ក្រុមបាល់ទះខេត្ដព្រះសីហនុពេលប្រកួតជាមួយក្រុមវិសាខា កាលពីថ្ងៃទី ៦ សីហា ។ រូបថត Sar Sokha FB
ភ្នំពេញៈ កំណត់ត្រាដ៏ល្អបំផុតរបស់ក្រុមបាល់ទះលេខ ១ ប្រចាំនៅប្រទេសកម្ពុជាវិសាខា ដោយបានឈ្នះគ្រប់ពានរង្វាន់ក្នុងស្រុកផ្តាច់មុខតែឯងក្នុងរយៈពេលជាង ៣ ឆ្នាំនេះ ត្រូវបានបញ្ចប់ត្រឹមការប្រកួតដណ្តើមពានរង្វាន់ឯកឧត្តម ស សុខា (Sar Sokha Challenge Cup) រដូវកាលទី១ ឆ្នាំ ២០២៣ បន្ទាប់ពីក្រុមប្រមូលផ្តុំដោយកីឡាករជម្រើសជាតិមួយនេះ បានចាញ់ក្រុមស្នងការដ្ឋាននគរបាលខេត្តព្រះសីហនុ ដោយលទ្ធផល ៣ សិតទល់នឹង ២ សិត (៣-២) នៅក្នុងការប្រកួតផ្តាច់ព្រ័ត្រ។
តាមរយៈការជួបគ្នាកន្លងមក ក្រុមខេត្តព្រះសីហនុបានចាញ់ក្រុមវិសាខា ស្ទើរគ្រប់ព្រឹត្តិការណ៍ ហើយការប្រកួតពាន Sar Sokha Challenge Cup 2023 នេះ ក៏គេមិនរំពឹងថា ក្រុមខេត្តព្រះសីហនុ បានឡើងរហូតដល់វគ្គផ្តាច់ព្រ័ត្រនោះដែរ ប៉ុន្តែតាមរយៈការប្រកួតជាក់ស្តែង ក្រុមមួយនេះ ពិតជាធ្វើឱ្យគ្រប់គ្នាមានការភ្ញាក់ផ្អើលខ្លាំង ដោយពួកគេបានឈ្នះគ្រប់ការប្រកួត និងបានបន្តយកឈ្នះក្រុមវិសាខា នៅវគ្គផ្តាច់ព្រ័ត្រ ដើម្បីឈ្នះពានយ៉ាងរំភើបបំផុត។
នៅការប្រកួតវគ្គជម្រុះតាមពូល ដែលបានចាប់ដំណើរការពីថ្ងៃទី ១ ដល់ទី ៤ ខែសីហា ទាំងក្រុមវិសាខា និងក្រុមខេត្តព្រះសីហនុ ទទួលបានលេខ ១ រៀងៗខ្លួន ដោយក្នុងនោះ វិសាខា បានយកឈ្នះស្នងការដ្ឋាននគរបាលខេត្តត្បូងឃ្មុំ ក្រុមកងពលធំអន្តរាគមន៍លេខ៣ និងក្រុមក្រុមបញ្ជាការដ្ឋានអង្គរក្ស ៣-០ ដូចគ្នា និងឈ្នះក្រុមរដ្ឋបាលរាជធានីភ្នំពេញ ៣-២ រីឯក្រុមខេត្តព្រះសីហនុ បានយកឈ្នះក្រុមស្នងការដ្ឋាននគរបាលខេត្តបាត់ដំបង និងក្រុមស្នងការដ្ឋាននគរបាលខេត្តកំពងឆ្នាំង ៣-០ ដូចគ្នា និងឈ្នះក្រុមខេត្តតាកែវ ៣-១។
យ៉ាងណាមិញ នៅក្នុងការប្រកួតវគ្គពាក់កណ្តាលផ្តាច់ព្រ័ត្រ កាលពីថ្ងៃទី៥ ខែសីហា ក្រុមលេខ១ពូលA វិសាខា បានទម្លាក់ក្រុមលេខ២ពូលA ខេត្តតាកែវ ដោយការយកឈ្នះ ៣-០ ចំណែកក្រុមខេត្តព្រះសីហនុ ក៏បានយកឈ្នះក្រុមបញ្ជាការដ្ឋានអង្គរក្ស ៣-០ ដូចគ្នា ដើម្បីឡើងទៅជួបគ្នា នៅវគ្គផ្តាច់ព្រ័ត្រ ដែលត្រូវបានធ្វើឡើង នៅក្នុងវិមានពហុកីឡដ្ឋានជាតិ កាលពីយប់ថ្ងៃទី៦ ខែសីហា។
