អ្នកអង្គម្ចាស់ នរោត្តម អម្រិតា បញ្ជាសោះលោតផ្លោះរបារ ក្នុងពេលប្រកួតថ្នាក់ជាតិ។ រូប ឈន ណន
ភ្នំពេញៈ សហព័ន្ធកម្ពុជាបង្ហាត់ ជិះសេះ បាននិងកំពុងពង្រឹងឡើងវិញ ទាំងទៅលើគុណភាពកីឡាករ កីឡាការិនី និងគុណភាពសេះ គឺធ្វើយ៉ាងណាឱ្យសេះ និងអ្នកជិះ មានភាពស៊ីចង្វាក់គ្នា និងយល់គ្នាច្បាស់ ដើម្បីសម្រួចគោលដៅឈានទៅរកការដណ្តើមបានមេដាយមាសនៅពេលកម្ពុជា ធ្វើជាម្ចាស់ផ្ទះស៊ីហ្គេម លើកទី៣២ ជាប្រវត្តិសាស្ត្រលើកដំបូងនាឆ្នាំ២០២៣។
ជាមួយទិសដៅនេះ ថ្នាក់ដឹកនាំប្រធានសហព័ន្ធកម្ពុជាបង្ហាត់ជិះសេះ បានចាត់ទុកការលើកពេល ការប្រកួតកីឡាជិះសេះផ្លោះរបារ ជ្រើសរើសជើងឯកថ្នាក់ជាតិ ប្រចាំឆ្នាំ ២០២១ មកធ្វើ នៅមជ្ឈមណ្ឌលកីឡា Cambodian Country Club (CCC) កាលពីថ្ងៃទី ២០ ខែ កុម្ភៈ ឆ្នាំ ២០២២ ថា ជាការប្រកួតដ៏សំខាន់ ដើម្បីវាស់ស្ទង់ទាំងកម្រិតបច្ចេកទេសរបស់អត្តពលិក និងសេះ។
លោកស្រី ទេព ម៉ូណា ប្រធានសហព័ន្ធកម្ពុជាបង្ហាត់ជិះសេះ បានថ្លែង ក្រោយការប្រកួតនោះថា៖ «ការប្រកួតជើងឯកថ្នាក់ជាតិនេះ គឺដើម្បីពង្រឹងសមត្ថភាពកីឡាករកីឡាការិនីត្រៀមឆ្ពោះទៅស៊ីហ្គេម ឆ្នាំ ២០២៣ ដែលជាការប្រៀបធៀបមួយដ៏ធំ ហើយយើងបានឃើញថា កីឡាកររបស់យើងមានភាពរីកចម្រើនបានប្រសើរមួយចំនួនធំ ក្នុងការលោតជាមួយសេះ ព្រោះពួកគាត់ មានការហ្វឹកហាត់ត្រឹមត្រូវ ជាមួយគ្រូបង្វឹកខ្មែរ និងអ្នកជំនាញមកពីបារាំង ដោយយើងធ្វើម៉េច ដើម្បីឱ្យសេះ និងអ្នកជិះ ដែលជាកីឡាករ កីឡាការិនីរបស់យើង ក្លាយជាដៃគូដ៏ល្អជាមួយគ្នា»។
តាមរយៈការប្រកួតកីឡាជិះសេះផ្លោះរបារថ្នាក់ជាតិ ដោយប្រើប្រាស់កញ្ចប់ថវិកា របស់ក្រសួងអប់រំ យុវជន និងកីឡា លើកនេះ គឺសម្រាប់វិញ្ញាសាប្រកួតរបស់ក្រុមជម្រើសជាតិ ចំណាត់ថ្នាក់លេខ ១ បានទៅកីឡាករ គីរី ចាន់តុលា ជិះសេះឈ្មោះ ព្រីនសេស មកពីសហព័ន្ធកម្ពុជាបង្ហាត់ជិះសេះ លេខ ២ អ្នកអង្គម្ចាស់ នរោត្តម អម្រិតា ជិះសេះឈ្មោះ ព្រីនសេស មកពីសហព័ន្ធកម្ពុជា លេខ ៣ កីឡាករ គ្រី សារឿន ជិះសេះឈ្មោះ កាហ្វេ មកពីក្លិប កីឡាជិះសេះនៅប្រទេសថៃ និងលេខ ៣ ស្ទួន កីឡាករ គង់ រតនៈ ជិះសេះឈ្មោះ កាហ្វេ មកពីក្លិប CCC។
ជាមួយគ្នានេះ លោកស្រី ទេព ម៉ូណា បានអះអាងថា សហព័ន្ធគ្រោង នឹងរៀបចំការប្រកួតដ៏ធំមួយទៀត ក្នុងរយៈពេល ៦ សប្ដាហ៍ទៀតដែលនឹងមានការចូលរួមប្រកួតពីកីឡាករ កីឡាការិនី និងសេះកាន់តែច្រើន ដើម្បីពង្រឹងសមត្ថភាព និងបច្ចេកទេសឱ្យកាន់តែប្រសើរថែមទៀត ក្នុងការត្រៀមខ្លួនឆ្ពោះទៅកាន់ការប្រកួតស៊ីហ្គេម ឆ្នាំ ២០២៣ នៅកម្ពុជា។
