កីឡាការិនីចំបាប់កម្ពុជា ឌិត សំណាង(ឆ្វេង) ពេលទទួលបានមេដាយប្រាក់នៅប្រទេសសិង្ហបុរីកាលពីថ្ងៃទី១១ មិថុនា ។ រូបថត សហការី
ភ្នំពេញៈកីឡាការិនីជម្រើសជាតិ ឌិត សំណាង បានក្លាយជាអត្តពលិកចំបាប់កម្ពុជាដំបូងគេដែលអាចបង្កើតបានកំណត់ត្រាថ្មីដោយការឈ្នះបានមេដាយប្រាក់ពីការប្រកួតកីឡាចំបាប់ឆ្នេរខ្សាច់ស៊េរីពិភពលោក (Beach Wrestling World Series) ដែលបានធ្វើឡើងនៅប្រទេសសិង្ហបុរីដោយបាននាំយកមេដាយនេះ មកដល់មាតុប្រទេស កាលពីថ្ងៃទី ១២ ខែមិថុនា។
តាមរយៈការប្រកួតចំនួន ២ ថ្ងៃ កាលពីថ្ងៃទី ១០ និងទី ១១ ខែមិថុនា កន្លងទៅ គឺមានតែ ឌិត សំណាង ម្នាក់គត់ ដែលទទួលបានជ័យជម្នះជាបន្តបន្ទាប់ រហូតឈានទៅកាន់ការប្រកួតផ្តាច់ព្រ័ត្រក្នុងប្រភេទទម្ងន់៥០គីឡូក្រាម។ ចំណែកមិត្តរួមជាតិរបស់នាងចំនួន៤នាក់ទៀត រួមមានកីឡាករម្ចាស់មេដាយមាសស៊ីហ្គេម ហេង វុទ្ធី ,ម្ចាស់មេដាយសំរឹទ្ធ ឆាំ ពិស៊ិន កីឡាការិនីមេដាយប្រាក់ស៊ីហ្គេម សឿន នឿន និង ឈឿន ឈាង សុទ្ធតែបានចាញ់ នៅក្នុងការប្រកួត Beach Wrestling World Series ជាលើកដំបូងនេះ។
នៅក្នុងការប្រកួតនេះ ឌិត សំណាង បានទទួលជ័យជម្នះជាប់ៗគ្នានៅក្នុងការប្រកួតវិលជុំសន្សំពិន្ទុប្រចាំពូលC ដោយនាងបានយកឈ្នះកីឡាការិនីកេនយ៉ា Emma Nokosa Wangila រួចបន្តឈ្នះកីឡាការិនីបារាំង Justine Fanny Vigouroux និងឈ្នះកីឡការិនីអេស្ប៉ាញ Cristina Andujar Ojeda ដើម្បីទទួលបានចំណាត់ថ្នាក់លេខ១ប្រចាំពូលCនេះ។
បន្ថែមទៅលើជ័យជម្នះ ក្នុងការប្រកួតជម្រុះតាមពូលទាំង៣លើកនេះ ឌិត សំណាង បានបន្តយកឈ្នះកីឡាការិនីរបស់ចិនXiaomin Xie ដោយពិន្ទុ ៣-២ នៅវគ្គពាក់កណ្តាលផ្តាច់ព្រ័ត្រ។ ប៉ុន្តែការប្រកួតផ្តាច់ព្រ័ត្រ ដែលបានធ្វើឡើងក្នុងថ្ងៃទី១១ ខែមិថុនា ដោយនៅក្នុងពេលនោះ សំណាង បានចាញ់កីឡាការិនីរបស់រូម៉ានី Priceputu ដោយពិន្ទុ ៣-១ និងទទួលបានមេដាយប្រាក់ សម្រាប់ការបង្ហាញខ្លួន ក្នុងព្រឹត្តិការណ៍ Beach Wrestling World Seriesជាលើកដំបូងនេះ។
ជាមួយការឈ្នះបានមេដាយប្រាក់របស់ ឌិត សំណាង នេះ លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា និងជាអ្នកឧបត្ថម្ភទាំងស្រុងសម្រាប់ប្រតិភូកីឡាចំបាប់កម្ពុជាក្នុងបេសកកម្មប្រកួតកម្រិតពិភពលោកនេះ បានថ្លែងថា បើទោះបីជាកីឡាការិនីកម្ពុជា ដណ្តើមបានត្រឹមមេដាយប្រាក់ក៏ដោយ ប៉ុន្តែយើងពិតជាសប្បាយរីករាយណាស់ ព្រោះនេះជាការប្រកួតកម្រិតពិភពលោក ដែលកីឡាការិនី ឌិត សំណាង បានប្រកួតឈ្នះកីឡាការិនីកេនយ៉ា បារាំង អេស្ប៉ាញ និងកីឡាការិនីចិន មុនមកចាញ់កីឡាការិនីរូម៉ានី។
