ភ្នំពេញៈ ការ​វិវាទ​ចោទ​ប្រកាន់គ្នា​រវាង​សហព័ន្ធ​កីឡា​កាយ​វប្បកម្ម និង​លំហាត់​ប្រាណ​កម្ពុជា និង​អតីត​ម្ចាស់​​មេដាយ​​ជើងឯក​ពិភព​​លោក សំបូរ សុភ័ណ្ឌ ជុំវិញបញ្ហា​បណ្តាល​ឱ្យមាន​ការ​ដក​ប្រភេទ​កីឡា​កាយ​វប្បកម្ម ចេញ​ពី​ការ​ប្រកួត​ស៊ីហ្គេម លើកទី​៣២ ឆ្នាំ​ ២០២៣ នៅតែ​រក​មិនទាន់​ឃើញ​ដំណោះ​ស្រាយ​រួម ហើយ​មិន​តែប៉ុណ្ណោះ ​សុភ័ណ្ឌ នៅតែ​រក្សាគោល​ជំហរ​ក្នុង​ការ​ប្តឹង ទៅ​លើ​កីឡាករ​​​ជម្រើស​ជាតិ​​កាយវប្បកម្ម ផាន់ ណារិទ្ធ និង ស៊ាង ម៉េង​សាង ដែល​បាន​ចោទ​ប្រកាន់​លើ​រូបគេ ដោយ​គ្មាន​មូល​ដ្ឋាន​ច្បាស់​លាស់​។

នៅ​ក្នុង​វិវាទ​ចោទ​ប្រកាន់​គ្នានេះ ម្ចាស់​មេដាយ​មាស សំបូរ សុភ័ណ្ឌ ត្រូវ​បាន​លោក តឹក ប៊ុនវី សហព័ន្ធ​កីឡា​កាយ​វប្ប​កម្ម និង​លំហាត់​ប្រាណ​កម្ពុជា ព្រមទាំង​កីឡាករ​​ ផាន់ ណារិទ្ធ និងកីឡាករ ស៊ាង ម៉េង​សាង ចោទ​ប្រកាន់​ថា ជាដើម​ចម ​ធ្វើ​ឱ្យ​គណៈ​កម្មាធិការ​ជាតិ CAMSOC ដក​ប្រភេទ​កីឡាកាយ​វប្ប​កម្ម ចេញ​ពីស៊ីហ្គេម ឆ្នាំ​ ២០២៣ តាម​រយៈ​ការ​អូស​ទាញ​កីឡាករ​ជម្រើស​ជាតិ​ទាំង​២នាក់នេះ ឱ្យប្រើ​ប្រាស់​សារធាតុ​ហាម​ឃាត់​ប្រភេទ Steroids ប៉ុន្តែ សុភ័ណ្ឌ បាន​បដិសេធ​ដាច់​ខាត។

និយាយ​ផ្តោត​ទៅលើ​កីឡាករ ផាន់ ណារិទ្ធ និង ស៊ាង ម៉េង​សាង នេះ លោក សំបូរ សុភ័ណ្ឌ បាន​ប្រាប់ ​ភ្នំពេញ ប៉ុ​ស្តិ៍​​ថា៖ ​«អ្វីដែល​គាត់​បាន​លើក​ឡើង បាន​វាយ​ប្រហារ​មកលើខ្ញុំ​ និង​ក្លិប​របស់​ខ្ញុំ​ខ្លាំងពេក ហេតុនេះ​បើ​សិនជា​ពួកគាត់ មិនបានចេញ​ជា​លិខិត ឬវីដេអូ សុំ​ទោស​ដល់ខ្ញុំ ជា​​សាធារណៈ​វិញទេ ខ្ញុំមាន​តែ​ប្រើ​ផ្លូវ​ច្បាប់ ព្រោះ​ប្រទេស​របស់យើង​មាន​ច្បាប់​ត្រឹមត្រូវ ហើយ​ខ្ញុំ​ក៏​មិន​​ចង់​​បាន​​ជា​សំណង​​លុយ​កាក់អ្វីនោះដែរ ​​គឺខ្ញុំចង់បាន​​យុត្តិធម៌ និង​ភាព​ស្អាត​ស្អំ​របស់​ខ្ញុំ​ត្រឡប់មក​វិញ​»។

