ការប្រកួតកីឡាលោតទឹក ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣ តែម្ចាស់ផ្ទះកម្ពុជា មិនដណ្តើមបានមេដាយ លើប្រភេទកីឡានេះទេ។ ហុង មិនា
ភ្នំពេញ៖ ក្រុមកីឡាករ កីឡាការិនីជម្រើសជាតិហែលទឹកពាក់ជើងទាកម្ពុជា (Finswimming) ចំនួន ៤ នាក់ នឹងត្រូវឡើងទៅប្រកួតផ្តាច់ព្រ័ត្រ នាល្ងាចថ្ងៃសុក្រនេះ ដើម្បីស្វែងរកមេដាយជូនជាតិ ក្នុងនាមជាម្ចាស់ផ្ទះ រៀបចំការប្រកួតស៊ីហ្គេម លើកទី៣២ ឆ្នាំ ២០២៣ ខណៈក្រុមហែលទឹក និងលោតទឹកកម្ពុជា បានបញ្ចប់ការប្រកួត ដោយមិនបានទទួលបានមេដាយនោះទេ។
តាមរយៈការប្រកួត កីឡាហែលទឹកពាក់ជើងទា ដែលត្រូវបានធ្វើនៅអាងហែលទឹក នៃពហុកីឡដ្ឋានជាតិមរតកតេជោ កាលពីព្រឹកថ្ងៃសុក្រនេះ កីឡាការិនី កាំង មួយនីន, ឃឿន ប៊ុនពេជ្រមរកត ព្រមទាំងកីឡាករ សុខ វ៉ាត់ថានូន និង លឹម កែវឧត្តម សុទ្ធតែបានឆ្លងផុតការប្រកួតជម្រុះទៅលើជំនាញរបស់ខ្លួន ដើម្បីបានឡើងទៅកាន់ការប្រកួតវគ្គផ្តាច់ព្រ័ត្រ ដែលនឹងត្រូវធ្វើនៅល្ងាចម៉ោង ៦ ថ្ងៃនេះ។
សម្រាប់ការប្រកួតលើវិញ្ញាសា Women’s 400m Bi Fins កីឡាការិនី កាំង មួយនីន, និង ឃឿន ប៊ុនពេជ្រមរកត របស់កម្ពុជា បានឈរនៅលេខ ១ និងលេខ ២ ជាមួយថិរវេលា ០៤:០៥.៦៧០ វិនាទី និង ០៤:១២.០៧០ ដើម្បីឡើងទៅកាន់ការប្រកួតវគ្គផ្តាច់ព្រ័ត្រ ដោយមានទំនុកចិត្ត។
បន្ថែមលើនេះ កាំង មួយនីន ក៏ធ្វើបានល្អ សម្រាប់ការប្រកួតលើវិញ្ញាសា Women’s 100m Bi Fins ផងដែរ ដោយកីឡាការិនីរបស់កម្ពុជារូបនេះ បានឈរនៅលេខ៣ សម្រាប់ការប្រកួត Heat 2 ហើយការធ្វើបានក្នុងថិរវេលា ៥១.០០០ វិនាទី ក៏បានធ្វើឱ្យ មួយនីន មានភាគរយ ក្នុងការប្រជែងយកមេដាយផងដែរ ព្រោះក្នុងវិញ្ញាសានេះ មានតែកីឡាការិនីលេខ ១ របស់ឥណ្ឌនេស៊ី និងអ្នកបានលេខ២របស់វៀតណាម ទេ ដែលធ្វើបាន ក្នុងថិរវេលាល្អជាង មួយនីន។
កីឡាករ កីឡាការិនីជម្រើសជាតិហែលទឹកពាក់ជើងទារបស់កម្ពុជាទាំង៤នាក់ ដែលត្រូវប្រកួតផ្តាច់ព្រ័ត្រ នៅល្ងាចម៉ោង៦ ថ្ងៃសុក្រនេះ។ រូបថត សហការី
ចំណែកកីឡាករ សុខ វ៉ាត់ថានូន និងកីឡាករ លឹម កែវឧត្តម នឹងត្រូវប្រកួតផ្តាច់ព្រ័ត្រ លើវិញ្ញាសា Men’s 100m Surface ប៉ុន្តែតាមរយៈលទ្ធផលនៃការប្រកួតជម្រុះតាម Heat កាលពីព្រឹកមិញ គឺកីឡាករកម្ពុជាទាំង២នេះ ធ្វើក្នុងថវិរវេលា មិនសូវជាល្អប៉ុន្មានទេ ដោយក្នុងនោះ វ៉ាត់ថានូន ធ្វើបាន ៤២.២៩០ វិនាទី រីឯ កែវឧត្តម ធ្វើក្នុងថិរវេលា ៤៥.២៩០ វិនាទី គឺទាបជាងកីឡាករវៀតណាម ថៃ និងហ្វីលីពីន ហេតុនេះឱកាសរកមេដាយ សម្រាប់អ្នកទាំង២នេះ អាចមានការពិបាកខ្លាំង។
ដោយឡែក ក្រុមជម្រើសជាតិហែលទឹកកម្ពុជា បានបញ្ចប់ការប្រកួត នៅលើវិញ្ញាសាទាំង៣៩របស់ខ្លួន ដោយមិនបានមេដាយអ្វីនោះទេ ខណៈក្រុមសិង្ហបុរី ដណ្តើមបានមេដាយមាស២២ ប្រាក់១៤ សំរឹទ្ធ១០ វៀតណាម បានមាស ៧ ប្រាក់ ៣ សំរឹទ្ធ ៧ ថៃ បានមាស ៤ ប្រាក់ ១១ សំរឹទ្ធ ៨ ឥណ្ឌូនេស៊ី បានមាស ៣ ប្រាក់ ១ សំរឹទ្ធ ៣ ហ្វីលីពីន បានមាស ២ ប្រាក់ ៧ សំរឹទ្ធ ៧ និងម៉ាឡេស៊ី បានមេដាយមាស ១ ប្រាក់ ៣ សំរឹទ្ធ ៤។
ដូចគ្នានេះ ក្រុមជម្រើសជាតិលោតទឹកកម្ពុជា ក៏បានបញ្ចប់ការប្រកួតស៊ីហ្គេម នៅលើទឹកដីលើកដំបូងរបស់ខ្លួន ជាមួយការមិនទទួលបានមេដាយដូចគ្នា ដោយការប្រកួតចំនួន៤វិញ្ញាសា នៃប្រភេទកីឡានេះ ម៉ាឡេស៊ី បានយកមេដាយមាសទាំងអស់ និងឈ្នះបានមេដាយប្រាក់២ និងសំរឹទ្ធ១ទៀត រីឯឥណ្ឌូនេស៊ី បានប្រាក់១ សំរឹទ្ធ១ វៀតណាម បានប្រាក់១ និងសិង្ហបុរី បានមេដាយសំរឹទ្ធ២៕
ក្រុមជម្រើសជាតិហែលទឹកកម្ពុជា នៅតែមិនអាចដណ្តើមបានមេដាយ សម្រាប់ការប្រកួតស៊ីហ្គេម លើទឹកដីខ្លួនឯង។ រូបថត សហការី
