កម្មវិធីសន្និសីទសារព័ត៌មាន ជើងឯកថ្នាលគុនខ្មែរកាលពីថ្ងៃទី ៤ កក្កដា។ រូបថត Town Sports
ភ្នំពេញៈព្រឹត្តិការណ៍ប្រដាល់ជើងឯកថ្នាលគុនខ្មែរ (Kun Khmer Kids Series) ត្រូវបានបង្កើតឱ្យមានជាផ្លូវការនៅលើសង្វៀនប្រដាល់ថោន ក្រោមកិច្ចសហការជាមួយសហព័ន្ធកីឡាប្រដាល់គុនខ្មែរ ហើយកម្មវិធីដ៏ថ្មីសន្លាងនេះ បានផ្តោតសំខាន់លើការបណ្តុះបណ្តាលថ្នាលអ្នកជំនាន់ក្រោយ ដើម្បីឱ្យក្លាយទៅជាអ្នកបន្តវេនគុនខ្មែរនាថ្ងៃអនាគត ប្រកបដោយសមត្ថភាព និងគុណភាពខ្ពស់។
លោក គឹម ស្រ៊ុនកុសល តំណាង Mas Fight ប្រចាំប្រទេសកម្ពុជា និងជាទីប្រឹក្សារបស់ទូរទស្សន៍ថោន បានអះអាងនៅក្នុងសន្និសីទកាសែតកាលពីថ្ងៃទី៤ ខែកក្កដា ថា ការប្រកួត Kun Khmer Kids Series នេះ ជាការបើកទំព័រសករាជថ្មីមួយទៀតក្នុងការផ្សព្វផ្សាយវិស័យកីឡាប្រដាល់គុនខ្មែរឱ្យកាន់តែទូលំទូលាយ ជាពិសេសពង្រឹងថ្នាក់ថ្នាលជំនាន់ក្រោយ ដែលជាអ្នកបន្តវេនទៅថ្ងៃអនាគត។
បុរសមានឈ្មោះក្រៅ Tommy Kim រូបនេះ បានបញ្ជាក់ថា៖ «ការរៀបចំឱ្យមានព្រឹត្តិការណ៍នេះឡើងដើម្បីជាការលើកទឹកចិត្តដល់ប្អូនៗជំនាន់ក្រោយ ដែលជាអ្នកបន្តវេនឱ្យចូលរួមថែរក្សាក្បាច់គុនបុរាណដ៏មានតម្លៃរបស់ខ្មែរ ហើយតាមរយៈការប្រកួតនេះ ក៏ជាការបណ្តុះធនធានកីឡាករគុនខ្មែរយើងថ្មីមួយទៀត ដើម្បីលើកកម្ពស់ និងផ្សព្វផ្សាយប្រដាល់គុនខ្មែរឱ្យបានទូលំទូលាយនិងល្បីល្បាញនៅលើឆាកអន្តរជាតិ និងពិភពលោកនាពេលខាងមុខ ផងដែរ»។
កីឡាករវ័យក្មេងចំនួន១៦នាក់ ត្រូវបានសម្រិតសម្រាំងចេញមកពីក្លិប-សមាគមផ្សេងៗគ្នាចំនួន១៦នៅទូទាំងប្រទេសកម្ពុជាដើម្បីឱ្យចូលរួមការប្រកួតជម្រុះ «ជើងឯកថ្នាលគុនខ្មែរ» ក្នុងប្រភេទទម្ងន់៤៨គីឡូក្រាមនេះ ដោយអ្នកទាំង១៦នាក់នេះ ត្រូវបានកំណត់ឱ្យចាប់ឆ្នោតនៅក្នុងសន្និសីទកាសែតកាលពីរសៀលម៉ោង២ ថ្ងៃទី៤ ខែកក្កដា គឺមុនការប្រកួតតែ៣ម៉ោងប៉ុណ្ណោះ។
តាមរយៈការប្រកួតជម្រុះចាញ់ធ្លាក់ៗ ត្រឹម៣ទឹក នៅសង្វៀនថោន កាលពីល្ងាចថ្ងៃអង្គារនោះ កីឡាករ ឃន មហិទ្ធិឫទ្ធិ ដែលជាកូនប្រុសរបស់ជើងខ្លាំង ព្រំ សំណាង បានបង្ហាញការប្រកួតយ៉ាងល្អ ហើយរូបគេបានប្រើក្បាច់ជង្គង់ និងវាយកែងផ្តួលអ្នកប្រដាល់ រ៉ៃយ៉ុង នួនមុន្នីរាជ ឱ្យសន្លប់នៅក្នុងទឹកទី៣។ ប៉ុន្តែប្អូនប្រុសរបស់ម្ចាស់មេដាយមាស ឃីម ឌីម៉ា ឈ្មោះ ឃីម ឌីម៉ី បានដួលសង្កត់លើជើងខ្លួនឯងក្នុងពេលកីឡាករ ឯក ប៊ុនថី ចាប់បោក បណ្តាលឱ្យបាក់កជើងឆ្វេងនៅក្នុងទឹកទី១ ដ៏គួរឱ្យអាណិតបំផុត។
