ងួន មករា បានជាប់ក្លេរបស់កីឡាករថៃ ហើយបានចុះចាញ់ត្រឹមទឹកទី១ ក្នុងពេលប្រកួតជុំទី១។ រូប សហការី
ភ្នំពេញៈ ក្រុមជម្រើសជាតិចំបាប់កម្ពុជា បានបញ្ចប់ការប្រកួតក្រិចកូរ៉ូម៉ាំងទាំង ៥ វិញ្ញាសា ដោយមិនបានមេដាយ ១ សោះ សម្រាប់ការប្រកួតថ្ងៃដំបូង ក្នុងស៊ីហ្គេម លើកទី៣១ ឆ្នាំ ២០២១ នៅវៀតណាម កាលពីថ្ងៃអង្គារ។
តាមរយៈការប្រកួតពេញ ១ ថ្ងៃ នោះ កីឡាករចំបាប់កម្ពុជាទាំង ៥ នាក់ បានចាញ់ស្ទើរគ្រប់ការប្រកួតទាំងអស់ គឺមានតែ ងួន មករា និង យុន ប៊ុនណា ទេ ដែលស្គាល់រសជាតិឈ្នះបានម្តង លើកីឡាករឡាវដូចគ្នា នៅក្នុងការប្រកួតជម្រុះ ចំណែកកីឡាករជើងចាស់ ឌន សៅ ព្រមទាំង កែវ សុភ័ក្ត្រ, និង អេង សេងលាង រកមិនឃើញការឈ្នះសោះ។
ផ្ទុយពីនេះ កីឡាកររបស់ម្ចាស់ផ្ទះវៀតណាម បានឈ្នះមេដាយមាស ទាំង ៥ ប្រភេទទម្ងន់នេះតែម្តង ចំណែកកីឡាករថៃ ឈ្នះបានមេដាយប្រាក់ ២ សំរឹទ្ធចំនួន ២ ឥណ្ឌូនេស៊ី បានប្រាក់ ២ និងហ្វីលីពីន ឈ្នះបានប្រាក់ ១ និងសំរឹទ្ធ ៣។
សម្រាប់លទ្ធផលប្រកួតរបស់កីឡាករទាំង ៥ នាក់របស់កម្ពុជា គឺអតីតម្ចាស់មេដាយមាស ៣ សម័យកាល ឌន សៅ ទទួលបានលេខ ៤ ចុងក្រោយគេ ក្នុងការប្រកួតទម្ងន់ ៩៧ គីឡូក្រាម រីឯ យុន ប៊ុនណា បានលេខ ៤ ក្នុងចំណោម ៥ នាក់ នៃការប្រកួតទម្ងន់ ៦០ គីឡូក្រាម។
កីឡាការិនីចំបាប់របស់កម្ពុជាទាំង៤នាក់ (ពាក់ឯកសណ្ឋានពណ៌ស) ពេលថតជាមួយលោក Casey Barnett និងប្រតិភូចំបាប់ នៅប្រទេសវៀតណាម។ រូបថត សហការី
ចំណែកកីឡាករ អេង ផានិត បានលេខ ៤ ក្រោយគេ ក្នុងការប្រកួតទម្ងន់ ៦៧ គីឡូក្រាម ហើយ ងួន មករា បានលេខ ៤ ក្នុងចំណោមបេក្ខភាពទាំង ៦ នាក់ ដែលចូលរួមប្រកួតទម្ងន់ ៧៧គីឡូក្រាម ខណៈ កែវ សុភ័ក្ត្រ បានលេខ ៤ ក្រោយគេ ក្នុងទម្ងន់ ៨៧ គីឡូក្រាម។
ជាមួយ ការទទួលលទ្ធផលមិនគាប់ប្រសើរ សម្រាប់ការប្រកួតចំបាប់ក្រិចកូរ៉ូម៉ាំងរបស់ កីឡាករទាំង ៥ នាក់នេះ បានធ្វើឱ្យថ្នាក់ដឹកនាំសហព័ន្ធកីឡាចំបាប់កម្ពុជា ជាពិសេសនាយកវិទ្យាស្ថានខេមអេដ លោក Casey Barnett បានដាក់ក្តីសង្ឃឹមទៅលើការប្រកួតចំបាប់សេរី របស់ក្រុមកីឡាការិនីចំបាប់វិញម្តង។
លោក Casey Barnett អនុប្រធានសហព័ន្ធកីឡាចំបាប់កម្ពុជា និងជាប្រធានប្រតិភូដឹកនាំក្រុមចំបាប់កម្ពុជា ទៅប្រកួតស៊ីហ្គេម នេះ បានថ្លែងថា៖ «ការប្រកួតចំបាប់ក្រិចកូរ៉ូម៉ាំង នៅថ្ងៃនេះ ទទួលបានលទ្ធផលមិនល្អទេ ប៉ុន្តែយើងទន្ទឹងរង់ចាំការប្រកួតចំបាប់នារី នៅថ្ងៃពុធ ហើយយើងរំពឹងថា នឹងឈ្នះបានមេដាយចំនួន ២ សម្រាប់នារី»។
សម្រាប់ការប្រកួត នៅថ្ងៃពុធនេះ កីឡាការិនីចំបាប់កម្ពុជាចំនួន ៤ នាក់ នឹងត្រូវប្រកួតនៅលើប្រភេទទម្ងន់រៀងៗខ្លួនរបស់ពួកគេ ដោយក្នុងនោះកីឡាការិនី ជា កញ្ញា ត្រូវប្រកួតក្នុងទម្ងន់ ៦២ គីឡូក្រាម រីឯកីឡាការិនី សឿន នឿន ប្រកួតទម្ងន់ ៥៧ គីឡូក្រាម ហើយ សម្បត្តិ វណ្ណៈ ប្រកួតទម្ងន់ ៥៣ គីឡូក្រាម និងកីឡាការិនី ឌិត សំណាង ប្រកួតក្នុងប្រភេទទម្ងន់ ៥៧ គីឡូក្រាម៕