នៅ​ក្នុង​ហេតុការ​ណ៍នេះ កីឡាករ​​ ផាន់ ណារិទ្ធ និង​កីឡាករ ស៊ាង ម៉េងសាង ដែល​ត្រូវ​បាន​​រក​ឃើញ​សារធាតុ​ហាម​ឃាត់ ក្រោយ​ព្រឹត្តិ​ការណ៍​កីឡា​ជាតិ លើក​ទី៣ កាល​ពីខែ​វិច្ឆិកា ឆ្នាំ​២០២២ បាន​​លើក​ឡើង នៅក្នុង​សន្និសីទ​កាសែត កាលពីថ្ងៃទី​១៧ ខែមករា​ថា ការ​បង្កើត​កំហុស​ឆ្គង​​របស់ពួកគេ បាន​កើត​ឡើង​​ដោយ​អចេតនា ព្រោះ​​ការ​ចាក់ថ្នាំ​សម្រក​​ជាតិ​ទឹក មុន​ការ​ប្រកួតកី​ឡាជាតិ លើក​ទី៣នោះ ខ្លួន​ពុំ​បាន​ដឹង​ពី​ផល​ប៉ះ​ពាល់ ឬ​ជា​​សារធាតុ​ហាម​ឃាត់ ​ក្នុង​វិស័យ​កីឡា​នោះ​ទេ។

ជាមួយ​គ្នានេះ ផាន់ ណារិទ្ធ បង្ហើប​ថា ខ្លួន និងស៊ាង ម៉េង​សាង បាន​ទៅ​ក្លិបហាត់​ប្រាណ King GYM ​របស់​អតីត​ម្ចាស់​មេដាយ​មាសពិភព​លោក សំបូរ សុភ័ណ្ឌ ដើម្បី​សុំការណែនាំ មុន​ការ​​ប្រកួត​​កីឡា​ជាតិ។

ណារិទ្ធ ​បន្ថែម​ថា បន្ទាប់ពី​ហ្វឹក​ហាត់​សម​បង្ហាញ​សាច់ដុំ​ហើយ សំបូរ សុភ័ណ្ឌ បាន​ស្នើ​ពួកគេ ​ឱ្យ​ទៅ​គេងនៅក្លិប ព្រោះ​មានវិធី​សាស្ដ្រ​ពិសេស ​អាច​​ជួយ​​​កែ​កុន​បាន​​​បន្ដិច​ទៀត​ ដើម្បីមើល​ទៅកាន់តែស្អាត ហើយ​ព្រលឹម​ឡើង​ចេញ​ទៅ​ប្រកួត​តែម្ដង។

«យប់​ហ្នឹង យើង​អត់ដឹង​ទេ​ថា មានពិធីអ្វី? ដល់​ពេល​យើង​ញាំអី​ហើយ បាន​គាត់ថា កន្លះ​ម៉ោង​​ទៀត ពួក​យើង​​ត្រូវ​បញ្ចុះ​ទឹក​នោម ហើយ​យើង​ក៏អត់​ដឹង​ដែរថា អាហ្នឹង​វាប៉ះពាល់​ដល់ម្លឹ​ង​។ អ៊ីចឹង​​គាត់​ក៏​បាន​ហៅគ្នី​គ្នារបស់​ខ្ញុំម្ដង​ម្នាក់​ៗ ដើម្បី​ចាក់​ថ្នាំ​បញ្ចុះទឹក​នោម​ហ្នឹង»។ ណារិទ្ធ បាន​បញ្ជាក់។

ណារិទ្ធ ក៏​បាន​សង្ស័យ​ថា សុ​ភ័ណ្ឌ ជាអ្នក​ប្រាប់ទី​​ភ្នាក់ងារ​ដូភីង​ដែរ​។ «ខ្ញុំ​សង្ស័យ​ចាក់​​ឱ្យ​យើង​ហើយ គាត់​ផ្ដល់ព័ត៌​មានឱ្យ​គេ ព្រោះ​កីឡាករ​ផ្សេងៗ​ទៀត គេ​អត់​ចាប់​យក​ទៅ​ពិនិត្យ​ទឹក​នោម​​ទេ»។