ចំណែកកីឡាករ ផានិត វ៉ាន់ហូន បានយកឈ្នះ សី សារ៉ាក់ ដោយពិន្ទុ រីឯ រិទ្ធ ភូបាន បានទាត់ស្តាំចូលកញ្ចឹងក និងថែមដោយកែងស្តាំ បណ្តាលឱ្យ ម៉ាប់ ថុនា សន្លប់នៅក្នុងទឹកទី២ តែកីឡាករ ហ៊ឹម តុងហាន់ បានចាញ់ពិន្ទុ មិត្ត រមលី គឺដូចគ្នាទៅនឹងកីឡាករ ប្រាក់ ស៊ីនា ដែរ ដែលបានចាញ់ពិន្ទុ សៅយ៉ាន់ វិសាស ជាកូនប្រុសរបស់លោកគ្រូ សាន់ សៅយ៉ាន់ ហើយ ឃាង គឹមអាន ក៏បានឈ្នះ សែន ឆៃ ដោយពិន្ទុដែរ ខណៈ អេលីត សំណាង ត្រូវបាន សូដា សុឃឿន ម៉ាត់ពោះបណ្តាលឱ្យសន្លប់នៅទឹកទី៣។
ជាមួយគ្នានេះ លោក ជួប វុត្ថា ពិធីករ និងជាអ្នកផ្គូផ្គងប្រដាល់ប្រចាំនៅសង្វៀនថោន បានប្រាប់ថា បេក្ខភាពទទួលបានជ័យជម្នះទាំង៨នាក់ នៅក្នុងវគ្គជម្រុះចាញ់ធ្លាក់ៗ កាលពីថ្ងៃទី៤ ខែកក្កដា កន្លងមក នឹងត្រូវដាក់ឱ្យប្រកួតដណ្តើមខ្សែក្រវាត់ទម្ងន់៤៨គីឡូក្រាម ដោយពួកគេត្រូវបែងចែកជា២ពូល ហើយការប្រកួតជម្រុះសន្សំពិន្ទុតាមពូលទាំង២នឹងចាប់ផ្តើមពីថ្ងៃទី៣ ខែសីហា តទៅ ដើម្បីរកអ្នកឈ្នះឡើងទៅប្រកួតវគ្គពាក់កណ្តាលផ្តាច់ព្រ័ត្រ និងឈានទៅវគ្គផ្តាច់ព្រ័ត្រ។
ចំណែកលោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានវាយតម្លៃខ្ពស់ទៅដល់ស្ថានីយទូរទស្សន៍ និងដៃគូឧបត្ថម្ភ ដែលបានរួមគ្នារៀបចំឱ្យមានការប្រកួតជើងឯកថ្នាលគុនខ្មែរជាផ្លូវការលើកដំបូងនេះ គឺស្របទៅនឹងផែនការយុទ្ធសាស្ត្ររយៈពេលវែងរបស់សហព័ន្ធក្នុងការបណ្តុះថ្នាក់ថ្នាលជំនាន់ក្រោយ សម្រាប់បន្តវេនប្រដាល់គុនខ្មែររបស់យើង។
លោកតែម ម៉ឺន បានថ្លែងថា៖ «យើងមានចក្ខុវិស័យវែងឆ្ងាយក្នុងការបណ្តុះបណ្តាលថ្នាលជំនាន់ក្រោយ គឺយើងជំរុញដល់ការលើកកម្ពស់សមត្ថភាព និងគុណភាព ដើម្បីឱ្យពួកគេក្លាយជាថ្នាលបន្តវេនគុនខ្មែរជំនួសរៀមច្បងជំនាន់មុនៗដែលចេះតែមានអាយុច្រើនទៅៗ ហើយការប្រកួតនេះ ក៏ដើម្បីផ្សព្វផ្សាយ និងរក្សាទំនៀមទម្លាប់ កេរដំណែល វប្បធម៌ប្រពៃណីនៃសិល្បៈក្បាច់គុនបុរាណខ្មែររបស់យើងឱ្យបានគង់វង្សផងដែរ»៕
