ភ្នំពេញៈសហព័ន្ធកីឡាការ៉ាតេកម្ពុជា ដែលមានលោកឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ អូន ព័ន្ធមុន្នីរ័ត្ន ជាប្រធានសហព័ន្ធនោះ បានកំណត់យកការប្រកួតជ្រើសរើសជើងឯកកីឡាការ៉ាតេ ក្នុងព្រឹត្តិការណ៍កីឡាជាតិ លើកទី៣ និងកីឡាជនពិការ លើកទី ១ ឆ្នាំ ២០២២ ជាការសាកល្បង ដើម្បីពង្រឹងបន្ថែមនៅចំណុចខ្វះខាត ទាំងទៅលើបច្ចេកទេស និងយុទ្ធសាស្រ្តផ្សេងៗ សម្រាប់ត្រៀមឆ្ពោះទៅរៀបចំការប្រកួតស៊ីហ្គេម លើកទី ៣២ ឆ្នាំ២០២៣ ដែលកម្ពុជា ត្រូវធ្វើជាម្ចាស់ផ្ទះ។
នៅក្នុងពិធីបើកការប្រកួតជ្រើសរើសជើងឯកកីឡាការ៉ាតេក្នុងព្រឹត្តិការណ៍កីឡាជាតិ លើកទី ៣ នេះ នៅសាលប្រកួតនៃសាកលវិទ្យាល័យភូមិន្ទភ្នំពេញកាលពីព្រឹកថ្ងៃទី ២៧ ខែវិច្ឆិកា លោក សាមឺឌី ស៊ីវឌ្ឍនា អនុប្រធានសហព័ន្ធកីឡាការ៉ាតេកម្ពុជា បានសម្តែងការស្វាគមន៍យ៉ាងកក់ក្តៅដល់ប្រតិភូកីឡាទាំងអស់ ព្រមទាំងមន្រ្តីពាក់ព័ន្ធ ដែលបានចូលរួម នៅក្នុងពិធីបើកការប្រកួតនេះ។
អនុរដ្ឋលេខាធិការក្រសួងអប់រំ យុវជន និងកីឡា លោក សាមឺឌី ស៊ីវឌ្ឍនា បានថ្លែងថា រាជរដ្ឋាភិបាលកម្ពុជា បានរៀបចំការប្រកួតកីឡាជាតិ ជាលើកដំបូង នៅឆ្នាំ ២០១៦ ក្នុងគោលបំណងពង្រឹងសមត្ថភាព គណៈកម្មការរៀបចំការប្រកួត និងកីឡាករ កីឡាការិនី ដើម្បីឆ្ពោះទៅចូលរួមកីឡាស៊ីហ្គេម លើកទី ៣២ ឆ្នាំ ២០២៣ ដែលកម្ពុជា ត្រូវធ្វើជាម្ចាស់ផ្ទះ ហេតុដូច្នេះ ព្រឹត្តិការណ៍កីឡាជាតិនេះ ត្រូវបានរៀបចំឡើង មានលំនាំដូចនឹងការប្រកួតកីឡាស៊ីហ្គេមតែម្តង។
លោកបានបញ្ជាក់ថា៖ «ការប្រកួតកីឡាការ៉ាតេ ក្នុងព្រឹត្តិការណ៍កីឡាជាតិ លើកទី៣នេះ ជាព្រឹត្តិការណ៍នៃការសាមគ្គី សន្តិភាព ការសាកល្បង ត្រៀមលក្ខណៈរៀបចំ ពង្រឹងសមត្ថភាព ដើម្បីធ្វើការវាយតម្លៃ និងកែលម្អ បំពេញបន្ថែមចំណុចខ្វខាតនូវកម្រិតស្តង់ដារ បទពិសោធ បច្ចេកទេស យុទ្ធសាស្រ្ត និងយុទ្ធវិធី សម្រាប់ការរៀបចំប្រកួតកីឡាស៊ីហ្គេម ឆ្នាំ ២០២៣ ដែលជាកិត្តិយសរបស់ប្រទេសជាតិយើង»។
តាមរយបាយការណ៍របស់គណៈកម្មការរៀបចំការប្រកួតកីឡាការ៉ាតេ ក្នុងព្រឹត្តកិការណ៍កីឡាជាតិ លើកទី ៣ នេះ បានឱ្យដឹងថា ការប្រកួតនេះ មានអ្នកចូលរួមសរុបចំនួន ១០២ នាក់ ក្នុងនោះមានប្រតិភូ ១១ នាក់ គ្រូបង្វឹក ១៥ នាក់ កីឡាករ ៤៧ នាក់ និងកីឡាការិនី ២៩ នាក់ មកពីក្រសួងមហាផ្ទៃ ក្រសួងសេដ្ឋកិច្ច និងហិរញ្ញវត្ថុ ក្រសួងការពារជាតិ សាលារាជធានីភ្នំពេញ ខេត្តកណ្តាល និងខេត្តកំពង់ស្ពឺ ហើយអ្នកទាំងនេះ ត្រូវប្រកួតប្រជែងគ្នា នៅលើវិញ្ញាសាសម្តែងកាតា និងប្រយុទ្ធសរុបចំនួន ១២ ។
ជាមួយគ្នានេះលោក សាមឺឌី ស៊ីវឌ្ឍនា បានជំរុញឱ្យមន្រ្តីបច្ចេកទេស ជាពិសេសអាជ្ញាកណ្តាល និងចៅក្រមកាត់សេចក្តី នៅលើទីលាន ត្រូវអនុវត្តការងារ ដោយតម្លាភាព និងគ្មានការរើសអើងដើម្បីធ្វើឱ្យការប្រកួតកីឡាការ៉ាតេ ក្នុងព្រឹត្តិការណ៍កីឡាជាតិ លើកទី ៣ ឆ្នាំ ២០២២ នេះ ទទួលបានជោគជ័យស្របពេលដែលប្រភេទកីឡានេះ បាននិងកំពុងមានការរីកចម្រើន នៅលើឆាកអន្តរជាតិផងដែរ។
លោកបានថ្លែងថា៖ «ក្នុងនាមឯកឧត្តមបណ្ឌិតសភាចារ្យ អូន ព័ន្ធមុន្នីរ័ត្ន និងក្នុងនាមរូបខ្ញុំផ្ទាល់ ខ្ញុំសូមថ្លែងអំណរគុណចំពោះឯកឧត្តម លោកជំទាវ លោកឧកញ៉ា គណៈកម្មការទាំងអស់ និងគ្រូបង្វឹក ដែលបានសហការ និងគាំទ្រយ៉ាងសកម្មក្នុងការចូលរួមចំណែករៀបចំការប្រកួតនិងលើកស្ទួយកីឡានេះឱ្យកាន់តែមានការរីកចម្រើន នៅក្នុងតំបន់ លើឆាកអន្តរជាតិ និងនៅលើសកលលោក»៕