ប្រធានសហព័ន្ធរូបនេះបានបន្ថែមថា៖ «ការរៀបចំឱ្យមានការប្រកួតនេះ ដើម្បីដុសខាត់ទាំងកីឡាករផង និងសេះផង ព្រោះទាំងអត្តពលិក និងសេះ សុទ្ធតែមានសាច់ដុំ ហេតុនេះបើយើងមិនប្រើប្រាស់ វាត្រូវតែជ្រាយហើយ អ៊ីចឹងយើងត្រូវពង្រឹងសាច់ដុំរបស់គាត់ ព្រោះអ្វីដែលយើងត្រូវការ គឺឱ្យគាត់ចេះបញ្ជាសេះលោត ឱ្យបានត្រឹមត្រូវ»។
លោកស្រី ទេព ម៉ូណា (កាន់មីក្រូ) ពេលថតរួមគ្នា។ រូបថត ឈន ណន
«ពិតពិត ការបញ្ជាសេះលោតផ្លោះរបារ ក្រោម ១ ម៉ែត្រ ឬទាបត្រឹម ៣០ សង់ទីម៉ែត្រ វារាងងាយស្រួល ប៉ុន្តែការលោតកាន់តែខ្ពស់ ចាប់ពី ១ ម៉ែត្រឡើងទៅ វាមានការពិបាកកាន់តែច្រើន។ យើងមិនអាចឱ្យសេះផ្អើល ដោយយើងត្រូវមានបច្ចេកទេស និងមានអារម្មណ៍ស្ងប់ស្ងាត់ ដូច្នេះយើងបង្រៀនគាត់ឱ្យមានបច្ចេកទេសកាន់ខ្សែបញ្ជាសេះ គឺមិនត្រូវទាញមាត់សេះខ្លាំង ឬឱ្យធ្វើសេះមានអារម្មណ៍ថា ប្រឹងខ្លាំងពេកនោះទេ ព្រោះបើប្រឹងខ្លាំងពេក ពេលលោត វាអាចមានបញ្ហាកើតឡើង អ៊ីចឹងយើងត្រូវពង្រឹងទាំងសងខាង ឱ្យមានភាពស៊ីចង្វាក់គ្នា ក្នុងការលោត»។
លោកស្រី ទេព ម៉ូណា បានថ្លែងទៀតថា៖ «ក្រុមអត្តពលិករបស់យើង គាត់នៅក្មេង តែគាត់មានចិត្តក្លាហាន និងមានជំនាញនៅក្នុងខ្លួនរួចទៅហើយ វាដូចជាថ្មត្បូងដែលយើងយកមកដុសខាត់ ឱ្យចេញទៅជាត្បូង អ៊ីចឹងសព្វថ្ងៃនេះ យើងកំពុងដុសខាត់ជំនាញរបស់គាត់ឱ្យកាន់តែភ្លឺ និងមានភាពប្រសើរ ក្នុងការកាន់សេះ និងបញ្ជាសេះឱ្យបានល្អ ហេតុនេះបើទោះបីជាមានឧបសគ្គខ្លះ តែយើងអាចពង្រឹងសមត្ថភាពទាន់ពេល ក្នុងការត្រៀមស៊ីហ្គេម ឆ្នាំ ២០២៣ ព្រោះយើងមានគ្រូជំនាញៗ ព្រមទាំងមានការជួយជាបច្ចេកទេសបន្ថែមពីសហព័ន្ធជិះសេះពិភពលោក និងភាគីមួយចំនួនទៀត ដោយមានក្រសួងអប់រំ ជាអ្នកជួយគាំទ្រដល់យើង»។
ចំពោះការដាក់ទិសដៅ ពេលប្រកួតស៊ីហ្គេម ឆ្នាំ ២០២៣ លោកស្រី ទេព ម៉ូណា បានបញ្ជាក់ថា៖ «ក្នុងឋានៈជាម្ចាស់ផ្ទះ ជាលើកដំបូងនេះ យើងនឹងយកសេះរបស់យើង មកលោតប្រកួត អ៊ីចឹង ទម្រាំដល់ការប្រកួត គឺក្រុមអត្តពលិក និងសេះរបស់យើងមានភាពសមគ្នារួចទៅហើយ ហេតុនេះ ពិតប្រាកដណាស់ យើងចង់បានមេដាយមាស។ បានមេដាយអីក៏ល្អដែរ ប៉ុន្តែការសម្រួចគោលដៅ និងក្តីប្រាថ្នាធំរបស់យើង គឺការប្រជែងយកមេដាយមាស»៕
