ជា កញ្ញា (ឆ្វេង) ពេលថតជាមួយអ្នកគ្រូ ចូវ សុធារ៉ា។ ហេង ជីវ័ន
ថ្វីបើបានចូលហ្វឹកហាត់កីឡាចំបាប់ ដោយស្ថានភាពគ្រួសារបង្ខំ ប៉ុន្តែកីឡាការិនី ជា កញ្ញា បានក្លាយជាស្រ្តីទី៣ផ្នែកកីឡាចំបាប់កម្ពុជា ដែលបានឈ្នះមេដាយមាស ពីការប្រកួតកីឡាស៊ីហ្គេម បន្ទាប់ពីអតីតកីឡាការិនី ចូវ សុធារ៉ា និងនី សំណាង ដែលបានឈ្នះមេដាយមាសស៊ីហ្គេម ចុងក្រោយឱ្យកម្ពុជា សម្រាប់ការប្រកួត នៅប្រទេសមីយ៉ាន់ម៉ា កាលពីឆ្នាំ២០១៣។
ជាក្មេងស្រីដែលបានធំដឹងក្តី នៅខេត្តក្រចេះ ជា កញ្ញា មិនមានចំណង់ចំណូលចិត្តលើការហ្វឹកហាត់កីឡាអ្វីនោះទេ បើទោះបីជាម្តាយរបស់នាង ធ្លាប់ជាអ្នកហាត់កីឡាចំបាប់ជាមួយអតីតម្ចាស់មេដាយមាស ២ សម័យកាល ចូវ សុធារ៉ា តាំងពីនៅតូចៗក៏ដោយគឺយុវតីរូបនេះ ផ្តោតតែទៅលើការសិក្សាដូចក្មេងៗឯទៀត នៅក្នុងភូមិ។ តែទោះបីជាយ៉ាងណាដោយសារស្ថានភាពគ្រួសារមានការលំបាក មិនអាចផ្តល់លទ្ធភាពឱ្យខ្លួនបន្តការសិក្សាបានទៀត ជា កញ្ញា បានបង្ខំចិត្តឃ្លាតឆ្ងាយពីឪពុកម្តាយ និងប្អូនស្រីរបស់ខ្លួន ដើម្បីធ្វើដំណើរមករស់នៅភ្នំពេញ ជាមួយ ចូវ សុធារ៉ា ហើយដោយសារកញ្ញា មានកាយសម្បទាអំណោយផលល្អស័ក្តិសមជាអ្នកកីឡានោះ សុធារ៉ា បានជំរុញឱ្យយុវតីវ័យក្មេងរូបនេះ ចូលហ្វឹកហាត់កីឡាចំបាប់ នៅឆ្នាំ២០១៦តែម្តង។
ការសម្រេចបញ្ជូន ជា កញ្ញា ឱ្យចូលហាត់កីឡាចំបាប់ នៅសាលដំបូលទូក នៃពហុកីឡដ្ឋានជាតិអូឡាំពិក ដែលជាទីកន្លែងប្រមូលផ្តុំក្រុមជម្រើសជាតិកីឡាចំបាប់កម្ពុជានេះ ក៏ទទួលបានការឯកភាពពីម្តាយរបស់ កញ្ញា ផងដែរ ហើយក្រោមការបង្ហាត់បង្ហាញដោយយកចិត្តទុកដាក់របស់ចូវ សុធារ៉ា នោះ បានធ្វើឱ្យ ជា កញ្ញាអាចអភិវឌ្ឍសមត្ថភាពបានលឿនដើម្បីអាចចូលរួមប្រកួតប្រជែង ក្នុងកម្មវិធីផ្សេងៗ ដែលរៀបចំដោយសហព័ន្ធកីឡាចំបាប់កម្ពុជា។ មិនយូរប៉ុន្មាន ក្មេងស្រី ដែលបានបោះបង់ចោលការសិក្សាត្រឹមថ្នាក់ទី៩ រូបនេះ ត្រូវបានសហព័ន្ធ ជ្រើសរើសឱ្យចូលប្រមូលផ្តុំជាក្រុមថ្នាលជម្រើសជាតិ បន្ទាប់ពីនាងដណ្តើមបានមេដាយសំរឹទ្ធ ពីការប្រកួតជើងឯកថ្នាក់ជាតិ ហើយក្រោមការហ្វឹកហាត់យ៉ាងដិតដល់ ក្នុងជំរំហ្វឹកហាត់នោះ បានជួយឱ្យ ជា កញ្ញា មានសមត្ថភាពកាន់តែល្អ ដែលអាចប្រកួតប្រជែងដណ្តើមបានមេដាយមាស និងប្រាក់ ជាហូរហែពីការប្រកួតថ្នាក់ជាតិ។
លទ្ធផលដ៏ល្អនេះ បានផ្តល់ឱកាសឱ្យ ជា កញ្ញា អាចបានចេញទៅហ្វឹកហាត់ និងប្រកួត នៅលើឆាកអន្តរជាតិ ជាបន្តបន្ទាប់ និងដណ្តើមបានមេដាយប្រាក់ ពីការប្រកួតចំបាប់ជើងឯកអាស៊ានឆ្នាំ២០២២ ដែលកម្ពុជា បានធ្វើជាម្ចាស់ផ្ទះ ជាលើកដំបូង ក្នុងប្រភេទទម្ងន់៦៥គីឡូក្រាម ហើយការចូលរួមការប្រកួតស៊ីហ្គេម លើកទី៣១ ឆ្នាំ២០២៣ នៅប្រទេសវៀតណាម ជា កញ្ញា បានឈ្នះមេដាយសំរឹទ្ធ១។
បន្ថែមលើសមិទ្ធផលនេះ ជា កញ្ញា ត្រូវបានបញ្ជូនឱ្យទៅហ្វឹកហាត់ នៅប្រទេសចិនចំនួន៦ខែពេញ ដើម្បីត្រៀមការប្រកួតស៊ីហ្គេមលើកទី៣២ ឆ្នាំ២០២៣ ដែលកម្ពុជា ត្រូវធ្វើម្ចាស់ផ្ទះ ជាលើកដំបូង ហើយតាមរយៈការលត់ដំហ្វឹកហាត់យ៉ាងលំបាក នៅទីនោះ បានជួយឱ្យ ជា កញ្ញា អាចសម្រេចក្តីបំណង ដោយដណ្តើមបានមេដាយមាស ជូនប្រទេសជាតិដ៏គួរឱ្យភ្ញាក់ផ្អើលហើយវាក៏ជាពេលដែលក្រុមចំបាប់កម្ពុជា បានបំបែកកំណត់ត្រាឈ្នះបានមេដាយមាស៥ប្រាក់៤ និងសំរឹទ្ធ១១ ជាប្រវត្តិសាស្រ្តផងដែរ។
តែទោះបីជាយ៉ាងណាការឈ្នះបានមេដាយមាស ជាលើកដំបូង ពីការប្រកួតស៊ីហ្គេម លើកទី៣២ ឆ្នាំ២០២៣ នៅលើទឹកដីកម្ពុជា កាលពីខែឧសភា ហាក់មិនទាន់ធ្វើឱ្យក្រមុំរូបស្រស់ ស្កប់ចិត្តនោះទេ ព្រោះកីឡាការិនីវ័យ២៣ឆ្នាំរូបនេះ នៅមានគោលបំណងធំ មិនទាន់សម្រេចបាន។ ជា កញ្ញា ប្រាប់ភ្នំពេញប៉ុស្តិ៍ថា៖«តាមរយៈលទ្ធផលប្រកួតកន្លងមកនេះ អាចនិយាយបានថា ខ្ញុំទទួលបានជោគជ័យហើយ សម្រាប់ការប្រកួតស៊ីហ្គេម ប៉ុន្តែខ្ញុំចង់ឱ្យសមត្ថភាពរបស់ខ្ញុំខ្ពស់ជាងនេះ ព្រោះខ្ញុំនៅមានបំណង ចង់ឈានទៅប្រកួតប្រជែងកម្រិតខ្ពស់ជាងនេះដូចជាព្រឹត្តិការណ៍ពិភពលោក ជាដើមហេតុនេះខ្ញុំត្រូវបន្តពង្រឹងសមត្ថភាពខ្លួនឯង ដើម្បីអាចឈានទៅដល់ចំណុច ដែលខ្លួនឯងចង់បាន»។
