សន្និសីទកាសែតស្តីពីការជ្រើសរើសអ្នកស្ម័គ្រចិត្ត កាលពីថ្ងៃទី ១ កុម្ភៈ។ រូបថត Cambodia 2023
ភ្នំពេញៈ ថ្នាក់ដឹកនាំរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) បានចាត់ទុកប្រព័ន្ធផ្សព្វផ្សាយ និងអ្នកស្ម័គ្រចិត្ត ជាផ្នែកដ៏សំខាន់ ដែលនឹងជំរុញឱ្យការធ្វើម្ចាស់ផ្ទះស៊ីហ្គេម និងអាស៊ានប៉ារ៉ាហ្គេម ឆ្នាំ ២០២៣ ជាលើកដំបូងរបស់កម្ពុជា កាន់តែទទួលបានជោគជ័យ។
នៅក្នុងកិច្ចប្រជុំពិភាក្សាការងារពាក់ព័ន្ធការចុះឈ្មោះអ្នកសារព័ត៌មានជាតិ-អន្តរជាតិ នៅពហុកីឡដ្ឋានជាតិមរតកតេជោ កាលពីថ្ងៃទី ៦ ខែកុម្ភៈ លោក វ៉ាត់ ចំរើន និងលោក ផុស សុវណ្ណ ប្រតិភូរាជរដ្ឋាភិបាល ជាអគ្គនាយកសោតទស្សន៍នៃក្រសួងព័ត៌មាន និងជាប្រធានគណៈកម្មការព័ត៌មាន និងផ្សព្វផ្សាយ និងគណៈកម្មការហ្គេមព័ត៌មានវិទ្យារបស់ CAMSOC បានឱ្យដឹងថា ចាប់ពីខែមីនាតទៅ នឹងចាប់ផ្តើមរៀបចំទីតាំង ការទទួលចុះឈ្មោះអ្នកសារព័ត៌មាន និងការធ្វើប័ណ្ណ សម្រាប់សារព័ត៌មានជាតិ និងអន្តរជាតិ។
ជាមួយគ្នានោះអគ្គលេខាធិការ CAMSOC លោក វ៉ាត់ ចំរើន បានចាត់ទុកវិស័យសារព័ត៌មាន ជាកញ្ចក់ឆ្លុះបញ្ចាំងពីតថភាពនូវអ្វីជាសច្ចភាពរបស់កម្ពុជា នាពេលបច្ចុប្បន្នទៅកាន់ពិភពលោក ឱ្យកាន់តែជ្រួតជ្រាប ស្របពេលដែលប្រជាជន នៅលើពិភពលោក កំពុងតែត្រៀមផ្តោតចក្ខុមកកាន់កម្ពុជា តាមរយៈការធ្វើជាម្ចាស់ផ្ទះការប្រកួតកីឡាស៊ីហ្គេម ៣២ និងអាស៊ានប៉ារ៉ាហ្គេម លើកទី១២ ឆ្នាំ ២០២៣ ជាប្រវត្តិសាស្ត្រដំបូងរបស់កម្ពុជា ក្រោយរង់ចាំ ៦៤ ឆ្នាំ។
លោក វ៉ាត់ ចំរើន បានថ្លែងថា៖ «CAMSOC នឹងខិតខំលើកទឹកចិត្តក្នុងគោលដៅឱ្យអ្នកសារព័ត៌មានអន្តរជាតិមានភាពកក់ក្តៅ ក្នុងការលើកកម្ពស់ដល់ការផ្សព្វផ្សាយ ទៅកាន់ពិភពលោក ពីភាពវិជ្ជមាន ការខិតខំប្រឹងប្រែងរបស់យើងនៃមហាព្រឹត្តិការណ៍ ឆ្នាំ២០២៣ នេះ ជាពិសេសគឺសមិទ្ធផលដ៏អស្ចារ្យនៃពហុកីឡដ្ឋានជាតិមរតកតេជោ ក្រោមសន្តិភាព និងការអភិវឌ្ឍ នៅរាជធានីភ្នំពេញ ក៏ដូចជាបណ្តាខេត្តរៀបចំស៊ីហ្គេម ដូចជាសៀមរាប ព្រះសីហនុ កែប កំពត ដែលជាខេត្តគោលដៅទេសចរណ៍ពិសេសៗរបស់កម្ពុជាផងដែរ»។
«ដូច្នេះ សារព័ត៌មានជាកញ្ចក់ឆ្លុះបញ្ចាំងពីតថភាពនូវអ្វីជាសច្ចភាពរបស់កម្ពុជា នាពេលបច្ចុប្បន្នទៅកាន់ពិភពលោក ដោយប្រជាជននៅលើពិភពលោក កំពុងតែត្រៀមផ្តោតចក្ខុមកកាន់កម្ពុជា តាមរយៈព្រឹត្តិការណ៍កីឡាដ៏អស្ចារ្យនេះ»។ លោក វ៉ាត់ ចំរើន បន្ថែមថា ការផ្សព្វផ្សាយត្រូវបានចែកចេញជា ២ គឺទី១ ការផ្សព្វផ្សាយពីការថតផលិតលើ ១៥ ប្រភេទកីឡា ដែលមានប្រជាប្រិយភាព ដោយផលិតពីក្រុមផលិតឯកជន ឬដោយក្រុមជំនាញអន្តរជាតិឱ្យបានក្នុងកម្រិតគុណភាពស្តង់ដាអន្តរជាតិ ហើយបញ្ជូនទៅប្រព័ន្ធផ្សព្វផ្សាយក្នុងស្រុកដោយឥតគិតថ្លៃ។