លោក ខេស៊ី បានបញ្ជាក់ថា៖ «ការដណ្តើមបានមេដាយប្រាក់របស់ ឌិត សំណាង គឺជាមោទនភាពជាតិ ព្រោះនេះជាលើកទី១ ដែលក្រុមចំបាប់កម្ពុជា បានចូលរួមការប្រកួតកីឡាចំបាប់ឆ្នេរខ្សាច់ស៊េរីពិភពលោកនេះ ហើយយើងឃើញថា ចំបាប់របស់យើង មានសក្តានុពល ព្រោះជាធម្មតាចំបាប់បុរាណរបស់យើង ក៏ប្រកួតនៅលើខ្សាច់ដែរ អ៊ីចឹងសម្រាប់ការចូលរួមប្រកួតនៅឆ្នាំក្រោយ យើងសង្ឃឹមថា កម្ពុជានឹងជោគជ័យបន្ថែមទៀត»។
ទន្ទឹមនឹងនេះ អនុប្រធានសហព័ន្ធកីឡាចំបាប់កម្ពុជា លោក ខេស៊ី បានពន្យល់ថា ព្រឹត្តិការណ៍ Beach Wrestling World Series នេះ គឺជាការប្រកួតប្រជែងកំណត់ឱ្យដឹងពិន្ទុដើម្បីទទួលបានសិទ្ធិឆ្ពោះទៅចូលរួមប្រកួតជើងឯកពិភពលោក។ ដូច្នេះ ឌិត សំណាង បានទទួលសិទ្ធិចូលរួមប្រកួតជើងឯកពិភពលោក នៅកោះបាលី ប្រទេសឥណ្ឌូនេស៊ី នាខែសីហា ឆ្នាំ២០២៣ ជាមួយនឹងបេក្ខភាពកីឡាការិនី ដូចនៅក្នុងការប្រកួត World Series នៅសិង្ហបុរីនេះដែរ។
បុរសជនជាតិអាមេរិក មានសញ្ជាតិខ្មែរ លោក ខេស៊ី បាណេត បានបញ្ជាក់ថា៖ «ការទទួលបានសិទ្ធិចូលរួមការប្រកួតជើងឯកពិភពលោក របស់ ឌិត សំណាង នៅខែសីហា ខាងមុខនេះ វាជាលើកទី១ ព្រោះកន្លងមកកម្ពុជា មិនធ្លាប់មានកីឡាករ កីឡាការិនីចំបាប់ បានចូលរួមប្រកួតជើងឯកពិភពលោកទេ ហើយ ឌិត សំណាង មានសង្ឃឹមច្រើន ដោយសារគូប្រកួត ដែលគាត់ត្រូវជួប គឺយើងធ្លាប់បានប្រកួតរួចហើយ នៅក្នុងការប្រកួត World Seriesលើកនេះ»។
ចំណែកលោក កាង ដែនពិសិដ្ឋ ជាគ្រូបង្វឹកក្រុមជម្រើសជាតិកីឡាចំបាប់កម្ពុជា បានចាត់ទុក ការឈ្នះបានមេដាយប្រាក់របស់ ឌិត សំណាង ថា ជាការបង្កើតបានកំណត់ត្រាថ្មីមួយទៀត សម្រាប់ក្រុមចំបាប់កម្ពុជា បន្ទាប់ពីពួកគេបានរួមគ្នាបង្កើតប្រវត្តិសាស្ត្រ ឈ្នះបានមេដាយមាស៥ ប្រាក់៤ និងសំរឹទ្ធ១១ ក្នុងការប្រកួតស៊ីហ្គេម លើកទី៣២ ឆ្នាំ២០២៣ នៅលើទឹកដីខ្លួនឯង កាលពីពេលថ្មីៗនេះ។
លោកបានប្រាប់ថា៖ «ក្នុងនាមខ្ញុំជាគ្រូបង្វឹក ដែលដឹកនាំកីឡាករ កីឡាការិនីចំបាប់ចូលរួមប្រកួតកីឡាចំបាប់ឆ្នេរខ្សាច់ស៊េរីពិភពលោកនេះ ពិតជាមានអារម្មណ៍ សប្បាយចិត្តខ្លាំងណាស់ ដែលកីឡាការិនី ឌិត សំណាង ទទួលបានមេដាយប្រាក់ ហើយនេះជាកំណត់ត្រាថ្មីមួយទៀត សម្រាប់ក្រុមចំបាប់កម្ពុជា ហើយសហព័ន្ធកីឡាចំបាប់កម្ពុជា ក៏ត្រៀមបញ្ជូនកីឡាករ កីឡាការិនីទៅហ្វឹកហាត់នៅប្រទេសចិន នាខែសីហា ដើម្បីត្រៀមចូលរួមការប្រកួតអន្តរជាតិផ្សេងៗទៀតផង»។
បើតាមគ្រូបង្វឹកលោក កាង ដែនពិសិដ្ឋ នៅក្នុងឆ្នាំ២០២៣នេះ ក្រុមចំបាប់កម្ពុជា នឹងត្រូវចូលរួមការប្រកួតកីឡាអាស៊ី(Asian Games)នៅប្រទេសចិន ការប្រកួត U23 Asian Championship នៅប្រទេសកៀហ្ស៊ីស៊ីស្ថាន ព្រមទាំងការប្រកួត World Police and Fire Games នៅប្រទេសកាណាដា និងការប្រកួតអន្តរជាតិកម្រិតអាស៊ាននៅប្រទេសថៃ៕
