ្នាំក្រោយ ដោយការបំបាក់ក្រុមម្ចាស់ផ្ទះសាំងម៉ារ៉ាំង ឥតប្រណី ១០-០ កាលពីថ្ងៃចន្ទ។
ក្នុងជ័យជម្នះភ្លូកទឹកភ្លូកដីនេះ ប្រធានក្រុមអង់គ្លេស Kane ស៊ុតបញ្ចូលទីម្នាក់ឯង ៤ គ្រាប់ ក្នុងវគ្គទី១ បន្ទាប់ពីមានគ្រាប់បើកឆាករបស់ខ្សែការពារ Harry Maguire និងការធ្វើឱ្យចូលទីខ្លួនឯងរបស់កីឡាក Filippo Fabbri។
កីឡាករ Emile Smith Rowe, Tyrone Mings, Tammy Abraham និង Bukayo Saka បានមានសួនរួមសម្រាប់ការបំបាក់ក្រុមម្ចាស់ផ្ទះនេះ ខណៈដែលក្រុមអង់គ្លេសបញ្ចប់យុទ្ធនាការក្នុងនាមជាប្រធានពូល I ដើម្បីធានាកៅអីស្វ័យប្រវត្តិរបស់ពួកគេ នៅឯព្រឹត្តិការណ៍ ក្នុងប្រទេសកាតា នា ១២ ខែខាងមុខ។
វាគឺជាជ័យជម្នះជាកំនត់ត្រារបស់អង់គ្លេស ក្នុងការប្រកួតលក្ខណៈអន្តរជាតិ ហើយខ្សែប្រយុទ្ធ Kane មានក្ដីរីករាយនឹងវិធីលេងដ៏ទាន់សម័យ ដែលក្រុមមិនទាន់ចាញ់របស់លោក Gareth Southgate បានសម្រេចគោលដៅរបស់ពួកគេ ក្នុងវគ្គជម្រុះនេះ។
កីឡាករ Kane បាននិយាយប្រាប់ទូរទស្សន៍ ITV ថា៖ «ពួកយើងអស្ចារ្យណាស់។ វាកើតមានចំពោះហ្គេមចុងក្រោយ ហើយយើងត្រូវបានរំពឹងឈ្នះ តែយើងសម្រេចបានយ៉ាងអស្ចារ្យណាស់។ ពិតជាអស្ចារ្យណាស់ ដែលបានឡើង។ យើងនៅតែត្រូវបន្តការងារទៀត។ ខ្ញុំមានអារម្មណ៍ថា ពួកយើងមានការអភិវឌ្ឍល្អឡើងៗ ពី ១ ឆ្នាំ ទៅ ១ ឆ្នាំ។ យើងត្រូវប្រើប្រាស់ពេលវេលាឱ្យមានតម្លៃជាទីបំផុត ពោលគឺគ្រប់ពេលហ្វឹកហាត់ ដើម្បីកែលម្អចំណុចតូចតាចនានាឱ្យប្រសើរឡើង»។
កីឡាករ Kane ដែលធ្វើបានហ៊ែតទ្រិក (ស៊ុត ៣គ្រាប់) ក្នុងជ័យជម្នះ ៥-០ លើក្រុមអាល់បានី កាលពីថ្ងៃសុក្រ បានឡើងទៅស្មើនឹងចំនួន ៤៨ គ្រាប់របស់អតីតកីឡាករ លោក Gary Lineker ដោយខ្សែប្រយុទ្ធរបស់ក្រុម Tottenham Hotspur រូបនេះ នៅពីក្រោមតែលោក Bobby Charlton (៤៩គ្រាប់) និងលោក Wayne Rooney (៥៣ គ្រាប់) ប៉ុណ្ណោះ ក្នុងបញ្ជីកំណត់ត្រាអ្នកស៊ុតបានច្រើនជាងគេ ក្នុងក្រុមជម្រើសជាតិអង់គ្លេស។
គ្រាប់បាល់ទាំង ១៦ គ្រាប់របស់គេ ក្នុងឆ្នាំ ២០២១ គឺជាកំណត់ត្រាប្រចាំឆ្នាំរបស់ក្រុមអង់គ្លេស ហើយកីឡាករវ័យ ២៨ ឆ្នាំ គឺជាកីឡាកររបស់ក្រុមតោកំណាចដំបូងគេ ដែលស៊ុតបញ្ចូលទីបាន ៣គ្រាប់ ឬច្រើនជាងហ្នឹង ក្នុងហ្គេមបន្តបន្ទាប់គ្នា គិតតាំងពីលោក Tommy Taylor ធ្វើបាន ក្នុងឆ្នាំ ១៩៥៧។
«ជាថ្មីម្ដងទៀត វាពិតជារឿងដ៏ពិសេសអស្ចារ្យនាស់។ គ្រប់ពេលដែលខ្ញុំពាក់អាវជម្រើសជាតិអង់គ្លេស ខ្ញុំមានមោទនភាព ហើយនៅពេលខ្ញុំស៊ុតបញ្ចូលទីបាន វាគឺជាអារម្មណ៍ល្អមួយ ក្នុងចំណោមអារម្មណ៍ល្អបំផុត ដែលខ្ញុំអាចមាន ក្នុងអាជីពរបស់ខ្ញុំ។ ជារឿងល្អ ដែលស្ថិតក្នុងចំណោមឈ្មោះអ្នកទាំងនោះ»។ នេះជាការបន្ថែមរបស់កីឡាករ Kane៕ AFP/VN
