កីឡាការិនីកូនកាត់ខ្មែរ-អាមេរិក ខេស៊ី ពេលឡើងទទួលមេដាយមាស ដែលនាងដណ្តើមបានជូនកម្ពុជា ក្នុងព្រឹត្តិការណ៍ស៊ីហ្គេម ឆ្នាំ២០២៣។ រូបថត សហការី
ភ្នំពេញ៖ កីឡាការិនីតេក្វាន់ដូជម្រើសជាតិកម្ពុជា ថិប កាសាន់ទ្រី នីកូល (Cassandre Nicole Tubbs) ហៅ ខេស៊ី បានរកឃើញជ័យជម្នះយ៉ាងសំខាន់ នៅក្នុងអាជីពរបស់ខ្លួនបានហើយ បន្ទាប់កីឡាការិនីកូនកាត់ខ្មែរ-អាមេរិករូបនេះ បានឈ្នះមេដាយមាស ជាលើកដំបូង ក្នុងការប្រកួតស៊ីហ្គេម លើកទី៣២ ឆ្នាំ ២០២៣។
ការឈ្នះបានមេដាយមាស ក្នុងប្រភេទទម្ងន់៦៧គីឡូក្រាមរបស់ Cassandre Nicole Tubbs បានកើតមានឡើង កាលពីព្រលប់ថ្ងៃទី១៥ ខែឧសភា បន្ទាប់កញ្ញា បានយកឈ្នះកីឡាការិនីហ្វីលីពីន Laila Rimbawa Delo ក្នុងវគ្គពាក់កណ្តាលផ្តាច់ព្រ័ត្រ ដោយលទ្ធផល ២-១ និងបន្តឈ្នះកីឡការិនីវៀតណាម Thi Khiem Bac ២-០ ក្នុងវគ្គផ្តាច់ព្រ័ត្រ សម្រាប់ការប្រកួតនៅមជ្ឈមណ្ឌល OCIC។
លោករដ្ឋមន្រ្តីក្រសួងអប់រំ យុវជន និងកីឡា ហង់ជួន ណារ៉ុន ជាប្រធានខេមរសហព័ន្ធតេក្វាន់ដូ និងថ្នាក់ដឹកនាំផ្សេងៗទៀត ព្រមទាំងអ្នកគាំទ្រ ដែលបានចូលរួមការប្រកួតនោះផ្ទាល់ បានបង្ហាញការសាទរខ្លាំងដល់ជ័យជម្នះរបស់កីឡាការិនី ខេស៊ី ចំណែកលោកគ្រូ ឆយ យ៉ុងសុខ និង ខេស៊ី ផ្ទាល់ បានកាន់ទង់ជាតិកម្ពុជា រត់នៅលើទីលានយ៉ាងរំភើប ដើម្បីបង្ហាញពីមោទនភាព ចំពោះការឈ្នះបានមេដាយមាសដ៏មានតម្លៃនេះ ព្រោះទម្រាំមានថ្ងៃនេះ ខេស៊ី បានជួបការខកចិត្ត ចំនួន៣លើកមកហើយ។
ការប្រកួតសម្តែងកាតារបស់កីឡាករតេក្វាន់ដូ WTកម្ពុជា ក្នុងការប្រកួតស៊ីហ្គេម លើកទី៣២ ឆ្នាំ២០២៣ ។ រូបថត ហុង មិនា
ទាំងទឹកមុខញញឹម ខេស៊ី បាននិយាយក្រោយដណ្តើមបានមេដាយមាស៖ «ខ្ញុំពិតជាសប្បាយចិត្តខ្លាំងណាស់ ដែលមានឱកាសប្រកួតតំណាងឱ្យកម្ពុជា និងបានធ្វើឱ្យប្រទេសជាតិ មានមោទនភាព ចំពោះការឈ្នះបានមេដាយមាស ជាលើកដំបូងរបស់ខ្ញុំ។ ជាមួយគ្នានេះ ខ្ញុំសូមអរគុណដល់អ្នកគាំទ្រទាំងអស់ និងថ្នាក់ដឹកនាំ ដែលបានលើកទឹកចិត្ត និងផ្តល់កម្លាំងចិត្តដល់រូបខ្ញុំ សម្រាប់ការឈានទៅដណ្តើមបានមេដាយមាស ឱ្យម្ចាស់ផ្ទះកម្ពុជា ដ៏មានន័យនៅពេលនេះ»។
គួររំឭកថា នៅមុនការឈ្នះបានមេដាយមាសស៊ីហ្គេម នៅពេលនេះ កីឡាការិនី ខេស៊ី ធ្លាប់ដណ្តើមបានត្រឹមមេដាយប្រាក់១ និងសំរឹទ្ធ២ សម្រាប់ការចូលរួមប្រកួតស៊ីហ្គេម ចំនួន៣លើកកន្លងមក ពោលគឺស៊ីហ្គេម ឆ្នាំ២០១៧ នៅម៉ាឡេស៊ី ខេស៊ី បានមេដាយសំរឹទ្ធ រីឯ ស៊ីហ្គេម លើកទី៣០ ឆ្នាំ២០១៩ នៅហ្វីលីពីន នាងទទួលបានមេដាយប្រាក់ និងស៊ីហ្គេម លើកទី៣១ ឆ្នាំ២០២១ នៅប្រទេសវៀតណាម កាលពីខែឧសភា ឆ្នាំ៣២០២២ កីឡាការិនីរបស់កម្ពុជារូបនេះ ដណ្តើមបានមេដាយសំរឹទ្ធ។
យ៉ាងណាក៏ដោយ ការឈ្នះបានមេដាយមាសរបស់ Tobbs Casande Nicole គឺបានកើតឡើង បន្ទាប់ពីវីរកីឡាការិនីតេក្វាន់ដូ ស៊ន សៀវម៉ី បានឈ្នះមេដាយមាស ប្រភេទទម្ងន់លើ៧៣គីឡូក្រាម ដែលនេះក៏ជាមេដាយមាសស៊ីហ្គេមទី៤ របស់ សៀវម៉ី ផងដែរ។ ជាមួយគ្នានេះ ក្រុមតេក្វាន់ដូ WT របស់កម្ពុជា ក៏ដណ្តើមបានមេដាយប្រាក់៤ និងសំរឹទ្ធចំនួន១០ទៀតផងដែរ សម្រាប់ការធ្វើជាម្ចាស់ផ្ទះ ការប្រកួតស៊ីហ្គេម លើកទី៣២ ឆ្នាំ២០២៣នេះ ហើយនេះជាចំនួនមេដាយដ៏ច្រើន ដែលក្រុមតេក្វាន់ដូ មិនធ្លាប់ធ្វើបាន សម្រាប់ការប្រកួតស៊ីហ្គេម កន្លងមកនោះទេ៕