តែទោះ​បីជា​យ៉ាង​ណា លោក សំបូរ សុភ័ណ្ឌ បាន​ច្រាន​ចោល​នូវ​រាល់​ការ​​ចោទ​ប្រកាន់​ទាំង​អស់​នេះ ដោយ​បាន​បកស្រា​យ​ថា៖ «គាត់​បាន​ចោទថា​ ខ្ញុំជា​​អ្នក​​ហៅ​​ពួកគាត់​​មក​​កន្លែង​​របស់ខ្ញុំ ដើម្បី​​ប្រើ​​ប្រាស់​សារ​ធាតុហាម​ឃាត់ ទាំងដែល​ខ្ញុំ​មិន​បានហៅ​ទាល់​តែសោះ គឺ​គាត់​​បាន​​មក​សុំខ្ញុំឱ្យ​ជួយ​គាត់កែសាច់ និង​ស្នាក់​នៅដោយ​ខ្លួនឯង ហើយ​ក្នុង​នាម​​​ខ្ញុំ​​ជា​កីឡាករ១​រូប ដែលបាន​​ដើរ​លើវិស័យ​នេះមុន ក៏បាន​ជួយកែ​លើការ​ហាត់​ ការប្រឹង​បង្ហាញ​សាច់​ដុំ និង​​របប​អាហារ​ជាដើម​»។

«គាត់​បាន​ចោទ​ប្រកាន់ថា ខ្ញុំបាន​ចាក់​ថ្នាំ​បញ្ចុះ​ទឹកនោម​ឱ្យ​​គ្នីគ្នា​គាត់​ម្តង​ម្នាក់ៗ​ទាំង​ដែល​​ខ្ញុំ​មិន​បាន​ធ្វើវា​ឡើយ គឺ​គ្នីគ្នាគាត់​ធ្វើ​ដោយ​ខ្លួន​ឯង ដោយ​មិន​មាន​ការ​បង្ខិត​បង្ខំ​ពី​រូបខ្ញុំ​បាទ ​ដូច​អ្វីដែល​ពួកគាត់​លើក​ឡើង​នោះ​ទេ។ មួយ​វិញទៀត​ បុគ្គល ផា​ន់ ណារិទ្ធ ​បាន​ចោទ​ប្រកាន់​ថា ខ្ញុំ​​​​បាន​​​ឃុប​ឃិតគ្នា​ជាមួយដូភីង អ្នក​ត្រួត​ពិនិត្យ​សារធាតុ​ហាម​​ឃាត់ Steroids ដោយ​គ្មាន​មូល​ដ្ឋាន និង​ភ័ស្តុតាង​ច្បាស់​លាស់។ សួរថា ​តើ​ខ្ញុំធ្វើ​បែបនេះ​ដើម្បីអ្វី​?»។ សុភ័ណ្ឌ បាន​បញ្ជាក់​បន្ថែម។

ទន្ទឹម​នឹង​នេះ សំបូរ សុភ័ណ្ឌ បាន​ដាក់ការ​សង្ស័យ​ទៅលើ​កីឡាករ ផាន់ ណារិទ្ធ និង​កីឡាករ ស៊ាង ម៉េងសាង វិញ​ថា អាច​នឹងមាន​ចេតនា​អ្វីមួយ ក្នុងការ​មួលបង្កាច់​មកលើ​រូប​លោក ព្រោះ​អ្នកទាំង​នេះ មិន​ធ្លាប់មក​ក្លិបហាត់​ប្រាណ King GYM នោះទេ ប៉ុន្តែ​ហេតុអ្វី ជិត​ដល់​​ប្រកួត​កីឡាជាតិ គាត់​មក​ពឹង​ឱ្យ​លោក​ជួយ ខណៈ​ពួក​គេ មាន​ប្រាក់​ខែ និង​មានគ្រូ​បង្វឹក នៅ​ក្នុង​​ក្រុម​ជម្រើស​ជាតិ​នោះ។