ចំណែកទី២ គឺប្រភេទជាង ១៥ ប្រភេទទៀត គឺផ្តល់ជូនដល់ស្ថានីយទូរទស្សន៍នានា ក្នុងស្រុក ដែលមានលទ្ធភាពគ្រប់គ្រាន់ សម្រាប់ការផ្សាយផ្ទាល់ ហើយចំពោះទូរទស្សន៍ណាទទួលបានសិទ្ធិផ្សាយផ្ទាល់លើប្រភេទកីឡាណាខ្លះនោះ លោក វ៉ាត់ ចំរើន បញ្ជាក់ថា វាអាស្រ័យលើការរៀបចំរបស់លោក ផុស សុវណ្ណ ក្រោមការឯកភាពពីលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអនុប្រធាន CAMSOC រួមទាំងការឯកភាពពីថ្នាក់ដឹកនាំរបស់ CAMSOC ផងដែរ។
«កិច្ចប្រជុំនេះផ្តោតសំខាន់លើផ្នែកបច្ចេកទេសនៃមជ្ឈមណ្ឌលផ្សាយផ្ទាល់ (IBC) និងមជ្ឈមណ្ឌលសារព័ត៌មាន ត្រូវរៀបចំបែបណាខ្លះ ធ្វើកិច្ចការអ្វីខ្លះ អ្នកទទួលខុសត្រូវ ជាពិសេសគឺប្រព័ន្ធផ្សព្វផ្សាយទូរទស្សន៍ទាំងអស់ ទទួលបានសិទ្ធិផ្សាយផ្ទាល់ ដោយឥតគិតថ្លៃ ហើយនេះជាអនុសាសន៍ដ៏ថ្លៃថ្លារបស់សម្តេចតេជោនាយករដ្ឋមន្ត្រី ហ៊ុន សែន។ ប៉ុន្តែកិច្ចប្រជុំនេះ ជំរុញឱ្យការងារផ្សព្វផ្សាយទាំងអស់ ទទួលខុសត្រូវឱ្យបានជាក់លាក់ និងប្រសិទ្ធភាពខ្ពស់ ក្នុងការផ្សព្វផ្សាយឱ្យបានទូលំទូលាយ ប្រកបដោយគុណភាពខ្ពស់ និងវិជ្ជាជីវៈកីឡា»។ លោកវ៉ាត់ ចំរើន បានបញ្ជាក់។
ជាមួយគ្នានេះដែរ លោក ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធាន អចិន្ដ្រៃយ៍ CAMSOC បានដាក់ក្ដីសង្ឃឹមថា កម្ពុជា នឹងទទួលបាននូវការចុះឈ្មោះរបស់ អ្នកស្ម័គ្រចិត្តជាច្រើន ផងដែរ ដើម្បីចូលរួមបំពេញការងារ ក្នុងកិច្ចការស៊ីហ្គេមរបស់ជាតិ ឱ្យទទួលបានជោគជ័យ។
នៅក្នុងសន្និសីទសារព័ត៌មាន ប្រកាសទទួលយកអ្នកស្ម័គ្រចិត្តជាផ្លូវការ កាលពីថ្ងៃទី ១ ខែកុម្ភៈ ដោយមានការចូលរួមពីសំណាក់លោក ហ៊ុន ម៉ានី ជាប្រធានសហភាពសហព័ន្ធយុវជនកម្ពុជា ផងនោះ លោក ថោង ខុន បានឱ្យដឹងថា CAMSOC ត្រូវការអ្នកស្ម័គ្រចិត្តប្រមាណ ៧ ០០០ នាក់ ដើម្បីបម្រើដល់ព្រឹត្តិការណ៍ស៊ីហ្គេម-អាស៊ានប៉ារ៉ាហ្គេម ដែលមានប្រតិភូប្រមាណពី៧ ទៅ៨ពាន់នាក់ចូលរួម។
លោករដ្ឋមន្រ្តីបានថ្លែងថា៖ «អ្នកស្ម័គ្រចិត្ត គឺជា DNA របស់ព្រឹត្តិការណ៍កីឡាដ៏ធំ ហើយកន្លងមកយើងបានធ្វើការរៀបចំបែងចែក គឺការចាត់តាំង ការប្រើប្រាស់របស់គណៈកម្មការស្ម័គ្រចិត្តនេះ ទៅតាមគ្រប់ផ្នែកអស់ហើយ ក្នុងនោះក៏មាននៅក្នុងគណៈកម្មការជំនាញផងដែរ ដោយខាងមុខនេះ គណៈកម្មការជំនាញ នឹងទទួលយកអ្នកស្ម័គ្រចិត្តទាំងឡាយ ដើម្បីទៅចូលរួមការងារជាមួយគណៈកម្មការជំនាញ ពិសេសក្នុងការរៀបចំការប្រកួតគ្រប់ប្រភេទកីឡាទាំងអស់ និងការងារជំនាញ ដែលមានការពាក់ព័ន្ធ។ ខ្ញុំសង្ឃឹមថា នឹងបានទទួលអ្នកស្ម័គ្រចិត្តជាច្រើន ក្នុងកិច្ចការស៊ីហ្គេមរបស់យើងនេះ»៕
