កីឡាការិនី កាំង មុយនីន (ឆ្វេង) និង ឃឿន ប៊ុនពេជ្រមរកត បានបង្ហាញទង់ជាតិ និងមេដាយ ដែលអ្នកទាំង២ ដណ្តើមបាន ក្នុងស៊ីហ្គេម ឆ្នាំ២០២៣។ រូបថត សហការី
ភ្នំពេញ៖ កីឡាការិនី កាំង មុយនីន បានជួយឱ្យសហព័ន្ធខ្មែរកីឡាហែលទឹក អាចបំបែកបាននូវកំណត់ត្រាប្រវត្តិសាស្រ្ត ឈ្នះមេដាយមាស ជាលើកដំបូង បន្ទាប់ពីពួកគេ បានរង់ចាំអស់រយៈពេល ៥០ឆ្នាំ ហើយជោគជ័យដ៏ធំនេះ វាបានកើតមានឡើង ចំពេលដែលប្រទេសកម្ពុជា បានធ្វើជាម្ចាស់ផ្ទះស៊ីហ្គេម ជាប្រវត្តិសាស្រ្ត លើកទី១ ដូចគ្នា ក្រោយរង់ចាំអស់រយៈពេល ៦៤ឆ្នាំ។
បើទោះបីជា ក្រុមជម្រើសជាតិហែលទឹក និងលោតទឹកកម្ពុជា បានបញ្ចប់ការប្រកួតសរុបទាំង៤៣វិញ្ញាសារបស់ពួកគេ ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣នេះ ដោយមិនបានមេដាយអ្វីសោះ ប៉ុន្តែការដណ្តើមបានមេដាយមាស លើប្រភេទកីឡាហែលទឹកពាក់ជើងទារបស់ កាំង មុយនីន កាលពីល្ងាចថ្ងៃទី១២ ខែឧសភា បានធ្វើឱ្យគ្រប់យ៉ាងមានភាពល្អប្រសើរឡើងវិញ ព្រោះនេះជាកំណត់ត្រាប្រវត្តិសាស្រ្តថ្មី សម្រាប់ក្រុមហែលទឹក។
កាំង មុយនីន បានឈ្នះមេដាយមាស លើវិញ្ញាសាហែល 400m Bi Fins ជាមួយថិរវេលា ៣:៥៩.០១ នាទី គឺនាំមុខកីឡាការិនីលេខ២របស់ឥណ្ឌូនេស៊ី Az Zahra Raqiel ដែលប្រើពេល ៤:០៥.៩៧ នាទី។ ចំណែកកីឡាការិនី ឃឿន ប៊ុនពេជ្រមរកត ទទួលបានមេដាយសំរឹទ្ធ លើវិញ្ញាសានេះដែរ ជាមួយថិរវេលា ៤:០៩.៦២ នាទី ដោយបាននាំមុខកីឡាការិនីសិង្ហបុរី Dawn Tong Eh Koh កីឡាការិនីហ្វីលីពីន Cabayaran Alexi Kouzenye និង De La Paz Jannie រួមទាំងកីឡាការិនីសិង្ហបុរី Ong R’yen Jing Qi និងកីឡាការិនីម៉ាឡេស៊ី Guan Jun Jamie Tan។
បន្ថែមទៅលើការឈ្នះបានមេដាយមាស ១ និងសំរឹទ្ធ ១ លើវិញ្ញាសាហែល 400m Bi Fins របស់ កាំង មុយនីន និង ឃឿន ប៊ុនពេជ្រមរកត នេះ កីឡាករ លឹម សុខវឌ្ឍន៍នន្ទ, ទួន ទិត្យសត្យា, លឹម កែវឧត្តម និងកីឡាករ ឆោម ច័ន្ទថន ក៏បានរួមគ្នា ឈ្នះមេដាយសំរឹទ្ធ លើវិញ្ញាសា Men’s Relay 4x200m Surface ផងដែរ។
សម្រាប់ការប្រកួតផ្តាច់ព្រ័ត្រ ក្នុងអាងហែលទឹកនៃពហុកីឡដ្ឋានជាតិមរតកតេជោ កាលពីល្ងាចថ្ងៃសុក្រនោះ លឹម សុខវឌ្ឍន៍នន្ទ ទួន ទិត្យសត្យា លឹម កែវឧត្តម និង ឆោម ច័ន្ទថន បានប្រើពេល ០៦:២៧.១៨០ នាទី គឺមានន័យថា ពួកគេ បានបំបែកឯតទ្ទគ្គកម្មចាស់ ០៧:១៩.៩៧០ នាទី សម្រាប់ការឈ្នះបានមេដាយសំរឹទ្ធនេះ ជាលើកដំបូង កាលស៊ីហ្គេម ឆ្នាំ២០២២ នៅវៀតណាម។ រីឯក្រុមមេដាយមាសរបស់វៀតណាម ធ្វើក្នុងថិរវេលា ០៥:៥០.០៣០ នាទី និងក្រុមលេខ២ ឥណ្ឌូនេស៊ី ប្រើពេល ០៥:៥២.១៨០ នាទី។
ជាមួយការទទួលបានជោគជ័យយ៉ាងធំធេង ជាពិសេសការឈ្នះបានមេដាយមាស របស់កីឡាការិនី កាំង មុយនីន វាបានក្លាយជាការបំបែកកំណត់ត្រាប្រវត្តិសាស្រ្តថ្មី របស់សហព័ន្ធខ្មែរកីឡាហែលទឹក ដែលកំពុងដឹកនាំដោយលោក ស៊ុន ចាន់ថុល បន្ទាប់ពីសហព័ន្ធនេះ បានរង់ចាំអស់រយៈពេល ៥០ឆ្នាំ ព្រោះចាប់តាំងពីឈ្នះបានមេដាយមាស២ ប្រាក់ ៧ និងសំរឹទ្ធ ៤ កាលស៊ីហ្គេម ឆ្នាំ១៩៧៣ នៅសិង្ហបុរី មក ក្រុមហែលទឹកកម្ពុជា មិនដែលដណ្តើមបានមេដាយមាស ទៀតនោះទេ គឺទើបតែពេលនេះ ដែលក្រុមហែលទឹក រកបាននៅលើប្រភេទកីឡាហែលទឹកពាក់ជើងទា៕