សុភ័ណ្ឌ បាន​បញ្ជាក់​ថា៖ «ខ្ញុំមាន​ការ​សង្ស័យ​ថា ដូច​ជា​គាត់​បាន​រៀបចំ​អ្វីមួយ ព្រោះ​ ណារិទ្ធ មិន​ធ្លាប់​មក​កន្លែង​ខ្ញុំ​ទេ ហើយ​ក៏​មិន​មែន​ជា​អ្នក​ជិត​ស្និទ្ធ​នឹងគ្នា​នោះដែ​រ។ គាត់ជា​កីឡាករ​របស់​​សហព័ន្ធ ខណៈ​សហព័ន្ធ មិនសូវ​ចុះ​សម្រុងនឹង​ខ្ញុំយូរ​មក​ហើយ ព្រោះ​ពេល​ខ្ញុំចេញ​ទៅ​ប្រកួត​ម្តងៗ នៅ​ក្រៅ​ប្រទេស គាត់តែង​បង្ហាញ​ការមិន​សូវពេញ​ចិត្ត ទាំង​ដែលខ្ញុំ​ហ្វឹកហាត់​ខ្លួន​ឯង និង​​ចំណាយ​គ្រប់​​បែប​​​យ៉ាង​ទាំងអស់​ដោយ​ខ្លួនឯង តាំងពីឆ្នាំ​២០១៧មក។ ខ្ញុំ​ខំប្រឹង​បែប​នេះ ដើម្បី​​មុខមាត់កម្ពុជា និង​ដើម្បី​​ឱ្យគេស្គាល់​កាយ​វប្បកម្មរបស់​ខ្មែរ​យើង។ អ៊ីចឹង​ចង់សួរ​ថា តើខ្ញុំ​ទៅធ្វើ​អំពើ​​​ដូចការ​​​ចោទ​របស់​គាត់ ដើម្បី​អ្វី?»។

បន្ថែម​លើ​នេះ សំបូរ សុភ័ណ្ឌ បាន​អះអាង​ថា ថ្នាំបញ្ចុះទឹក​នោម មិន​មែន​ជាប្រភេទ​ Steroids នោះ​ទេ។ «ខ្ញុំ​សូម​បញ្ជាក់​ឱ្យបាន​ច្បាស់​ថា ថ្នាំបញ្ចុះ​ទឹក​នោម និង​សារ​ធាតុ​ហាម​​ឃាត់ Steroids ខុសដាច់ពី​គ្នា។ ថ្នាំបញ្ចុះទឹក​នោម មិន​មែនជា​​ថ្នាំ​ហាម​ឃាត់​​ទេ ព្រោះ​វាមាន​លក់​នៅ​ស្ទើរ​គ្រប់​ឱសថ​ស្ថាន ក្នុង​ប្រទេស​កម្ពុជា ដោយមាន​ទាំង​ប្រភេទ​លាប, លេប និង​ចាក់ ហើយ​អ្នក​មានរោគ​ផ្សេងៗ ដូចជា​នោម​ទាស់ គឺ​គេប្រើបាន​ជា​ធម្មតា ចំណែក​ថ្នាំ​ជំនួយ​សាច់​ដុំ ចាក់ ឬ​លេប​ឡើង​សាច់ដុំ ដែល​ជាប្រភេទ​ Steroids វាជារឿង​ផ្សេង»។

«គ្រប់​អត្តព​លិកកាយ​វប្បកម្ម​នេះ ត្រូវប្រើថ្នាំ​បញ្ចុះ​ទឹក​នោម ដោយ​អ្នកខ្លះ​ជ្រើស​រើស​យក​ការលេប និងអ្នក​ខ្លះ​ទៀត​​យកការ​ចាក់ ហើយ​សម្រាប់​ខ្ញុំ គឺខ្ញុំ​ប្រើទាំង​មុនការ​ប្រកួត និង​ក្រោយ​ការ​​ប្រកួត ដោយ​អត់មាន​អ្វីត្រូវប៉ះ​ពាល់​នោះ​ទេ​ គ្រាន់តែ​យើង​អត់​ដឹង​ថា ការ​ប្រកួត​ថ្នាក់​ជាតិនេះ គេ​​ពិនិត្យសារ​ធាតុហ្នឹង​ដែរ។ ​​យើង​ដឹង​តែថា គេ​ផ្តោត​លើ​ប្រភេទ Steroids ហើយ​ពួក​ខ្ញុំ​ដាច់​ខាត​មិន​ប្រើ ឬណែនាំ​ឱ្យអ្នក​ណា​ប្រើ​​ប្រភេទថ្នាំ​ទាំង​នេះ​ទេ ព្រោះជា​សារធាតុ​ហាម​ឃាត់​»។ សោ​ភ័ណ្ឌ បាន​បញ្ជាក់​បន្ថែម​។