នៅក្នុងការប្រកួតដ៏ស្វិតស្វាញនេះ ក្រុមវិសាខា បានយកឈ្នះក្រុមខេត្តព្រះសីហនុ ជាមួយគ្រាប់បាល់ ២៥-១៦ នៅសិតទី១ ដែលធ្វើឱ្យគ្រប់គ្នាគិតថា វិសាខា នឹងបន្តឈ្នះ២សិតទៀត ដើម្បីលើកពាន ជាមួយឈ្នះ៣សិតដាច់តែម្តង ប៉ុន្តែអ្វីៗបានប្រែប្រួល បន្ទាប់ពីក្រុមខេត្តព្រះសីហនុ បានយកឈ្នះ ២៥-១៩ នៅសិតទី២វិញ។ ទោះយ៉ាងណា នៅសិតទី៣ វិសាខា បានឈ្នះ ២៥-២២ វិញ ប៉ុន្តែ២សិតចុងក្រោយ ក្រុមខេត្តព្រះសីហនុ បានយកឈ្នះ ២៥-២៣ និង ១៥-១១ ដើម្បីលើកពានយ៉ាងរំភើបបំផុត។ រីឯក្រុមបញ្ជាការដ្ឋានអង្គរក្ស បានយកឈ្នះក្រុមខេត្តតាកែវ ៣-០ ដើម្បីទទួលបានលេខ៣។
ការយកឈ្នះក្រុមវិសាខា ៣-២ ដើម្បីលើកពាន Sar Sokha Challenge Cup 2023 របស់ក្រុមខេត្តព្រះសីហនុ បានធ្វើឱ្យគ្រប់គ្នាមានការភ្ញាក់ផ្អើល និងស្ទើរតែមិនជឿ ចំពោះលទ្ធផលនេះ ហើយសូម្បីលោក សោម ចំណាប់ ដែលជាគ្រូបង្វឹក ក៏សឹងតែមិនជឿថា កូនក្រុមរបស់លោកអាចធ្វើបានល្អបែបនេះដែរ។
លោក បានថ្លែងថា៖ «ខ្ញុំពិតជាមានការកោតសរសើរទៅដល់កូនក្រុមរបស់ខ្ញុំ ដែលធ្វើបានល្អមែនទែន ដើម្បីយកឈ្នះលើក្រុមវិសាខា ៣-២ នៅក្នុងវគ្គផ្តាច់ព្រ័ត្រនេះ ហើយការឈ្នះពាននេះ វាជាលទ្ធផលហួសពីការរំពឹងទុករបស់ខ្ញុំ ប៉ុន្តែយើងបានប្រឹងប្រែងហ្វឹកហាត់ខ្លាំងរៀងរាល់ព្រឹក-ល្ងាច ដើម្បីត្រៀមរាល់ការប្រកួត ដែលសហព័ន្ធកីឡាបាល់ទះកម្ពុជា បានរៀបចំ»។
យ៉ាងណាក៏ដោយគ្រូបង្វឹកក្រុមស្នងការដ្ឋាននគរបាលខេត្តព្រះសីហនុ រូបនេះ បានឱ្យដឹងថា លោកបានព្យាយាមសង្កេតមើលពីបច្ចេកទេសលេងរបស់ក្រុមវិសាខា គ្រប់ការប្រកួត ដើម្បីបានដឹងពីចំណុចខ្លាំង និងចំណុចដែលលោកត្រូវរៀបចំក្រុម ដើម្បីបំបែកក្បូនលេងរបស់ វិសាខា សម្រាប់ការជួបគ្នាលើកនេះ។
លោក សោម ចំណាប់ បានបញ្ជាក់ថា៖ «ខ្ញុំបានសង្កេតឃើញថា បច្ចេកទេសលេងរបស់វិសាខា ល្អ ព្រោះការប្រកួតស៊ីហ្គេម កន្លងមកនេះ គាត់ទទួលបានមេដាយប្រាក់។ ការលេងរបស់គាត់លឿន ហើយការវាយរបស់គាត់ខ្ពស់ៗលើរនាំង ដូច្នេះហើយខ្ញុំបានដាក់កីឡាករខ្ពស់ៗរបស់ខ្ញុំ ឱ្យលោតបាំងត្រង់ៗឡើងទៅលើ ហើយបើក១ច្រក និងបិទ១ច្រក ដើម្បីការពារ។ ចំពោះការដេញវាយបាល់លឿន ខ្ញុំបានឱ្យកីឡាកររបស់ខ្ញុំតាមពីមុខឱ្យជាប់ ដោយសល់កីឡាករម្នាក់ សម្រាប់ទុកចាប់ដូចគ្នា អ្នកណាល្អជាង អ្នកហ្នឹងឈ្នះ»។