យ៉ាងណាមិញ នៅពេលនេះ កីឡាការិនី ជា កញ្ញា បាននិងកំពុងធ្វើការហ្វឹកហាត់ នៅប្រទេសចិន ជាលើកទី២ បន្ទាប់ពីនាងបានចាកចេញពីមាតុប្រទេសជាមួយអ្នកគ្រូ ចូវ សុធារ៉ា និងប្រតិភូកីឡាផ្សេងទៀត កាលពីថ្ងៃទី២៣ ខែសីហា ដើម្បីត្រៀមចូលរួមការប្រកួតកីឡាអាស៊ី លើកទី១៩ នៅទីនោះ ដោយប្រភេទកីឡាចំបាប់ នឹងចាប់ប្រកួតពីថ្ងៃទី៥ ដល់ថ្ងៃទី៧ ខែតុលា ឆ្នាំ២០២៣។ និយាយដល់ការហ្វឹកហាត់ នៅប្រទេសចិននេះ ជា កញ្ញា បានទម្លាយថា មានការហ្វឹកហាត់ខ្លាំង ទៅតាមកាលវិភាគ ដែលគ្រូបានដាក់ឱ្យ ហើយមានដៃគូប្រកួតសមច្រើន ធ្វើឱ្យមានការកើនផ្នែកកម្លាំង និងបច្ចេកទេស ពិសេសធ្វើឱ្យរូបនាងផ្ទាល់ មានភាពធន់ខ្លាំង ព្រោះក្រៅពីការហ្វឹកហាត់ និងប្រកួតសម ក៏មានការប្រឡងធ្វើតេស្តសមត្ថភាពជាប្រចាំផងដែរ ដើម្បីបានដឹងពីការវិវឌ្ឍរបស់អត្តពលិកម្នាក់ៗ។
ជា កញ្ញាបញ្ជាក់ថា៖ «សម្រាប់ការហ្វឹកហាត់ នៅក្នុងស្រុក គឺពេលយើងឈឺបន្តិច យើងអាចសម្រាកបាន ប៉ុន្តែចំពោះការហាត់នៅចិន ពេលយើងឈឺដៃ គ្រូឱ្យហាត់ជើង ពេលឈឺជើង ឱ្យហាត់ដៃ។ អ៊ីចឹងវាធ្វើឱ្យសមត្ថភាពរបស់យើង ចេះតែមានការកើនឡើងជាបន្តបន្ទាប់ ហើយការហ្វឹកហាត់នៅចិន គេយកចិត្តទុកដាក់ និងមើលថែយើងដិតដល់ណាស់ អ៊ីចឹងទោះបីជាការហាត់ មានការលំបាកក៏យើងមានភាពកក់ក្តៅដែរ»។
សម្រាប់ការធ្វើដំណើរទៅហ្វឹកហាត់ នៅប្រទេសចិនជាលើកទី២ ដើម្បីត្រៀមការប្រកួតកីឡាអាស៊ី លើកទី១៩នេះ ជា កញ្ញា ចង់ពង្រឹងសមត្ថភាពខ្លួនឯងឱ្យបានខ្លាំងថែមទៀត។ បើទោះបីជានាង មិនរំពឹងខ្ពស់ ក្នុងការដណ្តើមបានលទ្ធផលល្អ ក្នុងការប្រកួតកីឡាអាស៊ីនេះ ប៉ុន្តែកញ្ញា ជឿជាក់ថា ការហ្វឹកហាត់ខ្លាំងនៅចិននឹងអាចជួយនាងឱ្យកើនកម្រិតបច្ចេកទេសថែមទៀត ដើម្បីសម្រួចទៅរកការឈ្នះបានមេដាយមាសស៊ីហ្គេមម្តងទៀត ក៏ដូចជាអាចទទួលបានឱកាសប្រកួតកម្រិតពិភពលោកនៅពេលណាមួយ។