តែទោះបី​ជា​យ៉ាង​ណា លោក​ តឹក ប៊ុនវី ហាក់​មានការ​​ជឿទាំង​ស្រុង ទៅលើ​ចម្លើយ​សារភាព​របស់​​កីឡាករ​ ផាន់ ណារិទ្ធ និងស៊ាង ម៉េង​សាង ហើយ​បាន​ទម្លាក់​កំហុស​គ្រប់​យ៉ាងមកលើ​ សំបូរ សុភ័ណ្ឌ ​បើទោះបី​ជា សុភ័ណ្ឌ ព្រម​ទាំង​បង​ប្រុស​របស់​គេ សំបូរ ណាន និង សំបូរ នន់ ធ្លាប់ជា​មិត្ត​ភក្តិជា​មួយ​លោក ប៊ុនវី កាល​នៅជា​កីឡាករ​កាយ​វប្បកម្ម​ជាមួយ​គ្នា​ក៏​ដោយ។

លោក តឹក ប៊ុនវី បាន​និយាយ ក្នុងសន្និសីទ​កាសែត​នោះ​​ថា៖ «ការ​ពាក់​ព័ន្ធ​នឹង​សារធាតុ​ហាមឃាត់ Steroids ធ្វើឱ្យ​ប៉ះពាល់​ធ្ងន់​ធ្ងរ ចំពោះ​សហព័ន្ធ ព្រោះ​សហព័ន្ធ​បាន​ខំប្រឹង និង​យក​ចិត្ត​ទុកដាក់​ណាស់ លើការ​ហ្វឹក​ហាត់ ទាំង​ក្នុង និង​ក្រៅប្រ​ទេស ដើម្បី​កីឡាករ​យើង តែ​ទីបំផុត​យើង​​ក៏​ជួបបញ្ហា​ដូភីង​។ ខ្ញុំមាន​ការ​សោក​ស្ដាយ និង​ឈឺចា​ប់មែន​ទែន ហេតុ​អ្វីយើង​ដឹង​ហើយ ឮ​ហើយ ថា​ សហព័ន្ធ​យើង ធ្លាប់​ប្រឈម​មុខម្ដង​ហើយ​ម្ដង​ទៀត​​ពាក់ព័​ន្ធនឹង​រឿង​ Steroids ចុះ​មូលហេតុ​អ្វី បាន​​យើង​នាំគ្នា​បំផ្លាញ​ទឹក​ចិត្ត និង​ការ​ខិតខំ​ប្រឹង​ប្រែង​នេះ»។​

នៅក្នុង​សន្និ​សីទ​កា​សែត កាលពី​ថ្ងៃទី​ ១៧ ខែមករា នោះ​ដែរ ទាំង​លោក តឹក ប៊ុនវី ព្រម​ទាំង​កីឡាករ ផាន់ ណារិទ្ធ និងស៊ាង ម៉េងសាង បាន​អំពាវ​នាវ​ដល់​អាជ្ញាធរ និង​ក្រសួង​ពាក់ព័ន្ធ ចាត់​វិធាន​ការ​លើ​ជន​ទុច្ចរិត ដែល​នាំ​ចូល និង​ចែក​ចាយ​ថ្នាំ​ ស្ថិត​ក្នុង​បញ្ជី​ហាម​ឃាត់​របស់​​ទី​ភ្នាក់​ងារ​​ប្រឆាំង​សារ​ធាតុ​ញៀន​ពិភពលោក (WADA) ដើម្បី​ចៀស​វាង​ផល​ប៉ះ​ពាល់​ផ្សេងៗ ដល់សុខ​ភាព​របស់​ប្រជា​ពល​រដ្ឋ និង​អ្នក​លេង​កីឡា ពិសេស​កីឡា​កាយ​វប្បកម្ម​តែម្ដ​ង។

