ខ្សែប្រយុទ្ធកាណាដា Marcus Haber ព្យាយាមអូសបាល់រំលងខ្សែការពារក្រុមវិសាខា ក្នុងពេលប្រកួតពីថ្ងៃទី២៤ ខែកញ្ញា។ រូបថត CPL
ភ្នំពេញៈ ខ្សែប្រយុទ្ធរបស់កាណាដា Marcus Haber នៅតែជាវីរបុរសដែលបានជួយឱ្យក្រុមព្រះខ័នរាជស្វាយរៀងទទួលបានជ័យជម្នះនៅចុងម៉ោង ដើម្បីរក្សាកំណត់ត្រាឈ្នះទាំង៦លើកជាប់ៗគ្នានៅក្នុងការប្រកួតលីគកំពូលកម្ពុជា បន្ទាប់ពីក្រុមមានមូលដ្ឋាននៅខេត្តស្វាយរៀង មួយនេះបានបន្តយកឈ្នះលើក្រុមជើងឯករង វិសាខា នៅក្នុងការប្រកួតប្រចាំសប្តាហ៍ទី៦ កាលពីថ្ងៃទី២៤ ខែកញ្ញា។
សម្រាប់ការប្រកួតនៅក្រៅទឹកដីដ៏តានតឹងនៅកីឡដ្ឋានព្រីនស៍កាលពីយប់ថ្ងៃអាទិត្យកន្លងទៅ ក្រុមព្រះខ័នរាជស្វាយរៀងបានបង្កើតសំខាន់ចំនួន២លើកនៅមុខទីក្រុមម្ចាស់ផ្ទះ វិសាខា ប៉ុន្តែខ្សែប្រយុទ្ធ ថេឡរ ឌឿននីកូឡាស ស៊ុតមិនត្រូវគោលដៅ។ ចំណែកការស៊ុតបាល់យ៉ាងកៀកបំផុតរបស់ សារ៉េត គ្រីយ៉ា ត្រូវបានសង្គ្រោះដោយអ្នកចាំទី កែវ សុខសិលា។
យ៉ាងណាក៏ដោយ នៅដើមតង់ទី២ ខ្សែប្រយុទ្ធប្រេស៊ីល De Oliveira Bastos Jonata ក៏គួរណាស់តែរកបានគ្រាប់បាល់បំប៉ោងសំណាញទីឱ្យក្រុមវិសាខាផងដែរ នៅពេលរូបគេបានអូសរំលងខ្សែការពាររបស់ក្រុមស្វាយរៀងយ៉ាងល្អ នៅមុខទីនោះ ប៉ុន្តែម្ចាស់អាវលេខ១៣រូបនេះ បែរជាស៊ុតបាល់នោះ ខុសបង្គោលទី ដែលធ្វើឱ្យក្រុមគ្រូបង្វឹកវិសាខា មានការសោកស្តាយយ៉ាងខ្លាំង។
ទោះបីជាយ៉ាងណា ការបញ្ជូនបាល់ចូលក្នុងតំបន់គ្រោះថ្នាក់យ៉ាងស្អាតរបស់ខ្សែប្រយុទ្ធឡាវBounkong Bounphachan បានផ្តល់ឱកាសមាសឱ្យ Marcus Haber អាចស៊ុតបាល់ដាច់តែម្នាក់ឯង បញ្ចូលទីបានយ៉ាងល្អបំផុត នៅនាទីទី៨២ ហើយតាមរយៈការរកបានគ្រាប់បាល់ជ័យជម្នះដ៏មានន័យនេះ បានធ្វើឱ្យ Marcus ក្លាយជាខ្សែប្រយុទ្ធដែលមានភាពមុតស្រួចជាងគេ និងកំពុងរកបានគ្រាប់បាល់ច្រើនជាងគេ(៨គ្រាប់)ផងដែរ សម្រាប់ការប្រកួតលីគកំពូលកម្ពុជា នារដូវកាលថ្មីនេះ។
