ព្រះសង្ឃក្នុងពេលរៀបចំទូងស្គរកាលពីពេលកន្លងមក ។ ហេង ជីវ័ន
ភ្នំពេញៈ សាលាគណរាជធានីភ្នំពេញ បានស្នើព្រះអនុគណខណ្ឌទាំង ១៤ ព្រះចៅអធិការគ្រប់វត្តអារាមក្នុងរាជធានីភ្នំពេញ ព្រះមេត្តាវាយជួង រគាំង និងទូងស្គរ ឱ្យបានកងរំពងគ្រប់វត្តអារាម ដើម្បីចូលរួមអបអរសាទរក្នុងពិធីទទួល និងដង្ហែ «ព្រះអគ្គិជ័យកីឡា» នៃព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ របស់ម្ចាស់ផ្ទះកម្ពុជាដែលនឹងចូលមកដល់រាជធានីភ្នំពេញនៅថ្ងៃទី ២៨ ខែមេសា។
តាមសេចក្តីប្រគេនដំណឹងនេះ បានបញ្ជាក់ថា នៅល្ងាចម៉ោង ៥:២០ ថ្ងៃទី២៨ មេសា សាលាគណរាជធានីភ្នំពេញ ស្នើព្រះអនុគណ ព្រះចៅអធិការគ្រប់វត្តអារាម ក្នុងរាជធានីភ្នំពេញ ព្រះមេត្តាវាយជួង រគាំង និងទូងស្គរ ឱ្យបានកងរំពងគ្រប់វត្តអារាម ដើម្បីចូលរួមអបអរសាទរក្នុងពិធីទទួលខែមេសានេះ ពិធីទទួល និងដង្ហែព្រះអគ្គិជ័យកីឡាពីត្រង់ចំណុចផ្សារព្រែកអញ្ចាញស្ពានទី១២ ព្រំប្រទល់ខេត្តកណ្តាល-រាជធានីភ្នំពេញ បន្តឆ្ពោះទៅចំណុចរមណីយដ្ឋានវត្តភ្នំ និងទៅតម្កល់រក្សាទុកនៅវត្តលង្កាព្រះកុសុមារាម រហូតដល់ចប់ក្បូនដង្ហែ។
បើតាមកម្មវិធីដង្ហែ «ព្រះអគ្គិជ័យកីឡា» ពីតំបន់អាស៊ាន ចូលមកប្រទេសកម្ពុជាវិញនេះ បានឱ្យដឹងថា ព្រះអគ្គិជ័យកម្ពុជានឹងត្រូវដង្ហែពីប្រទេសឡាវមកដល់ព្រំដែនអន្តរជាតិត្រពាំងក្រៀល-ណងណុកឃៀននៅម៉ោង ១១:៣០នាថ្ងៃទី២៧ ខែមេសា ហើយត្រូវបន្តដង្ហែមកកាន់ខេត្តស្ទឹងត្រែង រួចចូលមកខេត្តក្រចេះ ខេត្តត្បូងឃ្មុំ ខេត្តកំពង់ចាម និងខេត្តកណ្តាល មុនមកដល់រាជធានីភ្នំពេញ នៅថ្ងៃទី២៨ ខែមេសា។
សម្រាប់ការដង្ហែក្បួនឆ្លងពីខេត្ត១ទៅខេត្ត១ទៀត គឺមានការរៀបចំពិធីទទួលស្វាគមន៍ និងដង្ហែក្បួនបន្តយ៉ាងត្រឹមត្រូវ មានរបៀបរៀបរយទៅតាមទំនៀមទម្លាប់ប្រពៃណីខ្មែរ។ ចំណែកនៅថ្ងៃទី២៨ ខែមេសា រដ្ឋ
បាលរាជធានីភ្នំពេញនឹងរង់ចាំទទួលស្វាគមន៍ព្រះអគ្គិជ័យកីឡានៅស្ពានទី១២ដើម្បីដង្ហែមកវេទិកានៅរមណីយដ្ឋានប្រវត្តិសាស្ត្រវត្តភ្នំ ហើយព្រះអគ្គិជ័យកីឡា នឹងត្រូវដង្ហែយកទៅតម្កល់រក្សាទុកនៅវត្តលង្កាព្រះកុសុមារាមនៅល្ងាចថ្ងៃដដែល ដោយមានរៀបចំពិធីសាសនា និងបាញ់កាំជ្រួចផងដែរ។
ចំណែកនៅថ្ងៃសៅរ៍ទី២៩ ខែមេសា «ព្រះអគ្គិជ័យកីឡា» នឹងត្រូវដង្ហែចេញពីវត្តលង្កាព្រះកុសុមារាម ទៅកាន់គោលដៅសំខាន់ៗមួយចំនួន នៅរាជធានីភ្នំពេញ មុនបន្តទៅខេត្តផ្សេងៗទៀត ហើយជាមួយគ្នានេះ រដ្ឋបាលរាជធានីភ្នំពេញ ក្រោមការដឹកនាំរបស់លោក ឃួង ស្រេង អភិបាលរាជធានីភ្នំពេញ បានស្នើឱ្យប្រជាពលរដ្ឋទាំងអស់ចូលរួមទទួល និងអបអរសាទរការដង្ហែព្រះអគ្គិជ័យកីឡា នៅក្នុងរាជធានីភ្នំពេញនេះ។