ចំពោះ​ការ​ចោទ​ប្រកាន់ ដោយ​ប្រយោល​នេះ សំបូរ សុភ័ណ្ឌ បាន​បញ្ជាក់​ថា៖ «ចំណុច​ហ្នឹង ធ្វើ​ឱ្យមហាជន មាន​ការ​យល់ច្រឡំ​ខ្លាំង​មែន​ទែន ដូច​ថា ខ្ញុំយក​សារធាតុ​ហ្នឹង មក​ពី​ប្រទេស​គេ ឬ​យក​ពីខាង​ណា​មួយ មកចែក​ចាយ ទាំង​ប្រភេ​ទ​ថ្នាំ​បញ្ចុះ​ទឹក​នោមនេះ នៅ​ឱសថស្ថាន​ណាក៏មាន​ដែរ គ្រាន់តែ​យើង​អត់​ដឹង​ថា ការ​ប្រកួត​កីឡា​កាយវប្បកម្ម​ថ្នាក់​ជាតិ នៅស្រុក​យើង គេពិនិត្យ​ទាំង​សារធាតុ​​បញ្ចុះទឹក​នោមហ្នឹងទេ ព្រោះ​ពេល​ខ្ញុំចេញ​ទៅ​ប្រកួត​នៅ​អន្តរជាតិ កន្ល​ងមក គេ​អត់​ចាប់​អាហ្នឹងទេ គឺ​គេរក​តែ​ប្រភេទ Steroids»។

ជុំវិញការ​ចោទ​ប្រកាន់គ្នា រកទី​បញ្ចប់​មិនទាន់​​បាននេះ លោក តឹក ប៊ុនវី បាន​ឈាន​ដល់ការ​ធ្វើ​លិខិត​អញ្ជើញ​មួយ ផ្ញើ​ទៅ​លោក សំបូរ សុភ័ណ្ឌ ដើម្បី​ឱ្យ​ចូល​ខ្លួន​មក​ដោះស្រាយ​ទល់មុខ​គ្នា ជាមួយ​ ផាន់ ណារិទ្ធ និងស៊ាង ម៉េងសាង ព្រមទាំង​សាក្សី​២នាក់​ទៀត គឺ​កីឡាករ ហ៊ន ធារ៉េត និង​ ឈួន ធារដ្ឋ ហើយ​សហព័ន្ធ មាន​តួនាទី​ជាអាជ្ញា​កណ្តាល ប៉ុន្តែ​ជំនួប​ដែល​គ្រោងធ្វើ កាលពី​ថ្ងៃទី​២២ ខែមករា កន្លង​មក​នេះ ត្រូវបាន សំបូរ សុភ័ណ្ឌ ច្រាន​ចោល ដោយ​អះអាង​ថា សហព័ន្ធ មិន​បាន​គោរ​ព​ទៅតាម​លក្ខខណ្ឌ ដែល​បាន​ឯកភាព​គ្នា​។

