ការបង្ហាញក្បួនរបស់ក្រុមអ្នកស្ម័គ្រចិត្ត នៅចំពោះមុខអ្នកគាំទ្ររាប់ម៉ឺននាក់ ក្នុងពិធីបិទស៊ីហ្គេម លើកទី៣២ កាលពីថ្ងៃទី១៧ ខែឧសភា ឆ្នាំ២០២៣។ រូបថត ហុង មិនា
ភ្នំពេញ៖ ក្រុមអ្នកស្ម័គ្រចិត្ត ប្រមាណ ៦ ពាន់នាក់ ត្រូវបានថ្នាក់ដឹកនាំ កោតសរសើរ និងថ្លែងអំណរគុណ ចំពោះការបំពេញការងារបានយ៉ាងល្អរបស់ពួកគេ ក្នុងព្រឹត្តិការណ៍ស៊ីហ្គេម លើកទី៣២ ឆ្នាំ ២០២៣ ដែលទើបបានរៀបចំពិធីបិទជាផ្លូវការ នៅពហុកីឡដ្ឋានជាតិមរតកតេជោ កាលពីយប់ថ្ងៃទី ១៧ ខែឧសភា។
រដ្ឋមន្រ្តីក្រសួងទេសចរណ៍ លោក ថោង ខុន ជាប្រធានគណៈកម្មាធិការជាតិអូឡាំពិកកម្ពុជា និងជាប្រធានក្រុមប្រឹក្សាសហព័ន្ធកីឡាអាស៊ីអាគ្នេយ៍ បានធ្វើការវាយតម្លៃខ្ពស់ ទៅលើការបំពេញការងាររបស់ក្រុមអ្នកស្ម័គ្រចិត្ត ដែលបានធ្វើឱ្យការបដិសណ្ឋារកិច្ចទទួលភ្ញៀវ ព្រមទាំងការរៀបចំការប្រកួត និងពិធីបើក-បិទស៊ីហ្គេម អាចដំណើរទៅដោយរលូន និងមានសណ្តាប់ធ្នាប់ល្អ។
លោក ថោង ខុន ដែលជាអនុប្រធានអចិន្រ្តៃយ៍ CAMSOC ផងនោះ បានថ្លែងនៅក្នុងពិធីបិទស៊ីហ្គេម បែបនេះថា៖ «ជូនចំពោះអ្នកស្ម័គ្រចិត្តរាប់ពាន់នាក់ ដែលបានខិតខំ ដើម្បីធ្វើយ៉ាងណាឱ្យគណៈប្រតិភូ និងអ្នកទស្សនាទទួលបានបទពិសោធន៍ដ៏ល្អ ពីការប្រកួតស៊ីហ្គេម លើកទី៣២ ឆ្នាំ២០២៣ ដែលកម្ពុជា បានផ្តល់ជូន ខ្ញុំសូមអរគុណដ៏ស្មោះចេញពីបេះដូង។ អ្នកគឺពិតជាកោសិការស្នូល (DNA) នៃព្រឹត្តិការណ៍កីឡារបស់យើង។ ខ្ញុំសូមអរគុណអ្នកទាំងអស់គ្នា»។
ជាមួយគ្នានេះ លោកនាយករដ្ឋមន្រ្តី ហ៊ុន សែន ក៏បានសម្តែងការអរគុណ ចំពោះអ្នកស្ម័គ្រចិត្តទាំងអស់ ដែលបានចូលរួមជួយ នៅក្នុងព្រឹត្តិការណ៍ស៊ីហ្គេម លើកទី៣២ ឆ្នាំ២០២៣នេះ ដែលបានជំរុញឱ្យព្រឹត្តិការណ៍ជាប្រវត្តិសាស្រ្ត នៅលើទឹកដីកម្ពុជា ជាលើកដំបូងនេះ បានបញ្ចប់ ប្រកបដោយថាមពល និងទទួលបានជោគជ័យ ដ៏ត្រចះត្រចង់។
ចំណែកលោក សុខ សប្បាយណា ប្រធានគណៈកម្មការអ្នកស្ម័គ្រចិត្តនៃគណៈកម្មាធិការជាតិ CAMSOC បានឱ្យដឹងថា អ្នកស្ម័គ្រចិត្តចំនួន៦ពាន់នាក់ ដែលបានចូលរួមបំពេញការងារ ក្នុងស៊ីហ្គេម លើកទី៣២នេះ បានប្រតិបត្តិការងាររបស់ខ្លួន តាំងពីថ្ងៃទី២៦ ខែមេសាមក ដោយបានបែងចែកកម្លាំង បំពេញការងារ ទាំងនៅរាជធានីភ្នំពេញ និងនៅតាមខេត្តកំពត កែប ព្រះសីហនុ និងខេត្តសៀមរាប ដែលមានរៀបចំការប្រកួតស៊ីហ្គេម។
លោកបានបញ្ជាក់ថា៖ «យើងមានវត្តមាន នៅគ្រប់ទីតាំង ហើយខ្ញុំពិតជាសូមថ្លែងអំណរគុណដល់ប្អូនៗ និងបងៗ ជាអ្នកស្ម័គ្រចិត្តមែនទែន ដោយពួកគាត់ ទទួលបានការកោតសរសើរខ្លាំង។ ទាំងកីឡាករ កីឡាការិនី ប្រតិភូកីឡា ក៏ដូចជាអ្នកសារព័ត៌មានអន្តរជាតិ បានកោតសរសើរពីភាពទន់ភ្លន់ ម៉ឺងម៉ាត់ រួសរាយរាក់ទាក់ និងឆន្ទៈនៃប្រតិបត្តិការការស្ម័គ្រចិត្តរបស់គាត់។ ដូចបងប្រធាន ហ៊ុន ម៉ានី តែងតែលើកឡើងថា ពួកគាត់បានធ្វើលើសពីភារកិច្ច គឺធ្វើចេញពីបេះដូងតែម្តង ដើម្បីបង្ហាញភាសាបេះដូងរបស់កម្ពុជា ទៅកាន់ពិភពលោក»៕