រដ្ឋបាលរាជធានីភ្នំពេញបានបញ្ជាក់ក្នុងសេចក្តីជូនដំណឹងថា៖ «ដើម្បីឱ្យពិធីដង្ហែព្រះអគ្គិជ័យកីឡានេះ ប្រព្រឹត្តទៅប្រកបដោយភាពអធិកអធម មានអត្ថន័យជ្រាលជ្រៅជាប្រវត្តិសាស្ត្រមិនអាចបំភ្លេចបាន ក្រោយខកខានធ្វើជាម្ចាស់ផ្ទះអស់រយៈពេល៦៤ឆ្នាំ រដ្ឋបាលរាជធានីភ្នំពេញ សូមអំពាវនាវដល់បងប្អូនប្រជាពលរដ្ឋទាំងអស់ចូលរួមអបអរសាទរ និងទទូលស្វាគមន៍តាមដងផ្លូវ ដែលព្រះអគ្គិជ័យកីឡាឆ្លងកាត់នូវដំណើរមកដល់ និងការដង្ហែនៃព្រះអគ្គិជ័យកីឡាឱ្យបានស័ក្តិសមជាប្រជាជាតិខ្មែរដែលជាជាតិសាសន៍មានវប្បធម៌ អរិយធម៌ខ្ពង់ខ្ពស់ ឧត្ដុង្គឧត្ដម ចម្រើនរុងរឿង ព្រមទាំងធ្លាប់មានកិត្តិនាមល្បីល្បាញពេញពិភពលោក»។
«ការចូលរួមអបអរសាទររបស់បងប្អូនប្រជាពលរដ្ឋទាំងអស់ ក៏ជាការផ្ដល់កម្លាំងចិត្តមិនអាចកាត់ថ្លៃបាន ចំពោះកីឡាករ កីឡាការិនី និងប្រតិភូកីឡាទាំងអស់ ដែលបានលះបង់ពេលវេលា និងកម្លាំងកាយចិត្ត ធ្វើដំណើរមកប្រកួតនៅលើទឹកដីនៃព្រះរាជាណាចក្រកម្ពុជា ជាពិសេសបានបង្ហាញនូវនិមិត្តរូបនៃសាមគ្គីភាព ភារតភាព និងការជួយគ្នាទៅវិញទៅមកក្នុងនាមជាប្រជាជាតិអាស៊ីអាគ្នេយ៍ផងដែរ»។នេះជាការបញ្ជាក់បន្ថែមរបស់រដ្ឋបាលរាជធានីភ្នំពេញ ។
ជាមួយគ្នានេះ រដ្ឋបាលរាជធានីភ្នំពេញ មានសង្ឃឹមជឿជាក់ថា បងប្អូនប្រជាពលរដ្ឋទាំងអស់ ពិសេសអ្នកមានលំនៅឋាននៅតាមតម្រាយផ្លូវដែលព្រះអគ្គិជ័យកីឡាត្រូវដង្ហែឆ្លងកាត់ នឹងផ្តល់ការយោគយល់អធ្យាស្រ័យ ហើយចូលរួមអបអរសាទរទទួលស្វាគមន៍ដោយសហការរក្សាបាននូវសន្តិសុខ សុវត្ថិភាព សណ្តាប់ធ្នាប់ របៀបរៀបរយសាធារណៈព្រមទាំងមានការតុបតែងលម្អសោភណភាព រក្សាអនាម័យបរិស្ថាន ដោតទង់ជាតិនៅតាមគេហដ្ឋាន និងទីតាំងរៀងៗខ្លួនឱ្យបានល្អប្រសើរ។
ចំណែកស្នងការនគរបាលរាជធានីភ្នំពេញ មេបញ្ជាការកងរាជអាវុធហត្ថរាជធានីភ្នំពេញ អភិបាលខណ្ឌ និងអាជ្ញាធរពាក់ព័ន្ធគ្រប់លំដាប់ថ្នាក់ ក៏ត្រូវចូលរួមសហការអនុវត្ត និងបង្កលក្ខណៈ ឱ្យមានប្រសិទ្ធភាព ប្រកបដោយស្មារតីទទួលខុសត្រូវខ្ពស់ សម្រាប់ការដង្ហែក្បូនព្រះអគ្គិជ័យកីឡានៅក្នុងរាជធានីភ្នំពេញនេះ មុនពេល «ព្រះអគ្គិជ័យកីឡា» ត្រូវបានយកទៅដង្ហែនៅតាមបណ្តាខេត្ត ជុំវិញបឹងទន្លេសាប។
ចំពោះការដង្ហែនៅជុំវិញបឹងទន្លេសាបគឺផ្តើមចេញពីខេត្តកំពង់ឆ្នាំង បន្ទាប់ពីប្រតិភូរបស់ខេត្តមួយនេះ បានទទួលព្រះអគ្គិជ័យកីឡានេះ ពីរដ្ឋបាលរាជធានីភ្នំពេញនៅខាងមុខភោជនីយដ្ឋានដំរីសនារសៀលម៉ោង២ថ្ងៃទី២៩ ខែមេសា ហើយក្បូនដង្ហែនេះ ត្រូវនាំចូលខេត្តពោធិ៍សាត់ នៅថ្ងៃទី៣០ ខែមេសា រួចបន្តទៅខេត្តបាត់ដំបងថ្ងៃទី១ ឧសភា ឆ្លងចូលខេត្តបន្ទាយមានជ័យ នៅថ្ងៃទី២ ខេត្តសៀមរាប ថ្ងៃទី៣ ខេត្តកំពង់ធំថ្ងៃទី៤ និងខេត្តកំពង់ចាម នៅថ្ងៃទី៥ ឧសភា ហើយនៅថ្ងៃដដែលនេះ ព្រះអគ្គិជ័យកីឡា ត្រូវដង្ហែត្រឡប់មកភ្នំពេញវិញ ដោយមកដល់ពហុកីឡដ្ឋានជាតិមរតកតេជោ នៅយប់ម៉ោង ៨:៣០ ដើម្បីអុជបំភ្លឺគប់ធំ នាពិធីបើកស៊ីហ្គេមពេលនោះតែម្តង៕