ជា កញ្ញាបន្ថែមថា៖ «ការប្រឹងប្រែងហ្វឹកហាត់រយៈពេល៦ខែ នៅប្រទេសចិនកន្លងមកនេះ បានធ្វើឱ្យខ្ញុំសម្រេចគោលដៅទី១ហើយគឺឈ្នះបានមេដាយមាសស៊ីហ្គេម។ ប៉ុន្តែខ្ញុំត្រូវពង្រឹងសមត្ថភាពខ្លួនឯងឱ្យកើនឡើងថែមទៀត ព្រោះទិសដៅសំខាន់១ទៀតរបស់ខ្ញុំ គឺបន្តឈានទៅប្រកួតស៊ីហ្គេម ឆ្នាំ២០២៥ ដោយខ្ញុំចង់ឈ្នះបានមេដាយមាស ម្តងទៀត ហើយខ្ញុំជឿថា ការខិតខំហ្វឹកហាត់ ដោយមិនបោះបង់របស់ខ្ញុំ នឹងអាចជួយឱ្យខ្ញុំ ឈានទៅសម្រេចគោលដៅ»។
ដោយឡែក ចំពោះអតីតម្ចាស់មេដាយមាសស៊ីហ្គេម ឆ្នាំ២០០៩ និងឆ្នាំ២០១៣ ចូវ សុធារ៉ា ដែលជាគ្រូបង្វឹកផ្ទាល់ និងជាអាណាព្យាបាលរបស់ជា កញ្ញា ផងនោះ បានបង្ហាញឆន្ទៈក្នុងការជំរុញឱ្យ កញ្ញា ឈានទៅបង្កើតបានលទ្ធផលដ៏ល្អមួយ ក្នុងការប្រកួតកីឡាអាស៊ីលើកទី១៩ នៅប្រទេសចិន មុនគិតទៅដល់ការប្រកួតកីឡាស៊ីហ្គេម លើកទី៣៣ ឆ្នាំ២០២៥ នៅប្រទេសថៃ។
ចូវ សុធារ៉ា និយាយថា៖ «ជា កញ្ញា អាចធ្វើបានហើយ សម្រាប់ការឈ្នះមេដាយមាស នៅស៊ីហ្គេម ប៉ុន្តែអ្វីដែលសំខាន់ ខ្ញុំចង់ឱ្យគាត់ឈានទៅដល់ការប្រកួតកីឡាអាស៊ី។ បើទោះបីជាយើង មិនបានលទ្ធផលល្អ គឺយ៉ាងហោចណាស់ក៏បានចូលដល់ជុំផ្តាច់ព្រ័ត្រដែរគឺខ្ញុំសង្ឃឹមថា គាត់អាចធ្វើបានហើយខ្ញុំនឹង ជំរុញគាត់បន្ថែមទៀត»។ អតីតកីឡាការិនីជម្រើសជាតិចំបាប់ ដែលធ្លាប់បានចូលរួមប្រកួតកីឡាអាស៊ី ឆ្នាំ២០០៦នៅកាតា ឆ្នាំ២០១០ នៅចិន និងកីឡាអាស៊ី ឆ្នាំ២០១៤ នៅកូរ៉េខាងត្បូង ចូវ សុធារ៉ាបន្ថែមថា៖«ខ្ញុំធ្លាប់ដណ្តើមបានត្រឹមលេខ៥ កាលប្រកួតកីឡាអាស៊ីឆ្នាំ២០១០ ប៉ុន្តែខ្ញុំចង់ឱ្យកូនសិស្សរបស់ខ្ញុំ ឈានដល់ដណ្តើមបានមេដាយតែម្តងគឺបានត្រឹមមេដាយសំរឹទ្ធក៏អស់ចិត្តដែរហើយ ខ្ញុំមានសង្ឃឹមខ្លាំង»៕
