កីឡាការិនីជម្រើសជាតិកម្ពុជា ប៉ាល់ ឆរស្ម៊ី និងកីឡាការិនីជើងខ្លាំងរបស់សិង្ហបុរី Ting Wen Quah បានទទួលពានរង្វាន់ជាអត្តពលិកឆ្នើម ប្រចាំស៊ីហ្គេម ឆ្នាំ២០២៣។ រូបថត ហុង មិនា
ភ្នំពេញ៖ កីឡាការិនីជម្រើសជាតិកម្ពុជា ប៉ាល់ ឆរស្ម៊ី និងកីឡាការិនីជើងខ្លាំងរបស់សិង្ហបុរី Ting Wen Quah ត្រូវបានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) ជ្រើសរើសជាអត្តពលិកឆ្នើមផ្តាច់គេ ដែលទទួលបានពាន ប្រចាំព្រឹត្តិការណ៍ជាប្រវត្តិសាស្តលើកដំបូង ក្នុងរយៈពេល ៦៤ ឆ្នាំ នៅកម្ពុជាមួយនេះ។
ការជ្រើសរើសនេះ ក៏ព្រោះតែកីឡាការិនីដ៏ឆ្នើមទាំង២នេះ បានបង្ហាញសមត្ថភាពប្រកួតតំណាងឱ្យប្រទេសរបស់ខ្លួនបានយ៉ាងល្អ និងដណ្តើមបានមេដាយមាសច្រើន ពីការប្រកួតស៊ីហ្គេម លើកទី៣២ ឆ្នាំ ២០២៣ ដោយក្នុងនោះ កីឡាការិនីហែលទឹក Ting Wen Quah បានឈ្នះមេដាយមាស ៦ និងប្រាក់ ២ រីឯកីឡាការិនីវ៉ូវីណាមរបស់កម្ពុជា ប៉ាល់ ឆរស្ម៊ី បានឈ្នះមេដាយមាស ៤ ប្រាក់ ១ និងសំរឹទ្ធ ១។
តាមរយៈការប្រកួតស៊ីហ្គេម លើកទី៣២ នេះ កីឡាការិនី Ting Wen Quah បានឈ្នះមេដាយមាសទាំង ៦ ទៅលើវិញ្ញាសាហែលបណ្តាក់គ្នា Mixed 4 x 100m Medley, Women’s 4 x 100m Medley, Women’s 4 x 100m Freestyle, Women’s 4 x 200m Freestyle, ព្រមទាំងការប្រកួតឯកត្តជនហែលរបៀបសេរី ចម្ងាយ ១០០ ម៉ែត្រ និងចម្ងាយ ៥០ ម៉ែត្រ ចំណែកមេដាយប្រាក់ទាំង ២ Ting Wen Quah រកបានលើការហែលរបៀបមេអំបៅ ចម្ងាយ ១០០ ម៉ែត្រ និង ៥០ ម៉ែត្រ។
ចំណែកកីឡាការិនីវ៉ូវីណាមកម្ពុជា ប៉ាល់ ឆរស្ម៊ី បានឈ្នះមេដាយមាស ៤ ប្រាក់ ១ និងសំរឹទ្ធ ១ ដោយក្នុងនោះ មេដាយមាសទាំង ៤ របស់នាង រកបាននៅលើវិញ្ញាសាប្រកួតសម្តែងការពារខ្លួននារី ៣ បុរស ៣, Women’s Dual Knife Form, Aspect Broadsword Single Form, និងសម្តែងជាក្រុម Ying-Yang Sword Form 4x ចំណែកមេដាយប្រាក់ ឆរស្ម៊ី ដណ្តើមបានលើវិញ្ញាសា Women’s Multiple Training និងមេដាយសំរឹទ្ធ លើវិញ្ញាសា Women’s Self-Defence។
ចំពោះការទទួលបានពានជាអត្តពលិកឆ្នើមប្រចាំព្រឹត្តិការណ៍ស៊ីហ្គេម ឆ្នាំ ២០២៣ នេះ បានក្លាយជាមហាកិត្តិយស សម្រាប់ ប៉ាល់ ឆរស្ម៊ី និង Ting Wen Quah ហើយពាននេះ បានប្រគល់ដោយផ្ទាល់ពីសំណាក់លោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៀ បាញ់ ជាប្រធានគណៈកម្មាធិការជាតិ CAMSOC អបដោយលោក ថោង ខុន ជាអនុប្រធានអចិន្រ្តៃយ៍ និងលោក វ៉ាត់ ចំរើន ជាអគ្គលេខាធិការ CAMSOC នៅក្នុងពិធីបិទស៊ីហ្គេម កាលពីយប់ថ្ងៃទី ១៧ ខែឧសភា នៅពហុកីឡដ្ឋានជាតិមរតកតេជោ៕