សំបូរ សុភ័ណ្ឌ បាន​យក​លិខិត​អញ្ជើញ​នោះ មក​បង្ហោះ​ នៅ​លើ​ហ្វេសប៊ុក​របស់​ខ្លួន កាល​ពី​ថ្ងៃទី​២០ ​ខែ​មករា រួច​បក​ស្រាយ​ថា៖ «ប្រធាន​សហព័ន្ធ​កីឡាកាយ​វប្បកម្ម បាន​ចេញ​ជា​សារ​ព័ត៌​មាន​​មួយ សុំ​ឱ្យខ្ញុំ​ទៅដោះ​ស្រាយ​ដោយ​សន្តិ​វិធី នៅ​ទីតាំង​សហព័ន្ធ​កាយ​វប្បកម្ម ហើយ​​នៅថ្ងៃ​ទី​១៩ ខែមករា ដដែល​នោះ ខ្ញុំក៏យល់​ព្រម ដោយ​ស្នើឱ្យ​មាន​លក្ខខណ្ឌ​មួយ​ចំនួន​ គឺទី​១ ខ្ញុំ​ទៅ​ជាមួយ​​មេធាវីផ្ទាល់​ខ្លួន​របស់​ខ្ញុំ ទី​២ បង​ប្អូន ​ដែល​ជា​កីឡាករ​កាយ​វប្បកម្ម អាច​មាន​សិទ្ធិ​ទៅ​ចូល​​រួម​ទាំងអស់គ្នាបាន ដើម្បីដឹងឮជាសាធារណៈ ហើយ​ទី​៣ អ្នកសារព័ត៌​មាន អាច​ទៅ​ចូលរួម​ជាមួយគ្នា ដើម្បី​យក​ព័ត៌មាន​ជាក់​លាក់​ឱ្យ​មហាជន​បាន​ដឹង​ទូលំទូ​លាយ​ទាំង​អស់គ្នា អំពី​ការ​ពិត​យ៉ាង​ណា»។

សំបូរ សុភ័ណ្ឌ បាន​បន្ថែម​ថា៖ «ខាង​សហព័ន្ធ​បាន​យល់ព្រ​ម ប៉ុន្តែព្រឹ​កថ្ងៃ​២០ ខែ​មករា សហព័ន្ធ​កាយ​វប្ប​កម្ម ​បាន​ផ្ញើ​លិខិត​អញ្ជើញ បែរជា​ផ្ទុយ​ពីលក្ខខណ្ឌ​ដូចខា​ងលើទៅ​វិញ ដោយ​​សហព័ន្ធ ចង់ធ្វើ​បែប​ស្ងាត់ៗ និង​ឱ្យ​ខ្ញុំទៅ​តែម្នាក់​ឯង ខុសពី​លក្ខខណ្ឌ ដែល​សហព័ន្ធ​បាន​យល់​ព្រម។​ ដូច្នេះ​ខ្ញុំ​សូម​បញ្ជាក់​ថា បើ​សហព័ន្ធ ​មិន​ព្រម​តាម​សំណើ​​ខាង​លើនេះ​ទេ ខ្ញុំ​មិន​ទៅ​ចូល​រួម​នោះទេ ព្រោះ​រឿងនេះ ​វា​អយុត្តិធម៌​ហើយ​ប៉ះ​ពាល់​ដល់​កិត្តិយស​ខ្ញុំ​បាទ​យ៉ាង​ធ្ងន់ធ្ងរ​ណាស់​»។

យ៉ាង​ណាក៏​ដោយ បើតាម​ប្រភព​ច្បាស់​ការ​មួយ បាន​ឱ្យ​ដឹង​ថា ក្រោយ​ការ​បរាជ័យ សម្រាប់ការ​ជួបគ្នា​​ដោះស្រា​យបញ្ហា កាល​ពីថ្ងៃទី​២២ ខែម​ករា កន្លង​មក​នេះ គឺ​តំណាង​របស់​គណៈ​កម្មាធិការ​ជាតិ​អូឡាំពិក​កម្ពុជា និង​ក្រសួង​អប់រំ យុវ​ជន និង​កីឡា អាច​នឹង​ចេញ​មុខ ធ្វើជា​អាជ្ញា​កណ្តាល ដើម្បី​ឱ្យភាគី សំបូរ សុភ័ណ្ឌ និង​សហ​ព័ន្ធ​​កីឡា​កាយ​វប្បក​ម្ម និង​លំហាត់​ប្រាណ បាន​ជួបគ្នា ដើម្បី​ដោះស្រាយ​លើបញ្ហា​ចោទ​ប្រកាន់​គ្នា​នេះ ប៉ុន្តែជំនួប​នេះ នៅ​មិន​អាច​កំណត់​កាល​បរិច្ឆេទ​​ច្បាស់​នៅឡើយ​ទេ ដោយ​សារ​ពេល​នេះ លោក តឹក ប៊ុ​នវី កំពុង​មា​នភា​រ​កិច្ច នៅ​ក្រៅ​ប្រទេស៕