សម្រាប់ការប្រកួតចំនួន៦លើកកន្លងមកនេះ ខ្សែប្រយុទ្ធកម្ពស់១,៩២ម៉ែត្រ Marcusអាចរកបានគ្រាប់បាល់គ្រប់ការប្រកួតទាំងអស់ ហើយអ្វីដែលពិសេសនោះ គឺគ្រប់ការប្រកួតធំៗ ដែលក្រុមស្វាយរៀងដណ្តើមបាន៣ពិន្ទុ ដូចជាការយកឈ្នះក្រុមណាហ្គាវើលដ៍១-០ កាលពីថ្ងៃទី២០ សីហា និងការឈ្នះក្រុមម្ចាស់ជើងឯកភ្នំពេញក្រោន ២-១ កាលពីថ្ងៃទី១១ ខែសីហា ជាដើម គឺសុទ្ធតែជាគ្រាប់បាល់ដែលកើតឡើងដោយការលោតតែតបញ្ចូលទីរបស់ Marcus នៅចុងម៉ោង។
ជាមួយគុណភាពបញ្ចប់ទីយ៉ាងល្អនេះ បានធ្វើឱ្យអ្នកគាំទ្រចាត់ទុកម្ចាស់អាវលេខ៩៩Marcus ថា ជាខ្សែប្រយុទ្ធជំនាញប្រើក្បាលល្អផ្តាច់គេប្រចាំនៅលីគកំពូលកម្ពុជា។ ចំណែកការរកបាន១គ្រាប់ ដើម្បីយកឈ្នះក្រុមវិសាខា ១-០ កាលពីថ្ងៃទី២៤ ខែកញ្ញា កន្លងមក បានក្លាយជាជោគជ័យយ៉ាងសំខាន់សម្រាប់ក្រុមព្រះខ័នរាជស្វាយរៀង ក្នុងការបន្តឈរនៅកំពូលតារាងដោយមាន ១៨ពិន្ទុពេញជាមួយការឈ្នះទាំង៦លើកជាប់ៗគ្នា។
គ្រូបង្វឹកសញ្ជាតិអេស្ប៉ាញ លោក Pep Munoz និងអ្នកគាំទ្ររបស់ក្រុមព្រះខ័នរាជស្វាយរៀងបានបង្ហាញការសាទរខ្លាំងចំពោះការដណ្តើមបាន៣ពិន្ទុពីក្រុមម្ចាស់ផ្ទះវិសាខាលើកនេះ ព្រោះលទ្ធផលនេះបានធ្វើឱ្យពួកគេ កាន់តែមានគម្លាតពិន្ទុដាច់ពីក្រុមបឹងកេត កងយោធពលខេមរភូមិន្ទ និងព្រែវែងដែលមាន១០ពិន្ទុស្មើគ្នា ខណៈក្រុមកំពុងឈរនៅលេខ២ ភ្នំពេញក្រោនមាន១២ពិន្ទុ (មិនទាន់គិតពីការប្រកួតជាមួយក្រុម ISI ដង្កោសែនជ័យ នៅយប់ថ្ងៃទី២៥ ខែកញ្ញា)។
ចំណែកក្រុមជើងឯករង វិសាខា បានធ្លាក់មកឈរនៅលេខ៦ ដោយមានត្រឹម៩ពិន្ទុដដែល ហើយការឈ្នះ៣ និងចាញ់៣ប្រកួត សម្រាប់ការប្រកួត៦លើកជាប់ៗគ្នានេះ ក៏បានដាក់សម្ពាធទៅលើគ្រូបង្គោលជនជាតិអង់គ្លេសលោក Mcmenemy Simon Alexander ដែលទើបមកដឹកនាំក្រុមវិសាខា ក្នុងរដូវកាលថ្មីនេះផងដែរ ព្រោះអ្នកគាំទ្រមួយចំនួន បានបង្ហោះសារសុំឱ្យក្លិបមួយនេះ ផ្លាស់ប្តូរគ្រូបង្វឹកជាបណ្តើរៗហើយ។
ស្រដៀងគ្នានេះ ក្រុមណាហ្គាវើលដ៍ក៏នៅមិនទាន់អាចស្រោចស្រង់ស្ថានការណ៍ឱ្យបានប្រសើរមកវិញដែរ ដោយពួកគេមានត្រឹម៥ពិន្ទុ បន្ទាប់ពីណាហ្គាវើលដ៍បានស្មើគ្នា១-១ ជាមួយក្រុមគិរីវង់សុខសែនជ័យ សម្រាប់ការប្រកួតនៅលើទឹកទីខ្លួនឯងកាលពីយប់ថ្ងៃទី២៤ ខែកញ្ញាដែលធ្វើឱ្យការប្រកួតទាំង៦លើករបស់ក្រុមនេះបានត្រឹមឈ្នះ១ស្មើ២ និងចាញ់ដល់៣ប្រកួត៕