ចំណែកកីឡាករ ឌឹន ស៊ីដែន បាននិយាយថា៖ «ការឈ្នះពាននេះ មិនមែនជាការចៃដន្យនោះទេ គឺវាបានកើតមានឡើង ដោយការខិតខំប្រឹងប្រែងរបស់ក្រុមស្នងការដ្ឋាននគរបាលខេត្តព្រះសីហនុ ទាំងមូល។ បើទោះបីជាក្រុមរបស់យើង មិនទាន់ល្អ ប៉ុន្តែពួកយើងមានការប្រឹងប្រែងលេងអស់ពីសមត្ថភាព និងលេងដោយការយល់ចិត្តគ្នា ទើបទទួលបានចំណាត់ថ្នាក់លេខ១ នៅពេលនេះ»។
ផ្ទុយពីនេះកីឡាករ ផុល រតនៈ របស់ក្រុមវិសាខា បានសម្តែងការសោកស្តាយខ្លាំង និងបានសូមទោសដល់អ្នកគាំទ្រ ដែលពួកគេមិនអាចដណ្តើមបានពាន ដោយសារចាញ់ក្រុមខេត្តព្រះសីហនុ នៅវគ្គផ្តាច់ព្រ័ត្រនេះ។ «យើងមានការសោកស្តាយមែនទែន ព្រោះយើងបានដាក់ចិត្តមោះមុតហើយថា នឹងយកពានជូនក្លិប និងអ្នកគាំទ្ររបស់យើង ប៉ុន្តែចុងក្រោយយើងបានរងបរាជ័យ»។
ទោះបីជាយ៉ាងណា សមាជិកក្រុមជម្រើសជាតិរូបនេះ បានបន្ថែមថា៖ «ការបរាជ័យមួយនេះ វាបានក្លាយជាបទពិសោធន៍មួយ ដើម្បីឱ្យយើងដឹងនៅក្នុងចិត្តម្នាក់ៗថា យើងមិនខ្លាំងរហូតទេ និងមិនមែនលេខ១រហូតទេ គឺទាល់តែយើងប្រឹងហ្វឹកហាត់ និងបង្កើនសមត្ថភាពរបស់យើង ទើបយើងអាចរក្សាតំណែងលេខ១របស់យើងបាន។ ប្រសិនបើនៅក្នុងចិត្ត យើងដាក់ថា យើងជាក្រុមលេខ១ គឺយើងអាចនឹងខ្សោយជាងគេវិញ នៅថ្ងៃណាមួយ ប៉ុន្តែប្រសិនបើយើងដាក់ខ្លួនថា យើងជាក្រុមលេខ២ គឺវាប្រៀបដូចជាទឹកមិនទាន់ពេញកែវអ៊ីចឹង ដែលយើងត្រូវបំពេញបន្ថែមរហូត»។
សម្រាប់ការប្រកួតពានរង្វាន់ Sar Sokha Challenge Cup 2023នេះ វាបានក្លាយជារបត់ថ្មីបំផុត ដែលសហព័ន្ធកីឡាបាល់ទះកម្ពុជា អនុញ្ញាតឱ្យក្លិបនីមួយៗ ដាក់បញ្ចូលកីឡាករបរទេស ហើយការប្រកួតផ្តាច់ព្រ័ត្ររវាងក្រុមវិសាខា និងក្រុមខេត្តព្រះសីហនុ ដែលសុទ្ធតែមានកីឡាបរទេសចូលរួមនោះ គឺទទួលបានការគាំទ្រខ្លាំងមែនទែន ដោយមានអ្នកគាំទ្រផ្ទាល់ជិត៥ពាន់នាក់ និងអ្នកទស្សនាតាមការផ្សាយផ្ទាល់ជាង៤ម៉ឺននាក់។
លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា បានថ្លែងថា៖ «ចំពោះពានរង្វាន់ឯកឧត្តម ស សុខា រដូវកាលទី១នេះ ជាព្រឹត្តិការណ៍ដ៏អស្ចារ្យ ដែលធ្វើឱ្យមានការភ្ញាក់ផ្អើល ពីសម្ទុះអ្នកគាំទ្រដ៏ច្រើន បន្ទាប់ពីព្រឹត្តិការណ៍ស៊ីហ្គេម បានបញ្ចប់ ហើយវាជាលើកដំបូង ដែលយើងបានអនុញ្ញាតឱ្យក្លិបនីមួយៗដាក់បញ្ចូលកីឡាករបរទេស ដើម្បីជាការរំញោចដល់បណ្តាក្លិបទាំងអស់ឱ្យរៀបចំក្រុមឱ្យបានគ្រប់ជ្រុងជ្រោយសម្រាប់ត្រៀមចូលរួមព្រឹត្តិការណ៍ផ្សេងៗទៀត ដែលសហព័ន្ធ នឹងរៀបចំឱ្យមានឡើងជាបន្តបន្ទាប់ នៅក្នុងឆ្នាំ២០២៣នេះ»៕
